༩. ན་ཝ་མ་སི་ཀྑཱ་པ་དཾ

༡༠༡༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎི་སྶ་ནྟི, སེ་ཡྻ་ཐཱ་པི གི་ཧི་ནི་ཡོ ཀཱ་མ་བྷོ་གི་ནི་ཡོ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༡༠༡༤. ‘‘ཡཱ པ་ན བྷི་ཀྑུ་ནཱི ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎེ་ཡྻ, པཱ་ཙི་ཏྟི་ཡ’’ནྟི.

༡༠༡༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཏི་ར་ཙྪཱ་ན་ཝི་ཛྫཱ [ཏི་ར་ཙྪཱ་ན་ཝི་ཛྫཾ (ཀ.)] ནཱ་མ ཡཾ ཀི་ཉྩི བཱ་ཧི་ར་ཀཾ ཨ་ན་ཏྠ་སཾ་ཧི་ཏཾ.

པ་རི་ཡཱ་པུ་ཎེ་ཡྻཱཏི པ་དེ་ན པ་རི་ཡཱ་པུ་ཎཱ་ཏི, པ་དེ པ་དེ ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཀྑ་རཱ་ཡ པ་རི་ཡཱ་པུ་ཎཱ་ཏི, ཨ་ཀྑ་ར་ཀྑ་རཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ.

༡༠༡༦. ཨ་ནཱ་པ་ཏྟི ལེ་ཁཾ པ་རི་ཡཱ་པུ་ཎཱ་ཏི, དྷཱ་ར་ཎཾ པ་རི་ཡཱ་པུ་ཎཱ་ཏི, གུ་ཏྟ་ཏྠཱ་ཡ པ་རི་ཏྟཾ པ་རི་ཡཱ་པུ་ཎཱ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ན་ཝ་མ་སི་ཀྑཱ་པ་དཾ ནི་ཊྛི་ཏཾ.