༡. པ་ཋ་མ་པཱ་ཊི་དེ་ས་ནཱི་ཡ་སི་ཀྑཱ་པ་དཾ
ཨི་མེ ཁོ པ་ནཱ་ཡྻཱ་ཡོ ཨ་ཊྛ པཱ་ཊི་དེ་ས་ནཱི་ཡཱ
དྷ་མྨཱ ཨུ་དྡེ་སཾ ཨཱ་ག་ཙྪ་ནྟི.
༡༢༢༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ ས་པྤིཾ ཝི་ཉྙཱ་པེ་ཏྭཱ བྷུ་ཉྫ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ས་པྤིཾ ཝི་ཉྙཱ་པེ་ཏྭཱ བྷུ་ཉྫི་སྶ་ནྟི! ཀ་སྶ ས་མྤ་ནྣཾ ན མ་ནཱ་པཾ, ཀ་སྶ སཱ་དུཾ ན རུ་ཙྩ་ཏཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ས་པྤིཾ ཝི་ཉྙཱ་པེ་ཏྭཱ བྷུ་ཉྫི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ, བྷི་ཀྑུ་ནི་ཡོ ས་པྤིཾ ཝི་ཉྙཱ་པེ་ཏྭཱ བྷུ་ཉྫ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ས་པྤིཾ ཝི་ཉྙཱ་པེ་ཏྭཱ བྷུ་ཉྫི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
‘‘ཡཱ པ་ན བྷི་ཀྑུ་ནཱི ས་པྤིཾ ཝི་ཉྙཱ་པེ་ཏྭཱ བྷུ་ཉྫེ་ཡྻ, པ་ཊི་དེ་སེ་ཏ་བྦཾ ཏཱ་ཡ བྷི་ཀྑུ་ནི་ཡཱ – ‘གཱ་ར་ཡ྄ཧཾ, ཨ་ཡྻེ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱི’’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༡༢༢༩. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ གི་ལཱ་ནཱ ཧོ་ནྟི. གི་ལཱ་ན་པུ་ཙྪི་ཀཱ བྷི་ཀྑུ་ནི་ཡོ གི་ལཱ་ནཱ བྷི་ཀྑུ་ནི་ཡོ ཨེ་ཏ་ད་ཝོ་ཙུཾ – ‘‘ཀ་ཙྩི, ཨ་ཡྻེ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡ’’ནྟི? ‘‘པུ་བྦེ མ་ཡཾ, ཨ་ཡྻེ, ས་པྤིཾ ཝི་ཉྙཱ་པེ་ཏྭཱ བྷུ་ཉྫཱ་མ, ཏེ་ན ནོ ཕཱ་སུ ཧོ་ཏི; ཨི་དཱ་ནི པ་ན ‘‘བྷ་ག་ཝ་ཏཱ པ་ཊི་ཀྑི་ཏྟ’’ནྟི ཀུ་ཀྐུ་ཙྩཱ་ཡ་ནྟཱ ན ཝི་ཉྙཱ་པེ་མ, ཏེ་ན ནོ ན ཕཱ་སུ ཧོ་ཏཱི’’ཏི…པེ… བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནཱ་ཡ བྷི་ཀྑུ་ནི་ཡཱ ས་པྤིཾ ཝི་ཉྙཱ་པེ་ཏྭཱ བྷུ་ཉྫི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༢༣༠. ‘‘ཡཱ པ་ན བྷི་ཀྑུ་ནཱི ཨ་གི་ལཱ་ནཱ ས་པྤིཾ ཝི་ཉྙཱ་པེ་ཏྭཱ བྷུ་ཉྫེ་ཡྻ, པ་ཊི་དེ་སེ་ཏ་བྦཾ ཏཱ་ཡ བྷི་ཀྑུ་ནི་ཡཱ – ‘གཱ་ར་ཡ྄ཧཾ, ཨ་ཡྻེ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ ཏཾ པ་ཊི་དེ་སེ་མཱི’’’ཏི.
༡༢༣༡. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་གི་ལཱ་ནཱ ནཱ་མ ཡ་སྶཱ ཝི་ནཱ ས་པྤི་ནཱ ཕཱ་སུ ཧོ་ཏི.
གི་ལཱ་ནཱ ནཱ་མ ཡ་སྶཱ ཝི་ནཱ ས་པྤི་ནཱ ན ཕཱ་སུ ཧོ་ཏི.
ས་པྤི ནཱ་མ གོ་ས་པྤི ཝཱ ཨ་ཛི་ཀཱ་ས་པྤི ཝཱ མ་ཧིཾ་ས་ས་པྤི ཝཱ. ཡེ་སཾ མཾ་སཾ ཀ་པྤ་ཏི ཏེ་སཾ ས་པྤི.
ཨ་གི་ལཱ་ནཱ ཨ་ཏྟ་ནོ ཨ་ཏྠཱ་ཡ ཝི་ཉྙཱ་པེ་ཏི, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ‘‘བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
༡༢༣༢. ཨ་གི་ལཱ་ནཱ ཨ་གི་ལཱ་ན་ས་ཉྙཱ ས་པྤིཾ ཝི་ཉྙཱ་པེ་ཏྭཱ བྷུ་ཉྫ་ཏི, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨ་གི་ལཱ་ནཱ ཝེ་མ་ཏི་ཀཱ ས་པྤིཾ ཝི་ཉྙཱ་པེ་ཏྭཱ བྷུ་ཉྫ་ཏི, ཨཱ་པ་ཏྟི པཱ་ཊི་དེ་ས་ནཱི་ཡ་སྶ. ཨ་གི་ལཱ་ནཱ གི་ལཱ་ན་ས་ཉྙཱ ས་པྤིཾ ཝི་ཉྙཱ་པེ་ཏྭཱ བྷུ་ཉྫ་ཏི, ཨཱ་པ་ཏྟི པཱ་ཊི་དེ་ས་ནཱི་ཡ་སྶ.
གི་ལཱ་ནཱ ཨ་གི་ལཱ་ན་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. གི་ལཱ་ནཱ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. གི་ལཱ་ནཱ གི་ལཱ་ན་ས་ཉྙཱ, ཨ་ནཱ་པ་ཏྟི.
༡༢༣༣. ཨ་ནཱ་པ་ཏྟི གི་ལཱ་ནཱ་ཡ, གི་ལཱ་ནཱ ཧུ་ཏྭཱ ཝི་ཉྙཱ་པེ་ཏྭཱ ཨ་གི་ལཱ་ནཱ བྷུ་ཉྫ་ཏི, གི་ལཱ་ནཱ་ཡ སེ་ས་ཀཾ བྷུ་ཉྫ་ཏི, ཉཱ་ཏ་ཀཱ་ནཾ པ་ཝཱ་རི་ཏཱ་ནཾ, ཨ་ཉྙ་སྶ་ཏྠཱ་ཡ, ཨ་ཏྟ་ནོ དྷ་ནེ་ན, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཋ་མ་པཱ་ཊི་དེ་ས་ནཱི་ཡ་སི་ཀྑཱ་པ་དཾ ནི་ཊྛི་ཏཾ.