৪. পৰিসাসুত্তং

৯৬. ‘‘তিস্সো ইমা, ভিক্খৱে, পৰিসা. কতমা তিস্সো? অগ্গৱতী পৰিসা, ৱগ্গা পৰিসা, সমগ্গা পৰিসা.

‘‘কতমা চ, ভিক্খৱে, অগ্গৱতী পৰিসা? ইধ, ভিক্খৱে, যস্সং পৰিসাযং থেৰা ভিক্খূ ন বাহুলিকা হোন্তি ন সাথলিকা, ওক্কমনে নিক্খিত্তধুৰা পৱিৱেকে পুব্বঙ্গমা, ৱীৰিযং আৰভন্তি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিৰিযায, তেসং পচ্ছিমা জনতা দিট্ঠানুগতিং আপজ্জতি. সাপি হোতি ন বাহুলিকা ন সাথলিকা ওক্কমনে নিক্খিত্তধুৰা পৱিৱেকে পুব্বঙ্গমা, ৱীৰিযং আৰভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিৰিযায. অযং ৱুচ্চতি, ভিক্খৱে, অগ্গৱতী পৰিসা.

‘‘কতমা চ, ভিক্খৱে, ৱগ্গা পৰিসা? ইধ, ভিক্খৱে, যস্সং পৰিসাযং ভিক্খূ ভণ্ডনজাতা কলহজাতা ৱিৱাদাপন্না অঞ্ঞমঞ্ঞং মুখসত্তীহি ৱিতুদন্তা ৱিহৰন্তি, অযং ৱুচ্চতি, ভিক্খৱে, ৱগ্গা পৰিসা.

‘‘কতমা চ, ভিক্খৱে, সমগ্গা পৰিসা? ইধ, ভিক্খৱে, যস্সং পৰিসাযং ভিক্খূ সমগ্গা সম্মোদমানা অৱিৱদমানা খীৰোদকীভূতা অঞ্ঞমঞ্ঞং পিযচক্খূহি সম্পস্সন্তা ৱিহৰন্তি, অযং ৱুচ্চতি, ভিক্খৱে, সমগ্গা পৰিসা.

‘‘যস্মিং, ভিক্খৱে, সমযে ভিক্খূ সমগ্গা সম্মোদমানা অৱিৱদমানা খীৰোদকীভূতা অঞ্ঞমঞ্ঞং পিযচক্খূহি সম্পস্সন্তা ৱিহৰন্তি, বহুং, ভিক্খৱে, ভিক্খূ তস্মিং সমযে পুঞ্ঞং পসৱন্তি. ব্ৰহ্মং, ভিক্খৱে, ৱিহাৰং তস্মিং সমযে ভিক্খূ ৱিহৰন্তি, যদিদং মুদিতায চেতোৱিমুত্তিযা. পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৱেদিযতি, সুখিনো চিত্তং সমাধিযতি.

‘‘সেয্যথাপি, ভিক্খৱে, উপৰিপব্বতে থুল্লফুসিতকে দেৱে ৱস্সন্তে তং উদকং যথানিন্নং পৱত্তমানং পব্বতকন্দৰপদৰসাখা পৰিপূৰেতি, পব্বতকন্দৰপদৰসাখা পৰিপূৰা কুসোব্ভে [কুস্সুম্ভে (সী. পী.), কুসুম্ভে (স্যা. কং. ক.)] পৰিপূৰেন্তি, কুসোব্ভা পৰিপূৰা মহাসোব্ভে পৰিপূৰেন্তি, মহাসোব্ভা পৰিপূৰা কুন্নদিযো পৰিপূৰেন্তি, কুন্নদিযো পৰিপূৰা মহানদিযো পৰিপূৰেন্তি, মহানদিযো পৰিপূৰা সমুদ্দং [সমুদ্দসাগৰে (ক.)] পৰিপূৰেন্তি.

‘‘এৱমেৱং খো, ভিক্খৱে, যস্মিং সমযে ভিক্খূ সমগ্গা সম্মোদমানা অৱিৱদমানা খীৰোদকীভূতা অঞ্ঞমঞ্ঞং পিযচক্খূহি সম্পস্সন্তা ৱিহৰন্তি, বহুং, ভিক্খৱে, ভিক্খূ তস্মিং সমযে পুঞ্ঞং পসৱন্তি. ব্ৰহ্মং, ভিক্খৱে, ৱিহাৰং তস্মিং সমযে ভিক্খূ ৱিহৰন্তি, যদিদং মুদিতায চেতোৱিমুত্তিযা. পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৱেদিযতি, সুখিনো চিত্তং সমাধিযতি. ইমা খো, ভিক্খৱে, তিস্সো পৰিসা’’তি. চতুত্থং.