༡༠. ཨུ་ཡྻོ་དྷི་ཀ་སི་ཀྑཱ་པ་དཾ
༣༢༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ དི་ར་ཏྟ་ཏི་ར་ཏྟཾ སེ་ནཱ་ཡ ཝ་ས་མཱ་ནཱ ཨུ་ཡྻོ་དྷི་ཀ་མྤི བ་ལ་གྒ་མྤི སེ་ནཱ་བྱཱུ་ཧ་མྤི ཨ་ནཱི་ཀ་ད་སྶ་ན་མྤི ག་ཙྪ་ནྟི. ཨ་ཉྙ་ཏ་རོ་པི ཚ་བྦ་གྒི་ཡོ བྷི་ཀྑུ ཨུ་ཡྻོ་དྷི་ཀཾ ག་ནྟྭཱ ཀ་ཎྜེ་ན པ་ཊི་ཝི་དྡྷོ ཧོ་ཏི. མ་ནུ་སྶཱ ཏཾ བྷི་ཀྑུཾ ཨུ་པྤ་ཎྜེ་སུཾ – ‘‘ཀ་ཙྩི, བྷ་ནྟེ, སུ་ཡུ་དྡྷཾ ཨ་ཧོ་སི, ཀ་ཏི ཏེ ལ་ཀྑཱ་ནི ལ་དྡྷཱ་ནཱི’’ཏི? སོ བྷི་ཀྑུ ཏེ་ཧི མ་ནུ་སྶེ་ཧི ཨུ་པྤ་ཎྜཱི་ཡ་མཱ་ནོ མ་ངྐུ ཨ་ཧོ་སི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ཨུ་ཡྻོ་དྷི་ཀཾ ད་སྶ་ནཱ་ཡ ཨཱ་ག་ཙྪི་སྶ་ནྟི! ཨ་མྷཱ་ཀ་མྤི ཨ་ལཱ་བྷཱ, ཨ་མྷཱ་ཀ་མྤི དུ་ལླ་དྡྷཾ, ཡེ མ་ཡཾ ཨཱ་ཛཱི་ཝ་སྶ ཧེ་ཏུ པུ་ཏྟ་དཱ་ར་སྶ ཀཱ་ར་ཎཱ ཨུ་ཡྻོ་དྷི་ཀཾ ཨཱ་ག་ཙྪཱ་མཱ’’ཏི. ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཨུ་ཡྻོ་དྷི་ཀཾ ད་སྶ་ནཱ་ཡ ག་ཙྪི་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, ཨུ་ཡྻོ་དྷི་ཀཾ ད་སྶ་ནཱ་ཡ ག་ཙྪ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཨུ་ཡྻོ་དྷི་ཀཾ ད་སྶ་ནཱ་ཡ ག་ཙྪི་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༢༣. ‘‘དི་ར་ཏྟ་ཏི་ར་ཏྟཾ ཙེ བྷི་ཀྑུ སེ་ནཱ་ཡ ཝ་ས་མཱ་ནོ ཨུ་ཡྻོ་དྷི་ཀཾ ཝཱ བ་ལ་གྒཾ ཝཱ སེ་ནཱ་བྱཱུ་ཧཾ ཝཱ ཨ་ནཱི་ཀ་ད་སྶ་ནཾ ཝཱ ག་ཙྪེ་ཡྻ, པཱ་ཙི་ཏྟི་ཡ’’ནྟི.
༣༢༤. དི་ར་ཏྟ་ཏི་ར་ཏྟཾ ཙེ བྷི་ཀྑུ སེ་ནཱ་ཡ ཝ་ས་མཱ་ནོཏི དྭེ་ཏི་སྶོ ར་ཏྟི་ཡོ ཝ་ས་མཱ་ནོ.
ཨུ་ཡྻོ་དྷི་ཀཾ ནཱ་མ ཡ་ཏྠ ས་མྤ་ཧཱ་རོ དི་སྶ་ཏི.
བ་ལ་གྒཾ ནཱ་མ ཨེ་ཏྟ་ཀཱ ཧ་ཏྠཱི, ཨེ་ཏྟ་ཀཱ ཨ་སྶཱ, ཨེ་ཏྟ་ཀཱ ར་ཐཱ, ཨེ་ཏྟ་ཀཱ པ་ཏྟཱི.
སེ་ནཱ་བྱཱུ་ཧཾ ནཱ་མ ཨི་ཏོ ཧ་ཏྠཱི ཧོ་ནྟུ, ཨི་ཏོ ཨ་སྶཱ ཧོ་ནྟུ, ཨི་ཏོ ར་ཐཱ ཧོ་ནྟུ, ཨི་ཏོ པ་ཏྟི་ཀཱ ཧོ་ནྟུ.
ཨ་ནཱི་ཀཾ ནཱ་མ ཧ་ཏྠཱ་ནཱི་ཀཾ, ཨ་སྶཱ་ནཱི་ཀཾ, ར་ཐཱ་ནཱི་ཀཾ, པ་ཏྟཱ་ནཱི་ཀཾ. ཏ་ཡོ ཧ་ཏྠཱི པ་ཙྪི་མཾ ཧ་ཏྠཱ་ནཱི་ཀཾ, ཏ་ཡོ ཨ་སྶཱ པ་ཙྪི་མཾ ཨ་སྶཱ་ནཱི་ཀཾ, ཏ་ཡོ ར་ཐཱ པ་ཙྪི་མཾ ར་ཐཱ་ནཱི་ཀཾ, ཙ་ཏྟཱ་རོ པུ་རི་སཱ ས་ར་ཧ་ཏྠཱ པ་ཏྟཱི པ་ཙྪི་མཾ པ་ཏྟཱ་ནཱི་ཀཾ. ད་སྶ་ནཱ་ཡ ག་ཙྪ་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏོ པ་སྶ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ད་སྶ་ནཱུ་པ་ཙཱ་རཾ ཝི་ཛ་ཧི་ཏྭཱ པུ་ན་པྤུ་ནཾ པ་སྶ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨེ་ཀ་མེ་ཀཾ ད་སྶ་ནཱ་ཡ ག་ཙྪ་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏོ པ་སྶ་ཏི, ཨཱ་པ་ཏྟི དུ་ཀྐ་ཊ་སྶ. ད་སྶ་ནཱུ་པ་ཙཱ་རཾ ཝི་ཛ་ཧི་ཏྭཱ པུ་ན་པྤུ་ནཾ པ་སྶ་ཏི, ཨཱ་པ་ཏྟི དུ་ཀྐ་ཊ་སྶ.
༣༢༥. ཨ་ནཱ་པ་ཏྟི ཨཱ་རཱ་མེ ཋི་ཏོ པ་སྶ་ཏི, བྷི་ཀྑུ་སྶ ཋི་ཏོ་ཀཱ་སཾ ཝཱ ནི་སི་ནྣོ་ཀཱ་སཾ ཝཱ ནི་པ་ནྣོ་ཀཱ་སཾ ཝཱ ཨཱ་ག་ནྟྭཱ ས་མྤ་ཧཱ་རོ དི་སྶ་ཏི, པ་ཊི་པ་ཐཾ ག་ཙྪ་ནྟོ པ་སྶ་ཏི, ས་ཏི ཀ་ར་ཎཱི་ཡེ ག་ནྟྭཱ པ་སྶ་ཏི, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨུ་ཡྻོ་དྷི་ཀ་སི་ཀྑཱ་པ་དཾ ནི་ཊྛི་ཏཾ ད་ས་མཾ.
ཨ་ཙེ་ལ་ཀ་ཝ་གྒོ པ་ཉྩ་མོ.
ཏ་སྶུ་དྡཱ་ནཾ –
པཱུ་ཝཾ ཀ་ཐོ་པ་ན་ནྡ་སྶ, ཏ་ཡཾ་པ་ཊྛཱ་ཀ་མེ་ཝ ཙ;
མ་ཧཱ་ནཱ་མོ པ་སེ་ན་དི, སེ་ནཱ་ཝི་དྡྷོ ཨི་མེ ད་སཱ་ཏི [ཨ་ཙེ་ལ་ཀཾ ཨུ་ཡྻོ་ཛ་ཉྩ, ས་བྷོ་ཛ་ནཾ དུ་ཝེ ར་ཧོ; ས་བྷ་ཏྟ་ཀ་ཉྩ བྷེ་ས་ཛྫཾ, ཨུ་ཡྻུ་ཏྟཾ སེ་ནུ་ཡྻོ་དྷི་ཀཾ].