༥. ཨཱུ་ན་ཝཱི་ས་ཏི་ཝ་སྶ་སི་ཀྑཱ་པ་དཾ
༤༠༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. [ཨི་དཾ ཝ་ཏྠུ མ་ཧཱ་ཝ. ༩༩] ཏེ་ན ཁོ པ་ན ས་མ་ཡེ་ན རཱ་ཛ་ག་ཧེ ས་ཏྟ་ར་ས་ཝ་གྒི་ཡཱ དཱ་ར་ཀཱ ས་ཧཱ་ཡ་ཀཱ ཧོ་ནྟི. ཨུ་པཱ་ལི་དཱ་ར་ཀོ ཏེ་སཾ པཱ་མོ་ཀྑོ ཧོ་ཏི. ཨ་ཐ ཁོ ཨུ་པཱ་ལི་སྶ མཱ་ཏཱ་པི་ཏཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ ཨུ་པཱ་ཡེ་ན ཨུ་པཱ་ལི ཨ་མྷཱ་ཀཾ ཨ་ཙྩ་ཡེ་ན སུ་ཁ་ཉྩ ཛཱི་ཝེ་ཡྻ ན ཙ ཀི་ལ་མེ་ཡྻཱ’’ཏི? ཨ་ཐ ཁོ ཨུ་པཱ་ལི་སྶ མཱ་ཏཱ་པི་ཏཱུ་ནཾ ཨེ་ཏ་ད་ཧོ་སི – ‘‘ས་ཙེ ཁོ ཨུ་པཱ་ལི ལེ་ཁཾ སི་ཀྑེ་ཡྻ, ཨེ་ཝཾ ཁོ ཨུ་པཱ་ལི ཨ་མྷཱ་ཀཾ ཨ་ཙྩ་ཡེ་ན སུ་ཁ་ཉྩ ཛཱི་ཝེ་ཡྻ, ན ཙ ཀི་ལ་མེ་ཡྻཱ’’ཏི. ཨ་ཐ ཁོ ཨུ་པཱ་ལི་སྶ མཱ་ཏཱ་པི་ཏཱུ་ནཾ ཨེ་ཏ་ད་ཧོ་སི – ‘‘ས་ཙེ ཁོ ཨུ་པཱ་ལི ལེ་ཁཾ སི་ཀྑི་སྶ་ཏི, ཨ་ངྒུ་ལི་ཡོ དུ་ཀྑཱ བྷ་ཝི་སྶ་ནྟི. ས་ཙེ ཁོ ཨུ་པཱ་ལི ག་ཎ་ནཾ སི་ཀྑེ་ཡྻ, ཨེ་ཝཾ ཁོ ཨུ་པཱ་ལི ཨ་མྷཱ་ཀཾ ཨ་ཙྩ་ཡེ་ན སུ་ཁ་ཉྩ ཛཱི་ཝེ་ཡྻ ན ཙ ཀི་ལ་མེ་ཡྻཱ’’ཏི. ཨ་ཐ ཁོ ཨུ་པཱ་ལི་སྶ མཱ་ཏཱ་པི་ཏཱུ་ནཾ ཨེ་ཏ་ད་ཧོ་སི – ‘‘ས་ཙེ ཁོ ཨུ་པཱ་ལི ག་ཎ་ནཾ སི་ཀྑི་སྶ་ཏི, ཨུ་ར་སྶ དུ་ཀྑོ བྷ་ཝི་སྶ་ཏི. ས་ཙེ ཁོ ཨུ་པཱ་ལི རཱུ་པཾ སི་ཀྑེ་ཡྻ, ཨེ་ཝཾ ཁོ ཨུ་པཱ་ལི ཨ་མྷཱ་ཀཾ ཨ་ཙྩ་ཡེ་ན སུ་ཁ་ཉྩ ཛཱི་ཝེ་ཡྻ ན ཙ ཀི་ལ་མེ་ཡྻཱ’’ཏི. ཨ་ཐ ཁོ ཨུ་པཱ་ལི་སྶ མཱ་ཏཱ་པི་ཏཱུ་ནཾ ཨེ་ཏ་ད་ཧོ་སི – ‘‘ས་ཙེ ཁོ ཨུ་པཱ་ལི རཱུ་པཾ སི་ཀྑི་སྶ་ཏི, ཨ་ཀྑཱི་ནི དུ་ཀྑཱ བྷ་ཝི་སྶ་ནྟི. ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ སུ་ཁ་སཱི་ལཱ སུ་ཁ་ས་མཱ་ཙཱ་རཱ སུ་བྷོ་ཛ་ནཱ་ནི བྷུ་ཉྫི་ཏྭཱ ནི་ཝཱ་ཏེ་སུ ས་ཡ་ནེ་སུ ས་ཡ་ནྟི. ས་ཙེ ཁོ ཨུ་པཱ་ལི ས་མ་ཎེ་སུ ས་ཀྱ་པུ་ཏྟི་ཡེ་སུ པ་བྦ་ཛེ་ཡྻ, ཨེ་ཝཾ ཁོ ཨུ་པཱ་ལི ཨ་མྷཱ་ཀཾ ཨ་ཙྩ་ཡེ་ན སུ་ཁ་ཉྩ ཛཱི་ཝེ་ཡྻ, ན ཙ ཀི་ལ་མེ་ཡྻཱ’’ཏི.
ཨ་སྶོ་སི ཁོ ཨུ་པཱ་ལི་དཱ་ར་ཀོ མཱ་ཏཱ་པི་ཏཱུ་ནཾ ཨི་མཾ ཀ་ཐཱ་ས་ལླཱ་པཾ. ཨ་ཐ ཁོ ཨུ་པཱ་ལི་དཱ་ར་ཀོ ཡེ་ན ཏེ དཱ་ར་ཀཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏེ དཱ་ར་ཀེ ཨེ་ཏ་ད་ཝོ་ཙ – ‘‘ཨེ་ཐ མ་ཡཾ, ཨ་ཡྻཱ, ས་མ་ཎེ་སུ ས་ཀྱ་པུ་ཏྟི་ཡེ་སུ པ་བྦ་ཛི་སྶཱ་མཱ’’ཏི. ‘‘ས་ཙེ ཁོ ཏྭཾ, ཨ་ཡྻ, པ་བྦ་ཛི་སྶ་སི, ཨེ་ཝཾ མ་ཡ་མྤི པ་བྦ་ཛི་སྶཱ་མཱ’’ཏི. ཨ་ཐ ཁོ ཏེ དཱ་ར་ཀཱ ཨེ་ཀ་མེ་ཀ་སྶ མཱ་ཏཱ་པི་ཏ་རོ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙུཾ – ‘‘ཨ་ནུ་ཛཱ་ནཱ་ཐ མཾ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛྫཱ་ཡཱ’’ཏི. ཨ་ཐ ཁོ ཏེ་སཾ དཱ་ར་ཀཱ་ནཾ མཱ་ཏཱ་པི་ཏ་རོ – ‘‘ས་བྦེ་པི་མེ དཱ་ར་ཀཱ ས་མཱ་ན་ཙྪ་ནྡཱ ཀ་ལྱཱ་ཎཱ་དྷི་པྤཱ་ཡཱ’’ཏི ཨ་ནུ་ཛཱ་ནིཾ་སུ. ཏེ བྷི་ཀྑཱུ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙིཾ་སུ. ཏེ བྷི་ཀྑཱུ པ་བྦཱ་ཛེ་སུཾ ཨུ་པ་ས་མྤཱ་དེ་སུཾ. ཏེ ར་ཏྟི་ཡཱ པ་ཙྩཱུ་ས་ས་མ་ཡཾ པ་ཙྩུ་ཊྛཱ་ཡ རོ་ད་ནྟི – ‘‘ཡཱ་གུཾ དེ་ཐ, བྷ་ཏྟཾ དེ་ཐ, ཁཱ་ད་ནཱི་ཡཾ དེ་ཐཱ’’ཏི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཨཱ་ག་མེ་ཐ, ཨཱ་ཝུ་སོ, ཡཱ་ཝ ར་ཏྟི ཝི་བྷཱ་ཡ་ཏི. ས་ཙེ ཡཱ་གུ བྷ་ཝི་སྶ་ཏི, པི་ཝི་སྶ་ཐ. ས་ཙེ བྷ་ཏྟཾ བྷ་ཝི་སྶ་ཏི, བྷུ་ཉྫི་སྶ་ཐ. ས་ཙེ ཁཱ་ད་ནཱི་ཡཾ བྷ་ཝི་སྶ་ཏི, ཁཱ་དི་སྶ་ཐ. ནོ ཙེ བྷ་ཝི་སྶ་ཏི ཡཱ་གུ ཝཱ བྷ་ཏྟཾ ཝཱ ཁཱ་ད་ནཱི་ཡཾ ཝཱ, པི་ཎྜཱ་ཡ ཙ་རི་ཏྭཱ བྷུ་ཉྫི་སྶ་ཐཱ’’ཏི. ཨེ་ཝ་མྤི ཁོ ཏེ བྷི་ཀྑཱུ བྷི་ཀྑཱུ་ཧི ཝུ་ཙྩ་མཱ་ནཱ རོ་ད་ནྟི་ཡེ་ཝ – ‘‘ཡཱ་གུཾ དེ་ཐ, བྷ་ཏྟཾ དེ་ཐ, ཁཱ་ད་ནཱི་ཡཾ དེ་ཐཱ’’ཏི. སེ་ནཱ་ས་ནཾ ཨཱུ་ཧ་ད་ནྟི་པི ཨུ་མྨི་ཧ་ནྟི་པི.
ཨ་སྶོ་སི ཁོ བྷ་ག་ཝཱ ར་ཏྟི་ཡཱ པ་ཙྩཱུ་ས་ས་མ་ཡཾ པ་ཙྩུ་ཊྛཱ་ཡ དཱ་ར་ཀ་ས་དྡཾ. སུ་ཏྭཱ་ན ཨཱ་ཡ་སྨ་ནྟཾ ཨཱ་ན་ནྡཾ ཨཱ་མ་ནྟེ་སི – ‘‘ཀིཾ ནུ ཁོ སོ, ཨཱ་ན་ནྡ, དཱ་ར་ཀ་ས་དྡོ’’ཏི? ཨ་ཐ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཛཱ་ནཾ ཨཱུ་ན་ཝཱི་ས་ཏི་ཝ་སྶཾ པུ་གྒ་ལཾ ཨུ་པ་ས་མྤཱ་དེ་ནྟཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཛཱ་ནཾ ཨཱུ་ན་ཝཱི་ས་ཏི་ཝ་སྶཾ པུ་གྒ་ལཾ ཨུ་པ་ས་མྤཱ་དེ་སྶ་ནྟི! ཨཱུ་ན་ཀ་ཝཱི་ས་ཏི་ཝ་སྶོ, བྷི་ཀྑ་ཝེ, པུ་གྒ་ལོ ཨ་ཀྑ་མོ ཧོ་ཏི སཱི་ཏ་སྶ ཨུ་ཎྷ་སྶ ཛི་གྷ་ཙྪཱ་ཡ པི་པཱ་སཱ་ཡ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶཱ་ནཾ དུ་རུ་ཏྟཱ་ནཾ དུ་རཱ་ག་ཏཱ་ནཾ ཝ་ཙ་ན་པ་ཐཱ་ནཾ ཨུ་པྤ་ནྣཱ་ནཾ སཱ་རཱི་རི་ཀཱ་ནཾ ཝེ་ད་ནཱ་ནཾ དུ་ཀྑཱ་ནཾ ཏི་བྦཱ་ནཾ ཁ་རཱ་ནཾ ཀ་ཊུ་ཀཱ་ནཾ ཨ་སཱ་ཏཱ་ནཾ ཨ་མ་ནཱ་པཱ་ནཾ པཱ་ཎ་ཧ་རཱ་ནཾ ཨ་ན་དྷི་ཝཱ་ས་ཀ་ཛཱ་ཏི་ཀོ ཧོ་ཏི. ཝཱི་ས་ཏི་ཝ་སྶོ་ཝ ཁོ, བྷི་ཀྑ་ཝེ, པུ་གྒ་ལོ ཁ་མོ ཧོ་ཏི སཱི་ཏ་སྶ ཨུ་ཎྷ་སྶ…པེ… པཱ་ཎ་ཧ་རཱ་ནཾ ཨ་དྷི་ཝཱ་ས་ཀ་ཛཱ་ཏི་ཀོ ཧོ་ཏི. ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༠༣. ‘‘ཡོ པ་ན བྷི་ཀྑུ ཛཱ་ནཾ ཨཱུ་ན་ཝཱི་ས་ཏི་ཝ་སྶཾ པུ་གྒ་ལཾ ཨུ་པ་ས་མྤཱ་དེ་ཡྻ, སོ ཙ པུ་གྒ་ལོ ཨ་ནུ་པ་ས་མྤ་ནྣོ, ཏེ ཙ བྷི་ཀྑཱུ གཱ་ར་ཡ྄ཧཱ, ཨི་དཾ ཏ་སྨིཾ པཱ་ཙི་ཏྟི་ཡ’’ནྟི.
༤༠༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཛཱ་ནཱ་ཏི ནཱ་མ སཱ་མཾ ཝཱ ཛཱ་ནཱ་ཏི, ཨ་ཉྙེ ཝཱ ཏ་སྶ ཨཱ་རོ་ཙེ་ནྟི, སོ ཝཱ ཨཱ་རོ་ཙེ་ཏི.
ཨཱུ་ན་ཝཱི་ས་ཏི་ཝ་སྶོ ནཱ་མ ཨ་པྤ་ཏྟ་ཝཱི་ས་ཏི་ཝ་སྶོ.
‘‘ཨུ་པ་ས་མྤཱ་དེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ཡཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི [ས་མྨ་ན་ཏི (ཀ.)], ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡ་སྶ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ཡ་སྶ ཙ ཨཱ་པ་ཏྟི དུ་ཀྐ་ཊ་སྶ.
༤༠༥. ཨཱུ་ན་ཝཱི་ས་ཏི་ཝ་སྶེ ཨཱུ་ན་ཝཱི་ས་ཏི་ཝ་སྶ་ས་ཉྙཱི ཨུ་པ་ས་མྤཱ་དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨཱུ་ན་ཝཱི་ས་ཏི་ཝ་སྶེ ཝེ་མ་ཏི་ཀོ ཨུ་པ་ས་མྤཱ་དེ་ཏི, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཝཱི་ས་ཏི་ཝ་སྶེ པ་རི་པུ་ཎྞ་ཝཱི་ས་ཏི་ཝ་སྶ་ས་ཉྙཱི ཨུ་པ་ས་མྤཱ་དེ་ཏི, ཨ་ནཱ་པ་ཏྟི. པ་རི་པུ་ཎྞ་ཝཱི་ས་ཏི་ཝ་སྶེ ཨཱུ་ན་ཝཱི་ས་ཏི་ཝ་སྶ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པ་རི་པུ་ཎྞ་ཝཱི་ས་ཏི་ཝ་སྶེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པ་རི་པུ་ཎྞ་ཝཱི་ས་ཏི་ཝ་སྶེ པ་རི་པུ་ཎྞ་ཝཱི་ས་ཏི་ཝ་སྶ་ས་ཉྙཱི, ཨ་ནཱ་པ་ཏྟི.
༤༠༦. ཨ་ནཱ་པ་ཏྟི ཨཱུ་ན་ཝཱི་ས་ཏི་ཝ་སྶཾ པ་རི་པུ་ཎྞ་ཝཱི་ས་ཏི་ཝ་སྶ་ས་ཉྙཱི ཨུ་པ་ས་མྤཱ་དེ་ཏི, པ་རི་པུ་ཎྞ་ཝཱི་ས་ཏི་ཝ་སྶཾ པ་རི་པུ་ཎྞ་ཝཱི་ས་ཏི་ཝ་སྶ་ས་ཉྙཱི ཨུ་པ་ས་མྤཱ་དེ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨཱུ་ན་ཝཱི་ས་ཏི་ཝ་སྶ་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.