༢. ས་པྤཱ་ཎ་ཀ་སི་ཀྑཱ་པ་དཾ

༣༨༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཛཱ་ནཾ ས་པྤཱ་ཎ་ཀཾ ཨུ་ད་ཀཾ པ་རི་བྷུ་ཉྫ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཛཱ་ནཾ ས་པྤཱ་ཎ་ཀཾ ཨུ་ད་ཀཾ པ་རི་བྷུ་ཉྫི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཛཱ་ནཾ ས་པྤཱ་ཎ་ཀཾ ཨུ་ད་ཀཾ པ་རི་བྷུ་ཉྫ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཛཱ་ནཾ ས་པྤཱ་ཎ་ཀཾ ཨུ་ད་ཀཾ པ་རི་བྷུ་ཉྫི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༣༨༨. ‘‘ཡོ པ་ན བྷི་ཀྑུ ཛཱ་ནཾ ས་པྤཱ་ཎ་ཀཾ ཨུ་ད་ཀཾ པ་རི་བྷུ་ཉྫེ་ཡྻ, པཱ་ཙི་ཏྟི་ཡ’’ནྟི.

༣༨༩. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

ཛཱ་ནཱ་ཏི ནཱ་མ སཱ་མཾ ཝཱ ཛཱ་ནཱ་ཏི, ཨ་ཉྙེ ཝཱ ཏ་སྶ ཨཱ་རོ་ཙེ་ནྟི. ‘‘ས་པྤཱ་ཎ་ཀ’’ནྟི ཛཱ་ན་ནྟོ, ‘‘པ་རི་བྷོ་གེ་ན མ་རི་སྶ་ནྟཱི’’ཏི ཛཱ་ན་ནྟོ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༣༩༠. ས་པྤཱ་ཎ་ཀེ ས་པྤཱ་ཎ་ཀ་ས་ཉྙཱི པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་པྤཱ་ཎ་ཀེ ཝེ་མ་ཏི་ཀོ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ. ས་པྤཱ་ཎ་ཀེ ཨ་པྤཱ་ཎ་ཀ་ས་ཉྙཱི པ་རི་བྷུ་ཉྫ་ཏི, ཨ་ནཱ་པ་ཏྟི. ཨ་པྤཱ་ཎ་ཀེ ས་པྤཱ་ཎ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་པྤཱ་ཎ་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་པྤཱ་ཎ་ཀེ ཨ་པྤཱ་ཎ་ཀ་ས་ཉྙཱི, ཨ་ནཱ་པ་ཏྟི.

༣༩༡. ཨ་ནཱ་པ་ཏྟི ‘‘ས་པྤཱ་ཎ་ཀ’’ནྟི ཨ་ཛཱ་ན་ནྟོ, ‘‘ཨ་པྤཱ་ཎ་ཀ’’ནྟི ཛཱ་ན་ནྟོ, ‘‘པ་རི་བྷོ་གེ་ན ན མ་རི་སྶ་ནྟཱི’’ཏི ཛཱ་ན་ནྟོ པ་རི་བྷུ་ཉྫ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

ས་པྤཱ་ཎ་ཀ་སི་ཀྑཱ་པ་དཾ ནི་ཊྛི་ཏཾ དུ་ཏི་ཡཾ.