༧. ས་ཏྟ་མ་སི་ཀྑཱ་པ་དཾ

༡༠༠༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི ཨཱ་ཝ་ས་ཐ་ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏི. ཨ་ཉྙཱ ཨུ་ཏུ་ནི་ཡོ བྷི་ཀྑུ་ནི་ཡོ ན ལ་བྷ་ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨཱ་ཝ་ས་ཐ་ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨཱ་ཝ་ས་ཐ་ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨཱ་ཝ་ས་ཐ་ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༡༠༠༤. ‘‘ཡཱ པ་ན བྷི་ཀྑུ་ནཱི ཨཱ་ཝ་ས་ཐ་ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫེ་ཡྻ, པཱ་ཙི་ཏྟི་ཡ’’ནྟི.

༡༠༠༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཨཱ་ཝ་ས་ཐ་ཙཱི་ཝ་རཾ ནཱ་མ ‘‘ཨུ་ཏུ་ནི་ཡོ བྷི་ཀྑུ་ནི་ཡོ པ་རི་བྷུ་ཉྫ་ནྟཱུ’’ཏི དི་ནྣཾ ཧོ་ཏི.

ཨ་ནི་སྶ་ཛྫི་ཏྭཱ པ་རི་བྷུ་ཉྫེ་ཡྻཱཏི དྭེ་ཏི་སྶོ ར་ཏྟི་ཡོ པ་རི་བྷུ་ཉྫི་ཏྭཱ ཙ་ཏུ་ཏྠ་དི་ཝ་སེ དྷོ་ཝི་ཏྭཱ བྷི་ཀྑུ་ནི་ཡཱ ཝཱ སི་ཀྑ་མཱ་ནཱ་ཡ ཝཱ སཱ་མ་ཎེ་རི་ཡཱ ཝཱ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༡༠༠༦. ཨ་ནི་སྶ་ཛྫི་ཏེ ཨ་ནི་སྶ་ཛྫི་ཏ་ས་ཉྙཱ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནི་སྶ་ཛྫི་ཏེ ཝེ་མ་ཏི་ཀཱ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནི་སྶ་ཛྫི་ཏེ ནི་སྶ་ཛྫི་ཏ་ས་ཉྙཱ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

ནི་སྶ་ཛྫི་ཏེ ཨ་ནི་སྶ་ཛྫི་ཏ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ནི་སྶ་ཛྫི་ཏེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ནི་སྶ་ཛྫི་ཏེ ནི་སྶ་ཛྫི་ཏ་ས་ཉྙཱ ཨ་ནཱ་པ་ཏྟི.

༡༠༠༧. ཨ་ནཱ་པ་ཏྟི ནི་སྶ་ཛྫི་ཏྭཱ པ་རི་བྷུ་ཉྫ་ཏི, པུ་ན པ་རི་ཡཱ་ཡེ་ན པ་རི་བྷུ་ཉྫ་ཏི, ཨ་ཉྙཱ ཨུ་ཏུ་ནི་ཡོ བྷི་ཀྑུ་ནི་ཡོ ན ཧོ་ནྟི, ཨ་ཙྪི་ནྣ་ཙཱི་ཝ་རི་ཀཱ་ཡ, ན་ཊྛ་ཙཱི་ཝ་རི་ཀཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ས་ཏྟ་མ་སི་ཀྑཱ་པ་དཾ ནི་ཊྛི་ཏཾ.