༩. སེ་ནཱ་ཝཱ་ས་སི་ཀྑཱ་པ་དཾ
༣༡༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ས་ཏི ཀ་ར་ཎཱི་ཡེ སེ་ནཾ ག་ནྟྭཱ ཨ་ཏི་རེ་ཀ་ཏི་ར་ཏྟཾ སེ་ནཱ་ཡ ཝ་ས་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ སེ་ནཱ་ཡ ཝ་སི་སྶ་ནྟི! ཨ་མྷཱ་ཀ་མྤི ཨ་ལཱ་བྷཱ, ཨ་མྷཱ་ཀ་མྤི དུ་ལླ་དྡྷཾ, ཡེ མ་ཡཾ ཨཱ་ཛཱི་ཝ་སྶ ཧེ་ཏུ པུ་ཏྟ་དཱ་ར་སྶ ཀཱ་ར་ཎཱ སེ་ནཱ་ཡ པ་ཊི་ཝ་སཱ་མཱ’’ཏི. ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཨ་ཏི་རེ་ཀ་ཏི་ར་ཏྟཾ སེ་ནཱ་ཡ ཝ་སི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཨ་ཏི་རེ་ཀ་ཏི་ར་ཏྟཾ སེ་ནཱ་ཡ ཝ་ས་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཨ་ཏི་རེ་ཀ་ཏི་ར་ཏྟཾ སེ་ནཱ་ཡ ཝ་སི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༡༨. ‘‘སི་ཡཱ ཙ ཏ་སྶ བྷི་ཀྑུ་ནོ ཀོ་ཙི་དེ་ཝ པ་ཙྩ་ཡོ སེ་ནཾ ག་མ་ནཱ་ཡ, དི་ར་ཏྟ་ཏི་ར་ཏྟཾ ཏེ་ན བྷི་ཀྑུ་ནཱ སེ་ནཱ་ཡ ཝ་སི་ཏ་བྦཾ. ཏ་ཏོ ཙེ ཨུ་ཏྟ་རིཾ ཝ་སེ་ཡྻ, པཱ་ཙི་ཏྟི་ཡ’’ནྟི.
༣༡༩. སི་ཡཱ ཙ ཏ་སྶ བྷི་ཀྑུ་ནོ ཀོ་ཙི་དེ་ཝ པ་ཙྩ་ཡོ སེ་ནཾ ག་མ་ནཱ་ཡཱཏི སི་ཡཱ པ་ཙྩ་ཡོ སི་ཡཱ ཀ་ར་ཎཱི་ཡཾ.
དི་ར་ཏྟ་ཏི་ར་ཏྟཾ ཏེ་ན བྷི་ཀྑུ་ནཱ སེ་ནཱ་ཡ ཝ་སི་ཏ་བྦནྟི དྭེ་ཏི་སྶོ ར་ཏྟི་ཡོ ཝ་སི་ཏ་བྦཾ.
ཏ་ཏོ ཙེ ཨུ་ཏྟ་རི ཝ་སེ་ཡྻཱཏི ཙ་ཏུ་ཏྠེ དི་ཝ་སེ ཨ་ཏྠ་ངྒ་ཏེ སཱུ་རི་ཡེ སེ་ནཱ་ཡ ཝ་ས་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༣༢༠. ཨ་ཏི་རེ་ཀ་ཏི་ར་ཏྟེ ཨ་ཏི་རེ་ཀ་ས་ཉྙཱི སེ་ནཱ་ཡ ཝ་ས་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏི་རེ་ཀ་ཏི་ར་ཏྟེ ཝེ་མ་ཏི་ཀོ སེ་ནཱ་ཡ ཝ་ས་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏི་རེ་ཀ་ཏི་ར་ཏྟེ ཨཱུ་ན་ཀ་ས་ཉྙཱི སེ་ནཱ་ཡ ཝ་ས་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨཱུ་ན་ཀ་ཏི་ར་ཏྟེ ཨ་ཏི་རེ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་ཏི་ར་ཏྟེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་ཏི་ར་ཏྟེ ཨཱུ་ན་ཀ་ས་ཉྙཱི, ཨ་ནཱ་པ་ཏྟི.
༣༢༡. ཨ་ནཱ་པ་ཏྟི དྭེ་ཏི་སྶོ ར་ཏྟི་ཡོ ཝ་ས་ཏི, ཨཱུ་ན་ཀ་དྭེ་ཏི་སྶོ ར་ཏྟི་ཡོ ཝ་ས་ཏི, དྭེ ར་ཏྟི་ཡོ ཝ་སི་ཏྭཱ ཏ་ཏི་ཡཱ་ཡ ར་ཏྟི་ཡཱ པུ་རཱ་རུ་ཎཱ ནི་ཀྑ་མི་ཏྭཱ པུ་ན ཝ་ས་ཏི, གི་ལཱ་ནོ ཝ་ས་ཏི, གི་ལཱ་ན་སྶ ཀ་ར་ཎཱི་ཡེ་ན ཝ་ས་ཏི, སེ་ནཱ ཝཱ པ་ཊི་སེ་ནཱ་ཡ རུ་དྡྷཱ ཧོ་ཏི, ཀེ་ན་ཙི པ་ལི་བུ་དྡྷོ ཧོ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
སེ་ནཱ་ཝཱ་ས་སི་ཀྑཱ་པ་དཾ ནི་ཊྛི་ཏཾ ན་ཝ་མཾ.