৪. অজিতসুত্তং

১১৬. অথ খো অজিতো পৰিব্বাজকো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো অজিতো পৰিব্বাজকো ভগৱন্তং এতদৱোচ –

‘‘অম্হাকং, ভো গোতম, পণ্ডিতো নাম সব্ৰহ্মচাৰী. তেন পঞ্চমত্তানি চিত্তট্ঠানসতানি চিন্তিতানি, যেহি অঞ্ঞতিত্থিযা উপাৰদ্ধাৱ জানন্তি [উপাৰদ্ধা পজানন্তি (সী.)] উপাৰদ্ধস্মা’’তি [উপাৰদ্ধম্হাতি (সী. পী.)].

অথ খো ভগৱা ভিক্খূ আমন্তেসি – ‘‘ধাৰেথ নো তুম্হে, ভিক্খৱে, পণ্ডিতৱত্থূনী’’তি? ‘‘এতস্স, ভগৱা, কালো এতস্স, সুগত, কালো যং ভগৱা ভাসেয্য, ভগৱতো সুত্ৱা ভিক্খূ ধাৰেস্সন্তী’’তি.

‘‘তেন হি, ভিক্খৱে, সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ইধ, ভিক্খৱে, একচ্চো অধম্মিকেন ৱাদেন অধম্মিকং ৱাদং অভিনিগ্গণ্হাতি অভিনিপ্পীড়েতি, তেন চ অধম্মিকং পৰিসং ৰঞ্জেতি. তেন সা অধম্মিকা পৰিসা উচ্চাসদ্দমহাসদ্দা হোতি – ‘পণ্ডিতো ৱত, ভো, পণ্ডিতো ৱত, ভো’তি.

‘‘ইধ পন, ভিক্খৱে, একচ্চো অধম্মিকেন ৱাদেন ধম্মিকং ৱাদং অভিনিগ্গণ্হাতি অভিনিপ্পীড়েতি, তেন চ অধম্মিকং পৰিসং ৰঞ্জেতি. তেন সা অধম্মিকা পৰিসা উচ্চাসদ্দমহাসদ্দা হোতি – ‘পণ্ডিতো ৱত, ভো, পণ্ডিতো ৱত, ভো’তি.

‘‘ইধ পন, ভিক্খৱে, একচ্চো অধম্মিকেন ৱাদেন ধম্মিকঞ্চ ৱাদং অধম্মিকঞ্চ ৱাদং অভিনিগ্গণ্হাতি অভিনিপ্পীড়েতি, তেন চ অধম্মিকং পৰিসং ৰঞ্জেতি. তেন সা অধম্মিকা পৰিসা উচ্চাসদ্দমহাসদ্দা হোতি – ‘পণ্ডিতো ৱত, ভো, পণ্ডিতো ৱত, ভো’তি.

‘‘অধম্মো চ, ভিক্খৱে, ৱেদিতব্বো ধম্মো চ; অনত্থো চ ৱেদিতব্বো অত্থো চ. অধম্মঞ্চ ৱিদিত্ৱা ধম্মঞ্চ, অনত্থঞ্চ ৱিদিত্ৱা অত্থঞ্চ যথা ধম্মো যথা অত্থো তথা পটিপজ্জিতব্বং.

‘‘কতমো চ, ভিক্খৱে, অধম্মো, কতমো চ ধম্মো, কতমো চ অনত্থো, কতমো চ অত্থো? মিচ্ছাদিট্ঠি, ভিক্খৱে, অধম্মো; সম্মাদিট্ঠি ধম্মো; যে চ মিচ্ছাদিট্ঠিপচ্চযা অনেকে পাপকা অকুসলা ধম্মা সম্ভৱন্তি, অযং অনত্থো; সম্মাদিট্ঠিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি, অযং অত্থো.

‘‘মিচ্ছাসঙ্কপ্পো, ভিক্খৱে, অধম্মো; সম্মাসঙ্কপ্পো ধম্মো… মিচ্ছাৱাচা, ভিক্খৱে, অধম্মো; সম্মাৱাচা ধম্মো… মিচ্ছাকম্মন্তো, ভিক্খৱে, অধম্মো; সম্মাকম্মন্তো ধম্মো… মিচ্ছাআজীৱো, ভিক্খৱে, অধম্মো; সম্মাআজীৱো ধম্মো … মিচ্ছাৱাযামো, ভিক্খৱে, অধম্মো; সম্মাৱাযামো ধম্মো… মিচ্ছাসতি, ভিক্খৱে, অধম্মো; সম্মাসতি ধম্মো… মিচ্ছাসমাধি, ভিক্খৱে অধম্মো; সম্মাসমাধি ধম্মো… মিচ্ছাঞাণং, ভিক্খৱে, অধম্মো; সম্মাঞাণং ধম্মো.

‘‘মিচ্ছাৱিমুত্তি, ভিক্খৱে, অধম্মো; সম্মাৱিমুত্তি ধম্মো; যে চ মিচ্ছাৱিমুত্তিপচ্চযা অনেকে পাপকা অকুসলা ধম্মা সম্ভৱন্তি, অযং অনত্থো; সম্মাৱিমুত্তিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি, অযং অত্থো.

‘‘‘অধম্মো চ, ভিক্খৱে, ৱেদিতব্বো ধম্মো চ; অনত্থো চ ৱেদিতব্বো অত্থো চ. অধম্মঞ্চ ৱিদিত্ৱা ধম্মঞ্চ, অনত্থঞ্চ ৱিদিত্ৱা অত্থঞ্চ যথা ধম্মো যথা অত্থো তথা পটিপজ্জিতব্ব’ন্তি, ইতি যং তং ৱুত্তং, ইদমেতং পটিচ্চ ৱুত্ত’’ন্তি. চতুত্থং.