৪. বীজসুত্তং

১০৪. [অ. নি. ১.৩০৬; কথা. ৭০৮] ‘‘মিচ্ছাদিট্ঠিকস্স, ভিক্খৱে, পুৰিসপুগ্গলস্স মিচ্ছাসঙ্কপ্পস্স মিচ্ছাৱাচস্স মিচ্ছাকম্মন্তস্স মিচ্ছাআজীৱস্স মিচ্ছাৱাযামস্স মিচ্ছাসতিস্স মিচ্ছাসমাধিস্স মিচ্ছাঞাণিস্স মিচ্ছাৱিমুত্তিস্স যঞ্চ কাযকম্মং যথাদিট্ঠি সমত্তং সমাদিন্নং [সমাদিণ্ণং (পী. ক.)] যঞ্চ ৱচীকম্মং… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স [দিট্ঠি হি (সী. স্যা. পী.)], ভিক্খৱে, পাপিকা.

‘‘সেয্যথাপি, ভিক্খৱে, নিম্ববীজং ৱা কোসাতকিবীজং ৱা তিত্তকালাবুবীজং ৱা অল্লায পথৱিযা নিক্খিত্তং যঞ্চেৱ পথৱিৰসং উপাদিযতি যঞ্চ আপোৰসং উপাদিযতি, সব্বং তং তিত্তকত্তায কটুকত্তায অসাতত্তায সংৱত্ততি. তং কিস্স হেতু? বীজঞ্হি, ভিক্খৱে, পাপকং. এৱমেৱং খো, ভিক্খৱে, মিচ্ছাদিট্ঠিকস্স পুৰিসপুগ্গলস্স মিচ্ছাসঙ্কপ্পস্স মিচ্ছাৱাচস্স মিচ্ছাকম্মন্তস্স মিচ্ছাআজীৱস্স মিচ্ছাৱাযামস্স মিচ্ছাসতিস্স মিচ্ছাসমাধিস্স মিচ্ছাঞাণিস্স মিচ্ছাৱিমুত্তিস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স, ভিক্খৱে, পাপিকা.

‘‘সম্মাদিট্ঠিকস্স, ভিক্খৱে, পুৰিসপুগ্গলস্স সম্মাসঙ্কপ্পস্স সম্মাৱাচস্স সম্মাকম্মন্তস্স সম্মাআজীৱস্স সম্মাৱাযামস্স সম্মাসতিস্স সম্মাসমাধিস্স সম্মাঞাণিস্স সম্মাৱিমুত্তিস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং যথাদিট্ঠি সমত্তং সমাদিন্নং যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা ইট্ঠায কন্তায মনাপায হিতায সুখায সংৱত্তন্তি. তং কিস্স হেতু? দিট্ঠি হিস্স, ভিক্খৱে, ভদ্দিকা.

‘‘সেয্যথাপি, ভিক্খৱে, উচ্ছুবীজং ৱা সালিবীজং ৱা মুদ্দিকাবীজং ৱা অল্লায পথৱিযা নিক্খিত্তং যঞ্চ পথৱিৰসং উপাদিযতি যঞ্চ আপোৰসং উপাদিযতি সব্বং তং সাতত্তায মধুৰত্তায অসেচনকত্তায সংৱত্ততি. তং কিস্স হেতু? বীজঞ্হি ভিক্খৱে, ভদ্দকং. এৱমেৱং খো, ভিক্খৱে, সম্মাদিট্ঠিকস্স…পে. … সম্মাৱিমুত্তিস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা ইট্ঠায কন্তায মনাপায হিতায সুখায সংৱত্তন্তি. তং কিস্স হেতু? দিট্ঠি হিস্স, ভিক্খৱে, ভদ্দিকা’’তি. চতুত্থং.