৩. খেত্তসুত্তং

৮৪. ‘‘তীণিমানি, ভিক্খৱে, কস্সকস্স গহপতিস্স পুব্বে কৰণীযানি. কতমানি তীণি? ইধ, ভিক্খৱে, কস্সকো গহপতি পটিকচ্চেৱ [পটিগচ্চেৱ (সী. পী.)] খেত্তং সুকট্ঠং কৰোতি সুমতিকতং [সুমত্তিকতং (ক.), এত্থ মতিসদ্দো কট্ঠখেত্তস্স সমীকৰণসাধনে দাৰুভণ্ডে ৱত্ততীতি সক্কতঅভিধানেসু আগতং. তং ‘‘মতিযা সুট্ঠু সমীকত’’ন্তি অট্ঠকথায সমেতি]. পটিকচ্চেৱ খেত্তং সুকট্ঠং কৰিত্ৱা সুমতিকতং কালেন বীজানি পতিট্ঠাপেতি. কালেন বীজানি পতিট্ঠাপেত্ৱা সমযেন উদকং অভিনেতিপি অপনেতিপি. ইমানি খো, ভিক্খৱে, তীণি কস্সকস্স গহপতিস্স পুব্বে কৰণীযানি.

‘‘এৱমেৱং খো, ভিক্খৱে, তীণিমানি ভিক্খুস্স পুব্বে কৰণীযানি. কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদানং – ইমানি খো, ভিক্খৱে, তীণি ভিক্খুস্স পুব্বে কৰণীযানি.

‘‘তস্মাতিহ, ভিক্খৱে, এৱং সিক্খিতব্বং – ‘তিব্বো নো ছন্দো ভৱিস্সতি অধিসীলসিক্খাসমাদানে, তিব্বো নো ছন্দো ভৱিস্সতি অধিচিত্তসিক্খাসমাদানে, তিব্বো নো ছন্দো ভৱিস্সতি অধিপঞ্ঞাসিক্খাসমাদানে’তি. এৱঞ্হি ৱো, ভিক্খৱে, সিক্খিতব্ব’’ন্তি. ততিযং.