༤. ཏུ་ཝ་ཊྚ་ཝ་གྒོ
༡. པ་ཋ་མ་སི་ཀྑཱ་པ་དཾ
༩༣༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ དྭེ ཨེ་ཀ་མ་ཉྩེ ཏུ་ཝ་ཊྚེ་ནྟི. མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ དྭེ ཨེ་ཀ་མ་ཉྩེ ཏུ་ཝ་ཊྚེ་སྶ་ནྟི, སེ་ཡྻ་ཐཱ་པི གི་ཧི་ནི་ཡོ ཀཱ་མ་བྷོ་གི་ནི་ཡོ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ དྭེ ཨེ་ཀ་མ་ཉྩེ ཏུ་ཝ་ཊྚེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ དྭེ ཨེ་ཀ་མ་ཉྩེ ཏུ་ཝ་ཊྚེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ དྭེ ཨེ་ཀ་མ་ཉྩེ ཏུ་ཝ་ཊྚེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༣༣. ‘‘ཡཱ པ་ན བྷི་ཀྑུ་ནི་ཡོ དྭེ ཨེ་ཀ་མ་ཉྩེ ཏུ་ཝ་ཊྚེ་ཡྻུཾ, པཱ་ཙི་ཏྟི་ཡ’’ནྟི.
༩༣༤. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནི་ཡོཏི ཨུ་པ་ས་མྤ་ནྣཱ་ཡོ ཝུ་ཙྩ་ནྟི.
དྭེ ཨེ་ཀ་མ་ཉྩེ ཏུ་ཝ་ཊྚེ་ཡྻུནྟི ཨེ་ཀཱ་ཡ ནི་པ་ནྣཱ་ཡ ཨ་པ་རཱ ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་བྷོ ཝཱ ནི་པ་ཛྫ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་ཊྛ་ཧི་ཏྭཱ པུ་ན་པྤུ་ནཾ ནི་པ་ཛྫ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ.
༩༣༥. ཨ་ནཱ་པ་ཏྟི ཨེ་ཀཱ་ཡ ནི་པ་ནྣཱ་ཡ ཨ་པ་རཱ ནི་སཱི་ད་ཏི, ཨུ་བྷོ ཝཱ ནི་སཱི་ད་ནྟི, ཨུ་མྨ་ཏྟི་ཀཱ་ནཾ, ཨཱ་དི་ཀ་མྨི་ཀཱ་ན་ནྟི.
པ་ཋ་མ་སི་ཀྑཱ་པ་དཾ ནི་ཊྛི་ཏཾ.
༢. དུ་ཏི་ཡ་སི་ཀྑཱ་པ་དཾ
༩༣༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་ནྟི. མ་ནུ་སྶཱ ཝི་ཧཱ་ར་ཙཱ་རི་ཀཾ ཨཱ་ཧི་ཎྜ་ནྟཱ པ་སྶི་ཏྭཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་སྶ་ནྟི, སེ་ཡྻ་ཐཱ་པི གི་ཧི་ནི་ཡོ ཀཱ་མ་བྷོ་གི་ནི་ཡོ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༣༧. ‘‘ཡཱ པ་ན བྷི་ཀྑུ་ནི་ཡོ དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་ཡྻུཾ, པཱ་ཙི་ཏྟི་ཡ’’ནྟི.
༩༣༨. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནི་ཡོཏི ཨུ་པ་ས་མྤ་ནྣཱ་ཡོ ཝུ་ཙྩ་ནྟི.
དྭེ ཨེ་ཀ་ཏྠ་ར་ཎ་པཱ་ཝུ་ར་ཎཱ ཏུ་ཝ་ཊྚེ་ཡྻུནྟི ཏ་ཉྙེ་ཝ ཨ་ཏྠ་རི་ཏྭཱ ཏ་ཉྙེ་ཝ པཱ་རུ་པ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ.
༩༣༩. ཨེ་ཀ་ཏྠ་ར་ཎ་པཱ་ཝུ་ར་ཎེ ཨེ་ཀ་ཏྠ་ར་ཎ་པཱ་ཝུ་ར་ཎ་ས་ཉྙཱ ཏུ་ཝ་ཊྚེ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ. ཨེ་ཀ་ཏྠ་ར་ཎ་པཱ་ཝུ་ར་ཎེ ཝེ་མ་ཏི་ཀཱ ཏུ་ཝ་ཊྚེ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ. ཨེ་ཀ་ཏྠ་ར་ཎ་པཱ་ཝུ་ར་ཎེ ནཱ་ན་ཏྠ་ར་ཎ་པཱ་ཝུ་ར་ཎ་ས་ཉྙཱ ཏུ་ཝ་ཊྚེ་ནྟི, ཨཱ་པ་ཏྟི པཱ་ཙི་ཏྟི་ཡ་སྶ.
ཨེ་ཀ་ཏྠ་ར་ཎེ ནཱ་ནཱ་པཱ་ཝུ་ར་ཎེ [ནཱ་ནཱ་པཱ་ཝུ་ར་ཎ་ས་ཉྙཱ (ཀ.)], ཨཱ་པ་ཏྟི དུ་ཀྐ་ཊ་སྶ. ནཱ་ན་ཏྠ་ར་ཎེ ཨེ་ཀ་པཱ་ཝུ་ར་ཎེ [ཨེ་ཀ་པཱ་ཝུ་ར་ཎ་ས་ཉྙཱ (ཀ.)], ཨཱ་པ་ཏྟི དུ་ཀྐ་ཊ་སྶ. ནཱ་ན་ཏྠ་ར་ཎ་པཱ་ཝུ་ར་ཎེ ཨེ་ཀ་ཏྠ་ར་ཎ་པཱ་ཝུ་ར་ཎ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ནཱ་ན་ཏྠ་ར་ཎ་པཱ་ཝུ་ར་ཎེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ནཱ་ན་ཏྠ་ར་ཎ་པཱ་ཝུ་ར་ཎེ ནཱ་ན་ཏྠ་ར་ཎ་པཱ་ཝུ་ར་ཎ་ས་ཉྙཱ, ཨ་ནཱ་པ་ཏྟི.
༩༤༠. ཨ་ནཱ་པ་ཏྟི ཝ་ཝ་ཏྠཱ་ནཾ ད་སྶེ་ཏྭཱ ནི་པ་ཛྫ་ནྟི, ཨུ་མྨ་ཏྟི་ཀཱ་ནཾ, ཨཱ་དི་ཀ་མྨི་ཀཱ་ན་ནྟི.
དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.
༣. ཏ་ཏི་ཡ་སི་ཀྑཱ་པ་དཾ
༩༤༡. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི བ་ཧུ་སྶུ་ཏཱ ཧོ་ཏི བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ. བྷ་དྡཱ་པི ཀཱ་པི་ལཱ་ནཱི བ་ཧུ་སྶུ་ཏཱ ཧོ་ཏི བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ ཨུ་ལཱ༹་ར་ས་མྦྷཱ་ཝི་ཏཱ. མ་ནུ་སྶཱ – ‘‘ཨ་ཡྻཱ བྷ་དྡཱ ཀཱ་པི་ལཱ་ནཱི བ་ཧུ་སྶུ་ཏཱ བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ ཨུ་ལཱ༹་ར་ས་མྦྷཱ་ཝི་ཏཱ’’ཏི བྷ་དྡཾ ཀཱ་པི་ལཱ་ནིཾ པ་ཋ་མཾ པ་ཡི་རུ་པཱ་སི་ཏྭཱ, པ་ཙྪཱ ཐུ་ལླ་ན་ནྡཾ བྷི་ཀྑུ་ནིཾ པ་ཡི་རུ་པཱ་ས་ནྟི. ཐུ་ལླ་ན་ནྡཱ བྷི་ཀྑུ་ནཱི ཨི་སྶཱ་པ་ཀ་ཏཱ – ‘‘ཨི་མཱ ཀི་ར ཨ་པྤི་ཙྪཱ ས་ནྟུ་ཊྛཱ པ་ཝི་ཝི་ཏྟཱ ཨ་སཾ་ས་ཊྛཱ ཡཱ ཨི་མཱ ས་ཉྙ་ཏྟི་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་ར་ནྟཱི’’ཏི བྷ་དྡཱ་ཡ ཀཱ་པི་ལཱ་ནི་ཡཱ པུ་ར་ཏོ ཙ་ངྐ་མ་ཏི་པི ཏི་ཊྛ་ཏི་པི ནི་སཱི་ད་ཏི་པི སེ་ཡྻ་མྤི ཀ་པྤེ་ཏི ཨུ་དྡི་ས་ཏི་པི ཨུ་དྡི་སཱ་པེ་ཏི་པི ས་ཛ྄ཛྷཱ་ཡ་མྤི ཀ་རོ་ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨ་ཡྻཱ་ཡ བྷ་དྡཱ་ཡ ཀཱ་པི་ལཱ་ནི་ཡཱ ས་ཉྩི་ཙྩ ཨ་ཕཱ་སུཾ ཀ་རི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི བྷ་དྡཱ་ཡ ཀཱ་པི་ལཱ་ནི་ཡཱ ས་ཉྩི་ཙྩ ཨ་ཕཱ་སུཾ ཀ་རོ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི བྷ་དྡཱ་ཡ ཀཱ་པི་ལཱ་ནི་ཡཱ ས་ཉྩི་ཙྩ ཨ་ཕཱ་སུཾ ཀ་རི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༤༢. ‘‘ཡཱ པ་ན བྷི་ཀྑུ་ནཱི བྷི་ཀྑུ་ནི་ཡཱ ས་ཉྩི་ཙྩ ཨ་ཕཱ་སུཾ ཀ་རེ་ཡྻ, པཱ་ཙི་ཏྟི་ཡ’’ནྟི.
༩༤༣. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
བྷི་ཀྑུ་ནི་ཡཱཏི ཨ་ཉྙཱ་ཡ བྷི་ཀྑུ་ནི་ཡཱ.
ས་ཉྩི་ཙྩཱཏི ཛཱ་ན་ནྟཱི ས་ཉྫཱ་ན་ནྟཱི ཙེ་ཙྩ ཨ་བྷི་ཝི་ཏ་རི་ཏྭཱ ཝཱི་ཏི་ཀྐ་མོ.
ཨ་ཕཱ་སུཾ ཀ་རེ་ཡྻཱཏི – ‘‘ཨི་མི་ནཱ ཨི་མི་སྶཱ ཨ་ཕཱ་སུ བྷ་ཝི་སྶ་ཏཱི’’ཏི ཨ་ནཱ་པུ་ཙྪཱ པུ་ར་ཏོ ཙ་ངྐ་མ་ཏི ཝཱ ཏི་ཊྛ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི ཨུ་དྡི་ས་ཏི ཝཱ ཨུ་དྡི་སཱ་པེ་ཏི ཝཱ ས་ཛ྄ཛྷཱ་ཡཾ ཝཱ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༩༤༤. ཨུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱ ས་ཉྩི་ཙྩ ཨ་ཕཱ་སུཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣཱ་ཡ ཝེ་མ་ཏི་ཀཱ ས་ཉྩི་ཙྩ ཨ་ཕཱ་སུཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱ ས་ཉྩི་ཙྩ ཨ་ཕཱ་སུཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣཱ་ཡ ས་ཉྩི་ཙྩ ཨ་ཕཱ་སུཾ ཀ་རོ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༩༤༥. ཨ་ནཱ་པ་ཏྟི ན ཨ་ཕཱ་སུཾ ཀ་ཏྟུ་ཀཱ་མཱ ཨཱ་པུ་ཙྪཱ པུ་ར་ཏོ ཙ་ངྐ་མ་ཏི ཝཱ ཏི་ཊྛ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི ཨུ་དྡི་ས་ཏི ཝཱ ཨུ་དྡི་སཱ་པེ་ཏི ཝཱ ས་ཛ྄ཛྷཱ་ཡཾ ཝཱ ཀ་རོ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་སི་ཀྑཱ་པ་དཾ ནི་ཊྛི་ཏཾ.
༤. ཙ་ཏུ་ཏྠ་སི་ཀྑཱ་པ་དཾ
༩༤༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི དུ་ཀྑི་ཏཾ ས་ཧ་ཛཱི་ཝི་ནིཾ ནེ་ཝ ཨུ་པ་ཊྛེ་ཏི ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ དུ་ཀྑི་ཏཾ ས་ཧ་ཛཱི་ཝི་ནིཾ ནེ་ཝ ཨུ་པ་ཊྛེ་སྶ་ཏི ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི དུ་ཀྑི་ཏཾ ས་ཧ་ཛཱི་ཝི་ནིཾ ནེ་ཝ ཨུ་པ་ཊྛེ་ཏི ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི དུ་ཀྑི་ཏཾ ས་ཧ་ཛཱི་ཝི་ནིཾ ནེ་ཝ ཨུ་པ་ཊྛེ་སྶ་ཏི ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༤༧. ‘‘ཡཱ པ་ན བྷི་ཀྑུ་ནཱི དུ་ཀྑི་ཏཾ ས་ཧ་ཛཱི་ཝི་ནིཾ ནེ་ཝ ཨུ་པ་ཊྛེ་ཡྻ ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རེ་ཡྻ, པཱ་ཙི་ཏྟི་ཡ’’ནྟི.
༩༤༨. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
དུ་ཀྑི་ཏཱ ནཱ་མ གི་ལཱ་ནཱ ཝུ་ཙྩ་ཏི.
ས་ཧ་ཛཱི་ཝི་ནཱི ནཱ་མ ས་དྡྷི་ཝི་ཧཱ་རི་ནཱི ཝུ་ཙྩ་ཏི.
ནེ་ཝ ཨུ་པ་ཊྛེ་ཡྻཱཏི ན ས་ཡཾ ཨུ་པ་ཊྛེ་ཡྻ.
ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རེ་ཡྻཱཏི ན ཨ་ཉྙཾ ཨཱ་ཎཱ་པེ་ཡྻ.
‘‘ནེ་ཝ ཨུ་པ་ཊྛེ་སྶཱ་མི, ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶཱ་མཱི’’ཏི དྷུ་རཾ ནི་ཀྑི་ཏྟ་མ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནྟེ་ཝཱ་སི་ནིཾ ཝཱ ཨ་ནུ་པ་ས་མྤ་ནྣཾ ཝཱ ནེ་ཝ ཨུ་པ་ཊྛེ་ཏི, ན ཨུ་པ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རོ་ཏི, ཨཱ་པ་ཏྟི དུ་ཀྐ་ཊ་སྶ.
༩༤༩. ཨ་ནཱ་པ་ཏྟི ས་ཏི ཨ་ནྟ་རཱ་ཡེ, པ་རི་ཡེ་སི་ཏྭཱ ན ལ་བྷ་ཏི, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཙ་ཏུ་ཏྠ་སི་ཀྑཱ་པ་དཾ ནི་ཊྛི་ཏཾ.
༥. པ་ཉྩ་མ་སི་ཀྑཱ་པ་དཾ
༩༥༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷ་དྡཱ ཀཱ་པི་ལཱ་ནཱི སཱ་ཀེ་ཏེ ཝ་སྶཾ ཨུ་པ་ག་ཏཱ ཧོ་ཏི. སཱ ཀེ་ན་ཙི་དེ་ཝ ཀ་ར་ཎཱི་ཡེ་ན ཨུ་བྦཱ་ལ༹ྷཱ ཐུ་ལླ་ན་ནྡཱ་ཡ བྷི་ཀྑུ་ནི་ཡཱ ས་ནྟི་ཀེ དཱུ་ཏཾ པཱ་ཧེ་སི – ‘‘ས་ཙེ མེ ཨ་ཡྻཱ ཐུ་ལླ་ན་ནྡཱ ཨུ་པ་སྶ་ཡཾ ད་དེ་ཡྻ ཨཱ་ག་ཙྪེ་ཡྻཱ་མ་ཧཾ སཱ་ཝ་ཏྠི’’ནྟི. ཐུ་ལླ་ན་ནྡཱ བྷི་ཀྑུ་ནཱི ཨེ་ཝ་མཱ་ཧ – ‘‘ཨཱ་ག་ཙྪ་ཏུ, ད་སྶཱ་མཱི’’ཏི. ཨ་ཐ ཁོ བྷ་དྡཱ ཀཱ་པི་ལཱ་ནཱི སཱ་ཀེ་ཏཱ སཱ་ཝ་ཏྠིཾ ཨ་ག་མཱ་སི. ཐུ་ལླ་ན་ནྡཱ བྷི་ཀྑུ་ནཱི བྷ་དྡཱ་ཡ ཀཱ་པི་ལཱ་ནི་ཡཱ ཨུ་པ་སྶ་ཡཾ ཨ་དཱ་སི. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི བ་ཧུ་སྶུ་ཏཱ ཧོ་ཏི བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ. བྷ་དྡཱ་པི ཀཱ་པི་ལཱ་ནཱི བ་ཧུ་སྶུ་ཏཱ [བ་ཧུ་སྶུ་ཏཱ་ཡེ་ཝ (ཀ.)] ཧོ་ཏི བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ ཨུ་ལཱ༹་ར་ས་མྦྷཱ་ཝི་ཏཱ. མ་ནུ་སྶཱ – ‘‘ཨ་ཡྻཱ བྷ་དྡཱ ཀཱ་པི་ལཱ་ནཱི བ་ཧུ་སྶུ་ཏཱ བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ ཨུ་ལཱ༹་ར་ས་མྦྷཱ་ཝི་ཏཱ’’ཏི བྷ་དྡཾ ཀཱ་པི་ལཱ་ནིཾ པ་ཋ་མཾ པ་ཡི་རུ་པཱ་སི་ཏྭཱ པ་ཙྪཱ ཐུ་ལླ་ན་ནྡཾ བྷི་ཀྑུ་ནིཾ པ་ཡི་རུ་པཱ་ས་ནྟི. ཐུ་ལླ་ན་ནྡཱ བྷི་ཀྑུ་ནཱི ཨི་སྶཱ་པ་ཀ་ཏཱ – ‘‘ཨི་མཱ ཀི་ར ཨ་པྤི་ཙྪཱ ས་ནྟུ་ཊྛཱ པ་ཝི་ཝི་ཏྟཱ ཨ་སཾ་ས་ཊྛཱ ཡཱ ཨི་མཱ ས་ཉྙ་ཏྟི་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་ར་ནྟཱི’’ཏི ཀུ་པི་ཏཱ ཨ་ན་ཏྟ་མ་ནཱ བྷ་དྡཾ ཀཱ་པི་ལཱ་ནིཾ ཨུ་པ་སྶ་ཡཱ ནི་ཀྐ་ཌྜྷི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨ་ཡྻཱ་ཡ བྷ་དྡཱ་ཡ ཀཱ་པི་ལཱ་ནི་ཡཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི བྷ་དྡཱ་ཡ ཀཱ་པི་ལཱ་ནི་ཡཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷ་ཏཱི་ཏི [ནི་ཀྐ་ཌྜྷཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི བྷ་དྡཱ་ཡ ཀཱ་པི་ལཱ་ནི་ཡཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༥༡. ‘‘ཡཱ པ་ན བྷི་ཀྑུ་ནཱི བྷི་ཀྑུ་ནི་ཡཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷེ་ཡྻ ཝཱ ནི་ཀྐ་ཌྜྷཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༩༥༢. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
བྷི་ཀྑུ་ནི་ཡཱཏི ཨ་ཉྙཱ་ཡ བྷི་ཀྑུ་ནི་ཡཱ. ཨུ་པ་སྶ་ཡོ ནཱ་མ ཀ་ཝཱ་ཊ་བ་དྡྷོ ཝུ་ཙྩ་ཏི. ད་ཏྭཱཏི ས་ཡཾ ད་ཏྭཱ. ཀུ་པི་ཏཱ ཨ་ན་ཏྟ་མ་ནཱཏི ཨ་ན་བྷི་ར་དྡྷཱ ཨཱ་ཧ་ཏ་ཙི་ཏྟཱ ཁི་ལ་ཛཱ་ཏཱ.
ནི་ཀྐ་ཌྜྷེ་ཡྻཱཏི ག་བྦྷེ ག་ཧེ་ཏྭཱ པ་མུ་ཁཾ ནི་ཀྐ་ཌྜྷ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པ་མུ་ཁེ ག་ཧེ་ཏྭཱ བ་ཧི ནི་ཀྐ་ཌྜྷ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨེ་ཀེ་ན པ་ཡོ་གེ་ན བ་ཧུ་ཀེ་པི དྭཱ་རེ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ནི་ཀྐ་ཌྜྷཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ [ཨེ་ཏྠ ‘‘ཨཱ་པ་ཏྟི དུ་ཀྐ་ཊ་སྶཱ’’ཏི ས་བྦ་ཏྠ དི་སྶ་ཏི, བྷི་ཀྑུ་ཝི་བྷ་ངྒེ པ་ན ཨི་དི་སེ་སུ ཨཱ་ཎ་ཏྟི་ས་ཧ་ག་ཏ་སི་ཀྑཱ་པ་དེ་སུ ‘‘ཨ་ཉྙཾ ཨཱ་ཎཱ་པེ་ཏི ཨཱ་པ་ཏྟི པཱ་ཙི་ཏྟི་ཡ་སྶཱ’’ཏི ཨཱ་ག་ཏ་ཏྟཱ ཏ་མ་ནུ་ཝ་ཏྟི་ཏྭཱ ཝི་སོ་དྷི་ཏ་མི་དཾ]. ས་ཀིཾ ཨཱ་ཎ་ཏྟཱ བ་ཧུ་ཀེ་པི དྭཱ་རེ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༩༥༣. ཨུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣཱ་ཡ ཝེ་མ་ཏི་ཀཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱ ཨུ་པ་སྶ་ཡཾ ད་ཏྭཱ ཀུ་པི་ཏཱ ཨ་ན་ཏྟ་མ་ནཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ཀ་ཝཱ་ཊ་བ་དྡྷཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཾ ཀ་ཝཱ་ཊ་བ་དྡྷཱ ཝཱ ཨ་ཀ་ཝཱ་ཊ་བ་དྡྷཱ ཝཱ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣཱ་ཡ ཨ་ནུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༩༥༤. ཨ་ནཱ་པ་ཏྟི ཨ་ལ་ཛྫི་ནིཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨུ་མྨ་ཏྟི་ཀཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, བྷ་ཎྜ་ན་ཀཱ་རི་ཀཾ ཀ་ལ་ཧ་ཀཱ་རི་ཀཾ ཝི་ཝཱ་ད་ཀཱ་རི་ཀཾ བྷ་སྶ་ཀཱ་རི་ཀཾ ས་ངྒྷེ ཨ་དྷི་ཀ་ར་ཎ་ཀཱ་རི་ཀཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨ་ནྟེ་ཝཱ་སི་ནིཾ ཝཱ ས་དྡྷི་ཝི་ཧཱ་རི་ནིཾ ཝཱ ན ས་མྨཱ ཝ་ཏྟ་ནྟིཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཏ་སྶཱ པ་རི་ཀྑཱ་རཾ ནི་ཀྐ་ཌྜྷ་ཏི ཝཱ ནི་ཀྐ་ཌྜྷཱ་པེ་ཏི ཝཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཉྩ་མ་སི་ཀྑཱ་པ་དཾ ནི་ཊྛི་ཏཾ.
༦. ཚ་ཊྛ་སི་ཀྑཱ་པ་དཾ
༩༥༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཙ་ཎྜ་ཀཱ་ལཱི༹ བྷི་ཀྑུ་ནཱི སཾ་ས་ཊྛཱ ཝི་ཧ་ར་ཏི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཙ་ཎྜ་ཀཱ་ལཱི༹ སཾ་ས་ཊྛཱ ཝི་ཧ་རི་སྶ་ཏི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཙ་ཎྜ་ཀཱ་ལཱི༹ བྷི་ཀྑུ་ནཱི སཾ་ས་ཊྛཱ ཝི་ཧ་ར་ཏི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཙ་ཎྜ་ཀཱ་ལཱི༹ བྷི་ཀྑུ་ནཱི སཾ་ས་ཊྛཱ ཝི་ཧ་རི་སྶ་ཏི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༥༦. ‘‘ཡཱ པ་ན བྷི་ཀྑུ་ནཱི སཾ་ས་ཊྛཱ ཝི་ཧ་རེ་ཡྻ ག་ཧ་པ་ཏི་ནཱ ཝཱ ག་ཧ་པ་ཏི་པུ་ཏྟེ་ན ཝཱ སཱ བྷི་ཀྑུ་ནཱི བྷི་ཀྑུ་ནཱི་ཧི ཨེ་ཝ་མ་སྶ ཝ་ཙ་ནཱི་ཡཱ – ‘མཱ་ཡྻེ, སཾ་ས་ཊྛཱ ཝི་ཧ་རི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི. ཝི་ཝི་ཙྩཱ་ཡྻེ; ཝི་ཝེ་ཀ་ཉྙེ་ཝ བྷ་གི་ནི་ཡཱ ས་ངྒྷོ ཝ་ཎྞེ་ཏཱི’ཏི. ཨེ་ཝ་ཉྩ [ཨེ་ཝ་ཉྩ པ་ན (ཀ.)] སཱ བྷི་ཀྑུ་ནཱི བྷི་ཀྑུ་ནཱི་ཧི ཝུ་ཙྩ་མཱ་ནཱ ཏ་ཐེ་ཝ པ་གྒ་ཎྷེ་ཡྻ, སཱ བྷི་ཀྑུ་ནཱི བྷི་ཀྑུ་ནཱི་ཧི ཡཱ་ཝ་ཏ་ཏི་ཡཾ ས་མ་ནུ་བྷཱ་སི་ཏ་བྦཱ ཏ་སྶ པ་ཊི་ནི་སྶ་གྒཱ་ཡ. ཡཱ་ཝ་ཏ་ཏི་ཡ་ཉྩེ ས་མ་ནུ་བྷཱ་སཱི་ཡ་མཱ་ནཱ ཏཾ པ་ཊི་ནི་སྶ་ཛྫེ་ཡྻ, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫེ་ཡྻ, པཱ་ཙི་ཏྟི་ཡ’’ནྟི.
༩༥༧. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
སཾ་ས་ཊྛཱ ནཱ་མ ཨ་ན་ནུ་ལོ་མི་ཀེ་ན ཀཱ་ཡི་ཀ་ཝཱ་ཙ་སི་ཀེ་ན སཾ་ས་ཊྛཱ.
ག་ཧ་པ་ཏི ནཱ་མ ཡོ ཀོ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.
ག་ཧ་པ་ཏི་པུ་ཏྟོ ནཱ་མ ཡེ ཀེ་ཙི [ཡོ ཀོ་ཙི (ཀ.)] པུ་ཏྟ་བྷཱ་ཏ་རོ.
སཱ བྷི་ཀྑུ་ནཱིཏི ཡཱ སཱ སཾ་ས་ཊྛཱ བྷི་ཀྑུ་ནཱི.
བྷི་ཀྑུ་ནཱི་ཧཱིཏི ཨ་ཉྙཱ་ཧི བྷི་ཀྑུ་ནཱི་ཧི. ཡཱ པ་སྶ་ནྟི ཡཱ སུ་ཎ་ནྟི ཏཱ་ཧི ཝ་ཏྟ་བྦཱ – ‘‘མཱ་ཡྻེ, སཾ་ས་ཊྛཱ ཝི་ཧ་རི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི. ཝི་ཝི་ཙྩཱ་ཡྻེ; ཝི་ཝེ་ཀ་ཉྙེ་ཝ བྷ་གི་ནི་ཡཱ ས་ངྒྷོ ཝ་ཎྞེ་ཏཱི’’ཏི. དུ་ཏི་ཡ་མྤི ཝ་ཏྟ་བྦཱ. ཏ་ཏི་ཡ་མྤི ཝ་ཏྟ་བྦཱ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སུ་ཏྭཱ ན ཝ་ད་ནྟི, ཨཱ་པ་ཏྟི དུ་ཀྐ་ཊ་སྶ. སཱ བྷི་ཀྑུ་ནཱི ས་ངྒྷ་མ་ཛ྄ཛྷ་མྤི ཨཱ་ཀ་ཌྜྷི་ཏྭཱ ཝ་ཏྟ་བྦཱ – ‘‘མཱ་ཡྻེ, སཾ་ས་ཊྛཱ ཝི་ཧ་རི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི. ཝི་ཝི་ཙྩཱ་ཡྻེ; ཝི་ཝེ་ཀ་ཉྙེ་ཝ་བྷ་གི་ནི་ཡཱ ས་ངྒྷོ ཝ་ཎྞེ་ཏཱི’’ཏི. དུ་ཏི་ཡ་མྤི ཝ་ཏྟ་བྦཱ. ཏ་ཏི་ཡ་མྤི ཝ་ཏྟ་བྦཱ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སཱ བྷི་ཀྑུ་ནཱི ས་མ་ནུ་བྷཱ་སི་ཏ་བྦཱ. ཨེ་ཝ་ཉྩ པ་ན, བྷི་ཀྑ་ཝེ, ས་མ་ནུ་བྷཱ་སི་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ས་ངྒྷོ ཉཱ་པེ་ཏ་བྦོ –
༩༥༨. ‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ བྷི་ཀྑུ་ནཱི སཾ་ས་ཊྛཱ ཝི་ཧ་ར་ཏི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི. སཱ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ བྷི་ཀྑུ་ནིཾ ས་མ་ནུ་བྷཱ་སེ་ཡྻ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཨེ་སཱ ཉ་ཏྟི.
‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ བྷི་ཀྑུ་ནཱི སཾ་ས་ཊྛཱ ཝི་ཧ་ར་ཏི ག་ཧ་པ་ཏི་ནཱ་པི ག་ཧ་པ་ཏི་པུ་ཏྟེ་ན་པི. སཱ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ས་ངྒྷོ ཨི་ཏྠ་ནྣཱ་མཾ བྷི་ཀྑུ་ནིཾ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ ཨ་ཡྻཱ་ཡ ཁ་མ་ཏི ཨི་ཏྠ་ནྣཱ་མཱ་ཡ བྷི་ཀྑུ་ནི་ཡཱ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སཱ ཏུ་ཎྷ་སྶ; ཡ་སྶཱ ན་ཀྑ་མ་ཏི, སཱ བྷཱ་སེ་ཡྻ.
‘‘དུ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ… ཏ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ….
‘‘ས་མ་ནུ་བྷ་ཊྛཱ ས་ངྒྷེ་ན ཨི་ཏྠ་ནྣཱ་མཱ བྷི་ཀྑུ་ནཱི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ; ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨཱ་པ་ཏྟི པཱ་ཙི་ཏྟི་ཡ་སྶ.
༩༥༩. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ ན པ་ཊི་ནི་སྶ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀཱ ན པ་ཊི་ནི་སྶ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ ན པ་ཊི་ནི་སྶ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༩༦༠. ཨ་ནཱ་པ་ཏྟི ཨ་ས་མ་ནུ་བྷཱ་ས་ནྟི་ཡཱ, པ་ཊི་ནི་སྶ་ཛྫ་ནྟི་ཡཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཚ་ཊྛ་སི་ཀྑཱ་པ་དཾ ནི་ཊྛི་ཏཾ.
༧. ས་ཏྟ་མ་སི་ཀྑཱ་པ་དཾ
༩༦༡. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཨ་ནྟོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་ར་ནྟི. དྷུ་ཏྟཱ དཱུ་སེ་ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་ནྟོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་རི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨ་ནྟོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་ར་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨ་ནྟོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༦༢. ‘‘ཡཱ པ་ན བྷི་ཀྑུ་ནཱི ཨ་ནྟོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་རེ་ཡྻ, པཱ་ཙི་ཏྟི་ཡ’’ནྟི.
༩༦༣. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ནྟོ་ར་ཊྛེཏི ཡ་སྶ ཝི་ཛི་ཏེ ཝི་ཧ་ར་ཏི, ཏ་སྶ ར་ཊྛེ.
སཱ་ས་ངྐཾ ནཱ་མ ཏ་སྨིཾ མ་གྒེ ཙོ་རཱ་ནཾ ནི་ཝི་ཊྛོ་ཀཱ་སོ དི་སྶ་ཏི, བྷུ་ཏྟོ་ཀཱ་སོ དི་སྶ་ཏི, ཋི་ཏོ་ཀཱ་སོ དི་སྶ་ཏི, ནི་སི་ནྣོ་ཀཱ་སོ དི་སྶ་ཏི, ནི་པ་ནྣོ་ཀཱ་སོ དི་སྶ་ཏི.
ས་པྤ་ཊི་བྷ་ཡཾ ནཱ་མ ཏ་སྨིཾ མ་གྒེ ཙོ་རེ་ཧི མ་ནུ་སྶཱ ཧ་ཏཱ དི་སྶ་ནྟི, ཝི་ལུ་ཏྟཱ དི་སྶ་ནྟི, ཨཱ་ཀོ་ཊི་ཏཱ དི་སྶ་ནྟི.
ཨ་ས་ཏྠི་ཀཱ ནཱ་མ ཝི་ནཱ ས་ཏྠེ་ན.
ཙཱ་རི་ཀཾ ཙ་རེ་ཡྻཱཏི ཀུ་ཀྐུ་ཊ་ས་མྤཱ་ཏེ གཱ་མེ གཱ་མ་ནྟ་རེ གཱ་མ་ནྟ་རེ ཨཱ་པ་ཏྟི པཱ་ཙི་ཏྟི་ཡ་སྶ. ཨ་གཱ་མ་ཀེ ཨ་ར་ཉྙེ ཨ་དྡྷ་ཡོ་ཛ་ནེ ཨ་དྡྷ་ཡོ་ཛ་ནེ ཨཱ་པ་ཏྟི པཱ་ཙི་ཏྟི་ཡ་སྶ.
༩༦༤. ཨ་ནཱ་པ་ཏྟི ས་ཏྠེ་ན ས་ཧ ག་ཙྪ་ཏི, ཁེ་མེ ཨ་པྤ་ཊི་བྷ་ཡེ ག་ཙྪ་ཏི, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ས་ཏྟ་མ་སི་ཀྑཱ་པ་དཾ ནི་ཊྛི་ཏཾ.
༨. ཨ་ཊྛ་མ་སི་ཀྑཱ་པ་དཾ
༩༦༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཏི་རོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་ར་ནྟི. དྷུ་ཏྟཱ དཱུ་སེ་ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཏི་རོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་རི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཏི་རོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་ར་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཏི་རོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༦༦. ‘‘ཡཱ པ་ན བྷི་ཀྑུ་ནཱི ཏི་རོ་ར་ཊྛེ སཱ་ས་ངྐ་ས་མྨ་ཏེ ས་པྤ་ཊི་བྷ་ཡེ ཨ་ས་ཏྠི་ཀཱ ཙཱ་རི་ཀཾ ཙ་རེ་ཡྻ, པཱ་ཙ་ཏྟི་ཡ’’ནྟི.
༩༦༧. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཏི་རོ་ར་ཊྛེཏི ཡ་སྶ ཝི་ཛི་ཏེ ཝི་ཧ་ར་ཏི, ཏཾ ཋ་པེ་ཏྭཱ ཨ་ཉྙ་སྶ ར་ཊྛེ.
སཱ་ས་ངྐཾ ནཱ་མ ཏ་སྨིཾ མ་གྒེ ཙོ་རཱ་ནཾ ནི་ཝི་ཊྛོ་ཀཱ་སོ དི་སྶ་ཏི, བྷུ་ཏྟོ་ཀཱ་སོ དི་སྶ་ཏི, ཋི་ཏོ་ཀཱ་སོ དི་སྶ་ཏི, ནི་སི་ནྣོ་ཀཱ་སོ དི་སྶ་ཏི, ནི་པ་ནྣོ་ཀཱ་སོ དི་སྶ་ཏི.
ས་པྤ་ཊི་བྷ་ཡཾ ནཱ་མ ཏ་སྨིཾ མ་གྒེ ཙོ་རེ་ཧི མ་ནུ་སྶཱ ཧ་ཏཱ དི་སྶ་ནྟི, ཝི་ལུ་ཏྟཱ དི་སྶ་ནྟི, ཨཱ་ཀོ་ཊི་ཏཱ དི་སྶ་ནྟི.
ཨ་ས་ཏྠི་ཀཱ ནཱ་མ ཝི་ནཱ ས་ཏྠེ་ན.
ཙཱ་རི་ཀཾ ཙ་རེ་ཡྻཱཏི ཀུ་ཀྐུ་ཊ་ས་མྤཱ་ཏེ གཱ་མེ གཱ་མ་ནྟ་རེ གཱ་མ་ནྟ་རེ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་གཱ་མ་ཀེ ཨ་ར་ཉྙེ ཨ་དྡྷ་ཡོ་ཛ་ནེ ཨ་དྡྷ་ཡོ་ཛ་ནེ ཨཱ་པ་ཏྟི པཱ་ཙི་ཏྟི་ཡ་སྶ.
༩༦༨. ཨ་ནཱ་པ་ཏྟི ས་ཏྠེ་ན ས་ཧ ག་ཙྪ་ཏི, ཁེ་མེ ཨ་པྤ་ཊི་བྷ་ཡེ ག་ཙྪ་ཏི, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཨ་ཊྛ་མ་སི་ཀྑཱ་པ་དཾ ནི་ཊྛི་ཏཾ.
༩. ན་ཝ་མ་སི་ཀྑཱ་པ་དཾ
༩༦༩. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཨ་ནྟོ་ཝ་སྶཾ ཙཱ་རི་ཀཾ ཙ་ར་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་ནྟོ་ཝ་སྶཾ ཙཱ་རི་ཀཾ ཙ་རི་སྶ་ནྟི ཧ་རི་ཏཱ་ནི ཏི་ཎཱ་ནི ཙ ས་མྨ་དྡ་ནྟཱ, ཨེ་ཀི་ནྡྲི་ཡཾ ཛཱི་ཝཾ ཝི་ཧེ་ཋེ་ནྟཱ, བ་ཧཱུ ཁུ་དྡ་ཀེ པཱ་ཎེ ས་ངྒྷཱ་ཏཾ ཨཱ་པཱ་དེ་ནྟཱ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་ནྟོ་ཝ་སྶཾ ཙཱ་རི་ཀཾ ཙ་རི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨ་ནྟོ་ཝ་སྶཾ ཙཱ་རི་ཀཾ ཙ་ར་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨ་ནྟོ་ཝ་སྶཾ ཙཱ་རི་ཀཾ ཙ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༧༠. ‘‘ཡཱ པ་ན བྷི་ཀྑུ་ནཱི ཨ་ནྟོ་ཝ་སྶཾ ཙཱ་རི་ཀཾ ཙ་རེ་ཡྻ, པཱ་ཙི་ཏྟི་ཡ’’ནྟི.
༩༧༡. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ནྟོ་ཝ་སྶནྟི པུ་རི་མཾ ཝཱ ཏེ་མཱ་སཾ པ་ཙྪི་མཾ ཝཱ ཏེ་མཱ་སཾ ཨ་ཝ་སི་ཏྭཱ.
ཙཱ་རི་ཀཾ ཙ་རེ་ཡྻཱཏི ཀུ་ཀྐུ་ཊ་ས་མྤཱ་ཏེ གཱ་མེ གཱ་མ་ནྟ་རེ གཱ་མ་ནྟ་རེ ཨཱ་པ་ཏྟི པཱ་ཙི་ཏྟི་ཡ་སྶ. ཨ་གཱ་མ་ཀེ ཨ་ར་ཉྙེ ཨ་དྡྷ་ཡོ་ཛ་ནེ ཨ་དྡྷ་ཡོ་ཛ་ནེ ཨཱ་པ་ཏྟི པཱ་ཙི་ཏྟི་ཡ་སྶ.
༩༧༢. ཨ་ནཱ་པ་ཏྟི ས་ཏྟཱ་ཧ་ཀ་ར་ཎཱི་ཡེ་ན ག་ཙྪ་ཏི, ཀེ་ན་ཙི ཨུ་བྦཱ་ལ༹ྷཱ ག་ཙྪ་ཏི, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ན་ཝ་མ་སི་ཀྑཱ་པ་དཾ ནི་ཊྛི་ཏཾ.
༡༠. ད་ས་མ་སི་ཀྑཱ་པ་དཾ
༩༧༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ཏ་ཏྠེ་ཝ རཱ་ཛ་ག་ཧེ ཝ་སྶཾ ཝ་ས་ནྟི, ཏ་ཏྠ ཧེ་མ་ནྟཾ, ཏ་ཏྠ གི་མྷཾ. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཨཱ་ཧུ་ནྡ་རི་ཀཱ བྷི་ཀྑུ་ནཱི་ནཾ དི་སཱ ཨ་ནྡྷ་ཀཱ་རཱ, ན ཨི་མཱ་སཾ དི་སཱ པ་ཀྑཱ་ཡ་ནྟཱི’’ཏི. ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ…པེ… ས་དྡྷ་མྨ་ཊྛི་ཏི་ཡཱ ཝི་ན་ཡཱ་ནུ་གྒ་ཧཱ་ཡ. ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༧༤. ‘‘ཡཱ པ་ན བྷི་ཀྑུ་ནཱི ཝ་སྶཾ་ཝུ་ཊྛཱ ཙཱ་རི་ཀཾ ན པ་ཀྐ་མེ་ཡྻ ཨ་ནྟ་མ་སོ ཚ་པྤ་ཉྩ་ཡོ་ཛ་ནཱ་ནི་པི, པཱ་ཙི་ཏྟི་ཡ’’ནྟི.
༩༧༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཝ་སྶཾ་ཝུ་ཊྛཱ ནཱ་མ པུ་རི་མཾ ཝཱ ཏེ་མཱ་སཾ པ་ཙྪི་མཾ ཝཱ ཏེ་མཱ་སཾ ཝུ་ཊྛཱ.
‘‘ཙཱ་རི་ཀཾ ན པ་ཀྐ་མི་སྶཱ་མི ཨ་ནྟ་མ་སོ ཚ་པྤ་ཉྩ་ཡོ་ཛ་ནཱ་ནི་པཱི’’ཏི དྷུ་རཾ ནི་ཀྑི་ཏྟ་མ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.
༩༧༦. ཨ་ནཱ་པ་ཏྟི ས་ཏི ཨ་ནྟ་རཱ་ཡེ, པ་རི་ཡེ་སི་ཏྭཱ དུ་ཏི་ཡི་ཀཾ བྷི་ཀྑུ་ནིཾ ན ལ་བྷ་ཏི, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ད་ས་མ་སི་ཀྑཱ་པ་དཾ ནི་ཊྛི་ཏཾ.
ཏུ་ཝ་ཊྚ་ཝ་གྒོ ཙ་ཏུ་ཏྠོ.