১. অচ্চাযিকসুত্তং

৯৩. ‘‘তীণিমানি, ভিক্খৱে, কস্সকস্স গহপতিস্স অচ্চাযিকানি কৰণীযানি. কতমানি তীণি? ইধ, ভিক্খৱে, কস্সকো গহপতি সীঘং সীঘং খেত্তং সুকট্ঠং কৰোতি সুমতিকতং. সীঘং সীঘং খেত্তং সুকট্ঠং কৰিত্ৱা সুমতিকতং সীঘং সীঘং বীজানি পতিট্ঠাপেতি. সীঘং সীঘং বীজানি পতিট্ঠাপেত্ৱা সীঘং সীঘং উদকং অভিনেতিপি অপনেতিপি. ইমানি খো, ভিক্খৱে, তীণি কস্সকস্স গহপতিস্স অচ্চাযিকানি কৰণীযানি. তস্স খো তং, ভিক্খৱে, কস্সকস্স গহপতিস্স নত্থি সা ইদ্ধি ৱা আনুভাৱো ৱা – ‘অজ্জেৱ মে ধঞ্ঞানি জাযন্তু, স্ৱেৱ গব্ভীনি হোন্তু, উত্তৰস্ৱেৱ পচ্চন্তূ’তি. অথ খো, ভিক্খৱে, হোতি সো সমযো যং তস্স কস্সকস্স গহপতিস্স তানি ধঞ্ঞানি উতুপৰিণামীনি জাযন্তিপি গব্ভীনিপি হোন্তি পচ্চন্তিপি.

‘‘এৱমেৱং খো, ভিক্খৱে, তীণিমানি ভিক্খুস্স অচ্চাযিকানি কৰণীযানি. কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদানং – ইমানি খো, ভিক্খৱে, তীণি ভিক্খুস্স অচ্চাযিকানি কৰণীযানি. তস্স খো তং, ভিক্খৱে, ভিক্খুনো নত্থি সা ইদ্ধি ৱা অনুভাৱো ৱা – ‘অজ্জেৱ মে অনুপাদায আসৱেহি চিত্তং ৱিমুচ্চতু স্ৱে ৱা উত্তৰস্ৱে ৱা’তি. অথ খো, ভিক্খৱে, হোতি সো সমযো যং তস্স ভিক্খুনো অধিসীলম্পি সিক্খতো অধিচিত্তম্পি সিক্খতো অধিপঞ্ঞম্পি সিক্খতো অনুপাদায আসৱেহি চিত্তং ৱিমুচ্চতি.

‘‘তস্মাতিহ, ভিক্খৱে, এৱং সিক্খিতব্বং – ‘তিব্বো নো ছন্দো ভৱিস্সতি অধিসীলসিক্খাসমাদানে, তিব্বো ছন্দো ভৱিস্সতি অধিচিত্তসিক্খাসমাদানে, তিব্বো ছন্দো ভৱিস্সতি অধিপঞ্ঞাসিক্খাসমাদানে’তি. এৱঞ্হি ৱো, ভিক্খৱে, সিক্খিতব্ব’’ন্তি. পঠমং.