১. সমণসুত্তং

৮২. ‘‘তীণিমানি, ভিক্খৱে, সমণস্স সমণিযানি সমণকৰণীযানি. কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদানং – ইমানি খো, ভিক্খৱে, তীণি সমণস্স সমণিযানি সমণকৰণীযানি.

‘‘তস্মাতিহ, ভিক্খৱে, এৱং সিক্খিতব্বং – ‘তিব্বো নো ছন্দো ভৱিস্সতি অধিসীলসিক্খাসমাদানে, তিব্বো নো ছন্দো ভৱিস্সতি অধিচিত্তসিক্খাসমাদানে, তিব্বো নো ছন্দো ভৱিস্সতি অধিপঞ্ঞাসিক্খাসমাদানে’তি. এৱঞ্হি ৱো, ভিক্খৱে, সিক্খিতব্ব’’ন্তি. পঠমং.