༡. པ་ཋ་མ་སི་ཀྑཱ་པ་དཾ
༡༡༧༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ ཚ་ཏྟུ་པཱ་ཧ་ནཾ དྷཱ་རེ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཚ་ཏྟུ་པཱ་ཧ་ནཾ དྷཱ་རེ་སྶ་ནྟི, སེ་ཡྻ་ཐཱ་པི གི་ཧི་ནི་ཡོ ཀཱ་མ་བྷོ་གི་ནི་ཡོ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ཚ་ཏྟུ་པཱ་ཧ་ནཾ དྷཱ་རེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཚ་ཏྟུ་པཱ་ཧ་ནཾ དྷཱ་རེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཚ་ཏྟུ་པཱ་ཧ་ནཾ དྷཱ་རེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
‘‘ཡཱ པ་ན བྷི་ཀྑུ་ནཱི ཚ་ཏྟུ་པཱ་ཧ་ནཾ དྷཱ་རེ་ཡྻ, པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༡༡༧༩. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི གི་ལཱ་ནཱ ཧོ་ཏི. ཏ་སྶཱ ཝི་ནཱ ཚ་ཏྟུ་པཱ་ཧ་ནཾ ན ཕཱ་སུ ཧོ་ཏི…པེ… བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནཱ་ཡ བྷི་ཀྑུ་ནི་ཡཱ ཚ་ཏྟུ་པཱ་ཧ་ནཾ. ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༨༠. ‘‘ཡཱ པ་ན བྷི་ཀྑུ་ནཱི ཨ་གི་ལཱ་ནཱ ཚ་ཏྟུ་པཱ་ཧ་ནཾ དྷཱ་རེ་ཡྻ, པཱ་ཙི་ཏྟི་ཡ’’ནྟི.
༡༡༨༡. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་གི་ལཱ་ནཱ ནཱ་མ ཡ་སྶཱ ཝི་ནཱ ཚ་ཏྟུ་པཱ་ཧ་ནཾ ཕཱ་སུ ཧོ་ཏི.
གི་ལཱ་ནཱ ནཱ་མ ཡ་སྶཱ ཝི་ནཱ ཚ་ཏྟུ་པཱ་ཧ་ནཾ ན ཕཱ་སུ ཧོ་ཏི.
ཚ་ཏྟཾ ནཱ་མ ཏཱི་ཎི ཚ་ཏྟཱ་ནི – སེ་ཏ་ཙྪ་ཏྟཾ, ཀི་ལ་ཉྫ་ཙྪ་ཏྟཾ, པ་ཎྞ་ཙྪ་ཏྟཾ མ་ཎྜ་ལ་བ་དྡྷཾ ས་ལཱ་ཀ་བ་དྡྷཾ. དྷཱ་རེ་ཡྻཱཏི ས་ཀི་མྤི དྷཱ་རེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༡༨༢. ཨ་གི་ལཱ་ནཱ ཨ་གི་ལཱ་ན་ས་ཉྙཱ ཚ་ཏྟུ་པཱ་ཧ་ནཾ དྷཱ་རེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་གི་ལཱ་ནཱ ཝེ་མ་ཏི་ཀཱ ཚ་ཏྟུ་པཱ་ཧ་ནཾ དྷཱ་རེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་གི་ལཱ་ནཱ གི་ལཱ་ན་ས་ཉྙཱ ཚ་ཏྟུ་པཱ་ཧ་ནཾ དྷཱ་རེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཚ་ཏྟཾ དྷཱ་རེ་ཏི ན ཨུ་པཱ་ཧ་ནཾ, ཨཱ་པ་ཏྟི དུ་ཀྐ་ཊ་སྶ. ཨུ་པཱ་ཧ་ནཾ དྷཱ་རེ་ཏི ན ཚ་ཏྟཾ, ཨཱ་པ་ཏྟི དུ་ཀྐ་ཊ་སྶ. གི་ལཱ་ནཱ ཨ་གི་ལཱ་ན་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. གི་ལཱ་ནཱ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. གི་ལཱ་ནཱ གི་ལཱ་ན་ས་ཉྙཱ, ཨ་ནཱ་པ་ཏྟི.
༡༡༨༣. ཨ་ནཱ་པ་ཏྟི གི་ལཱ་ནཱ་ཡ, ཨཱ་རཱ་མེ ཨཱ་རཱ་མཱུ་པ་ཙཱ་རེ དྷཱ་རེ་ཏི, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཋ་མ་སི་ཀྑཱ་པ་དཾ ནི་ཊྛི་ཏཾ.