২. গদ্ৰভসুত্তং

৮৩. ‘‘সেয্যথাপি, ভিক্খৱে, গদ্ৰভো গোগণং পিট্ঠিতো পিট্ঠিতো অনুবন্ধো হোতি – ‘অহম্পি দম্মো, অহম্পি দম্মো’তি [অহম্পি গো অম্হা অহম্পি গো অম্হাতি (সী.), অহম্পি অম্হা অহম্পি অম্হাতি (স্যা. কং. পী.), অহম্পি গো অহম্পি গোতি (?)]. তস্স ন তাদিসো ৱণ্ণো হোতি সেয্যথাপি গুন্নং, ন তাদিসো সৰো হোতি সেয্যথাপি গুন্নং, ন তাদিসং পদং হোতি সেয্যথাপি গুন্নং. সো গোগণংযেৱ পিট্ঠিতো পিট্ঠিতো অনুবন্ধো হোতি – ‘অহম্পি দম্মো, অহম্পি দম্মো’’’তি.

‘‘এৱমেৱং খো, ভিক্খৱে, ইধেকচ্চো ভিক্খু ভিক্খুসঙ্ঘং পিট্ঠিতো পিট্ঠিতো অনুবন্ধো হোতি – ‘অহম্পি ভিক্খু, অহম্পি ভিক্খূ’তি. তস্স ন তাদিসো ছন্দো হোতি অধিসীলসিক্খাসমাদানে সেয্যথাপি অঞ্ঞেসং ভিক্খূনং, ন তাদিসো ছন্দো হোতি অধিচিত্তসিক্খাসমাদানে সেয্যথাপি অঞ্ঞেসং ভিক্খূনং, ন তাদিসো ছন্দো হোতি অধিপঞ্ঞাসিক্খাসমাদানে সেয্যথাপি অঞ্ঞেসং ভিক্খূনং. সো ভিক্খুসঙ্ঘংযেৱ পিট্ঠিতো পিট্ঠিতো অনুবন্ধো হোতি – ‘অহম্পি ভিক্খু, অহম্পি ভিক্খূ’’’তি.

‘‘তস্মাতিহ, ভিক্খৱে, এৱং সিক্খিতব্বং – ‘তিব্বো নো ছন্দো ভৱিস্সতি অধিসীলসিক্খাসমাদানে, তিব্বো নো ছন্দো ভৱিস্সতি অধিচিত্তসিক্খাসমাদানে, তিব্বো নো ছন্দো ভৱিস্সতি অধিপঞ্ঞাসিক্খাসমাদানে’তি. এৱঞ্হি ৱো, ভিক্খৱে, সিক্খিতব্ব’’ন্তি. দুতিযং.