২. পৱিৱেকসুত্তং

৯৪. ‘‘তীণিমানি, ভিক্খৱে, অঞ্ঞতিত্থিযা পৰিব্বাজকা পৱিৱেকানি পঞ্ঞাপেন্তি. কতমানি তীণি? চীৱৰপৱিৱেকং, পিণ্ডপাতপৱিৱেকং, সেনাসনপৱিৱেকং.

‘‘তত্ৰিদং, ভিক্খৱে, অঞ্ঞতিত্থিযা পৰিব্বাজকা চীৱৰপৱিৱেকস্মিং পঞ্ঞাপেন্তি, সাণানিপি ধাৰেন্তি, মসাণানিপি ধাৰেন্তি, ছৱদুস্সানিপি ধাৰেন্তি, পংসুকূলানিপি ধাৰেন্তি, তিৰীটানিপি ধাৰেন্তি, অজিনম্পি ধাৰেন্তি, অজিনক্খিপম্পি ধাৰেন্তি, কুসচীৰম্পি ধাৰেন্তি, ৱাকচীৰম্পি ধাৰেন্তি, ফলকচীৰম্পি ধাৰেন্তি, কেসকম্বলম্পি ধাৰেন্তি, ৱালকম্বলম্পি ধাৰেন্তি, উলূকপক্খিকম্পি ধাৰেন্তি. ইদং খো, ভিক্খৱে, অঞ্ঞতিত্থিযা পৰিব্বাজকা চীৱৰপৱিৱেকস্মিং পঞ্ঞাপেন্তি.

‘‘তত্ৰিদং, ভিক্খৱে, অঞ্ঞতিত্থিযা পৰিব্বাজকা পিণ্ডপাতপৱিৱেকস্মিং পঞ্ঞাপেন্তি. সাকভক্খাপি হোন্তি, সামাকভক্খাপি হোন্তি, নীৱাৰভক্খাপি হোন্তি, দদ্দুলভক্খাপি হোন্তি, হটভক্খাপি হোন্তি, কণভক্খাপি হোন্তি, আচামভক্খাপি হোন্তি, পিঞ্ঞাকভক্খাপি হোন্তি, তিণভক্খাপি হোন্তি, গোমযভক্খাপি হোন্তি, ৱনমূলফলাহাৰা যাপেন্তি পৱত্তফলভোজী. ইদং খো, ভিক্খৱে, অঞ্ঞতিত্থিযা পৰিব্বাজকা পিণ্ডপাতপৱিৱেকস্মিং পঞ্ঞাপেন্তি.

‘‘তত্ৰিদং, ভিক্খৱে, অঞ্ঞতিত্থিযা পৰিব্বাজকা সেনাসনপৱিৱেকস্মিং পঞ্ঞাপেন্তি অৰঞ্ঞং ৰুক্খমূলং সুসানং [ৰুক্খমূলং ভুসাগাৰং সুসানং (ক.)] ৱনপত্থং অব্ভোকাসং পলালপুঞ্জং ভুসাগাৰং [সুঞ্ঞাগাৰং (ক.)]. ইদং খো, ভিক্খৱে, অঞ্ঞতিত্থিযা পৰিব্বাজকা সেনাসনপৱিৱেকস্মিং পঞ্ঞাপেন্তি. ইমানি খো, ভিক্খৱে, তীণি অঞ্ঞতিত্থিযা পৰিব্বাজকা পৱিৱেকানি পঞ্ঞাপেন্তি.

‘‘তীণি খো পনিমানি, ভিক্খৱে, ইমস্মিং ধম্মৱিনযে ভিক্খুনো পৱিৱেকানি. কতমানি তীণি? ইধ, ভিক্খৱে, ভিক্খু সীলৱা চ হোতি, দুস্সীল্যঞ্চস্স পহীনং হোতি, তেন চ ৱিৱিত্তো হোতি; সম্মাদিট্ঠিকো চ হোতি, মিচ্ছাদিট্ঠি চস্স পহীনা হোতি, তায চ ৱিৱিত্তো হোতি; খীণাসৱো চ হোতি, আসৱা চস্স পহীনা হোন্তি, তেহি চ ৱিৱিত্তো হোতি. যতো খো, ভিক্খৱে, ভিক্খু সীলৱা হোতি, দুস্সীল্যঞ্চস্স পহীনং হোতি, তেন চ ৱিৱিত্তো হোতি; সম্মাদিট্ঠিকো চ হোতি, মিচ্ছাদিট্ঠি চস্স পহীনা হোতি, তায চ ৱিৱিত্তো হোতি; খীণাসৱো চ হোতি, আসৱা চস্স পহীনা হোন্তি, তেহি চ ৱিৱিত্তো হোতি. অযং ৱুচ্চতি, ভিক্খৱে, ‘ভিক্খু অগ্গপ্পত্তো সাৰপ্পত্তো সুদ্ধো সাৰে পতিট্ঠিতো’’’.

‘‘সেয্যথাপি, ভিক্খৱে, কস্সকস্স গহপতিস্স সম্পন্নং সালিক্খেত্তং. তমেনং কস্সকো গহপতি সীঘং সীঘং [সীঘসীঘং (সী. স্যা. কং. পী.)] লৱাপেয্য. সীঘং সীঘং লৱাপেত্ৱা সীঘং সীঘং সঙ্ঘৰাপেয্য. সীঘং সীঘং সঙ্ঘৰাপেত্ৱা সীঘং সীঘং উব্বহাপেয্য [উব্বাহাপেয্য (স্যা. কং.)]. সীঘং সীঘং উব্বহাপেত্ৱা সীঘং সীঘং পুঞ্জং কাৰাপেয্য. সীঘং সীঘং পুঞ্জং কাৰাপেত্ৱা সীঘং সীঘং মদ্দাপেয্য. সীঘং সীঘং মদ্দাপেত্ৱা সীঘং সীঘং পলালানি উদ্ধৰাপেয্য. সীঘং সীঘং পলালানি উদ্ধৰাপেত্ৱা সীঘং সীঘং ভুসিকং উদ্ধৰাপেয্য. সীঘং সীঘং ভুসিকং উদ্ধৰাপেত্ৱা সীঘং সীঘং ওপুনাপেয্য. সীঘং সীঘং ওপুনাপেত্ৱা সীঘং সীঘং অতিহৰাপেয্য. সীঘং সীঘং অতিহৰাপেত্ৱা সীঘং সীঘং কোট্টাপেয্য. সীঘং সীঘং কোট্টাপেত্ৱা সীঘং সীঘং থুসানি উদ্ধৰাপেয্য. এৱমস্সু [এৱস্সু (ক.)] তানি, ভিক্খৱে, কস্সকস্স গহপতিস্স ধঞ্ঞানি অগ্গপ্পত্তানি সাৰপ্পত্তানি সুদ্ধানি সাৰে পতিট্ঠিতানি.

‘‘এৱমেৱং খো, ভিক্খৱে, যতো ভিক্খু সীলৱা চ হোতি, দুস্সীল্যঞ্চস্স পহীনং হোতি, তেন চ ৱিৱিত্তো হোতি; সম্মাদিট্ঠিকো চ হোতি, মিচ্ছাদিট্ঠি চস্স পহীনা হোতি, তায চ ৱিৱিত্তো হোতি; খীণাসৱো চ হোতি, আসৱা চস্স পহীনা হোন্তি, তেহি চ ৱিৱিত্তো হোতি. অযং ৱুচ্চতি, ভিক্খৱে, ‘ভিক্খু অগ্গপ্পত্তো সাৰপ্পত্তো সুদ্ধো সাৰে পতিট্ঠিতো’’’তি. দুতিযং.