༥. པ་ཉྩ་མ་སི་ཀྑཱ་པ་དཾ
༨༥༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི ཨ་ཉྙ་ཏ་ར་སྶ ཀུ་ལ་སྶ ཀུ་ལཱུ་པི་ཀཱ ཧོ་ཏི ནི་ཙྩ་བྷ་ཏྟི་ཀཱ. ཨ་ཐ ཁོ སཱ བྷི་ཀྑུ་ནཱི པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཏཾ ཀུ་ལཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ས་ནེ ནི་སཱི་དི་ཏྭཱ སཱ་མི་ཀེ ཨ་ནཱ་པུ་ཙྪཱ པ་ཀྐཱ་མི. ཏ་སྶ ཀུ་ལ་སྶ དཱ་སཱི གྷ་རཾ ས་མྨ་ཛྫ་ནྟཱི ཏཾ ཨཱ་ས་ནཾ བྷཱ་ཛ་ན་ནྟ་རི་ཀཱ་ཡ པ་ཀྑི་པི. མ་ནུ་སྶཱ ཏཾ ཨཱ་ས་ནཾ ཨ་པ་སྶ་ནྟཱ ཏཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ཀ་ཧཾ ཏཾ, ཨ་ཡྻེ, ཨཱ་ས་ན’’ནྟི? ‘‘ནཱ་ཧཾ ཏཾ, ཨཱ་ཝུ་སོ, ཨཱ་ས་ནཾ པ་སྶཱ་མཱི’’ཏི. ‘‘དེ་ཐཱ་ཡྻེ, ཏཾ ཨཱ་ས་ན’’ནྟི པ་རི་བྷཱ་སི་ཏྭཱ ནི་ཙྩ་བྷ་ཏྟཾ པ་ཙྪི་ནྡིཾ་སུ. ཨ་ཐ ཁོ ཏེ མ་ནུ་སྶཱ གྷ་རཾ སོ་དྷེ་ནྟཱ ཏཾ ཨཱ་ས་ནཾ བྷཱ་ཛ་ན་ནྟ་རི་ཀཱ་ཡ པ་སྶི་ཏྭཱ ཏཾ བྷི་ཀྑུ་ནིཾ ཁ་མཱ་པེ་ཏྭཱ ནི་ཙྩ་བྷ་ཏྟཾ པ་ཊྛ་པེ་སུཾ. ཨ་ཐ ཁོ སཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི པུ་རེ་བྷ་ཏྟཾ ཀུ་ལཱ་ནི ཨུ་པ་ས་ངྐ་མི་ཏྭཱ ཨཱ་ས་ནེ ནི་སཱི་དི་ཏྭཱ སཱ་མི་ཀེ ཨ་ནཱ་པུ་ཙྪཱ པ་ཀྐ་མི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི པུ་རེ་བྷ་ཏྟཾ ཀུ་ལཱ་ནི ཨུ་པ་ས་ངྐ་མི་ཏྭཱ ཨཱ་ས་ནེ ནི་སཱི་དི་ཏྭཱ སཱ་མི་ཀེ ཨ་ནཱ་པུ་ཙྪཱ པ་ཀྐ་མ་ཏཱི་ཏི [པ་ཀྐ་མཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ བྷི་ཀྑུ་ནཱི པུ་རེ་བྷ་ཏྟཾ ཀུ་ལཱ་ནི ཨུ་པ་ས་ངྐ་མི་ཏྭཱ ཨཱ་ས་ནེ ནི་སཱི་དི་ཏྭཱ སཱ་མི་ཀེ ཨ་ནཱ་པུ་ཙྪཱ པ་ཀྐ་མི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༥༥. ‘‘ཡཱ པ་ན བྷི་ཀྑུ་ནཱི པུ་རེ་བྷ་ཏྟཾ ཀུ་ལཱ་ནི ཨུ་པ་ས་ངྐ་མི་ཏྭཱ ཨཱ་ས་ནེ ནི་སཱི་དི་ཏྭཱ སཱ་མི་ཀེ ཨ་ནཱ་པུ་ཙྪཱ པ་ཀྐ་མེ་ཡྻ, པཱ་ཙི་ཏྟི་ཡ’’ནྟི.
༨༥༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པུ་རེ་བྷ་ཏྟཾ ནཱ་མ ཨ་རུ་ཎུ་གྒ་མ་ནཾ ཨུ་པཱ་དཱ་ཡ ཡཱ་ཝ མ་ཛ྄ཛྷ་ནྷི་ཀཱ.
ཀུ་ལཾ ནཱ་མ ཙ་ཏྟཱ་རི ཀུ་ལཱ་ནི – ཁ་ཏྟི་ཡ་ཀུ་ལཾ, བྲཱ་ཧྨ་ཎ་ཀུ་ལཾ, ཝེ་སྶ་ཀུ་ལཾ, སུ་དྡ་ཀུ་ལཾ. ཨུ་པ་ས་ངྐ་མི་ཏྭཱཏི ཏ་ཏྠ ག་ནྟྭཱ.
ཨཱ་ས་ནཾ ནཱ་མ པ་ལླ་ངྐ་སྶ ཨོ་ཀཱ་སོ ཝུ་ཙྩ་ཏི. ནི་སཱི་དི་ཏྭཱཏི ཏ་སྨིཾ ནི་སཱི་དི་ཏྭཱ.
སཱ་མི་ཀེ ཨ་ནཱ་པུ་ཙྪཱ པ་ཀྐ་མེ་ཡྻཱཏི ཡོ ཏ་སྨིཾ ཀུ་ལེ མ་ནུ་སྶོ ཝི་ཉྙཱུ ཏཾ ཨ་ནཱ་པུ་ཙྪཱ ཨ་ནོ་ཝ་སྶ་ཀཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཛ྄ཛྷོ་ཀཱ་སེ ཨུ་པ་ཙཱ་རཾ ཨ་ཏི་ཀྐཱ་མེ་ནྟི་ཡཱ ཨཱ་པ་ཏྟི པཱ་ཙི་ཏྟི་ཡ་སྶ.
༨༥༧. ཨ་ནཱ་པུ་ཙྪི་ཏེ ཨ་ནཱ་པུ་ཙྪི་ཏ་ས་ཉྙཱ པ་ཀྐ་མ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནཱ་པུ་ཙྪི་ཏེ ཝེ་མ་ཏི་ཀཱ པ་ཀྐ་མ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནཱ་པུ་ཙྪི་ཏེ ཨཱ་པུ་ཙྪི་ཏ་ས་ཉྙཱ པ་ཀྐ་མ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
པ་ལླ་ངྐ་སྶ ཨ་ནོ་ཀཱ་སེ ཨཱ་པ་ཏྟི དུ་ཀྐ་ཊ་སྶ. ཨཱ་པུ་ཙྪི་ཏེ ཨ་ནཱ་པུ་ཙྪི་ཏ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨཱ་པུ་ཙྪི་ཏེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨཱ་པུ་ཙྪི་ཏེ ཨཱ་པུ་ཙྪི་ཏ་ས་ཉྙཱ, ཨ་ནཱ་པ་ཏྟི.
༨༥༨. ཨ་ནཱ་པ་ཏྟི ཨཱ་པུ་ཙྪཱ ག་ཙྪ་ཏི, ཨ་སཾ་ཧཱ་རི་མེ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཉྩ་མ་སི་ཀྑཱ་པ་དཾ ནི་ཊྛི་ཏཾ.