༦. ཐེ་ཡྻ་ས་ཏྠ་སི་ཀྑཱ་པ་དཾ
༤༠༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ ས་ཏྠོ རཱ་ཛ་ག་ཧཱ པ་ཊི་ཡཱ་ལོ་ཀཾ ག་ནྟུ་ཀཱ་མོ ཧོ་ཏི. ཨ་ཉྙ་ཏ་རོ བྷི་ཀྑུ ཏེ མ་ནུ་སྶེ ཨེ་ཏ་ད་ཝོ་ཙ – ‘‘ཨ་ཧ་མྤཱ་ཡ་སྨ་ནྟེ་ཧི ས་དྡྷིཾ ག་མི་སྶཱ་མཱི’’ཏི. ‘‘མ་ཡཾ ཁོ, བྷ་ནྟེ, སུ་ངྐཾ པ་རི་ཧ་རི་སྶཱ་མཱ’’ཏི. ‘‘པ་ཛཱ་ནཱ་ཐཱ་ཝུ་སོ’’ཏི. ཨ་སྶོ་སུཾ ཁོ ཀ་མྨི་ཡཱ [ཀ་མྨི་ཀཱ (སཱི. སྱཱ.)] – ‘‘ས་ཏྠོ ཀི་ར སུ་ངྐཾ པ་རི་ཧ་རི་སྶ་ཏཱི’’ཏི. ཏེ མ་གྒེ པ་རི་ཡུ་ཊྛིཾ་སུ. ཨ་ཐ ཁོ ཏེ ཀ་མྨི་ཀཱ ཏཾ ས་ཏྠཾ ག་ཧེ་ཏྭཱ ཨ་ཙྪི་ནྡི་ཏྭཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, བྷ་ནྟེ, ཛཱ་ནཾ ཐེ་ཡྻ་ས་ཏྠེ་ན ས་དྡྷིཾ ག་ཙྪ་སཱི’’ཏི? པ་ལི་བུ་ནྡྷེ་ཏྭཱ མུ་ཉྩིཾ་སུ. ཨ་ཐ ཁོ སོ བྷི་ཀྑུ སཱ་ཝ་ཏྠིཾ ག་ནྟྭཱ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ ཛཱ་ནཾ ཐེ་ཡྻ་ས་ཏྠེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, བྷི་ཀྑུ, ཛཱ་ནཾ ཐེ་ཡྻ་ས་ཏྠེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ཛཱ་ནཾ ཐེ་ཡྻ་ས་ཏྠེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༤༠༨. ‘‘ཡོ པ་ན བྷི་ཀྑུ ཛཱ་ནཾ ཐེ་ཡྻ་ས་ཏྠེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫེ་ཡྻ, ཨ་ནྟ་མ་སོ གཱ་མ་ནྟ་ར་མྤི, པཱ་ཙི་ཏྟི་ཡ’’ནྟི.
༤༠༩. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཛཱ་ནཱ་ཏི ནཱ་མ སཱ་མཾ ཝཱ ཛཱ་ནཱ་ཏི, ཨ་ཉྙེ ཝཱ ཏ་སྶ ཨཱ་རོ་ཙེ་ནྟི, སོ ཝཱ ཨཱ་རོ་ཙེ་ཏི.
ཐེ་ཡྻ་ས་ཏྠོ ནཱ་མ ཙོ་རཱ ཀ་ཏ་ཀ་མྨཱ ཝཱ ཧོ་ནྟི ཨ་ཀ་ཏ་ཀ་མྨཱ ཝཱ, རཱ་ཛཱ་ནཾ ཝཱ ཐེ་ཡྻཾ ག་ཙྪ་ནྟི སུ་ངྐཾ ཝཱ པ་རི་ཧ་ར་ནྟི.
ས་དྡྷིནྟི ཨེ་ཀ་ཏོ.
སཾ་ཝི་དྷཱ་ཡཱཏི – ‘‘ག་ཙྪཱ་མཱ་ཝུ་སོ, ག་ཙྪཱ་མ བྷ་ནྟེ; ག་ཙྪཱ་མ བྷ་ནྟེ, ག་ཙྪཱ་མཱ་ཝུ་སོ, ཨ་ཛྫ ཝཱ ཧི་ཡྻོ ཝཱ པ་རེ ཝཱ ག་ཙྪཱ་མཱ’’ཏི སཾ་ཝི་ད་ཧ་ཏི, ཨཱ་པ་ཏྟི དུ་ཀྐ་ཊ་སྶ.
ཨ་ནྟ་མ་སོ གཱ་མ་ནྟ་ར་མྤཱིཏི ཀུ་ཀྐུ་ཊ་ས་མྤཱ་ཏེ གཱ་མེ གཱ་མ་ནྟ་རེ གཱ་མ་ནྟ་རེ ཨཱ་པ་ཏྟི པཱ་ཙི་ཏྟི་ཡ་སྶ. ཨ་གཱ་མ་ཀེ ཨ་ར་ཉྙེ ཨ་དྡྷ་ཡོ་ཛ་ནེ ཨ་དྡྷ་ཡོ་ཛ་ནེ ཨཱ་པ་ཏྟི པཱ་ཙི་ཏྟི་ཡ་སྶ.
༤༡༠. ཐེ་ཡྻ་ས་ཏྠེ ཐེ་ཡྻ་ས་ཏྠ་ས་ཉྙཱི སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་ཏི, ཨ་ནྟ་མ་སོ གཱ་མ་ནྟ་ར་མྤི, ཨཱ་པ་ཏྟི པཱ་ཙི་ཏྟི་ཡ་སྶ. ཐེ་ཡྻ་ས་ཏྠེ ཝེ་མ་ཏི་ཀོ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་ཏི, ཨ་ནྟ་མ་སོ གཱ་མ་ནྟ་ར་མྤི, ཨཱ་པ་ཏྟི དུ་ཀྐ་ཊ་སྶ. ཐེ་ཡྻ་ས་ཏྠེ ཨ་ཐེ་ཡྻ་ས་ཏྠ་ས་ཉྙཱི སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་ཏི, ཨ་ནྟ་མ་སོ གཱ་མ་ནྟ་ར་མྤི, ཨ་ནཱ་པ་ཏྟི. བྷི་ཀྑུ སཾ་ཝི་ད་ཧ་ཏི, མ་ནུ་སྶཱ ན སཾ་ཝི་ད་ཧ་ནྟི, ཨཱ་པ་ཏྟི དུ་ཀྐ་ཊ་སྶ. ཨ་ཐེ་ཡྻ་ས་ཏྠེ ཐེ་ཡྻ་ས་ཏྠ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ཐེ་ཡྻ་ས་ཏྠེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ཐེ་ཡྻ་ས་ཏྠེ ཨ་ཐེ་ཡྻ་ས་ཏྠ་ས་ཉྙཱི ཨ་ནཱ་པ་ཏྟི.
༤༡༡. ཨ་ནཱ་པ་ཏྟི ཨ་སཾ་ཝི་ད་ཧི་ཏྭཱ ག་ཙྪ་ཏི, མ་ནུ་སྶཱ སཾ་ཝི་ད་ཧ་ནྟི བྷི་ཀྑུ ན སཾ་ཝི་ད་ཧ་ཏི, ཝི་ས་ངྐེ་ཏེ་ན ག་ཙྪ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཐེ་ཡྻ་ས་ཏྠ་སི་ཀྑཱ་པ་དཾ ནི་ཊྛི་ཏཾ ཚ་ཊྛཾ.