༡༣. ཏེ་ར་ས་མ་སི་ཀྑཱ་པ་དཾ

༡༢༢༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི ཨ་ས་ངྐ་ཙྩི་ཀཱ [ཨ་ས་ངྐ་ཙྪི་ཀཱ (སྱཱ.)] གཱ་མཾ པི་ཎྜཱ་ཡ པཱ་ཝི་སི. ཏ་སྶཱ ར་ཐི་ཀཱ་ཡ ཝཱ་ཏ་མ་ཎྜ་ལི་ཀཱ ས་ངྒྷཱ་ཊི་ཡོ ཨུ་ཀྑི་པིཾ་སུ. མ་ནུ་སྶཱ ཨུ་ཀྐུ་ཊྛིཾ ཨ་ཀཾ་སུ – ‘‘སུ་ནྡ་རཱ ཨ་ཡྻཱ་ཡ ཐ་ནུ་ད་རཱ’’ཏི. སཱ བྷི་ཀྑུ་ནཱི ཏེ་ཧི མ་ནུ་སྶེ་ཧི ཨུ་པྤ་ཎྜི་ཡ་མཱ་ནཱ མ་ངྐུ ཨ་ཧོ་སི. ཨ་ཐ ཁོ སཱ བྷི་ཀྑུ་ནཱི ཨུ་པ་སྶ་ཡཾ ག་ནྟྭཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི ཨ་ས་ངྐ་ཙྩི་ཀཱ གཱ་མཾ པ་ཝི་སི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཨ་ས་ངྐ་ཙྩི་ཀཱ གཱ་མཾ པཱ་ཝི་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཨ་ས་ངྐ་ཙྩི་ཀཱ གཱ་མཾ པ་ཝི་སི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༡༢༢༥. ‘‘ཡཱ པ་ན བྷི་ཀྑུ་ནཱི ཨ་ས་ངྐ་ཙྩི་ཀཱ [ཨ་ས་ངྐ་ཙྪི་ཀཱ (སྱཱ.)] གཱ་མཾ པ་ཝི་སེ་ཡྻ, པཱ་ཙི་ཏྟི་ཡ’’ནྟི.

༡༢༢༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཨ་ས་ངྐ་ཙྩི་ཀཱཏི ཝི་ནཱ ས་ངྐ་ཙྩི་ཀཾ.

ས་ངྐ་ཙྩི་ཀཾ ནཱ་མ ཨ་དྷ་ཀྑ་ཀཾ ཨུ་བྦྷ་ནཱ་བྷི, ཏ་སྶ པ་ཊི་ཙྪཱ་ད་ན་ཏྠཱ་ཡ.

གཱ་མཾ པ་ཝི་སེ་ཡྻཱཏི པ་རི་ཀྑི་ཏྟ་སྶ གཱ་མ་སྶ པ་རི་ཀྑེ་པཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི པཱ་ཙི་ཏྟི་ཡ་སྶ. ཨ་པ་རི་ཀྑི་ཏྟ་སྶ གཱ་མ་སྶ ཨུ་པ་ཙཱ་རཾ ཨོ་ཀྐ་མ་ནྟི་ཡཱ ཨཱ་པ་ཏྟི པཱ་ཙི་ཏྟི་ཡ་སྶ.

༡༢༢༧. ཨ་ནཱ་པ་ཏྟི ཨ་ཙྪི་ནྣ་ཙཱི་ཝ་རི་ཀཱ་ཡ, ན་ཊྛ་ཙཱི་ཝ་རི་ཀཱ་ཡ, གི་ལཱ་ནཱ་ཡ, ཨ་སྶ་ཏི་ཡཱ, ཨ་ཛཱ་ན་ནྟི་ཡཱ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ཏེ་ར་ས་མ་སི་ཀྑཱ་པ་དཾ ནི་ཊྛི་ཏཾ.

ཚ་ཏྟུ་པཱ་ཧ་ན་ཝ་གྒོ ན་ཝ་མོ.

ཨུ་དྡི་ཊྛཱ ཁོ, ཨ་ཡྻཱ་ཡོ, ཚ་ས་ཊྛི་ས་ཏཱ པཱ་ཙི་ཏྟི་ཡཱ དྷ་མྨཱ. ཏ་ཏྠཱ་ཡྻཱ་ཡོ པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? དུ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? ཏ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? པ་རི་སུ་དྡྷེ་ཏྠཱ་ཡྻཱ་ཡོ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི་ཏི.

ཁུ་དྡ་ཀཾ ས་མ་ཏྟཾ.

བྷི་ཀྑུ་ནི་ཝི་བྷ་ངྒེ པཱ་ཙི་ཏྟི་ཡ་ཀ་ཎྜཾ ནི་ཊྛི་ཏཾ.