༨. ཀུ་མཱ་རཱི་བྷཱུ་ཏ་ཝ་གྒོ
༡. པ་ཋ་མ་སི་ཀྑཱ་པ་དཾ
༡༡༡༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཨཱུ་ན་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ ཝུ་ཊྛཱ་པེ་ནྟི. ཏཱ ཨ་ཀྑ་མཱ ཧོ་ནྟི སཱི་ཏ་སྶ ཨུ་ཎྷ་སྶ ཛི་གྷ་ཙྪཱ་ཡ པི་པཱ་སཱ་ཡ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶཱ་ནཾ དུ་རུ་ཏྟཱ་ནཾ དུ་རཱ་ག་ཏཱ་ནཾ ཝ་ཙ་ན་པ་ཐཱ་ནཾ. ཨུ་པྤ་ནྣཱ་ནཾ སཱ་རཱི་རི་ཀཱ་ནཾ ཝེ་ད་ནཱ་ནཾ དུ་ཀྑཱ་ནཾ ཏི་བྦཱ་ནཾ ཁ་རཱ་ནཾ ཀ་ཊུ་ཀཱ་ནཾ ཨ་སཱ་ཏཱ་ནཾ ཨ་མ་ནཱ་པཱ་ནཾ པཱ་ཎ་ཧ་རཱ་ནཾ ཨ་ན་དྷི་ཝཱ་ས་ཀ་ཛཱ་ཏི་ཀཱ ཧོ་ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨཱུ་ན་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨཱུ་ན་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨཱུ་ན་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ ཝུ་ཊྛཱ་པེ་སྶ་ནྟི! ཨཱུ་ན་ཝཱི་ས་ཏི་ཝ་སྶཱ, བྷི་ཀྑ་ཝེ, ཀུ་མཱ་རི་བྷཱུ་ཏཱ ཨ་ཀྑ་མཱ ཧོ་ཏི སཱི་ཏ་སྶ ཨུ་ཎྷ་སྶ…པེ… པཱ་ཎ་ཧ་རཱ་ནཾ ཨ་ན་དྷི་ཝཱ་ས་ཀ་ཛཱ་ཏི་ཀཱ ཧོ་ཏི. ཝཱི་ས་ཏི་ཝ་སྶཱ་ཝ ཁོ, བྷི་ཀྑ་ཝེ, ཀུ་མཱ་རི་བྷཱུ་ཏཱ ཁ་མཱ ཧོ་ཏི སཱི་ཏ་སྶ ཨུ་ཎྷ་སྶ…པེ… པཱ་ཎ་ཧ་རཱ་ནཾ ཨ་དྷི་ཝཱ་ས་ཀ་ཛཱ་ཏི་ཀཱ ཧོ་ཏི. ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༢༠. ‘‘ཡཱ པ་ན བྷི་ཀྑུ་ནཱི ཨཱུ་ན་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༢༡. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨཱུ་ན་ཝཱི་ས་ཏི་ཝ་སྶཱ ནཱ་མ ཨ་པྤ་ཏྟ་ཝཱི་ས་ཏི་ཝ་སྶཱ. ཀུ་མཱ་རི་བྷཱུ་ཏཱ ནཱ་མ སཱ་མ་ཎེ་རཱི ཝུ་ཙྩ་ཏི. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༢༢. ཨཱུ་ན་ཝཱི་ས་ཏི་ཝ་སྶཱ་ཡ ཨཱུ་ན་ཝཱི་ས་ཏི་ཝ་སྶ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨཱུ་ན་ཝཱི་ས་ཏི་ཝ་སྶཱ་ཡ ཝེ་མ་ཏི་ཀཱ ཝུ་ཊྛཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཝཱི་ས་ཏི་ཝ་སྶཱ་ཡ པ་རི་པུ་ཎྞ་ས་ཉྙཱ ཝུ་ཊྛཱ་པེ་ཏི, ཨ་ནཱ་པ་ཏྟི. པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཨཱུ་ན་ཝཱི་ས་ཏི་ཝ་སྶ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. པ་རི་པུ་ཎྞ་ཝཱི་ས་ཏི་ཝ་སྶཱ་ཡ པ་རི་པུ་ཎྞ་ས་ཉྙཱ, ཨ་ནཱ་པ་ཏྟི.
༡༡༢༣. ཨ་ནཱ་པ་ཏྟི ཨཱུ་ན་ཝཱི་ས་ཏི་ཝ་སྶཾ པ་རི་པུ་ཎྞ་ས་ཉྙཱ ཝུ་ཊྛཱ་པེ་ཏི, པ་རི་པུ་ཎྞ་ཝཱི་ས་ཏི་ཝ་སྶཾ པ་རི་པུ་ཎྞ་ས་ཉྙཱ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཋ་མ་སི་ཀྑཱ་པ་དཾ ནི་ཊྛི་ཏཾ.
༢. དུ་ཏི་ཡ་སི་ཀྑཱ་པ་དཾ
༡༡༢༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ ཨ་སི་ཀྑི་ཏ་སི་ཀྑཾ ཝུ་ཊྛཱ་པེ་ནྟི. ཏཱ བཱ་ལཱ ཧོ་ནྟི ཨ་བྱ་ཏྟཱ; ན ཛཱ་ན་ནྟི ཀ་པྤི་ཡཾ ཝཱ ཨ་ཀ་པྤི་ཡཾ ཝཱ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ ཨ་སི་ཀྑི་ཏ་སི་ཀྑཾ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ ཨ་སི་ཀྑི་ཏ་སི་ཀྑཾ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ ཨ་སི་ཀྑི་ཏ་སི་ཀྑཾ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཊྛཱ་ར་ས་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏིཾ དཱ་ཏུཾ. ཨེ་ཝ་ཉྩ པ་ན བྷི་ཀྑ་ཝེ དཱ་ཏ་བྦཱ. ཏཱ་ཡ ཨ་ཊྛཱ་ར་ས་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ བྷི་ཀྑུ་ནཱི་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ཨ་ཧཾ, ཨ་ཡྻེ, ཨི་ཏྠ་ནྣཱ་མཱ ཨི་ཏྠ་ནྣཱ་མཱ་ཡ ཨ་ཡྻཱ་ཡ ཨ་ཊྛཱ་ར་ས་ཝ་སྶཱ ཀུ་མཱ་རི་བྷཱུ་ཏཱ ས་ངྒྷཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏིཾ ཡཱ་ཙཱ་མཱི’’ཏི. དུ་ཏི་ཡ་མྤི ཡཱ་ཙི་ཏ་བྦཱ. ཏ་ཏི་ཡ་མྤི ཡཱ་ཙི་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ས་ངྒྷོ ཉཱ་པེ་ཏ་བྦོ –
༡༡༢༥. ‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ ཨི་ཏྠ་ནྣཱ་མཱ་ཡ ཨ་ཡྻཱ་ཡ ཨ་ཊྛཱ་ར་ས་ཝ་སྶཱ ཀུ་མཱ་རི་བྷཱུ་ཏཱ ས་ངྒྷཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏིཾ ཡཱ་ཙ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཱ་ཡ ཨ་ཊྛཱ་ར་ས་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏིཾ ད་དེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ ཨི་ཏྠ་ནྣཱ་མཱ་ཡ ཨ་ཡྻཱ་ཡ ཨ་ཊྛཱ་ར་ས་ཝ་སྶཱ ཀུ་མཱ་རི་བྷཱུ་ཏཱ ས་ངྒྷཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏིཾ ཡཱ་ཙ་ཏི. ས་ངྒྷོ ཨི་ཏྠ་ནྣཱ་མཱ་ཡ ཨ་ཊྛཱ་ར་ས་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏིཾ དེ་ཏི. ཡ་སྶཱ ཨ་ཡྻཱ་ཡ ཁ་མ་ཏི ཨི་ཏྠ་ནྣཱ་མཱ་ཡ ཨ་ཊྛཱ་ར་ས་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏི་ཡཱ དཱ་ནཾ, སཱ ཏུ་ཎྷ་སྶ; ཡ་སྶཱ ན་ཀྑ་མ་ཏི, སཱ བྷཱ་སེ་ཡྻ.
‘‘དི་ནྣཱ ས་ངྒྷེ་ན ཨི་ཏྠ་ནྣཱ་མཱ་ཡ ཨ་ཊྛཱ་ར་ས་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑཱ་ས་མྨུ་ཏི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
སཱ ཨ་ཊྛཱ་ར་ས་ཝ་སྶཱ ཀུ་མཱ་རི་བྷཱུ་ཏཱ ཨེ་ཝཾ ཝ་དེ་ཧཱི་ཏི ཝ་ཏྟ་བྦཱ – ‘‘པཱ་ཎཱ་ཏི་པཱ་ཏཱ ཝེ་ར་མ་ཎིཾ དྭེ ཝ་སྶཱ་ནི ཨ་ཝཱི་ཏི་ཀྐ་མྨ ས་མཱ་དཱ་ནཾ ས་མཱ་དི་ཡཱ་མི…པེ… ཝི་ཀཱ་ལ་བྷོ་ཛ་ནཱ ཝེ་ར་མ་ཎིཾ དྭེ ཝ་སྶཱ་ནི ཨ་ཝཱི་ཏི་ཀྐ་མྨ ས་མཱ་དཱ་ནཾ ས་མཱ་དི་ཡཱ་མཱི’’ཏི.
ཨ་ཐ ཁོ བྷ་ག་ཝཱ ཏཱ བྷི་ཀྑུ་ནི་ཡོ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༢༦. ‘‘ཡཱ པ་ན བྷི་ཀྑུ་ནཱི པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ ཨ་སི་ཀྑི་ཏ་སི་ཀྑཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༢༧. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་རི་པུ་ཎྞ་ཝཱི་ས་ཏི་ཝ་སྶཱ ནཱ་མ པ་ཏྟ་ཝཱི་ས་ཏི་ཝ་སྶཱ. ཀུ་མཱ་རི་བྷཱུ་ཏཱ ནཱ་མ སཱ་མ་ཎེ་རཱི ཝུ་ཙྩ་ཏི. དྭེ ཝ་སྶཱ་ནཱིཏི དྭེ སཾ་ཝ་ཙྪ་རཱ་ནི. ཨ་སི་ཀྑི་ཏ་སི་ཀྑཱ ནཱ་མ སི་ཀྑཱ ཝཱ ན དི་ནྣཱ ཧོ་ཏི, དི་ནྣཱ ཝཱ སི་ཀྑཱ ཀུ་པི་ཏཱ. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༢༨. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༡༡༢༩. ཨ་ནཱ་པ་ཏྟི པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.
༣. ཏ་ཏི་ཡ་སི་ཀྑཱ་པ་དཾ
༡༡༣༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ས་ངྒྷེ་ན ཨ་ས་མྨ་ཏཾ ཝུ་ཊྛཱ་པེ་ནྟི. བྷི་ཀྑུ་ནི་ཡོ ཨེ་ཝ་མཱ་ཧཾ་སུ – ‘‘ཨེ་ཐ སི་ཀྑ་མཱ་ནཱ, ཨི་མཾ ཛཱ་ནཱ་ཐ, ཨི་མཾ དེ་ཐ, ཨི་མཾ ཨཱ་ཧ་ར་ཐ, ཨི་མི་ནཱ ཨ་ཏྠོ, ཨི་མཾ ཀ་པྤི་ཡཾ ཀ་རོ་ཐཱ’’ཏི. ཏཱ ཨེ་ཝ་མཱ་ཧཾ་སུ – ‘‘ན མ་ཡཾ, ཨ་ཡྻེ, སི་ཀྑ་མཱ་ནཱ; བྷི་ཀྑུ་ནི་ཡོ མ་ཡ’’ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ས་ངྒྷེ་ན ཨ་ས་མྨ་ཏཾ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ས་ངྒྷེ་ན ཨ་ས་མྨ་ཏཾ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ས་ངྒྷེ་ན ཨ་ས་མྨ་ཏཾ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ་ཡ ཝུ་ཊྛཱ་ན་ས་མྨུ་ཏིཾ དཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, དཱ་ཏ་བྦཱ. ཏཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ་ཡ ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ བྷི་ཀྑུ་ནཱི་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ཨ་ཧཾ, ཨ་ཡྻེ, ཨི་ཏྠ་ནྣཱ་མཱ ཨི་ཏྠ་ནྣཱ་མཱ་ཡ ཨ་ཡྻཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ ཀུ་མཱ་རི་བྷཱུ་ཏཱ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ ས་ངྒྷཾ ཝུ་ཊྛཱ་ན་ས་མྨུ་ཏིཾ ཡཱ་ཙཱ་མཱི’’ཏི. དུ་ཏི་ཡ་མྤི ཡཱ་ཙི་ཏ་བྦཱ. ཏ་ཏི་ཡ་མྤི ཡཱ་ཙི་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ས་ངྒྷོ ཉཱ་པེ་ཏ་བྦོ –
༡༡༣༡. ‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ ཨི་ཏྠ་ནྣཱ་མཱ་ཡ ཨ་ཡྻཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ ཀུ་མཱ་རི་བྷཱུ་ཏཱ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ ས་ངྒྷཾ ཝུ་ཊྛཱ་ན་ས་མྨུ་ཏིཾ ཡཱ་ཙ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ ས་ངྒྷོ ཨི་ཏྠ་ནྣཱ་མཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ་ཡ ཝུ་ཊྛཱ་ན་ས་མྨུ་ཏིཾ ད་དེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ ཨི་ཏྠ་ནྣཱ་མཱ་ཡ ཨ་ཡྻཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ ཀུ་མཱ་རི་བྷཱུ་ཏཱ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ ས་ངྒྷཾ ཝུ་ཊྛཱ་ན་ས་མྨུ་ཏིཾ ཡཱ་ཙ་ཏི. ས་ངྒྷོ ཨི་ཏྠ་ནྣཱ་མཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ་ཡ ཝུ་ཊྛཱ་ན་ས་མྨུ་ཏིཾ དེ་ཏི. ཡ་སྶཱ ཨ་ཡྻཱ་ཡ ཁ་མ་ཏི ཨི་ཏྠ་ནྣཱ་མཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ་ཡ ཝུ་ཊྛཱ་ན་ས་མྨུ་ཏི་ཡཱ དཱ་ནཾ, སཱ ཏུ་ཎྷ་སྶ; ཡ་སྶཱ ན་ཀྑ་མ་ཏི, སཱ བྷཱ་སེ་ཡྻ.
‘‘དི་ནྣཱ ས་ངྒྷེ་ན ཨི་ཏྠ་ནྣཱ་མཱ་ཡ པ་རི་པུ་ཎྞ་ཝཱི་ས་ཏི་ཝ་སྶཱ་ཡ ཀུ་མཱ་རི་བྷཱུ་ཏཱ་ཡ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ་ཡ ཝུ་ཊྛཱ་ན་ས་མྨུ་ཏི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨ་ཐ ཁོ བྷ་ག་ཝཱ ཏཱ བྷི་ཀྑུ་ནི་ཡོ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༣༢. ‘‘ཡཱ པ་ན བྷི་ཀྑུ་ནཱི པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ས་ངྒྷེ་ན ཨ་ས་མྨ་ཏཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༣༣. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་རི་པུ་ཎྞ་ཝཱི་ས་ཏི་ཝ་སྶཱ ནཱ་མ པ་ཏྟ་ཝཱི་ས་ཏི་ཝ་སྶཱ. ཀུ་མཱ་རི་བྷཱུ་ཏཱ ནཱ་མ སཱ་མ་ཎེ་རཱི ཝུ་ཙྩ་ཏི. དྭེ ཝ་སྶཱ་ནཱིཏི དྭེ སཾ་ཝ་ཙྪ་རཱ་ནི. སི་ཀྑི་ཏ་སི་ཀྑཱ ནཱ་མ ཚ་སུ དྷ་མྨེ་སུ སི་ཀྑི་ཏ་སི་ཀྑཱ. ཨ་ས་མྨ་ཏཱ ནཱ་མ ཉ་ཏྟི་དུ་ཏི་ཡེ་ན ཀ་མྨེ་ན ཝུ་ཊྛཱ་ན་ས་མྨུ་ཏི ན དི་ནྣཱ ཧོ་ཏི. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༣༤. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༡༡༣༥. ཨ་ནཱ་པ་ཏྟི པ་རི་པུ་ཎྞ་ཝཱི་ས་ཏི་ཝ་སྶཾ ཀུ་མཱ་རི་བྷཱུ་ཏཾ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཾ ས་ངྒྷེ་ན ས་མྨ་ཏཾ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་སི་ཀྑཱ་པ་དཾ ནི་ཊྛི་ཏཾ.
༤. ཙ་ཏུ་ཏྠ་སི་ཀྑཱ་པ་དཾ
༡༡༣༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཨཱུ་ན་དྭཱ་ད་ས་ཝ་སྶཱ ཝུ་ཊྛཱ་པེ་ནྟི. ཏཱ བཱ་ལཱ ཧོ་ནྟི ཨ་བྱ་ཏྟཱ ན ཛཱ་ན་ནྟི ཀ་པྤི་ཡཾ ཝཱ ཨ་ཀ་པྤི་ཡཾ ཝཱ. ས་དྡྷི་ཝི་ཧཱ་རི་ནི་ཡོ་པི བཱ་ལཱ ཧོ་ནྟི ཨ་བྱ་ཏྟཱ; ན ཛཱ་ན་ནྟི ཀ་པྤི་ཡཾ ཝཱ ཨ་ཀ་པྤི་ཡཾ ཝཱ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨཱུ་ན་དྭཱ་ད་ས་ཝ་སྶཱ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨཱུ་ན་དྭཱ་ད་ས་ཝ་སྶཱ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨཱུ་ན་དྭཱ་ད་ས་ཝ་སྶཱ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༣༧. ‘‘ཡཱ པ་ན བྷི་ཀྑུ་ནཱི ཨཱུ་ན་དྭཱ་ད་ས་ཝ་སྶཱ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༣༨. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨཱུ་ན་དྭཱ་ད་ས་ཝ་སྶཱ ནཱ་མ ཨ་པྤ་ཏྟ་དྭཱ་ད་ས་ཝ་སྶཱ.
ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༣༩. ཨ་ནཱ་པ་ཏྟི པ་རི་པུ་ཎྞ་དྭཱ་ད་ས་ཝ་སྶཱ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཙ་ཏུ་ཏྠ་སི་ཀྑཱ་པ་དཾ ནི་ཊྛི་ཏཾ.
༥. པ་ཉྩ་མ་སི་ཀྑཱ་པ་དཾ
༡༡༤༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ པ་རི་པུ་ཎྞ་དྭཱ་ད་ས་ཝ་སྶཱ ས་ངྒྷེ་ན ཨ་ས་མྨ་ཏཱ ཝུ་ཊྛཱ་པེ་ནྟི. ཏཱ བཱ་ལཱ ཧོ་ནྟི ཨ་བྱ་ཏྟཱ; ན ཛཱ་ན་ནྟི ཀ་པྤི་ཡཾ ཝཱ ཨ་ཀ་པྤི་ཡཾ ཝཱ. ས་དྡྷི་ཝི་ཧཱ་རི་ནི་ཡོ་པི བཱ་ལཱ ཧོ་ནྟི ཨ་བྱ་ཏྟཱ; ན ཛཱ་ན་ནྟི ཀ་པྤི་ཡཾ ཝཱ ཨ་ཀ་པྤི་ཡཾ ཝཱ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ པ་རི་པུ་ཎྞ་དྭཱ་ད་ས་ཝ་སྶཱ ས་ངྒྷེ་ན ཨ་ས་མྨ་ཏཱ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ པ་རི་པུ་ཎྞ་དྭཱ་ད་ས་ཝ་སྶཱ ས་ངྒྷེ་ན ཨ་ས་མྨ་ཏཱ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ པ་རི་པུ་ཎྞ་དྭཱ་ད་ས་ཝ་སྶཱ ས་ངྒྷེ་ན ཨ་ས་མྨ་ཏཱ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པ་རི་པུ་ཎྞ་དྭཱ་ད་ས་ཝ་སྶཱ་ཡ བྷི་ཀྑུ་ནི་ཡཱ ཝུ་ཊྛཱ་པ་ན་ས་མྨུ་ཏིཾ དཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, དཱ་ཏ་བྦཱ. ཏཱ་ཡ པ་རི་པུ་ཎྞ་དྭཱ་ད་ས་ཝ་སྶཱ་ཡ བྷི་ཀྑུ་ནི་ཡཱ ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཝུ་ཌྜྷཱ་ནཾ བྷི་ཀྑུ་ནཱི་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ཨ་ཧཾ, ཨ་ཡྻེ, ཨི་ཏྠ་ནྣཱ་མཱ པ་རི་པུ་ཎྞ་དྭཱ་ད་ས་ཝ་སྶཱ བྷི་ཀྑུ་ནཱི ས་ངྒྷཾ ཝུ་ཊྛཱ་པ་ན་ས་མྨུ་ཏིཾ ཡཱ་ཙཱ་མཱི’’ཏི. དུ་ཏི་ཡ་མྤི ཡཱ་ཙི་ཏ་བྦཱ. ཏ་ཏི་ཡ་མྤི ཡཱ་ཙི་ཏ་བྦཱ. སཱ བྷི་ཀྑུ་ནཱི ས་ངྒྷེ་ན པ་རི་ཙྪི་ནྡི་ཏ་བྦཱ – ‘‘བྱ་ཏྟཱ་ཡཾ བྷི་ཀྑུ་ནཱི ལ་ཛྫི་ནཱི’’ཏི. ས་ཙེ བཱ་ལཱ ཙ ཧོ་ཏི ཨ་ལ་ཛྫི་ནཱི ཙ, ན དཱ་ཏ་བྦཱ. ས་ཙེ བཱ་ལཱ ཧོ་ཏི ལ་ཛྫི་ནཱི, ན དཱ་ཏ་བྦཱ. ས་ཙེ བྱ་ཏྟཱ ཧོ་ཏི ཨ་ལ་ཛྫི་ནཱི, ན དཱ་ཏ་བྦཱ. ས་ཙེ བྱ་ཏྟཱ ཙ ཧོ་ཏི ལ་ཛྫི་ནཱི ཙ, དཱ་ཏ་བྦཱ. ཨེ་ཝ་ཉྩ པ་ན, བྷི་ཀྑ་ཝེ, དཱ་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ས་ངྒྷོ ཉཱ་པེ་ཏ་བྦོ –
༡༡༤༡. ‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ པ་རི་པུ་ཎྞ་དྭཱ་ད་ས་ཝ་སྶཱ བྷི་ཀྑུ་ནཱི ས་ངྒྷཾ ཝུ་ཊྛཱ་པ་ན་ས་མྨུ་ཏིཾ ཡཱ་ཙ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཱ་ཡ པ་རི་པུ་ཎྞ་དྭཱ་ད་ས་ཝ་སྶཱ་ཡ བྷི་ཀྑུ་ནི་ཡཱ ཝུ་ཊྛཱ་པ་ན་ས་མྨུ་ཏིཾ ད་དེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ པ་རི་པུ་ཎྞ་དྭཱ་ད་ས་ཝ་སྶཱ བྷི་ཀྑུ་ནཱི ས་ངྒྷཾ ཝུ་ཊྛཱ་པ་ན་ས་མྨུ་ཏིཾ ཡཱ་ཙ་ཏི. ས་ངྒྷོ ཨི་ཏྠ་ནྣཱ་མཱ་ཡ པ་རི་པུ་ཎྞ་དྭཱ་ད་ས་ཝ་སྶཱ་ཡ བྷི་ཀྑུ་ནི་ཡཱ ཝུ་ཊྛཱ་པ་ན་ས་མྨུ་ཏིཾ དེ་ཏི. ཡ་སྶཱ ཨ་ཡྻཱ་ཡ ཁ་མ་ཏི ཨི་ཏྠ་ནྣཱ་མཱ་ཡ པ་རི་པུ་ཎྞ་དྭཱ་ད་ས་ཝ་སྶཱ་ཡ བྷི་ཀྑུ་ནི་ཡཱ ཝུ་ཊྛཱ་པ་ན་ས་མྨུ་ཏི་ཡཱ དཱ་ནཾ, སཱ ཏུ་ཎྷ་སྶ; ཡ་སྶཱ ན་ཀྑ་མ་ཏི, སཱ བྷཱ་སེ་ཡྻ.
‘‘དི་ནྣཱ ས་ངྒྷེ་ན ཨི་ཏྠ་ནྣཱ་མཱ་ཡ པ་རི་པུ་ཎྞ་དྭཱ་ད་ས་ཝ་སྶཱ་ཡ བྷི་ཀྑུ་ནི་ཡཱ ཝུ་ཊྛཱ་པ་ན་ས་མྨུ་ཏི. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཨ་ཐ ཁོ བྷ་ག་ཝཱ ཏཱ བྷི་ཀྑུ་ནི་ཡོ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༤༢. ‘‘ཡཱ པ་ན བྷི་ཀྑུ་ནཱི པ་རི་པུ་ཎྞ་དྭཱ་ད་ས་ཝ་སྶཱ ས་ངྒྷེ་ན ཨ་ས་མྨ་ཏཱ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༤༣. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་རི་པུ་ཎྞ་དྭཱ་ད་ས་ཝ་སྶཱ ནཱ་མ པ་ཏྟ་དྭཱ་ད་ས་ཝ་སྶཱ.
ཨ་ས་མྨ་ཏཱ ནཱ་མ ཉ་ཏྟི་དུ་ཏི་ཡེ་ན ཀ་མྨེ་ན ཝུ་ཊྛཱ་པ་ན་ས་མྨུ་ཏི ན དི་ནྣཱ ཧོ་ཏི. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༤༤. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༡༡༤༥. ཨ་ནཱ་པ་ཏྟི པ་རི་པུ་ཎྞ་དྭཱ་ད་ས་ཝ་སྶཱ ས་ངྒྷེ་ན ས་མྨ་ཏཱ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཉྩ་མ་སི་ཀྑཱ་པ་དཾ ནི་ཊྛི་ཏཾ.
༦. ཚ་ཊྛ་སི་ཀྑཱ་པ་དཾ
༡༡༤༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཙ་ཎྜ་ཀཱ་ལཱི༹ བྷི་ཀྑུ་ནཱི བྷི་ཀྑུ་ནི་ས་ངྒྷཾ ཨུ་པ་ས་ངྐ་མི་ཏྭཱ ཝུ་ཊྛཱ་པ་ན་ས་མྨུ་ཏིཾ ཡཱ་ཙ་ཏི. ཨ་ཐ ཁོ བྷི་ཀྑུ་ནི་ས་ངྒྷོ ཙ་ཎྜ་ཀཱ་ལི༹ཾ བྷི་ཀྑུ་ནིཾ པ་རི་ཙྪི་ནྡི་ཏྭཱ – ‘‘ཨ་ལཾ ཏཱ་ཝ ཏེ, ཨ་ཡྻེ, ཝུ་ཊྛཱ་པི་ཏེ་ནཱ’’ཏི, ཝུ་ཊྛཱ་པ་ན་ས་མྨུ་ཏིཾ ན ཨ་དཱ་སི. ཙ་ཎྜ་ཀཱ་ལཱི༹ བྷི་ཀྑུ་ནཱི ‘སཱ་དྷཱུ’ཏི པ་ཊི་སྶུ་ཎི. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ས་ངྒྷོ ཨ་ཉྙཱ་སཾ བྷི་ཀྑུ་ནཱི་ནཾ ཝུ་ཊྛཱ་པ་ན་ས་མྨུ་ཏིཾ དེ་ཏི. ཙ་ཎྜ་ཀཱ་ལཱི༹ བྷི་ཀྑུ་ནཱི ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཨ་ཧ་མེ་ཝ ནཱུ་ན བཱ་ལཱ, ཨ་ཧ་མེ་ཝ ནཱུ་ན ཨ་ལ་ཛྫི་ནཱི; ཡཾ ས་ངྒྷོ ཨ་ཉྙཱ་སཾ བྷི་ཀྑུ་ནཱི་ནཾ ཝུ་ཊྛཱ་པ་ན་ས་མྨུ་ཏིཾ དེ་ཏི, མ་ཡ྄ཧ་མེ་ཝ ན དེ་ཏཱི’’ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཙ་ཎྜ་ཀཱ་ལཱི༹ – ‘ཨ་ལཾ ཏཱ་ཝ ཏེ, ཨ་ཡྻེ, ཝུ་ཊྛཱ་པི་ཏེ་ནཱ’ཏི ཝུ་ཙྩ་མཱ་ནཱ ‘སཱ་དྷཱུ’ཏི པ་ཊི་སྶུ་ཎི་ཏྭཱ པ་ཙྪཱ ཁཱི་ཡ་ན་དྷ་མྨཾ ཨཱ་པ་ཛྫི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ‘ཙ་ཎྜ་ཀཱ་ལཱི༹ བྷི་ཀྑུ་ནཱི ཨ་ལཾ ཏཱ་ཝ ཏེ ཨ་ཡྻེ ཝུ་ཊྛཱ་པི་ཏེ་ནཱ’ཏི ཝུ་ཙྩ་མཱ་ནཱ ‘‘སཱ་དྷཱུ’’ཏི པ་ཊི་སྶུ་ཎི་ཏྭཱ པ་ཙྪཱ ཁཱི་ཡ་ན་དྷ་མྨཾ ཨཱ་པ་ཛྫ་ཏཱི་ཏི [ཨཱ་པ་ཛྫཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཙ་ཎྜ་ཀཱ་ལཱི༹ བྷི་ཀྑུ་ནཱི – ‘‘ཨ་ལཾ ཏཱ་ཝ ཏེ, ཨ་ཡྻེ, ཝུ་ཊྛཱ་པི་ཏེ་ནཱ’’ཏི ཝུ་ཙྩ་མཱ་ནཱ ‘སཱ་དྷཱུ’ཏི པ་ཊི་སྶུ་ཎི་ཏྭཱ པ་ཙྪཱ ཁཱི་ཡ་ན་དྷ་མྨཾ ཨཱ་པ་ཛྫི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༤༧. ‘‘ཡཱ པ་ན བྷི་ཀྑུ་ནཱི – ‘ཨ་ལཾ ཏཱ་ཝ ཏེ, ཨ་ཡྻེ, ཝུ་ཊྛཱ་པི་ཏེ་ནཱ’ཏི ཝུ་ཙྩ་མཱ་ནཱ ‘སཱ་དྷཱུ’ཏི པ་ཊི་སྶུ་ཎི་ཏྭཱ པ་ཙྪཱ ཁཱི་ཡ་ན་དྷ་མྨཾ ཨཱ་པ་ཛྫེ་ཡྻ, པཱ་ཙི་ཏྟི་ཡ’’ནྟི.
༡༡༤༨. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ལཾ ཏཱ་ཝ ཏེ ཨ་ཡྻེ ཝུ་ཊྛཱ་པི་ཏེ་ནཱཏི ཨ་ལཾ ཏཱ་ཝ ཏེ, ཨ་ཡྻེ, ཨུ་པ་ས་མྤཱ་དི་ཏེ་ན. ‘སཱ་དྷཱུ’ཏི པ་ཊི་སྶུ་ཎི་ཏྭཱ པ་ཙྪཱ ཁཱི་ཡ་ན་དྷ་མྨཾ ཨཱ་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༡༤༩. ཨ་ནཱ་པ་ཏྟི པ་ཀ་ཏི་ཡཱ ཚ་ནྡཱ དོ་སཱ མོ་ཧཱ བྷ་ཡཱ ཀ་རོ་ནྟཾ ཁི་ཡྻ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཚ་ཊྛ་སི་ཀྑཱ་པ་དཾ ནི་ཊྛི་ཏཾ.
༧. ས་ཏྟ་མ་སི་ཀྑཱ་པ་དཾ
༡༡༥༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ སི་ཀྑ་མཱ་ནཱ ཐུ་ལླ་ན་ནྡཾ བྷི་ཀྑུ་ནིཾ ཨུ་པ་ས་ངྐ་མི་ཏྭཱ ཨུ་པ་ས་མྤ་དཾ ཡཱ་ཙི. ཐུ་ལླ་ན་ནྡཱ བྷི་ཀྑུ་ནཱི ཏཾ སི་ཀྑ་མཱ་ནཾ – ‘‘ས་ཙེ མེ ཏྭཾ, ཨ་ཡྻེ, ཙཱི་ཝ་རཾ ད་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི ཝ་ཏྭཱ, ནེ་ཝ ཝུ་ཊྛཱ་པེ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏི. ཨ་ཐ ཁོ སཱ སི་ཀྑ་མཱ་ནཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ སི་ཀྑ་མཱ་ནཾ – ‘ས་ཙེ མེ ཏྭཾ, ཨ་ཡྻེ, ཙཱི་ཝ་རཾ ད་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’ཏི ཝ་ཏྭཱ, ནེ་ཝ ཝུ་ཊྛཱ་པེ་སྶ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི སི་ཀྑ་མཱ་ནཾ – ‘‘ས་ཙེ མེ ཏྭཾ, ཨ་ཡྻེ, ཙཱི་ཝ་རཾ ད་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི ཝ་ཏྭཱ, ནེ་ཝ ཝུ་ཊྛཱ་པེ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི སི་ཀྑ་མཱ་ནཾ – ‘‘ས་ཙེ མེ ཏྭཾ, ཨ་ཡྻེ, ཙཱི་ཝ་རཾ ད་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི ཝ་ཏྭཱ, ནེ་ཝ ཝུ་ཊྛཱ་པེ་སྶ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༥༡. ‘‘ཡཱ པ་ན བྷི་ཀྑུ་ནཱི སི་ཀྑ་མཱ་ནཾ – ‘ས་ཙེ མེ ཏྭཾ, ཨ་ཡྻེ, ཙཱི་ཝ་རཾ ད་སྶ་སི, ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’ཏི ཝ་ཏྭཱ, སཱ པ་ཙྪཱ ཨ་ན་ནྟ་རཱ་ཡི་ཀི་ནཱི ནེ་ཝ ཝུ་ཊྛཱ་པེ་ཡྻ ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རེ་ཡྻ, པཱ་ཙི་ཏྟི་ཡ’’ནྟི.
༡༡༥༢. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
སི་ཀྑ་མཱ་ནཱ ནཱ་མ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ.
ས་ཙེ མེ ཏྭཾ ཨ་ཡྻེ ཙཱི་ཝ་རཾ ད་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱིཏི ཨེ་ཝཱ་ཧཾ ཏཾ ཨུ་པ་ས་མྤཱ་དེ་སྶཱ་མི.
སཱ པ་ཙྪཱ ཨ་ན་ནྟ་རཱ་ཡི་ཀི་ནཱིཏི ཨ་ས་ཏི ཨ་ནྟ་རཱ་ཡེ.
ནེ་ཝ ཝུ་ཊྛཱ་པེ་ཡྻཱཏི ན ས་ཡཾ ཝུ་ཊྛཱ་པེ་ཡྻ.
ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རེ་ཡྻཱཏི ན ཨ་ཉྙཾ ཨཱ་ཎཱ་པེ་ཡྻ. ‘‘ནེ་ཝ ཝུ་ཊྛཱ་པེ་སྶཱ་མི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶཱ་མཱི’’ཏི དྷུ་རཾ ནི་ཀྑི་ཏྟ་མ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.
༡༡༥༣. ཨ་ནཱ་པ་ཏྟི ས་ཏི ཨ་ནྟ་རཱ་ཡེ, པ་རི་ཡེ་སི་ཏྭཱ ན ལ་བྷ་ཏི, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ས་ཏྟ་མ་སི་ཀྑཱ་པ་དཾ ནི་ཊྛི་ཏཾ.
༨. ཨ་ཊྛ་མ་སི་ཀྑཱ་པ་དཾ
༡༡༥༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ སི་ཀྑ་མཱ་ནཱ ཐུ་ལླ་ན་ནྡཾ བྷི་ཀྑུ་ནིཾ ཨུ་པ་ས་ངྐ་མི་ཏྭཱ ཨུ་པ་ས་མྤ་དཾ ཡཱ་ཙི. ཐུ་ལླ་ན་ནྡཱ བྷི་ཀྑུ་ནཱི ཏཾ སི་ཀྑ་མཱ་ནཾ ‘‘ས་ཙེ མཾ ཏྭཾ, ཨ་ཡྻེ, དྭེ ཝ་སྶཱ་ནི ཨ་ནུ་བ་ནྡྷི་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི ཝ་ཏྭཱ, ནེ་ཝ ཝུ་ཊྛཱ་པེ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏི. ཨ་ཐ ཁོ སཱ སི་ཀྑ་མཱ་ནཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ སི་ཀྑ་མཱ་ནཾ – ས་ཙེ མཾ ཏྭཾ, ཨ་ཡྻེ, དྭེ ཝ་སྶཱ་ནི ཨ་ནུ་བ་ནྡྷི་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི་ཏི ཝ་ཏྭཱ, ནེ་ཝ ཝུ་ཊྛཱ་པེ་སྶ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི སི་ཀྑ་མཱ་ནཾ – ‘‘ས་ཙེ མཾ ཏྭཾ ཨ་ཡྻེ དྭེ ཝ་སྶཱ་ནི ཨ་ནུ་བ་ནྡྷི་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི ཝ་ཏྭཱ, ནེ་ཝ ཝུ་ཊྛཱ་པེ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི སི་ཀྑ་མཱ་ནཾ – ‘‘ས་ཙེ མཾ ཏྭཾ, ཨ་ཡྻེ, དྭེ ཝ་སྶཱ་ནི ཨ་ནུ་བ་ནྡྷི་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི ཝ་ཏྭཱ, ནེ་ཝ ཝུ་ཊྛཱ་པེ་སྶ་ཏི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༥༥. ‘‘ཡཱ པ་ན བྷི་ཀྑུ་ནཱི སི་ཀྑ་མཱ་ནཾ – ‘ས་ཙེ མཾ ཏྭཾ ཨ་ཡྻེ དྭེ ཝ་སྶཱ་ནི ཨ་ནུ་བ་ནྡྷི་སྶ་སི ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’ཏི ཝ་ཏྭཱ, སཱ པ་ཙྪཱ ཨ་ན་ནྟ་རཱ་ཡི་ཀི་ནཱི ནེ་ཝ ཝུ་ཊྛཱ་པེ་ཡྻ ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རེ་ཡྻ, པཱ་ཙི་ཏྟི་ཡ’’ནྟི.
༡༡༥༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
སི་ཀྑ་མཱ་ནཱ ནཱ་མ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ.
ས་ཙེ མཾ ཏྭཾ ཨ་ཡྻེ དྭེ ཝ་སྶཱ་ནི ཨ་ནུ་བ་ནྡྷི་སྶ་སཱིཏི དྭེ སཾ་ཝ་ཙྪ་རཱ་ནི ཨུ་པ་ཊྛ་ཧི་སྶ་སི.
ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱིཏི ཨེ་ཝཱ་ཧཾ ཏཾ ཨུ་པ་ས་མྤཱ་དེ་སྶཱ་མི.
སཱ པ་ཙྪཱ ཨ་ན་ནྟ་རཱ་ཡི་ཀི་ནཱིཏི ཨ་ས་ཏི ཨ་ནྟ་རཱ་ཡེ.
ནེ་ཝ ཝུ་ཊྛཱ་པེ་ཡྻཱཏི ན ས་ཡཾ ཝུ་ཊྛཱ་པེ་ཡྻ.
ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རེ་ཡྻཱཏི ན ཨ་ཉྙཾ ཨཱ་ཎཱ་པེ་ཡྻ. ‘‘ནེ་ཝ ཝུ་ཊྛཱ་པེ་སྶཱ་མི ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶཱ་མཱི’’ཏི དྷུ་རཾ ནི་ཀྑི་ཏྟ་མ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.
༡༡༥༧. ཨ་ནཱ་པ་ཏྟི ས་ཏི ཨ་ནྟ་རཱ་ཡེ, པ་རི་ཡེ་སི་ཏྭཱ ན ལ་བྷ་ཏི, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཨ་ཊྛ་མ་སི་ཀྑཱ་པ་དཾ ནི་ཊྛི་ཏཾ.
༩. ན་ཝ་མ་སི་ཀྑཱ་པ་དཾ
༡༡༥༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི པུ་རི་ས་སཾ་ས་ཊྛཾ ཀུ་མཱ་ར་ཀ་སཾ་ས་ཊྛཾ ཙ་ཎྜིཾ སོ་ཀཱ་ཝཱ་སཾ [སོ་ཀ་ཝ་སྶཾ (སཱི.) སོ་ཀཱ་ཝ་སྶཾ (སྱཱ.)] ཙ་ཎྜ་ཀཱ་ལི༹ཾ སི་ཀྑ་མཱ་ནཾ ཝུ་ཊྛཱ་པེ་ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ པུ་རི་ས་སཾ་ས་ཊྛཾ ཀུ་མཱ་ར་ཀ་སཾ་ས་ཊྛཾ ཙ་ཎྜིཾ སོ་ཀཱ་ཝཱ་སཾ [སོ་ཀ་ཝ་སྶཾ (སཱི.) སོ་ཀཱ་ཝ་སྶཾ (སྱཱ.)] ཙ་ཎྜ་ཀཱ་ལི༹ཾ སི་ཀྑ་མཱ་ནཾ ཝུ་ཊྛཱ་པེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི པུ་རི་ས་སཾ་ས་ཊྛཾ ཀུ་མཱ་ར་ཀ་སཾ་ས་ཊྛཾ ཙ་ཎྜིཾ སོ་ཀཱ་ཝཱ་སཾ [སོ་ཀ་ཝ་སྶཾ (སཱི.) སོ་ཀཱ་ཝ་སྶཾ (སྱཱ.)] ཙ་ཎྜ་ཀཱ་ལི༹ཾ སི་ཀྑ་མཱ་ནཾ ཝུ་ཊྛཱ་པེ་ཏཱི་ཏི [ཝུ་ཊྛཱ་པེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི པུ་རི་ས་སཾ་ས་ཊྛཾ ཀུ་མཱ་ར་ཀ་སཾ་ས་ཊྛཾ ཙ་ཎྜིཾ སོ་ཀཱ་ཝཱ་སཾ ཙ་ཎྜ་ཀཱ་ལི༹ཾ སི་ཀྑ་མཱ་ནཾ ཝུ་ཊྛཱ་པེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༥༩. ‘‘ཡཱ པ་ན བྷི་ཀྑུ་ནཱི པུ་རི་ས་སཾ་ས་ཊྛཾ ཀུ་མཱ་ར་ཀ་སཾ་ས་ཊྛཾ ཙ་ཎྜིཾ སོ་ཀཱ་ཝཱ་སཾ སི་ཀྑ་མཱ་ནཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༦༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པུ་རི་སོ ནཱ་མ པ་ཏྟ་ཝཱི་ས་ཏི་ཝ་སྶོ. ཀུ་མཱ་ར་ཀོ ནཱ་མ ཨ་པྤ་ཏྟ་ཝཱི་ས་ཏི་ཝ་སྶོ. སཾ་ས་ཊྛཱ ནཱ་མ ཨ་ན་ནུ་ལོ་མི་ཀེ་ན ཀཱ་ཡི་ཀ་ཝཱ་ཙ་སི་ཀེ་ན སཾ་ས་ཊྛཱ. ཙ་ཎྜཱི ནཱ་མ ཀོ་དྷ་ནཱ ཝུ་ཙྩ་ཏི.
སོ་ཀཱ་ཝཱ་སཱ ནཱ་མ པ་རེ་སཾ དུ་ཀྑཾ ཨུ་པྤཱ་དེ་ཏི, སོ་ཀཾ ཨཱ་ཝི་ས་ཏི. སི་ཀྑ་མཱ་ནཱ ནཱ་མ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ; ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༦༡. ཨ་ནཱ་པ་ཏྟི ཨ་ཛཱ་ན་ནྟཱི ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ན་ཝ་མ་སི་ཀྑཱ་པ་དཾ ནི་ཊྛི་ཏཾ.
༡༠. ད་ས་མ་སི་ཀྑཱ་པ་དཾ
༡༡༦༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི མཱ་ཏཱ་པི་ཏཱུ་ཧི་པི སཱ་མི་ཀེ་ན་པི ཨ་ན་ནུ་ཉྙཱ་ཏཾ སི་ཀྑ་མཱ་ནཾ ཝུ་ཊྛཱ་པེ་ཏི. མཱ་ཏཱ་པི་ཏ་རོ་པི སཱ་མི་ཀོ་པི ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨ་མྷེ་ཧི ཨ་ན་ནུ་ཉྙཱ་ཏཾ སི་ཀྑ་མཱ་ནཾ ཝུ་ཊྛཱ་པེ་སྶ་ཏཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ མཱ་ཏཱ་པི་ཏཱུ་ན་མྤི སཱ་མི་ཀ་སྶ་པི ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ མཱ་ཏཱ་པི་ཏཱུ་ཧི་པི སཱ་མི་ཀེ་ན་པི ཨ་ན་ནུ་ཉྙཱ་ཏཾ སི་ཀྑ་མཱ་ནཾ ཝུ་ཊྛཱ་པེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི, མཱ་ཏཱ་པི་ཏཱུ་ཧི་པི སཱ་མི་ཀེ་ན་པི ཨ་ན་ནུ་ཉྙཱ་ཏཾ སི་ཀྑ་མཱ་ནཾ ཝུ་ཊྛཱ་པེ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི མཱ་ཏཱ་པི་ཏཱུ་ཧི་པི སཱ་མི་ཀེ་ན་པི ཨ་ན་ནུ་ཉྙཱ་ཏཾ སི་ཀྑ་མཱ་ནཾ ཝུ་ཊྛཱ་པེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༦༣. ‘‘ཡཱ པ་ན བྷི་ཀྑུ་ནཱི མཱ་ཏཱ་པི་ཏཱུ་ཧི ཝཱ སཱ་མི་ཀེ་ན ཝཱ ཨ་ན་ནུ་ཉྙཱ་ཏཾ སི་ཀྑ་མཱ་ནཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༦༤. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
མཱ་ཏཱ་པི་ཏ་རོ ནཱ་མ ཛ་ན་ཀཱ ཝུ་ཙྩ་ནྟི. སཱ་མི་ཀོ ནཱ་མ ཡེ་ན པ་རི་གྒ་ཧི་ཏཱ ཧོ་ཏི. ཨ་ན་ནུ་ཉྙཱ་ཏཱཏི ཨ་ནཱ་པུ་ཙྪཱ. སི་ཀྑ་མཱ་ནཱ ནཱ་མ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
ཝུ་ཊྛཱ་པེ་སྶཱ་མཱི་ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༦༥. ཨ་ནཱ་པ་ཏྟི ཨ་ཛཱ་ན་ནྟཱི ཝུ་ཊྛཱ་པེ་ཏི, ཨ་པ་ལོ་ཀེ་ཏྭཱ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ད་ས་མ་སི་ཀྑཱ་པ་དཾ ནི་ཊྛི་ཏཾ.
༡༡. ཨེ་ཀཱ་ད་ས་མ་སི་ཀྑཱ་པ་དཾ
༡༡༦༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི – ‘‘སི་ཀྑ་མཱ་ནཾ ཝུ་ཊྛཱ་པེ་སྶཱ་མཱི’’ཏི ཐེ་རེ བྷི་ཀྑཱུ ས་ནྣི་པཱ་ཏེ་ཏྭཱ པ་ཧཱུ་ཏཾ ཁཱ་ད་ནཱི་ཡཾ བྷོ་ཛ་ནཱི་ཡཾ པ་སྶི་ཏྭཱ – ‘‘ན ཏཱ་ཝཱ་ཧཾ, ཨ་ཡྻཱ, སི་ཀྑ་མཱ་ནཾ ཝུ་ཊྛཱ་པེ་སྶཱ་མཱི’’ཏི ཐེ་རེ བྷི་ཀྑཱུ ཨུ་ཡྻོ་ཛེ་ཏྭཱ དེ་ཝ་ད་ཏྟཾ ཀོ་ཀཱ་ལི་ཀཾ ཀ་ཊ་མོ་ད་ཀ་ཏི་སྶ་ཀཾ ཁ་ཎྜ་དེ་ཝི་ཡཱ པུ་ཏྟཾ ས་མུ་དྡ་ད་ཏྟཾ ས་ནྣི་པཱ་ཏེ་ཏྭཱ སི་ཀྑ་མཱ་ནཾ ཝུ་ཊྛཱ་པེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ པཱ་རི་ཝཱ་སི་ཀ་ཚ་ནྡ་དཱ་ནེ་ན སི་ཀྑ་མཱ་ནཾ ཝུ་ཊྛཱ་པེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི པཱ་རི་ཝཱ་སི་ཀ་ཚ་ནྡ་དཱ་ནེ་ན སི་ཀྑ་མཱ་ནཾ ཝུ་ཊྛཱ་པེ་ཏཱི་ཏི [ཝུ་ཊྛཱ་པེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི པཱ་རི་ཝཱ་སི་ཀ་ཚ་ནྡ་དཱ་ནེ་ན སི་ཀྑ་མཱ་ནཾ ཝུ་ཊྛཱ་པེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༦༧. ‘‘ཡཱ པ་ན བྷི་ཀྑུ་ནཱི པཱ་རི་ཝཱ་སི་ཀ་ཚ་ནྡ་དཱ་ནེ་ན སི་ཀྑ་མཱ་ནཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༦༨. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པཱ་རི་ཝཱ་སི་ཀ་ཚ་ནྡ་དཱ་ནེ་ནཱཏི ཝུ་ཊྛི་ཏཱ་ཡ པ་རི་སཱ་ཡ. སི་ཀྑ་མཱ་ནཱ ནཱ་མ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༦༩. ཨ་ནཱ་པ་ཏྟི ཨ་ཝུ་ཊྛི་ཏཱ་ཡ པ་རི་སཱ་ཡ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཨེ་ཀཱ་ད་ས་མ་སི་ཀྑཱ་པ་དཾ ནི་ཊྛི་ཏཾ.
༡༢. དྭཱ་ད་ས་མ་སི་ཀྑཱ་པ་དཾ
༡༡༧༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཨ་ནུ་ཝ་སྶཾ ཝུ་ཊྛཱ་པེ་ནྟི, ཨུ་པ་སྶ་ཡོ ན ས་མྨ་ཏི. མ་ནུ་སྶཱ [མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ (སཱི.)] ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་ནུ་ཝ་སྶཾ ཝུ་ཊྛཱ་པེ་སྶ་ནྟི, ཨུ་པ་སྶ་ཡོ ན ས་མྨ་ཏཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་ནུ་ཝ་སྶཾ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨ་ནུ་ཝ་སྶཾ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨ་ནུ་ཝ་སྶཾ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༧༡. ‘‘ཡཱ པ་ན བྷི་ཀྑུ་ནཱི ཨ་ནུ་ཝ་སྶཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༧༢. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ནུ་ཝ་སྶནྟི ཨ་ནུ་སཾ་ཝ་ཙྪ་རཾ. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.
‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༧༣. ཨ་ནཱ་པ་ཏྟི ཨེ་ཀ་ནྟ་རི་ཀཾ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དྭཱ་ད་ས་མ་སི་ཀྑཱ་པ་དཾ ནི་ཊྛི་ཏཾ.
༡༣. ཏེ་ར་ས་མ་སི་ཀྑཱ་པ་དཾ
༡༡༧༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཨེ་ཀཾ ཝ་སྶཾ དྭེ ཝུ་ཊྛཱ་པེ་ནྟི. ཨུ་པ་སྶ་ཡོ ཏ་ཐེ་ཝ ན ས་མྨ་ཏི. མ་ནུ་སྶཱ [མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ (སཱི.)] ཏ་ཐེ་ཝ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨེ་ཀཾ ཝ་སྶཾ དྭེ ཝུ་ཊྛཱ་པེ་སྶ་ནྟི! ཨུ་པ་སྶ་ཡོ ཏ་ཐེ་ཝ ན ས་མྨ་ཏཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨེ་ཀཾ ཝ་སྶཾ དྭེ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨེ་ཀཾ ཝ་སྶཾ དྭེ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨེ་ཀཾ ཝ་སྶཾ དྭེ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༡༧༥. ‘‘ཡཱ པ་ན བྷི་ཀྑུ་ནཱི ཨེ་ཀཾ ཝ་སྶཾ དྭེ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.
༡༡༧༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨེ་ཀཾ ཝ་སྶནྟི ཨེ་ཀཾ སཾ་ཝ་ཙྪ་རཾ. དྭེ ཝུ་ཊྛཱ་པེ་ཡྻཱཏི དྭེ ཨུ་པ་ས་མྤཱ་དེ་ཡྻ.
‘‘དྭེ ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
༡༡༧༧. ཨ་ནཱ་པ་ཏྟི ཨེ་ཀ་ནྟ་རི་ཀཾ ཨེ་ཀཾ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏེ་ར་ས་མ་སི་ཀྑཱ་པ་དཾ ནི་ཊྛི་ཏཾ.
ཀུ་མཱ་རཱི་བྷཱུ་ཏ་ཝ་གྒོ ཨ་ཊྛ་མོ.