༡. ས་ཉྩི་ཙྩ་སི་ཀྑཱ་པ་དཾ

༣༨༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་དཱ་ཡཱི ཨི་སྶཱ་སོ ཧོ་ཏི, ཀཱ་ཀཱ ཙ་སྶ ཨ་མ་ནཱ་པཱ ཧོ་ནྟི. སོ ཀཱ་ཀེ ཝི་ཛ྄ཛྷི་ཏྭཱ ཝི་ཛ྄ཛྷི་ཏྭཱ སཱི་སཾ ཚི་ནྡི་ཏྭཱ སཱུ་ལེ པ་ཊི་པཱ་ཊི་ཡཱ ཋ་པེ་སི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀེ་ནི་མེ, ཨཱ་ཝུ་སོ, ཀཱ་ཀཱ ཛཱི་ཝི་ཏཱ ཝོ་རོ་པི་ཏཱ’’ཏི? ‘‘མ་ཡཱ, ཨཱ་ཝུ་སོ. ཨ་མ་ནཱ་པཱ མེ ཀཱ་ཀཱ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་དཱ་ཡཱི ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཨུ་དཱ་ཡི, ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༣༨༣. ‘‘ཡོ པ་ན བྷི་ཀྑུ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻ, པཱ་ཙི་ཏྟི་ཡ’’ནྟི.

༣༨༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

ས་ཉྩི་ཙྩཱཏི ཛཱ་ན་ནྟོ ས་ཉྫཱ་ན་ནྟོ ཙེ་ཙྩ ཨ་བྷི་ཝི་ཏ་རི་ཏྭཱ ཝཱི་ཏི་ཀྐ་མོ.

པཱ་ཎོ ནཱ་མ ཏི་ར་ཙྪཱ་ན་ག་ཏ་པཱ་ཎོ ཝུ་ཙྩ་ཏི.

ཛཱི་ཝི་ཏཱ ཝོ་རོ་པེ་ཡྻཱཏི ཛཱི་ཝི་ཏི་ནྡྲི་ཡཾ ཨུ་པ་ཙྪི་ནྡ་ཏི ཨུ་པ་རོ་དྷེ་ཏི ས་ནྟ་ཏིཾ ཝི་ཀོ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༣༨༥. པཱ་ཎེ པཱ་ཎ་ས་ཉྙཱི ཛཱི་ཝི་ཏཱ ཝོ་རོ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པཱ་ཎེ ཝེ་མ་ཏི་ཀོ ཛཱི་ཝི་ཏཱ ཝོ་རོ་པེ་ཏི, ཨཱ་པ་ཏྟི དུ་ཀྐ་ཊ་སྶ. པཱ་ཎེ ཨ་པྤཱ་ཎ་ས་ཉྙཱི ཛཱི་ཝི་ཏཱ ཝོ་རོ་པེ་ཏི, ཨ་ནཱ་པ་ཏྟི. ཨ་པྤཱ་ཎེ པཱ་ཎ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་པྤཱ་ཎེ ཝེ་མི་ཏ་ཀོ, ཨཱ་པ་ཏྟི དུ་ཀྐ་ཊ་སྶ. ཨ་པྤཱ་ཎེ ཨ་པྤཱ་ཎ་ས་ཉྙཱི, ཨ་ནཱ་པ་ཏྟི.

༣༨༦. ཨ་ནཱ་པ་ཏྟི ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟ་སྶ, ན་མ་ར་ཎཱ་དྷི་པྤཱ་ཡ་སྶ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

ས་ཉྩི་ཙྩ་སི་ཀྑཱ་པ་དཾ ནི་ཊྛི་ཏཾ པ་ཋ་མཾ.