༤. ཙ་ཏུ་ཏྠ་སི་ཀྑཱ་པ་དཾ
༨༩༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ བྷི་ཀྑུ་ནཱི་ནཾ ཧ་ཏྠེ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན ཛ་ན་པ་ད་ཙཱ་རི་ཀཾ པ་ཀྐ་མ་ནྟི. ཏཱ་ནི ཙཱི་ཝ་རཱ་ནི ཙི་རཾ ནི་ཀྑི་ཏྟཱ་ནི ཀ་ཎྞ་ཀི་ཏཱ་ནི ཧོ་ནྟི. ཏཱ་ནི བྷི་ཀྑུ་ནི་ཡོ ཨོ་ཏཱ་པེ་ནྟི. བྷི་ཀྑུ་ནི་ཡོ ཏཱ བྷི་ཀྑུ་ནི་ཡོ ཨེ་ཏ་ད་ཝོ་ཙུཾ – ‘‘ཀ་སྶི་མཱ་ནི, ཨ་ཡྻེ, ཙཱི་ཝ་རཱ་ནི ཀ་ཎྞ་ཀི་ཏཱ་ནཱི’’ཏི? ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ བྷི་ཀྑུ་ནཱི་ནཾ ཧ་ཏྠེ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན ཛ་ན་པ་ད་ཙཱ་རི་ཀཾ པ་ཀྐ་མི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ བྷི་ཀྑུ་ནཱི་ནཾ ཧ་ཏྠེ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན ཛ་ན་པ་ད་ཙཱ་རི་ཀཾ པ་ཀྐ་མ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ བྷི་ཀྑུ་ནཱི་ནཾ ཧ་ཏྠེ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན ཛ་ན་པ་ད་ཙཱ་རི་ཀཾ པ་ཀྐ་མི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༩༨. ‘‘ཡཱ པ་ན བྷི་ཀྑུ་ནཱི པ་ཉྩཱ་ཧི་ཀཾ ས་ངྒྷཱ་ཊི་ཙཱ་རཾ [ས་ངྒྷཱ་ཊི་ཝཱ་རཾ (སྱཱ.)] ཨ་ཏི་ཀྐཱ་མེ་ཡྻ, པཱ་ཙི་ཏྟི་ཡ’’ནྟི.
༨༩༩. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་ཉྩཱ་ཧི་ཀཾ ས་ངྒྷཱ་ཊི་ཙཱ་རཾ ཨ་ཏི་ཀྐཱ་མེ་ཡྻཱཏི པ་ཉྩ་མཾ དི་ཝ་སཾ པ་ཉྩ ཙཱི་ཝ་རཱ་ནི ནེ་ཝ ནི་ཝཱ་སེ་ཏི ན པཱ་རུ་པ་ཏི ན ཨོ་ཏཱ་པེ་ཏི, པ་ཉྩ་མཾ དི་ཝ་སཾ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༩༠༠. པ་ཉྩཱ་ཧཱ་ཏི་ཀྐ་ནྟེ ཨ་ཏི་ཀྐ་ནྟ་ས་ཉྙཱ, ཨཱ་པ་ཏྟི པཱ་ཙི་ཏྟི་ཡ་སྶ. པ་ཉྩཱ་ཧཱ་ཏི་ཀྐ་ནྟེ ཝེ་མ་ཏི་ཀཱ, ཨཱ་པ་ཏྟི པཱ་ཙི་ཏྟི་ཡ་སྶ. པ་ཉྩཱ་ཧཱ་ཏི་ཀྐ་ནྟེ ཨ་ན་ཏི་ཀྐ་ནྟ་ས་ཉྙཱ, ཨཱ་པ་ཏྟི པཱ་ཙི་ཏྟི་ཡ་སྶ.
པ་ཉྩཱ་ཧཱ་ན་ཏི་ཀྐ་ནྟེ ཨ་ཏི་ཀྐ་ནྟ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. པ་ཉྩཱ་ཧཱ་ན་ཏི་ཀྐ་ནྟེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. པ་ཉྩཱ་ཧཱ་ན་ཏི་ཀྐ་ནྟེ ཨ་ན་ཏི་ཀྐ་ནྟ་ས་ཉྙཱ, ཨ་ནཱ་པ་ཏྟི.
༩༠༡. ཨ་ནཱ་པ་ཏྟི པ་ཉྩ་མཾ དི་ཝ་སཾ པ་ཉྩ ཙཱི་ཝ་རཱ་ནི ནི་ཝཱ་སེ་ཏི ཝཱ པཱ་རུ་པ་ཏི ཝཱ ཨོ་ཏཱ་པེ་ཏི ཝཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཙ་ཏུ་ཏྠ་སི་ཀྑཱ་པ་དཾ ནི་ཊྛི་ཏཾ.