༣. ཨུ་ཀྐོ་ཊ་ན་སི་ཀྑཱ་པ་དཾ
༣༩༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཛཱ་ནཾ ཡ་ཐཱ་དྷ་མྨཾ ནི་ཧ་ཏཱ་དྷི་ཀ་ར་ཎཾ པུ་ན་ཀ་མྨཱ་ཡ ཨུ་ཀྐོ་ཊེ་ནྟི – ‘‘ཨ་ཀ་ཏཾ ཀ་མྨཾ དུ་ཀྐ་ཊཾ ཀ་མྨཾ པུ་ན ཀཱ་ཏ་བྦཾ ཀ་མྨཾ ཨ་ནི་ཧ་ཏཾ དུ་ནྣི་ཧ་ཏཾ པུ་ན ནི་ཧ་ནི་ཏ་བྦ’’ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཛཱ་ནཾ ཡ་ཐཱ་དྷ་མྨཾ ནི་ཧ་ཏཱ་དྷི་ཀ་ར་ཎཾ པུ་ན་ཀ་མྨཱ་ཡ ཨུ་ཀྐོ་ཊེ་སྶ་ནྟཱི’’ཏི …པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཛཱ་ནཾ ཡ་ཐཱ་དྷ་མྨཾ ནི་ཧ་ཏཱ་དྷི་ཀ་ར་ཎཾ པུ་ན་ཀ་མྨཱ་ཡ ཨུ་ཀྐོ་ཊེ་ཐཱ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཛཱ་ནཾ ཡ་ཐཱ་དྷ་མྨཾ ནི་ཧ་ཏཱ་དྷི་ཀ་ར་ཎཾ པུ་ན་ཀ་མྨཱ་ཡ ཨུ་ཀྐོ་ཊེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༩༣. ‘‘ཡོ པ་ན བྷི་ཀྑུ ཛཱ་ནཾ ཡ་ཐཱ་དྷ་མྨཾ ནི་ཧ་ཏཱ་དྷི་ཀ་ར་ཎཾ པུ་ན་ཀ་མྨཱ་ཡ ཨུ་ཀྐོ་ཊེ་ཡྻ, པཱ་ཙི་ཏྟི་ཡ’’ནྟི.
༣༩༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཛཱ་ནཱ་ཏི ནཱ་མ སཱ་མཾ ཝཱ ཛཱ་ནཱ་ཏི, ཨ་ཉྙེ ཝཱ ཏ་སྶ ཨཱ་རོ་ཙེ་ནྟི, སོ ཝཱ ཨཱ་རོ་ཙེ་ཏི.
ཡ་ཐཱ་དྷ་མྨཾ ནཱ་མ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཀ་ཏཾ, ཨེ་ཏཾ ཡ་ཐཱ་དྷ་མྨཾ ནཱ་མ.
ཨ་དྷི་ཀ་ར་ཎཾ ནཱ་མ ཙ་ཏྟཱ་རི ཨ་དྷི་ཀ་ར་ཎཱ་ནི – ཝི་ཝཱ་དཱ་དྷི་ཀ་ར་ཎཾ, ཨ་ནུ་ཝཱ་དཱ་དྷི་ཀ་ར་ཎཾ, ཨཱ་པ་ཏྟཱ་དྷི་ཀ་ར་ཎཾ, ཀི་ཙྩཱ་དྷི་ཀ་ར་ཎཾ.
པུ་ན་ཀ་མྨཱ་ཡ ཨུ་ཀྐོ་ཊེ་ཡྻཱཏི ‘‘ཨ་ཀ་ཏཾ ཀ་མྨཾ དུ་ཀྐ་ཊཾ ཀ་མྨཾ པུ་ན་ཀཱ་ཏ་བྦཾ ཀ་མྨཾ ཨ་ནི་ཧ་ཏཾ དུ་ནྣི་ཧ་ཏཾ པུ་ན ནི་ཧ་ནི་ཏ་བྦཾ’’ཏི ཨུ་ཀྐོ་ཊེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༣༩༥. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི ཨུ་ཀྐོ་ཊེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དྷ་མྨ་ཀ་མྨེ ཝེ་མ་ཏི་ཀོ ཨུ་ཀྐོ་ཊེ་ཏི, ཨཱ་པ་ཏྟི དུ་ཀྐ་ཊ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི ཨུ་ཀྐོ་ཊེ་ཏི, ཨ་ནཱ་པ་ཏྟི. ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱི, ཨ་ནཱ་པ་ཏྟི.
༣༩༦. ཨ་ནཱ་པ་ཏྟི ‘‘ཨ་དྷ་མྨེ་ན ཝཱ ཝ་གྒེ་ན ཝཱ ན ཀ་མྨཱ་ར་ཧ་སྶ ཝཱ ཀ་མྨཾ ཀ་ཏ’’ནྟི ཛཱ་ན་ནྟོ ཨུ་ཀྐོ་ཊེ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨུ་ཀྐོ་ཊ་ན་སི་ཀྑཱ་པ་དཾ ནི་ཊྛི་ཏཾ ཏ་ཏི་ཡཾ.