༢. དུ་ཏི་ཡ་སི་ཀྑཱ་པ་དཾ
༨༤༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷ་དྡཱ་ཡ ཀཱ་པི་ལཱ་ནི་ཡཱ ཨ་ནྟེ་ཝཱ་སི་ནི་ཡཱ བྷི་ཀྑུ་ནི་ཡཱ ཉཱ་ཏ་ཀོ པུ་རི་སོ གཱ་མ་ཀཱ སཱ་ཝ་ཏྠིཾ ཨ་ག་མཱ་སི ཀེ་ན་ཙི་དེ་ཝ ཀ་ར་ཎཱི་ཡེ་ན. ཨ་ཐ ཁོ སཱ བྷི་ཀྑུ་ནཱི – ‘‘བྷ་ག་ཝ་ཏཱ པ་ཊི་ཀྑི་ཏྟཾ ར་ཏྟ་ནྡྷ་ཀཱ་རེ ཨ་པྤ་དཱི་པེ པུ་རི་སེ་ན ས་དྡྷིཾ ཨེ་ཀེ་ནེ་ཀཱ ས་ནྟི་ཊྛི་ཏུཾ ས་ལླ་པི་ཏུ’’ནྟི ཏེ་ནེ་ཝ པུ་རི་སེ་ན ས་དྡྷིཾ པ་ཊི་ཙྪ་ནྣེ ཨོ་ཀཱ་སེ ཨེ་ཀེ་ནེ་ཀཱ ས་ནྟི་ཊྛ་ཏི་པི ས་ལླ་པ་ཏི་པི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི པ་ཊི་ཙྪ་ནྣེ ཨོ་ཀཱ་སེ པུ་རི་སེ་ན ས་དྡྷིཾ ཨེ་ཀེ་ནེ་ཀཱ ས་ནྟི་ཊྛི་སྶ་ཏི་པི ས་ལླ་པི་སྶ་ཏི་པཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི པ་ཊི་ཙྪ་ནྣེ ཨོ་ཀཱ་སེ པུ་རི་སེ་ན ས་དྡྷིཾ ཨེ་ཀེ་ནེ་ཀཱ ས་ནྟི་ཊྛ་ཏི་པི ས་ལླ་པ་ཏི་པཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི པ་ཊི་ཙྪ་ནྣེ ཨོ་ཀཱ་སེ པུ་རི་སེ་ན ས་དྡྷིཾ ཨེ་ཀེ་ནེ་ཀཱ ས་ནྟི་ཊྛི་སྶ་ཏི་པི ས་ལླ་པི་སྶ་ཏི་པི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༤༣. ‘‘ཡཱ པ་ན བྷི་ཀྑུ་ནཱི པ་ཊི་ཙྪ་ནྣེ ཨོ་ཀཱ་སེ པུ་རི་སེ་ན ས་དྡྷིཾ ཨེ་ཀེ་ནེ་ཀཱ ས་ནྟི་ཊྛེ་ཡྻ ཝཱ ས་ལླ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༨༤༤. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་ཊི་ཙྪ་ནྣོ ནཱ་མ ཨོ་ཀཱ་སོ ཀུ་ཊྚེ་ན ཝཱ ཀ་ཝཱ་ཊེ་ན ཝཱ ཀི་ལ་ཉྫེ་ན ཝཱ སཱ་ཎི་པཱ་ཀཱ་རེ་ན ཝཱ རུ་ཀྑེ་ན ཝཱ ཐ་མྦྷེ་ན ཝཱ ཀོ་ཏྠ་ལི༹་ཡཱ ཝཱ ཡེ་ན ཀེ་ན་ཙི པ་ཊི་ཙྪ་ནྣོ ཧོ་ཏི.
པུ་རི་སོ ནཱ་མ མ་ནུ་སྶ་པུ་རི་སོ ན ཡ་ཀྑོ ན པེ་ཏོ ན ཏི་ར་ཙྪཱ་ན་ག་ཏོ ཝི་ཉྙཱུ པ་ཊི་བ་ལོ ས་ནྟི་ཊྛི་ཏུཾ ས་ལླ་པི་ཏུཾ.
ས་དྡྷིནྟི ཨེ་ཀ་ཏོ. ཨེ་ཀེ་ནེ་ཀཱཏི པུ་རི་སོ ཙེ་ཝ ཧོ་ཏི བྷི་ཀྑུ་ནཱི ཙ.
ས་ནྟི་ཊྛེ་ཡྻ ཝཱཏི པུ་རི་ས་སྶ ཧ་ཏྠ་པཱ་སེ ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ས་ལླ་པེ་ཡྻ ཝཱཏི པུ་རི་ས་སྶ ཧ་ཏྠ་པཱ་སེ ཋི་ཏཱ ས་ལླ་པ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཧ་ཏྠ་པཱ་སཾ ཝི་ཛ་ཧི་ཏྭཱ ས་ནྟི་ཊྛ་ཏི ཝཱ ས་ལླ་པ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཡ་ཀྑེ་ན ཝཱ པེ་ཏེ་ན ཝཱ པ་ཎྜ་ཀེ་ན ཝཱ ཏི་ར་ཙྪཱ་ན་ག་ཏ་མ་ནུ་སྶ་ཝི་གྒ་ཧེ་ན ཝཱ ས་དྡྷིཾ ས་ནྟི་ཊྛ་ཏི ཝཱ ས་ལླ་པ་ཏི ཝཱ, ཨཱ་པ་ཏྟི དུ་ཀྐ་ཊ་སྶ.
༨༤༥. ཨ་ནཱ་པ་ཏྟི ཡོ ཀོ་ཙི ཝི་ཉྙཱུ དུ་ཏི་ཡོ ཧོ་ཏི, ཨ་ར་ཧོ་པེ་ཀྑཱ, ཨ་ཉྙ་ཝི་ཧི་ཏཱ ས་ནྟི་ཊྛ་ཏི ཝཱ ས་ལླ་པ་ཏི ཝཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.