༧. ས་ཏྟ་མ་སི་ཀྑཱ་པ་དཾ

༨༦༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑུ་ནི་ཡོ ཀོ་ས་ལེ་སུ ཛ་ན་པ་དེ སཱ་ཝ་ཏྠིཾ ག་ཙྪ་ནྟི་ཡོ སཱ་ཡཾ ཨ་ཉྙ་ཏ་རཾ གཱ་མཾ ཨུ་པ་ག་ནྟྭཱ ཨ་ཉྙ་ཏ་རཾ བྲཱ་ཧྨ་ཎ་ཀུ་ལཾ ཨུ་པ་ས་ངྐ་མི་ཏྭཱ ཨོ་ཀཱ་སཾ ཡཱ་ཙིཾ་སུ. ཨ་ཐ ཁོ སཱ བྲཱ་ཧྨ་ཎཱི ཏཱ བྷི་ཀྑུ་ནི་ཡོ ཨེ་ཏ་ད་ཝོ་ཙ – ‘‘ཨཱ་ག་མེ་ཐ, ཨ་ཡྻེ, ཡཱ་ཝ བྲཱ་ཧྨ་ཎོ ཨཱ་ག་ཙྪ་ཏཱི’’ཏི. བྷི་ཀྑུ་ནི་ཡོ – ‘‘ཡཱ་ཝ བྲཱ་ཧྨ་ཎོ ཨཱ་ག་ཙྪ་ཏཱི’’ཏི སེ་ཡྻཾ ས་ནྠ་རི་ཏྭཱ ཨེ་ཀ་ཙྩཱ ནི་སཱི་དིཾ་སུ ཨེ་ཀ་ཙྩཱ ནི་པ་ཛྫིཾ་སུ. ཨ་ཐ ཁོ སོ བྲཱ་ཧྨ་ཎོ ར་ཏྟིཾ ཨཱ་ག་ནྟྭཱ ཏཾ བྲཱ་ཧྨ་ཎིཾ ཨེ་ཏ་ད་ཝོ་ཙ – ‘‘ཀཱ ཨི་མཱ’’ཏི? ‘‘བྷི་ཀྑུ་ནི་ཡོ, ཨ་ཡྻཱ’’ཏི. ‘‘ནི་ཀྐ་ཌྜྷ་ཐ ཨི་མཱ མུ་ཎྜཱ བ་ནྡྷ་ཀི་ནི་ཡོ’’ཏི, གྷ་ར་ཏོ ནི་ཀྐ་ཌྜྷཱ་པེ་སི. ཨ་ཐ ཁོ ཏཱ བྷི་ཀྑུ་ནི་ཡོ སཱ་ཝ་ཏྠིཾ ག་ནྟྭཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཝི་ཀཱ་ལེ ཀུ་ལཱ་ནི ཨུ་པ་ས་ངྐ་མི་ཏྭཱ སཱ་མི་ཀེ ཨ་ནཱ་པུ་ཙྪཱ སེ་ཡྻཾ ས་ནྠ་རི་ཏྭཱ ཨ་བྷི་ནི་སཱི་དི་སྶ་ནྟི་པི ཨ་བྷི་ནི་པ་ཛྫི་སྶ་ནྟི་པཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཝི་ཀཱ་ལེ ཀུ་ལཱ་ནི ཨུ་པ་ས་ངྐ་མི་ཏྭཱ སཱ་མི་ཀེ ཨ་ནཱ་པུ་ཙྪཱ སེ་ཡྻཾ ས་ནྠ་རི་ཏྭཱ ཨ་བྷི་ནི་སཱི་ད་ནྟི་པི ཨ་བྷི་ནི་པ་ཛྫ་ནྟི་པཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཝི་ཀཱ་ལེ ཀུ་ལཱ་ནི ཨུ་པ་ས་ངྐ་མི་ཏྭཱ སཱ་མི་ཀེ ཨ་ནཱ་པུ་ཙྪཱ སེ་ཡྻཾ ས་ནྠ་རི་ཏྭཱ ཨ་བྷི་ནི་སཱི་དི་སྶ་ནྟི་པི ཨ་བྷི་ནི་པ་ཛྫི་སྶ་ནྟི་པི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༨༦༥. ‘‘ཡཱ པ་ན བྷི་ཀྑུ་ནཱི ཝི་ཀཱ་ལེ ཀུ་ལཱ་ནི ཨུ་པ་ས་ངྐ་མི་ཏྭཱ སཱ་མི་ཀེ ཨ་ནཱ་པུ་ཙྪཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཨ་བྷི་ནི་སཱི་དེ་ཡྻ ཝཱ ཨ་བྷི་ནི་པ་ཛྫེ་ཡྻ ཝཱ, པཱ་ཙི་ཏྟི་ཡ’’ནྟི.

༨༦༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཝི་ཀཱ་ལོ ནཱ་མ ཨ་ཏྠ་ངྒ་ཏེ སཱུ་རི་ཡེ ཡཱ་ཝ ཨ་རུ་ཎུ་གྒ་མ་ནཱ.

ཀུ་ལཾ ནཱ་མ ཙ་ཏྟཱ་རི ཀུ་ལཱ་ནི – ཁ་ཏྟི་ཡ་ཀུ་ལཾ, བྲཱ་ཧྨ་ཎ་ཀུ་ལཾ, ཝེ་སྶ་ཀུ་ལཾ སུ་དྡ་ཀུ་ལཾ. ཨུ་པ་ས་ངྐ་མི་ཏྭཱཏི ཏ་ཏྠ ག་ནྟྭཱ.

སཱ་མི་ཀེ ཨ་ནཱ་པུ་ཙྪཱཏི ཡོ ཏ་སྨིཾ ཀུ་ལེ མ་ནུ་སྶོ སཱ་མི་ཀོ དཱ་ཏུཾ, ཏཾ ཨ་ནཱ་པུ་ཙྪཱ.

སེ་ཡྻཾ ནཱ་མ ཨ་ནྟ་མ་སོ པ་ཎྞ་ས་ནྠཱ་རོ་པི. ས་ནྠ་རི་ཏྭཱཏི ས་ཡཾ ས་ནྠ་རི་ཏྭཱ. ས་ནྠ་རཱ་པེ་ཏྭཱཏི ཨ་ཉྙཾ ས་ནྠ་རཱ་པེ་ཏྭཱ. ཨ་བྷི་ནི་སཱི་དེ་ཡྻཱཏི ཏ་སྨིཾ ཨ་བྷི་ནི་སཱི་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་བྷི་ནི་པ་ཛྫེ་ཡྻཱཏི ཏ་སྨིཾ ཨ་བྷི་ནི་པ་ཛྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༨༦༧. ཨ་ནཱ་པུ་ཙྪི་ཏེ ཨ་ནཱ་པུ་ཙྪི་ཏ་ས་ཉྙཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནཱ་པུ་ཙྪི་ཏེ ཝེ་མ་ཏི་ཀཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནཱ་པུ་ཙྪི་ཏེ ཨཱ་པུ་ཙྪི་ཏ་ས་ཉྙཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.

ཨཱ་པུ་ཙྪི་ཏེ ཨ་ནཱ་པུ་ཙྪི་ཏ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨཱ་པུ་ཙྪི་ཏེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨཱ་པུ་ཙྪི་ཏེ ཨཱ་པུ་ཙྪི་ཏ་ས་ཉྙཱ, ཨ་ནཱ་པ་ཏྟི.

༨༦༨. ཨ་ནཱ་པ་ཏྟི ཨཱ་པུ་ཙྪཱ སེ་ཡྻཾ ས་ནྠ་རི་ཏྭཱ ཝཱ ས་ནྠ་རཱ་པེ་ཏྭཱ ཝཱ ཨ་བྷི་ནི་སཱི་ད་ཏི ཝཱ ཨ་བྷི་ནི་པ་ཛྫ་ཏི ཝཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ས་ཏྟ་མ་སི་ཀྑཱ་པ་དཾ ནི་ཊྛི་ཏཾ.