৩. মিচ্ছত্তসুত্তং

১০৩. ‘‘মিচ্ছত্তং, ভিক্খৱে, আগম্ম ৱিৰাধনা হোতি, নো আৰাধনা. কথঞ্চ, ভিক্খৱে, মিচ্ছত্তং আগম্ম ৱিৰাধনা হোতি, নো আৰাধনা? মিচ্ছাদিট্ঠিকস্স, ভিক্খৱে, মিচ্ছাসঙ্কপ্পো পহোতি, মিচ্ছাসঙ্কপ্পস্স মিচ্ছাৱাচা পহোতি, মিচ্ছাৱাচস্স মিচ্ছাকম্মন্তো পহোতি, মিচ্ছাকম্মন্তস্স মিচ্ছাআজীৱো পহোতি, মিচ্ছাআজীৱস্স মিচ্ছাৱাযামো পহোতি, মিচ্ছাৱাযামস্স মিচ্ছাসতি পহোতি, মিচ্ছাসতিস্স মিচ্ছাসমাধি পহোতি, মিচ্ছাসমাধিস্স মিচ্ছাঞাণং পহোতি, মিচ্ছাঞাণিস্স [মিচ্ছাঞাণস্স (পী. ক.)] মিচ্ছাৱিমুত্তি পহোতি. এৱং খো, ভিক্খৱে, মিচ্ছত্তং আগম্ম ৱিৰাধনা হোতি, নো আৰাধনা.

‘‘সম্মত্তং, ভিক্খৱে, আগম্ম আৰাধনা হোতি, নো ৱিৰাধনা. কথঞ্চ, ভিক্খৱে, সম্মত্তং আগম্ম আৰাধনা হোতি, নো ৱিৰাধনা? সম্মাদিট্ঠিকস্স, ভিক্খৱে, সম্মাসঙ্কপ্পো পহোতি, সম্মাসঙ্কপ্পস্স সম্মাৱাচা পহোতি, সম্মাৱাচস্স সম্মাকম্মন্তো পহোতি, সম্মাকম্মন্তস্স সম্মাআজীৱো পহোতি, সম্মাআজীৱস্স সম্মাৱাযামো পহোতি, সম্মাৱাযামস্স সম্মাসতি পহোতি, সম্মাসতিস্স সম্মাসমাধি পহোতি, সম্মাসমাধিস্স সম্মাঞাণং পহোতি, সম্মাঞাণিস্স [সম্মাঞাণস্স (পী. ক.)] সম্মাৱিমুত্তি পহোতি. এৱং খো, ভিক্খৱে, সম্মত্তং আগম্ম আৰাধনা হোতি, নো ৱিৰাধনা’’তি. ততিযং.