༦. སུ་རཱ་པཱ་ན་ཝ་གྒོ
༡. སུ་རཱ་པཱ་ན་སི་ཀྑཱ་པ་དཾ
༣༢༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཙེ་ཏི་ཡེ་སུ ཙཱ་རི་ཀཾ ཙ་ར་མཱ་ནོ ཡེ་ན བྷ་དྡ་ཝ་ཏི་ཀཱ ཏེ་ན པཱ་ཡཱ་སི. ཨ་དྡ་སཾ་སུ ཁོ གོ་པཱ་ལ་ཀཱ པ་སུ་པཱ་ལ་ཀཱ ཀ་སྶ་ཀཱ པ་ཐཱ་ཝི་ནོ བྷ་ག་ཝ་ནྟཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘མཱ ཁོ, བྷ་ནྟེ, བྷ་ག་ཝཱ ཨ་མྦ་ཏི་ཏྠཾ ཨ་ག་མཱ་སི. ཨ་མྦ་ཏི་ཏྠེ, བྷ་ནྟེ, ཛ་ཊི་ལ་སྶ ཨ་སྶ་མེ ནཱ་གོ པ་ཊི་ཝ་ས་ཏི ཨི་དྡྷི་མཱ ཨཱ་སི་ཝི་སོ [ཨཱ་སཱི་ཝི་སོ (སཱི. སྱཱ.)] གྷོ་ར་ཝི་སོ. སོ བྷ་ག་ཝ་ནྟཾ མཱ ཝི་ཧེ་ཋེ་སཱི’’ཏི. ཨེ་ཝཾ ཝུ་ཏྟེ བྷ་ག་ཝཱ ཏུ་ཎྷཱི ཨ་ཧོ་སི. དུ་ཏི་ཡ་མྤི ཁོ…པེ… ཏ་ཏི་ཡ་མྤི ཁོ གོ་པཱ་ལ་ཀཱ པ་སུ་པཱ་ལ་ཀཱ ཀ་སྶ་ཀཱ པ་ཐཱ་ཝི་ནོ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘མཱ ཁོ, བྷ་ནྟེ, བྷ་ག་ཝཱ ཨ་མྦ་ཏི་ཏྠཾ ཨ་ག་མཱ་སི. ཨ་མྦ་ཏི་ཏྠེ, བྷ་ནྟེ, ཛ་ཊི་ལ་སྶ ཨ་སྶ་མེ ནཱ་གོ པ་ཊི་ཝ་ས་ཏི ཨི་དྡྷི་མཱ ཨཱ་སི་ཝི་སོ གྷོ་ར་ཝི་སོ. སོ བྷ་ག་ཝ་ནྟཾ མཱ ཝི་ཧེ་ཋེ་སཱི’’ཏི. ཏ་ཏི་ཡ་མྤི ཁོ བྷ་ག་ཝཱ ཏུ་ཎྷཱི ཨ་ཧོ་སི.
ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན བྷ་དྡ་ཝ་ཏི་ཀཱ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ བྷ་དྡ་ཝ་ཏི་ཀཱ་ཡཾ ཝི་ཧ་ར་ཏི. ཨ་ཐ ཁོ ཨཱ་ཡ་སྨཱ སཱ་ག་ཏོ ཡེ་ན ཨ་མྦ་ཏི་ཏྠ་སྶ [ཨ་མྦ་ཏི་ཏྠ་ཀ་སྶ (སཱི.), ཨ་མྦ་ཏི་ཏྠཾ (སྱཱ.)] ཛ་ཊི་ལ་སྶ ཨ་སྶ་མོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨ་གྱཱ་གཱ་རཾ པ་ཝི་སི་ཏྭཱ ཏི་ཎ་ས་ནྠཱ་ར་ཀཾ པ་ཉྙ་པེ་ཏྭཱ ནི་སཱི་དི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ. ཨ་དྡ་སཱ ཁོ སོ ནཱ་གོ ཨཱ་ཡ་སྨ་ནྟཾ སཱ་ག་ཏཾ པ་ཝི་ཊྛཾ. དི་སྭཱ་ན དུ་མྨ་ནོ [དུ་ཀྑཱི དུ་མྨ་ནོ (སཱི. སྱཱ.)] པ་དྷཱུ་པཱ་ཡི [པ་དྷཱུ་པཱ་སི (སྱཱ. ཀ.)]. ཨཱ་ཡ་སྨཱ་པི སཱ་ག་ཏོ པ་དྷཱུ་པཱ་ཡི [པ་དྷཱུ་པཱ་སི (སྱཱ. ཀ.)]. ཨ་ཐ ཁོ སོ ནཱ་གོ མ་ཀྑཾ ཨ་ས་ཧ་མཱ་ནོ པ་ཛྫ་ལི. ཨཱ་ཡ་སྨཱ་པི སཱ་ག་ཏོ ཏེ་ཛོ་དྷཱ་ཏུཾ ས་མཱ་པ་ཛྫི་ཏྭཱ པ་ཛྫ་ལི. ཨ་ཐ ཁོ ཨཱ་ཡ་སྨཱ སཱ་ག་ཏོ ཏ་སྶ ནཱ་ག་སྶ ཏེ་ཛ་སཱ ཏེ་ཛཾ པ་རི་ཡཱ་དི་ཡི་ཏྭཱ ཡེ་ན བྷ་དྡ་ཝ་ཏི་ཀཱ ཏེ་ནུ་པ་ས་ངྐ་མི. ཨ་ཐ ཁོ བྷ་ག་ཝཱ བྷ་དྡ་ཝ་ཏི་ཀཱ་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན ཀོ་ས་མྦཱི ཏེ་ན ཙཱ་རི་ཀཾ པ་ཀྐཱ་མི. ཨ་སྶོ་སུཾ ཁོ ཀོ་ས་མྦི་ཀཱ ཨུ་པཱ་ས་ཀཱ – ‘‘ཨ་ཡྻོ ཀི་ར སཱ་ག་ཏོ ཨ་མྦ་ཏི་ཏྠི་ཀེ་ན ནཱ་གེ་ན ས་དྡྷིཾ ས་ངྒཱ་མེ་སཱི’’ཏི.
ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཀོ་ས་མྦཱི ཏ་ད་ཝ་ས་རི. ཨ་ཐ ཁོ ཀོ་ས་མྦི་ཀཱ ཨུ་པཱ་ས་ཀཱ བྷ་ག་ཝ་ཏོ པ་ཙྩུ་གྒ་མ་ནཾ ཀ་རི་ཏྭཱ ཡེ་ནཱ་ཡ་སྨཱ སཱ་ག་ཏོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ སཱ་ག་ཏཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཾ་སུ. ཨེ་ཀ་མ་ནྟཾ ཋི་ཏཱ ཁོ ཀོ་ས་མྦི་ཀཱ ཨུ་པཱ་ས་ཀཱ ཨཱ་ཡ་སྨ་ནྟཾ སཱ་ག་ཏཾ ཨེ་ཏ་ད་ཝོ་ཙུཾ – ‘‘ཀིཾ, བྷ་ནྟེ, ཨ་ཡྻཱ་ནཾ དུ་ལླ་བྷ་ཉྩ མ་ནཱ་པ་ཉྩ, ཀིཾ པ་ཊི་ཡཱ་དེ་མཱ’’ཏི? ཨེ་ཝཾ ཝུ་ཏྟེ ཚ་བྦ་གྒི་ཡཱ བྷི་ཀྑཱུ ཀོ་ས་མྦི་ཀེ ཨུ་པཱ་ས་ཀེ ཨེ་ཏ་ད་ཝོ་ཙུཾ – ‘‘ཨ་ཏྠཱ་ཝུ་སོ, ཀཱ་པོ་ཏི་ཀཱ ནཱ་མ པ་ས་ནྣཱ བྷི་ཀྑཱུ་ནཾ དུ་ལླ་བྷཱ ཙ མ་ནཱ་པཱ ཙ, ཏཾ པ་ཊི་ཡཱ་དེ་ཐཱ’’ཏི. ཨ་ཐ ཁོ ཀོ་ས་མྦི་ཀཱ ཨུ་པཱ་ས་ཀཱ གྷ་རེ གྷ་རེ ཀཱ་པོ་ཏི་ཀཾ པ་ས་ནྣཾ པ་ཊི་ཡཱ་དེ་ཏྭཱ ཨཱ་ཡ་སྨ་ནྟཾ སཱ་ག་ཏཾ པི་ཎྜཱ་ཡ པ་ཝི་ཊྛཾ དི་སྭཱ་ན ཨཱ་ཡ་སྨ་ནྟཾ སཱ་ག་ཏཾ ཨེ་ཏ་ད་ཝོ་ཙུཾ – ‘‘པི་ཝ་ཏུ, བྷ་ནྟེ, ཨ་ཡྻོ སཱ་ག་ཏོ ཀཱ་པོ་ཏི་ཀཾ པ་ས་ནྣཾ, པི་ཝ་ཏུ, བྷ་ནྟེ, ཨ་ཡྻོ སཱ་ག་ཏོ ཀཱ་པོ་ཏི་ཀཾ པ་ས་ནྣ’’ནྟི. ཨ་ཐ ཁོ ཨཱ་ཡ་སྨཱ སཱ་ག་ཏོ གྷ་རེ གྷ་རེ ཀཱ་པོ་ཏི་ཀཾ པ་ས་ནྣཾ པི་ཝི་ཏྭཱ ན་ག་ར་མྷཱ ནི་ཀྑ་མ་ནྟོ ན་ག་ར་དྭཱ་རེ པ་རི་པ་ཏི.
ཨ་ཐ ཁོ བྷ་ག་ཝཱ ས་མྦ་ཧུ་ལེ་ཧི བྷི་ཀྑཱུ་ཧི ས་དྡྷིཾ ན་ག་ར་མྷཱ ནི་ཀྑ་མ་ནྟོ ཨ་དྡ་ས ཨཱ་ཡ་སྨ་ནྟཾ སཱ་ག་ཏཾ ན་ག་ར་དྭཱ་རེ པ་རི་པ་ཏ་ནྟཾ. དི་སྭཱ་ན བྷི་ཀྑཱུ ཨཱ་མ་ནྟེ་སི – ‘‘ག་ཎྷ་ཐ, བྷི་ཀྑ་ཝེ, སཱ་ག་ཏ’’ནྟི. ‘‘ཨེ་ཝཾ, བྷ་ནྟེ’’ཏི ཁོ ཏེ བྷི་ཀྑཱུ བྷ་ག་ཝ་ཏོ པ་ཊི་སྶུ་ཎི་ཏྭཱ ཨཱ་ཡ་སྨ་ནྟཾ སཱ་ག་ཏཾ ཨཱ་རཱ་མཾ ནེ་ཏྭཱ ཡེ་ན བྷ་ག་ཝཱ ཏེ་ན སཱི་སཾ ཀ་ཏྭཱ ནི་པཱ་ཏེ་སུཾ. ཨ་ཐ ཁོ ཨཱ་ཡ་སྨཱ སཱ་ག་ཏོ པ་རི་ཝ་ཏྟི་ཏྭཱ ཡེ་ན བྷ་ག་ཝཱ ཏེ་ན པཱ་དེ ཀ་རི་ཏྭཱ སེ་ཡྻཾ ཀ་པྤེ་སི. ཨ་ཐ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ན་ནུ, བྷི་ཀྑ་ཝེ, པུ་བྦེ སཱ་ག་ཏོ ཏ་ཐཱ་ག་ཏེ ས་གཱ་ར་ཝོ ཨ་ཧོ་སི ས་པྤ་ཏི་སྶོ’’ཏི? ‘‘ཨེ་ཝཾ, བྷ་ནྟེ’’. ‘‘ཨ་པི ནུ ཁོ, བྷི་ཀྑ་ཝེ, སཱ་ག་ཏོ ཨེ་ཏ་ར་ཧི ཏ་ཐཱ་ག་ཏེ ས་གཱ་ར་ཝོ ས་པྤ་ཏི་སྶོ’’ཏི? ‘‘ནོ ཧེ་ཏཾ, བྷ་ནྟེ’’. ‘‘ན་ནུ, བྷི་ཀྑ་ཝེ, སཱ་ག་ཏོ ཨ་མྦ་ཏི་ཏྠི་ཀེ་ན ནཱ་གེ་ན [ཌེ་ཌྜུ་བྷེ་ནཱ་པི (སཱི. སྱཱ.)] ས་དྡྷིཾ ས་ངྒཱ་མེ་སཱི’’ཏི? ‘‘ཨེ་ཝཾ, བྷ་ནྟེ’’. ‘‘ཨ་པི ནུ ཁོ, བྷི་ཀྑ་ཝེ, སཱ་ག་ཏོ ཨེ་ཏ་ར་ཧི པ་ཧོ་ཏི ནཱ་གེ་ན ས་དྡྷིཾ ས་ངྒཱ་མེ་ཏུ’’ནྟི? ‘‘ནོ ཧེ་ཏཾ, བྷ་ནྟེ’’. ‘‘ཨ་པི ནུ ཁོ, བྷི་ཀྑ་ཝེ, ཏཾ པཱ་ཏ་བྦཾ ཡཾ པི་ཝི་ཏྭཱ ཝི་ས་ཉྙཱི ཨ་སྶཱ’’ཏི? ‘‘ནོ ཧེ་ཏཾ, བྷ་ནྟེ’’. ‘‘ཨ་ན་ནུ་ཙྪ་ཝི་ཀཾ, བྷི་ཀྑ་ཝེ, སཱ་ག་ཏ་སྶ ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ, བྷི་ཀྑ་ཝེ, སཱ་ག་ཏོ མ་ཛྫཾ པི་ཝི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༢༧. ‘‘སུ་རཱ་མེ་ར་ཡ་པཱ་ནེ པཱ་ཙི་ཏྟི་ཡ’’ནྟི.
༣༢༨. སུ་རཱ ནཱ་མ པི་ཊྛ་སུ་རཱ པཱུ་ཝ་སུ་རཱ ཨོ་ད་ན་སུ་རཱ ཀི་ཎྞ་པ་ཀྑི་ཏྟཱ ས་མྦྷཱ་ར་སཾ་ཡུ་ཏྟཱ.
མེ་ར་ཡོ ནཱ་མ པུ་པྥཱ་ས་ཝོ ཕ་ལཱ་ས་ཝོ མ་དྷྭཱ་ས་ཝོ གུ་ལཱ༹་ས་ཝོ ས་མྦྷཱ་ར་སཾ་ཡུ་ཏྟོ.
པི་ཝེ་ཡྻཱཏི ཨ་ནྟ་མ་སོ ཀུ་ས་གྒེ་ན་པི པི་ཝ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
མ་ཛྫེ མ་ཛྫ་ས་ཉྙཱི པི་ཝ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. མ་ཛྫེ ཝེ་མ་ཏི་ཀོ པི་ཝ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. མ་ཛྫེ ཨ་མ་ཛྫ་ས་ཉྙཱི པི་ཝ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་མ་ཛྫེ མ་ཛྫ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་མ་ཛྫེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་མ་ཛྫེ ཨ་མ་ཛྫ་ས་ཉྙཱི, ཨ་ནཱ་པ་ཏྟི.
༣༢༩. ཨ་ནཱ་པ་ཏྟི ཨ་མ་ཛྫ་ཉྩ ཧོ་ཏི མ་ཛྫ་ཝ་ཎྞཾ མ་ཛྫ་ག་ནྡྷཾ མ་ཛྫ་ར་སཾ ཏཾ པི་ཝ་ཏི, སཱུ་པ་ས་མྤཱ་ཀེ, མཾ་ས་ས་མྤཱ་ཀེ, ཏེ་ལ་ས་མྤཱ་ཀེ, ཨཱ་མ་ལ་ཀ་ཕཱ་ཎི་ཏེ, ཨ་མ་ཛྫཾ ཨ་རི་ཊྛཾ པི་ཝ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
སུ་རཱ་པཱ་ན་སི་ཀྑཱ་པ་དཾ ནི་ཊྛི་ཏཾ པ་ཋ་མཾ.
༢. ཨ་ངྒུ་ལི་པ་ཏོ་ད་ཀ་སི་ཀྑཱ་པ་དཾ
༣༣༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ས་ཏྟ་ར་ས་ཝ་གྒི་ཡཾ བྷི་ཀྑུཾ ཨ་ངྒུ་ལི་པ་ཏོ་ད་ཀེ་ན ཧཱ་སེ་སུཾ. སོ བྷི་ཀྑུ ཨུ་ཏྟ་ནྟོ ཨ་ན་སྶཱ་ས་ཀོ ཀཱ་ལ་མ་ཀཱ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ བྷི་ཀྑུཾ ཨ་ངྒུ་ལི་པ་ཏོ་ད་ཀེ་ན ཧཱ་སེ་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, བྷི་ཀྑུཾ ཨ་ངྒུ་ལི་པ་ཏོ་ད་ཀེ་ན ཧཱ་སེ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, བྷི་ཀྑུཾ ཨ་ངྒུ་ལི་པ་ཏོ་ད་ཀེ་ན ཧཱ་སེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༣༡. ‘‘ཨ་ངྒུ་ལི་པ་ཏོ་ད་ཀེ པཱ་ཙི་ཏྟི་ཡ’’ནྟི.
༣༣༢. ཨ་ངྒུ་ལི་པ་ཏོ་ད་ཀོ ནཱ་མ [ཨ་ངྒུ་ལི་པ་ཏོ་ད་ཀོ ནཱ་མ ཨ་ངྒུ་ལི་ཡཱ་པི ཏུ་ད་ནྟི (སྱཱ.)] ཨུ་པ་ས་མྤ་ནྣོ ཨུ་པ་ས་མྤ་ནྣཾ ཧ་སཱ་དྷི་པྤཱ་ཡོ [ཧ་སྶཱ་དྷི་པྤཱ་ཡོ (སཱི. སྱཱ.)] ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཨ་ངྒུ་ལི་པ་ཏོ་ད་ཀེ་ན ཧཱ་སེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ ཨ་ངྒུ་ལི་པ་ཏོ་ད་ཀེ་ན ཧཱ་སེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཨ་ངྒུ་ལི་པ་ཏོ་ད་ཀེ་ན ཧཱ་སེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
༣༣༣. ཨ་ནུ་པ་ས་མྤ་ནྣཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༣༣༤. ཨ་ནཱ་པ་ཏྟི ན ཧ་སཱ་དྷི་པྤཱ་ཡོ, ས་ཏི ཀ་ར་ཎཱི་ཡེ ཨཱ་མ་ས་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨ་ངྒུ་ལི་པ་ཏོ་ད་ཀ་སི་ཀྑཱ་པ་དཾ ནི་ཊྛི་ཏཾ དུ་ཏི་ཡཾ.
༣. ཧ་ས་དྷ་མྨ་སི་ཀྑཱ་པ་དཾ
༣༣༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་ཏྟ་ར་ས་ཝ་གྒི་ཡཱ བྷི་ཀྑཱུ ཨ་ཙི་ར་ཝ་ཏི་ཡཱ ན་དི་ཡཱ ཨུ་ད་ཀེ ཀཱི་ལ༹་ནྟི. ཏེ་ན ཁོ པ་ན ས་མ་ཡེ་ན རཱ་ཛཱ པ་སེ་ན་དི ཀོ་ས་ལོ མ་ལླི་ཀཱ་ཡ དེ་ཝི་ཡཱ ས་དྡྷིཾ ཨུ་པ་རི་པཱ་སཱ་ད་ཝ་ར་ག་ཏོ ཧོ་ཏི. ཨ་དྡ་སཱ ཁོ རཱ་ཛཱ པ་སེ་ན་དི ཀོ་ས་ལོ ས་ཏྟ་ར་ས་ཝ་གྒི་ཡེ བྷི་ཀྑཱུ ཨ་ཙི་ར་ཝ་ཏི་ཡཱ ན་དི་ཡཱ ཨུ་ད་ཀེ ཀཱི་ལ༹་ནྟེ. དི་སྭཱ་ན མ་ལླི་ཀཾ དེ་ཝིཾ ཨེ་ཏ་ད་ཝོ་ཙ – ‘‘ཨེ་ཏེ ཏེ, མ་ལླི་ཀེ, ཨ་ར་ཧ་ནྟོ ཨུ་ད་ཀེ ཀཱི་ལ༹་ནྟཱི’’ཏི. ‘‘ནི་སྶཾ་ས་ཡཾ ཁོ, མ་ཧཱ་རཱ་ཛ, བྷ་ག་ཝ་ཏཱ སི་ཀྑཱ་པ་དཾ ཨ་པ་ཉྙ་ཏྟཾ. ཏེ ཝཱ བྷི་ཀྑཱུ ཨ་པྤ་ཀ་ཏ་ཉྙུ་ནོ’’ཏི. ཨ་ཐ ཁོ ར་ཉྙོ པ་སེ་ན་དི་སྶ ཀོ་ས་ལ་སྶ ཨེ་ཏ་ད་ཧོ་སི – ‘‘ཀེ་ན ནུ ཁོ ཨ་ཧཾ ཨུ་པཱ་ཡེ་ན བྷ་ག་ཝ་ཏོ ཙ ན ཨཱ་རོ་ཙེ་ཡྻཾ, བྷ་ག་ཝཱ ཙ ཛཱ་ནེ་ཡྻ ཨི་མེ བྷི་ཀྑཱུ ཨུ་ད་ཀེ ཀཱི་ལི༹་ཏཱ’’ཏི? ཨ་ཐ ཁོ རཱ་ཛཱ པ་སེ་ན་དི ཀོ་ས་ལོ ས་ཏྟ་ར་ས་ཝ་གྒི་ཡེ བྷི་ཀྑཱུ པ་ཀྐོ་སཱ་པེ་ཏྭཱ མ་ཧ་ནྟཾ གུ་ལ༹་པི་ཎྜཾ ཨ་དཱ་སི – ‘‘ཨི་མཾ, བྷ་ནྟེ, གུ་ལ༹་པི་ཎྜཾ བྷ་ག་ཝ་ཏོ དེ་ཐཱ’’ཏི. ས་ཏྟ་ར་ས་ཝ་གྒི་ཡཱ བྷི་ཀྑཱུ ཏཾ གུ་ལ༹་པི་ཎྜཾ ཨཱ་དཱ་ཡ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨི་མཾ, བྷ་ནྟེ, གུ་ལ༹་པི་ཎྜཾ རཱ་ཛཱ པ་སེ་ན་དི ཀོ་ས་ལོ བྷ་ག་ཝ་ཏོ དེ་ཏཱི’’ཏི. ‘‘ཀ་ཧཾ པ་ན ཏུ་མྷེ, བྷི་ཀྑ་ཝེ, རཱ་ཛཱ ཨ་དྡ་སཱ’’ཏི. ‘‘ཨ་ཙི་ར་ཝ་ཏི་ཡཱ ན་དི་ཡཱ, བྷ་ག་ཝཱ, ཨུ་ད་ཀེ ཀཱི་ལ༹་ནྟེ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, ཨུ་ད་ཀེ ཀཱི་ལི༹་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༣༦. ‘‘ཨུ་ད་ཀེ ཧ་ས་དྷ་མྨེ [ཧ་སྶ་དྷ་མྨེ (སཱི. སྱཱ.)] པཱ་ཙི་ཏྟི་ཡ’’ནྟི.
༣༣༧. ཨུ་ད་ཀེ ཧ་ས་དྷ་མྨོ ནཱ་མ ཨུ་པ་རི་གོ་པྥ་ཀེ ཨུ་ད་ཀེ ཧ་སཱ་དྷི་པྤཱ་ཡོ ནི་མུ་ཛྫ་ཏི ཝཱ ཨུ་མྨུ་ཛྫ་ཏི ཝཱ པ་ལ་ཝ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
༣༣༨. ཨུ་ད་ཀེ ཧ་ས་དྷ་མྨེ ཧ་ས་དྷ་མྨ་ས་ཉྙཱི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་ད་ཀེ ཧ་ས་དྷ་མྨེ ཝེ་མ་ཏི་ཀོ, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་ད་ཀེ ཧ་ས་དྷ་མྨེ ཨ་ཧ་ས་དྷ་མྨ་ས་ཉྙཱི, ཨཱ་པ་ཏྟི པཱ་ཙི་ཏྟི་ཡ་སྶ.
ཧེ་ཊྛཱ་གོ་པྥ་ཀེ ཨུ་ད་ཀེ ཀཱི་ལ༹་ཏི, ཨཱ་པ་ཏྟི དུ་ཀྐ་ཊ་སྶ. ཨུ་ད་ཀེ ནཱ་ཝཱ་ཡ ཀཱི་ལ༹་ཏི, ཨཱ་པ་ཏྟི དུ་ཀྐ་ཊ་སྶ. ཧ་ཏྠེ་ན ཝཱ པཱ་དེ་ན ཝཱ ཀ་ཊྛེ་ན ཝཱ ཀ་ཋ་ལཱ་ཡ ཝཱ ཨུ་ད་ཀཾ པ་ཧ་ར་ཏི, ཨཱ་པ་ཏྟི དུ་ཀྐ་ཊ་སྶ. བྷཱ་ཛ་ན་ག་ཏཾ ཨུ་ད་ཀཾ ཝཱ ཀ་ཉྫི་ཀཾ ཝཱ ཁཱི་རཾ ཝཱ ཏ་ཀྐཾ ཝཱ ར་ཛ་ནཾ ཝཱ པ་སྶཱ་ཝཾ ཝཱ ཙི་ཀྑ་ལླཾ ཝཱ ཀཱི་ལ༹་ཏི, ཨཱ་པ་ཏྟི དུ་ཀྐ་ཊ་སྶ.
ཨུ་ད་ཀེ ཨ་ཧ་ས་དྷ་མྨེ ཧ་ས་དྷ་མྨ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨུ་ད་ཀེ ཨ་ཧ་ས་དྷ་མྨེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨུ་ད་ཀེ ཨ་ཧ་ས་དྷ་མྨེ ཨ་ཧ་ས་དྷ་མྨ་ས་ཉྙཱི, ཨ་ནཱ་པ་ཏྟི.
༣༣༩. ཨ་ནཱ་པ་ཏྟི ན ཧ་སཱ་དྷི་པྤཱ་ཡོ, ས་ཏི ཀ་ར་ཎཱི་ཡེ ཨུ་ད་ཀཾ ཨོ་ཏ་རི་ཏྭཱ ནི་མུ་ཛྫ་ཏི ཝཱ ཨུ་མྨུ་ཛྫ་ཏི ཝཱ པ་ལ་ཝ་ཏི ཝཱ, པཱ་རཾ ག་ཙྪ་ནྟོ ནི་མུ་ཛྫ་ཏི ཝཱ ཨུ་མྨུ་ཛྫ་ཏི ཝཱ པ་ལ་ཝ་ཏི ཝཱ, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཧ་ས་དྷ་མྨ་སི་ཀྑཱ་པ་དཾ ནི་ཊྛི་ཏཾ ཏ་ཏི་ཡཾ.
༤. ཨ་ནཱ་ད་རི་ཡ་སི་ཀྑཱ་པ་དཾ
༣༤༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཚ་ནྣོ ཨ་ནཱ་ཙཱ་རཾ ཨཱ་ཙ་ར་ཏི. བྷི་ཀྑཱུ ཨེ་ཝ་མཱ་ཧཾ་སུ – ‘‘མཱ་ཝུ་སོ ཚ་ནྣ, ཨེ་ཝ་རཱུ་པཾ ཨ་ཀཱ་སི. ནེ་ཏཾ ཀ་པྤ་ཏཱི’’ཏི. སོ ཨ་ནཱ་ད་རི་ཡཾ པ་ཊི་ཙྩ ཀ་རོ་ཏི་ཡེ་ཝ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཚ་ནྣོ ཨ་ནཱ་ད་རི་ཡཾ ཀ་རི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཚ་ནྣ, ཨ་ནཱ་ད་རི་ཡཾ ཀ་རོ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ཨ་ནཱ་ད་རི་ཡཾ ཀ་རི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༤༡. ‘‘ཨ་ནཱ་ད་རི་ཡེ པཱ་ཙི་ཏྟི་ཡ’’ནྟི.
༣༤༢. ཨ་ནཱ་ད་རི་ཡཾ ནཱ་མ དྭེ ཨ་ནཱ་ད་རི་ཡཱ་ནི – པུ་གྒ་ལཱ་ནཱ་ད་རི་ཡ་ཉྩ དྷ་མྨཱ་ནཱ་ད་རི་ཡ་ཉྩ.
པུ་གྒ་ལཱ་ནཱ་ད་རི་ཡཾ ནཱ་མ ཨུ་པ་ས་མྤ་ནྣེ་ན པ་ཉྙ་ཏྟེ་ན ཝུ་ཙྩ་མཱ་ནོ – ‘‘ཨ་ཡཾ ཨུ་ཀྑི་ཏྟ་ཀོ ཝཱ ཝ་མྦྷི་ཏོ ཝཱ ག་ར་ཧི་ཏོ ཝཱ, ཨི་མ་སྶ ཝ་ཙ་ནཾ ཨ་ཀ་ཏཾ བྷ་ཝི་སྶ་ཏཱི’’ཏི ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
དྷ་མྨཱ་ནཱ་ད་རི་ཡཾ ནཱ་མ ཨུ་པ་ས་མྤ་ནྣེ་ན པ་ཉྙ་ཏྟེ་ན ཝུ་ཙྩ་མཱ་ནོ ‘‘ཀ་ཐཱ་ཡཾ ན་སྶེ་ཡྻ ཝཱ ཝི་ན་སྶེ་ཡྻ ཝཱ ཨ་ནྟ་ར་དྷཱ་ཡེ་ཡྻ ཝཱ’’, ཏཾ ཝཱ ན སི་ཀྑི་ཏུ་ཀཱ་མོ ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༣༤༣. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་པ་ཉྙ་ཏྟེ་ན ཝུ་ཙྩ་མཱ་ནོ – ‘‘ཨི་དཾ ན ས་ལླེ་ཁཱ་ཡ ན དྷུ་ཏ་ཏྠཱ་ཡ ན པཱ་སཱ་དི་ཀ་ཏཱ་ཡ ན ཨ་པ་ཙ་ཡཱ་ཡ ན ཝཱི་རི་ཡཱ་ར་མྦྷཱ་ཡ སཾ་ཝ་ཏྟ་ཏཱི’’ཏི ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ་ན པ་ཉྙ་ཏྟེ་ན ཝཱ ཨ་པ་ཉྙ་ཏྟེ་ན ཝཱ ཝུ་ཙྩ་མཱ་ནོ – ‘‘ཨི་དཾ ན ས་ལླེ་ཁཱ་ཡ ན དྷུ་ཏ་ཏྠཱ་ཡ ན པཱ་སཱ་དི་ཀ་ཏཱ་ཡ ན ཨ་པ་ཙ་ཡཱ་ཡ ན ཝཱི་རི་ཡཱ་ར་མྦྷཱ་ཡ སཾ་ཝ་ཏྟ་ཏཱི’’ཏི ཨ་ནཱ་ད་རི་ཡཾ ཀ་རོ་ཏི, ཨཱ་པ་ཏྟི དུ་ཀྐ་ཊ་སྶ.
ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༣༤༤. ཨ་ནཱ་པ་ཏྟི – ‘‘ཨེ་ཝཾ ཨ་མྷཱ་ཀཾ ཨཱ་ཙ་རི་ཡཱ་ནཾ ཨུ་གྒ་ཧོ པ་རི་པུ་ཙྪཱ’’ཏི བྷ་ཎ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཨ་ནཱ་ད་རི་ཡ་སི་ཀྑཱ་པ་དཾ ནི་ཊྛི་ཏཾ ཙ་ཏུ་ཏྠཾ.
༥. བྷིཾ་སཱ་པ་ན་སི་ཀྑཱ་པ་དཾ
༣༤༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ས་ཏྟ་ར་ས་ཝ་གྒི་ཡེ བྷི་ཀྑཱུ བྷིཾ་སཱ་པེ་ནྟི. ཏེ བྷིཾ་སཱ་པཱི་ཡ་མཱ་ནཱ རོ་ད་ནྟི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, རོ་ད་ཐཱ’’ཏི? ‘‘ཨི་མེ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ཨ་མྷེ བྷིཾ་སཱ་པེ་ནྟཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ བྷི་ཀྑུཾ བྷིཾ་སཱ་པེ་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, བྷི་ཀྑུཾ བྷིཾ་སཱ་པེ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, བྷི་ཀྑུཾ བྷིཾ་སཱ་པེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༤༦. ‘‘ཡོ པ་ན བྷི་ཀྑུ བྷི་ཀྑུཾ བྷིཾ་སཱ་པེ་ཡྻ, པཱ་ཙི་ཏྟི་ཡ’’ནྟི.
༣༤༧. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུནྟི ཨ་ཉྙཾ བྷི་ཀྑུཾ.
བྷིཾ་སཱ་པེ་ཡྻཱཏི ཨུ་པ་ས་མྤ་ནྣོ ཨུ་པ་ས་མྤ་ནྣཾ བྷིཾ་སཱ་པེ་ཏུ་ཀཱ་མོ རཱུ་པཾ ཝཱ ས་དྡཾ ཝཱ ག་ནྡྷཾ ཝཱ ར་སཾ ཝཱ ཕོ་ཊྛ་བྦཾ ཝཱ ཨུ་པ་སཾ་ཧ་ར་ཏི. བྷཱ་ཡེ་ཡྻ ཝཱ སོ ན ཝཱ བྷཱ་ཡེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ. ཙོ་ར་ཀ་ནྟཱ་རཾ ཝཱ ཝཱ་ལ༹་ཀ་ནྟཱ་རཾ ཝཱ པི་སཱ་ཙ་ཀ་ནྟཱ་རཾ ཝཱ ཨཱ་ཙི་ཀྑ་ཏི. བྷཱ་ཡེ་ཡྻ ཝཱ སོ ན ཝཱ བྷཱ་ཡེ་ཡྻ, ཨཱ་པ་ཏྟི པཱ་ཙི་ཏྟི་ཡ་སྶ.
༣༤༨. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི བྷིཾ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀོ བྷིཾ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ‘ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི བྷིཾ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣཾ བྷིཾ་སཱ་པེ་ཏུ་ཀཱ་མོ རཱུ་པཾ ཝཱ ས་དྡཾ ཝཱ ག་ནྡྷཾ ཝཱ ར་སཾ ཝཱ ཕོ་ཊྛ་བྦཾ ཝཱ ཨུ་པ་སཾ་ཧ་ར་ཏི. བྷཱ་ཡེ་ཡྻ ཝཱ སོ ན ཝཱ བྷཱ་ཡེ་ཡྻ, ཨཱ་པ་ཏྟི དུ་ཀྐ་ཊ་སྶ. ཙོ་ར་ཀ་ནྟཱ་རཾ ཝཱ ཝཱ་ལ༹་ཀ་ནྟཱ་རཾ ཝཱ པི་སཱ་ཙ་ཀ་ནྟཱ་རཾ ཝཱ ཨཱ་ཙི་ཀྑ་ཏི. བྷཱ་ཡེ་ཡྻ ཝཱ སོ ན ཝཱ བྷཱ་ཡེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ.
༣༤༩. ཨ་ནཱ་པ་ཏྟི ན བྷིཾ་སཱ་པེ་ཏུ་ཀཱ་མོ རཱུ་པཾ ཝཱ ས་དྡཾ ཝཱ ག་ནྡྷཾ ཝཱ ར་སཾ ཝཱ ཕོ་ཊྛ་བྦཾ ཝཱ ཨུ་པ་སཾ་ཧ་ར་ཏི, ཙོ་ར་ཀ་ནྟཱ་རཾ ཝཱ ཝཱ་ལ༹་ཀ་ནྟཱ་རཾ ཝཱ པི་སཱ་ཙ་ཀ་ནྟཱ་རཾ ཝཱ ཨཱ་ཙི་ཀྑ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
བྷིཾ་སཱ་པ་ན་སི་ཀྑཱ་པ་དཾ ནི་ཊྛི་ཏཾ པ་ཉྩ་མཾ.
༦. ཛོ་ཏི་ཀ་སི་ཀྑཱ་པ་དཾ
༣༥༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ བྷ་གྒེ་སུ ཝི་ཧ་ར་ཏི སུཾ་སུ་མཱ་ར་གི་རེ [སུཾ་སུ་མཱ་ར་གི་རེ (སཱི. སྱཱ.) སཾ་སུ་མཱ་ར་གི་རེ (ཀ.)] བྷེ་ས་ཀ་ལཱ༹་ཝ་ནེ མི་ག་དཱ་ཡེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཧེ་མ་ནྟི་ཀེ ཀཱ་ལེ ཨ་ཉྙ་ཏ་རཾ མ་ཧ་ནྟཾ སུ་སི་ར་ཀ་ཊྛཾ ཛོ་ཏིཾ ས་མཱ་ད་ཧི་ཏྭཱ ཝི་སི་བྦེ་སུཾ. ཏ་སྨི་ཉྩ སུ་སི་རེ ཀ་ཎྷ་ས་པྤོ ཨ་གྒི་ནཱ ས་ནྟ་ཏྟོ ནི་ཀྑ་མི་ཏྭཱ བྷི་ཀྑཱུ པ་རི་པཱ་ཏེ་སི. བྷི་ཀྑཱུ ཏ་ཧཾ ཏ་ཧཾ ཨུ་པ་དྷཱ་ཝིཾ་སུ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ ཛོ་ཏིཾ ས་མཱ་ད་ཧི་ཏྭཱ ཝི་སི་བྦེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ ཛོ་ཏིཾ ས་མཱ་ད་ཧི་ཏྭཱ ཝི་སི་བྦེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ ཛོ་ཏིཾ ས་མཱ་ད་ཧི་ཏྭཱ ཝི་སི་བྦེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཝི་སི་བྦ་ནཱ་པེ་ཀྑོ ཛོ་ཏིཾ ས་མཱ་ད་ཧེ་ཡྻ ཝཱ ས་མཱ་ད་ཧཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༥༡. ཏེ་ན ཁོ པ་ན ས་མ་ཡེ་ན བྷི་ཀྑཱུ གི་ལཱ་ནཱ ཧོ་ནྟི. གི་ལཱ་ན་པུ་ཙྪ་ཀཱ བྷི་ཀྑཱུ གི་ལཱ་ནེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཀ་ཙྩཱ་ཝུ་སོ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡ’’ནྟི? ‘‘པུ་བྦེ མ་ཡཾ, ཨཱ་ཝུ་སོ, ཛོ་ཏིཾ ས་མཱ་ད་ཧི་ཏྭཱ ཝི་སི་བྦེ་མ; ཏེ་ན ནོ ཕཱ་སུ ཧོ་ཏི. ཨི་དཱ་ནི པ་ན ‘‘བྷ་ག་ཝ་ཏཱ པ་ཊི་ཀྑི་ཏྟ’’ནྟི ཀུ་ཀྐུ་ཙྩཱ་ཡ་ནྟཱ ན ཝི་སི་བྦེ་མ, ཏེ་ན ནོ ན ཕཱ་སུ ཧོ་ཏཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནེ་ན བྷི་ཀྑུ་ནཱ ཛོ་ཏིཾ ས་མཱ་ད་ཧི་ཏྭཱ ཝཱ ས་མཱ་ད་ཧཱ་པེ་ཏྭཱ ཝཱ ཝི་སི་བྦེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨ་གི་ལཱ་ནོ ཝི་སི་བྦ་ནཱ་པེ་ཀྑོ ཛོ་ཏིཾ ས་མཱ་ད་ཧེ་ཡྻ ཝཱ ས་མཱ་ད་ཧཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༥༢. ཏེ་ན ཁོ པ་ན ས་མ་ཡེ་ན བྷི་ཀྑཱུ པ་དཱི་པེ་པི ཛོ་ཏི་ཀེ་པི ཛ་ནྟཱ་གྷ་རེ་པི ཀུ་ཀྐུ་ཙྩཱ་ཡ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཏ་ཐཱ་རཱུ་པ་པྤ་ཙྩ་ཡཱ ཛོ་ཏིཾ ས་མཱ་ད་ཧི་ཏུཾ ས་མཱ་ད་ཧཱ་པེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༥༣. ‘‘ཡོ པ་ན བྷི་ཀྑུ ཨ་གི་ལཱ་ནོ ཝི་སི་བྦ་ནཱ་པེ་ཀྑོ ཛོ་ཏིཾ ས་མཱ་ད་ཧེ་ཡྻ ཝཱ ས་མཱ་ད་ཧཱ་པེ་ཡྻ ཝཱ, ཨ་ཉྙ་ཏྲ ཏ་ཐཱ་རཱུ་པ་པྤ་ཙྩ་ཡཱ, པཱ་ཙི་ཏྟི་ཡ’’ནྟི.
༣༥༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨ་གི་ལཱ་ནོ ནཱ་མ ཡ་སྶ ཝི་ནཱ ཨ་གྒི་ནཱ ཕཱ་སུ ཧོ་ཏི.
གི་ལཱ་ནོ ནཱ་མ ཡ་སྶ ཝི་ནཱ ཨ་གྒི་ནཱ ན ཕཱ་སུ ཧོ་ཏི.
ཝི་སི་བྦ་ནཱ་པེ་ཀྑོཏི ཏ་པྤི་ཏུ་ཀཱ་མོ.
ཛོ་ཏི ནཱ་མ ཨ་གྒི ཝུ་ཙྩ་ཏི.
ས་མཱ་ད་ཧེ་ཡྻཱཏི ས་ཡཾ ས་མཱ་ད་ཧ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ས་མཱ་ད་ཧཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ཀིཾ ཨཱ་ཎ་ཏྟོ བ་ཧུ་ཀ་མྤི ས་མཱ་ད་ཧ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཉྙ་ཏྲ ཏ་ཐཱ རཱུ་པ་པྤ་ཙྩ་ཡཱཏི ཋ་པེ་ཏྭཱ ཏ་ཐཱ་རཱུ་པ་པྤ་ཙྩ་ཡཾ.
༣༥༥. ཨ་གི་ལཱ་ནོ ཨ་གི་ལཱ་ན་ས་ཉྙཱི ཝི་སི་བྦ་ནཱ་པེ་ཀྑོ ཛོ་ཏིཾ ས་མཱ་ད་ཧ་ཏི ཝཱ ས་མཱ་ད་ཧཱ་པེ་ཏི ཝཱ, ཨ་ཉྙ་ཏྲ ཏ་ཐཱ་རཱུ་པ་པྤ་ཙྩ་ཡཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་གི་ལཱ་ནོ ཝེ་མ་ཏི་ཀོ ཝི་སི་བྦ་ནཱ་པེ་ཀྑོ ཛོ་ཏིཾ ས་མཱ་ད་ཧ་ཏི ཝཱ ས་མཱ་ད་ཧཱ་པེ་ཏི ཝཱ, ཨ་ཉྙ་ཏྲ ཏ་ཐཱ་རཱུ་པ་པྤ་ཙྩ་ཡཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་གི་ལཱ་ནོ གི་ལཱ་ན་ས་ཉྙཱི ཝི་སི་བྦ་ནཱ་པེ་ཀྑོ ཛོ་ཏིཾ ས་མཱ་ད་ཧ་ཏི ཝཱ ས་མཱ་ད་ཧཱ་པེ་ཏི ཝཱ, ཨ་ཉྙ་ཏྲ ཏ་ཐཱ་རཱུ་པ་པྤ་ཙྩ་ཡཱ, ཨཱ་པ་ཏྟི པཱ་ཙི་ཏྟི་ཡ་སྶ.
པ་ཊི་ལཱ་ཏཾ ཨུ་ཀྑི་པ་ཏི, ཨཱ་པ་ཏྟི དུ་ཀྐ་ཊ་སྶ. གི་ལཱ་ནོ ཨ་གི་ལཱ་ན་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. གི་ལཱ་ནོ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. གི་ལཱ་ནོ གི་ལཱ་ན་ས་ཉྙཱི, ཨ་ནཱ་པ་ཏྟི.
༣༥༦. ཨ་ནཱ་པ་ཏྟི གི་ལཱ་ན་སྶ, ཨ་ཉྙེ་ན ཀ་ཏཾ ཝི་སི་བྦེ་ཏི, ཝཱི་ཏ་ཙྩི་ཏ་ངྒཱ་རཾ ཝི་སི་བྦེ་ཏི, པ་དཱི་པེ ཛོ་ཏི་ཀེ ཛ་ནྟཱ་གྷ་རེ ཏ་ཐཱ་རཱུ་པ་པྤ་ཙྩ་ཡཱ, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཛོ་ཏི་ཀ་སི་ཀྑཱ་པ་དཾ ནི་ཊྛི་ཏཾ ཚ་ཊྛཾ.
༧. ན་ཧཱ་ན་སི་ཀྑཱ་པ་དཾ
༣༥༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷི་ཀྑཱུ ཏ་པོ་དེ ན་ཧཱ་ཡ་ནྟི. ཏེ་ན ཁོ པ་ན ས་མ་ཡེ་ན [ཨ་ཐ ཁོ (སཱི. སྱཱ.)] རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ ‘‘སཱི་སཾ ན་ཧཱ་ཡི་སྶཱ་མཱི’’ཏི ཏ་པོ་དཾ ག་ནྟྭཱ – ‘‘ཡཱ་ཝཱ་ཡྻཱ ན་ཧཱ་ཡ་ནྟཱི’’ཏི ཨེ་ཀ་མ་ནྟཾ པ་ཊི་མཱ་ནེ་སི. བྷི་ཀྑཱུ ཡཱ་ཝ ས་མ་ནྡྷ་ཀཱ་རཱ ན་ཧཱ་ཡིཾ་སུ. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ ཝི་ཀཱ་ལེ སཱི་སཾ ན་ཧཱ་ཡི་ཏྭཱ, ན་ག་ར་དྭཱ་རེ ཐ་ཀི་ཏེ བ་ཧི་ན་ག་རེ ཝ་སི་ཏྭཱ, ཀཱ་ལ་སྶེ་ཝ ཨ་ས་མྦྷི་ནྣེ་ན ཝི་ལེ་པ་ནེ་ན ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ རཱ་ཛཱ་ནཾ མཱ་ག་དྷཾ སེ་ནི་ཡཾ བི་མྦི་སཱ་རཾ བྷ་ག་ཝཱ ཨེ་ཏ་ད་ཝོ་ཙ – ‘‘ཀི་སྶ ཏྭཾ, མ་ཧཱ་རཱ་ཛ, ཀཱ་ལ་སྶེ་ཝ ཨཱ་ག་ཏོ ཨ་ས་མྦྷི་ནྣེ་ན ཝི་ལེ་པ་ནེ་ནཱ’’ཏི? ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཨ་ཐ ཁོ བྷ་ག་ཝཱ རཱ་ཛཱ་ནཾ མཱ་ག་དྷཾ སེ་ནི་ཡཾ བི་མྦི་སཱ་རཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏོ ས་མཱ་ད་པི་ཏོ ས་མུ་ཏྟེ་ཛི་ཏོ ས་མྤ་ཧཾ་སི་ཏོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ རཱ་ཛཱ་ན་མྤི པ་སྶི་ཏྭཱ ན མ་ཏྟཾ ཛཱ་ནི་ཏྭཱ ན་ཧཱ་ཡ་ནྟཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ རཱ་ཛཱ་ན་མྤི པ་སྶི་ཏྭཱ ན མ་ཏྟཾ ཛཱ་ནི་ཏྭཱ ན་ཧཱ་ཡི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, པཱ་ཙི་ཏྟི་ཡ’’ནྟི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༥༨. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨུ་ཎྷ་ས་མ་ཡེ པ་རི་ལཱ༹་ཧ་ས་མ་ཡེ ཀུ་ཀྐུ་ཙྩཱ་ཡ་ནྟཱ ན ན་ཧཱ་ཡ་ནྟི, སེ་ད་ག་ཏེ་ན ག་ཏྟེ་ན ས་ཡ་ནྟི. ཙཱི་ཝ་ར་མྤི སེ་ནཱ་ས་ན་མྤི དུ་སྶ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་ཎྷ་ས་མ་ཡེ པ་རི་ལཱ༹་ཧ་ས་མ་ཡེ ཨོ་རེ་ན་དྡྷ་མཱ་སཾ ན་ཧཱ་ཡི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. དི་ཡ་ཌྜྷོ མཱ་སོ སེ་སོ གི་མྷཱ་ན་ནྟི [གི་མྷཱ་ནཾ (ཨི་ཏི་པི)] ཝ་སྶཱ་ན་སྶ པ་ཋ་མོ མཱ་སོ ཨི་ཙྩེ་ཏེ ཨ་ཌྜྷ་ཏེ་ཡྻ་མཱ་སཱ ཨུ་ཎྷ་ས་མ་ཡོ པ་རི་ལཱ༹་ཧ་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༥༩. ཏེ་ན ཁོ པ་ན ས་མ་ཡེ་ན བྷི་ཀྑཱུ གི་ལཱ་ནཱ ཧོ་ནྟི. གི་ལཱ་ན་པུ་ཙྪ་ཀཱ བྷི་ཀྑཱུ གི་ལཱ་ནེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཀ་ཙྩཱ་ཝུ་སོ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡ’’ནྟི? ‘‘པུ་བྦེ མ་ཡཾ, ཨཱ་ཝུ་སོ, ཨོ་རེ་ན་དྡྷ་མཱ་སཾ ན་ཧཱ་ཡཱ་མ, ཏེ་ན ནོ ཕཱ་སུ ཧོ་ཏི; ཨི་དཱ་ནི པ་ན ‘‘བྷ་ག་ཝ་ཏཱ པ་ཊི་ཀྑི་ཏྟ’’ནྟི ཀུ་ཀྐུ་ཙྩཱ་ཡ་ནྟཱ ན ན་ཧཱ་ཡཱ་མ, ཏེ་ན ནོ ན ཕཱ་སུ ཧོ་ཏཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནེ་ན བྷི་ཀྑུ་ནཱ ཨོ་རེ་ན་དྡྷ་མཱ་སཾ ན་ཧཱ་ཡི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. དི་ཡ་ཌྜྷོ མཱ་སོ སེ་སོ གི་མྷཱ་ན་ནྟི [གི་མྷཱ་ནཾ (ཨི་ཏི་པི)] ཝ་སྶཱ་ན་སྶ པ་ཋ་མོ མཱ་སོ ཨི་ཙྩེ་ཏེ ཨ་ཌྜྷ་ཏེ་ཡྻ་མཱ་སཱ ཨུ་ཎྷ་ས་མ་ཡོ, པ་རི་ལཱ༹་ཧ་ས་མ་ཡོ, གི་ལཱ་ན་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༦༠. ཏེ་ན ཁོ པ་ན ས་མ་ཡེ་ན བྷི་ཀྑཱུ ན་ཝ་ཀ་མྨཾ ཀ་ཏྭཱ ཀུ་ཀྐུ་ཙྩཱ་ཡ་ནྟཱ ན ན་ཧཱ་ཡ་ནྟི. ཏེ སེ་ད་ག་ཏེ་ན ག་ཏྟེ་ན ས་ཡ་ནྟི. ཙཱི་ཝ་ར་མྤི སེ་ནཱ་ས་ན་མྤི དུ་སྶ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཀ་མྨ་ས་མ་ཡེ ཨོ་རེ་ན་དྡྷ་མཱ་སཾ ན་ཧཱ་ཡི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. དི་ཡ་ཌྜྷོ མཱ་སོ སེ་སོ གི་མྷཱ་ན་ནྟི ཝ་སྶཱ་ན་སྶ པ་ཋ་མོ མཱ་སོ ཨི་ཙྩེ་ཏེ ཨ་ཌྜྷ་ཏེ་ཡྻ་མཱ་སཱ ཨུ་ཎྷ་ས་མ་ཡོ, པ་རི་ལཱ༹་ཧ་ས་མ་ཡོ, གི་ལཱ་ན་ས་མ་ཡོ, ཀ་མྨ་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༦༡. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་དྡྷཱ་ནཾ ག་ནྟྭཱ ཀུ་ཀྐུ་ཙྩཱ་ཡ་ནྟཱ ན ན་ཧཱ་ཡ་ནྟི. ཏེ སེ་ད་ག་ཏེ་ན ག་ཏྟེ་ན ས་ཡ་ནྟི. ཙཱི་ཝ་ར་མྤི སེ་ནཱ་ས་ན་མྤི དུ་སྶ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཨ་དྡྷཱ་ན་ག་མ་ན་ས་མ་ཡེ ཨོ་རེ་ན་དྡྷ་མཱ་སཾ ན་ཧཱ་ཡི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. དི་ཡ་ཌྜྷོ མཱ་སོ སེ་སོ གི་མྷཱ་ན་ནྟི ཝ་སྶཱ་ན་སྶ པ་ཋ་མོ མཱ་སོ ཨི་ཙྩེ་ཏེ ཨ་ཌྜྷ་ཏེ་ཡྻ་མཱ་སཱ ཨུ་ཎྷ་ས་མ་ཡོ, པ་རི་ལཱ༹་ཧ་ས་མ་ཡོ, གི་ལཱ་ན་ས་མ་ཡོ, ཀ་མྨ་ས་མ་ཡོ, ཨ་དྡྷཱ་ན་ག་མ་ན་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.
ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.
༣༦༢. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ ཨ་ཛ྄ཛྷོ་ཀཱ་སེ ཙཱི་ཝ་ར་ཀ་མྨཾ ཀ་རོ་ནྟཱ ས་ར་ཛེ་ན ཝཱ་ཏེ་ན ཨོ་ཀི་ཎྞཱ ཧོ་ནྟི. དེ་ཝོ ཙ ཐོ་ཀཾ ཐོ་ཀཾ ཕུ་སཱ་ཡ་ཏི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ན ན་ཧཱ་ཡ་ནྟི, ཀི་ལི་ནྣེ་ན ག་ཏྟེ་ན ས་ཡ་ནྟི. ཙཱི་ཝ་ར་མྤི སེ་ནཱ་ས་ན་མྤི དུ་སྶ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ཨ་ནུ་ཛཱ་ནཱ་མི, བྷི་ཀྑ་ཝེ, ཝཱ་ཏ་ཝུ་ཊྛི་ས་མ་ཡེ ཨོ་རེ་ན་དྡྷ་མཱ་སཾ ན་ཧཱ་ཡི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༦༣. ‘‘ཡོ པ་ན བྷི་ཀྑུ ཨོ་རེ་ན་དྡྷ་མཱ་སཾ ན་ཧཱ་ཡེ་ཡྻ, ཨ་ཉྙ་ཏྲ ས་མ་ཡཱ, པཱ་ཙི་ཏྟི་ཡཾ. ཏ་ཏྠཱ་ཡཾ ས་མ་ཡོ. དི་ཡ་ཌྜྷོ མཱ་སོ སེ་སོ གི་མྷཱ་ན་ནྟི ཝ་སྶཱ་ན་སྶ པ་ཋ་མོ མཱ་སོ ཨི་ཙྩེ་ཏེ ཨ་ཌྜྷ་ཏེ་ཡྻ་མཱ་སཱ ཨུ་ཎྷ་ས་མ་ཡོ, པ་རི་ལཱ༹་ཧ་ས་མ་ཡོ, གི་ལཱ་ན་ས་མ་ཡོ, ཀ་མྨ་ས་མ་ཡོ, ཨ་དྡྷཱ་ན་ག་མ་ན་ས་མ་ཡོ, ཝཱ་ཏ་ཝུ་ཊྛི་ས་མ་ཡོ – ཨ་ཡཾ ཏ་ཏྠ ས་མ་ཡོ’’ཏི.
༣༦༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
ཨོ་རེ་ན་དྡྷ་མཱ་སནྟི ཨཱུ་ན་ཀ་དྡྷ་མཱ་སཾ.
ན་ཧཱ་ཡེ་ཡྻཱཏི ཙུ་ཎྞེ་ན ཝཱ མ་ཏྟི་ཀཱ་ཡ ཝཱ ན་ཧཱ་ཡ་ཏི, པ་ཡོ་གེ པ་ཡོ་གེ དུ་ཀྐ་ཊཾ. ན་ཧཱ་ན་པ་རི་ཡོ་སཱ་ནེ, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཉྙ་ཏྲ ས་མ་ཡཱཏི ཋ་པེ་ཏྭཱ ས་མ་ཡཾ.
ཨུ་ཎྷ་ས་མ་ཡོ ནཱ་མ དི་ཡ་ཌྜྷོ མཱ་སོ སེ་སོ གི་མྷཱ་ནཾ. པ་རི་ལཱ༹་ཧ་ས་མ་ཡོ ནཱ་མ ཝ་སྶཱ་ན་སྶ པ་ཋ་མོ མཱ་སོ ‘‘ཨི་ཙྩེ་ཏེ ཨ་ཌྜྷ་ཏེ་ཡྻ་མཱ་སཱ ཨུ་ཎྷ་ས་མ་ཡོ པ་རི་ལཱ༹་ཧ་ས་མ་ཡོ’’ཏི ན་ཧཱ་ཡི་ཏ་བྦཾ.
གི་ལཱ་ན་ས་མ་ཡོ ནཱ་མ ཡ་སྶ ཝི་ནཱ ན་ཧཱ་ནེ་ན ན ཕཱ་སུ ཧོ་ཏི. གི་ལཱ་ན་ས་མ་ཡོ་ཏི ན་ཧཱ་ཡི་ཏ་བྦཾ.
ཀ་མྨ་ས་མ་ཡོ ནཱ་མ ཨ་ནྟ་མ་སོ པ་རི་ཝེ་ཎ་མྤི ས་མྨ་ཊྛཾ ཧོ་ཏི. ‘‘ཀ་མྨ་ས་མ་ཡོ’’ཏི ན་ཧཱ་ཡི་ཏ་བྦཾ.
ཨ་དྡྷཱ་ན་ག་མ་ན་ས་མ་ཡོ ནཱ་མ ‘‘ཨ་དྡྷ་ཡོ་ཛ་ནཾ ག་ཙྪི་སྶཱ་མཱི’’ཏི ན་ཧཱ་ཡི་ཏ་བྦཾ, ག་ཙྪ་ནྟེ་ན ན་ཧཱ་ཡི་ཏ་བྦཾ, ག་ཏེ་ན ན་ཧཱ་ཡི་ཏ་བྦཾ.
ཝཱ་ཏ་ཝུ་ཊྛི་ས་མ་ཡོ ནཱ་མ བྷི་ཀྑཱུ ས་ར་ཛེ་ན ཝཱ་ཏེ་ན ཨོ་ཀི་ཎྞཱ ཧོ་ནྟི, དྭེ ཝཱ ཏཱི་ཎི ཝཱ ཨུ་ད་ཀ་ཕུ་སི་ཏཱ་ནི ཀཱ་ཡེ པ་ཏི་ཏཱ་ནི ཧོ་ནྟི. ‘‘ཝཱ་ཏ་ཝུ་ཊྛི་ས་མ་ཡོ’’ཏི ན་ཧཱ་ཡི་ཏ་བྦཾ.
༣༦༥. ཨཱུ་ན་ཀ་དྡྷ་མཱ་སེ ཨཱུ་ན་ཀ་ས་ཉྙཱི, ཨ་ཉྙ་ཏྲ ས་མ་ཡཱ, ན་ཧཱ་ཡ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨཱུ་ན་ཀ་དྡྷ་མཱ་སེ ཝེ་མ་ཏི་ཀོ, ཨ་ཉྙ་ཏྲ ས་མ་ཡཱ, ན་ཧཱ་ཡ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨཱུ་ན་ཀ་དྡྷ་མཱ་སེ ཨ་ཏི་རེ་ཀ་ས་ཉྙཱི, ཨ་ཉྙ་ཏྲ ས་མ་ཡཱ, ན་ཧཱ་ཡ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཏི་རེ་ཀ་དྡྷ་མཱ་སེ ཨཱུ་ན་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨ་ཏི་རེ་ཀ་དྡྷ་མཱ་སེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨ་ཏི་རེ་ཀ་དྡྷ་མཱ་སེ ཨ་ཏི་རེ་ཀ་ས་ཉྙཱི, ཨ་ནཱ་པ་ཏྟི.
༣༦༦. ཨ་ནཱ་པ་ཏྟི ས་མ་ཡེ, ཨ་དྡྷ་མཱ་སཾ ན་ཧཱ་ཡ་ཏི, ཨ་ཏི་རེ་ཀ་དྡྷ་མཱ་སཾ ན་ཧཱ་ཡ་ཏི, པཱ་རཾ ག་ཙྪ་ནྟོ ན་ཧཱ་ཡ་ཏི, ས་བྦ་པ་ཙྩ་ནྟི་མེ་སུ ཛ་ན་པ་དེ་སུ, ཨཱ་པ་དཱ་སུ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ན་ཧཱ་ན་སི་ཀྑཱ་པ་དཾ ནི་ཊྛི་ཏཾ ས་ཏྟ་མཾ.
༨. དུ་བྦ་ཎྞ་ཀ་ར་ཎ་སི་ཀྑཱ་པ་དཾ
༣༦༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ ཙ པ་རི་བྦཱ་ཛ་ཀཱ ཙ སཱ་ཀེ་ཏཱ སཱ་ཝ་ཏྠིཾ ཨ་དྡྷཱ་ན་མ་གྒ་པྤ་ཊི་པ་ནྣཱ ཧོ་ནྟི. ཨ་ནྟ་རཱ་མ་གྒེ ཙོ་རཱ ནི་ཀྑ་མི་ཏྭཱ ཏེ ཨ་ཙྪི་ནྡིཾ་སུ. སཱ་ཝ་ཏྠི་ཡཱ རཱ་ཛ་བྷ་ཊཱ ནི་ཀྑ་མི་ཏྭཱ ཏེ ཙོ་རེ ས་བྷ་ཎྜེ ག་ཧེ་ཏྭཱ བྷི་ཀྑཱུ་ནཾ ས་ནྟི་ཀེ དཱུ་ཏཾ པཱ་ཧེ་སུཾ – ‘‘ཨཱ་ག་ཙྪ་ནྟུ, བྷ་ད་ནྟཱ, ས་ཀཾ ས་ཀཾ ཙཱི་ཝ་རཾ ས་ཉྫཱ་ནི་ཏྭཱ ག་ཎྷ་ནྟཱུ’’ཏི. བྷི་ཀྑཱུ ན ས་ཉྫཱ་ན་ནྟི. ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷ་ད་ནྟཱ ཨ་ཏྟ་ནོ ཨ་ཏྟ་ནོ ཙཱི་ཝ་རཾ ན ས་ཉྫཱ་ནི་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ་ནཾ ཏ་ད་ནུ་ཙྪ་ཝི་ཀཾ ཏ་ད་ནུ་ལོ་མི་ཀཾ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑཱུ་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ, ས་ངྒྷ་ཕཱ་སུ་ཏཱ་ཡ…པེ… ས་དྡྷ་མྨ་ཊྛི་ཏི་ཡཱ, ཝི་ན་ཡཱ་ནུ་གྒ་ཧཱ་ཡ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༦༨. ‘‘ན་ཝཾ པ་ན བྷི་ཀྑུ་ནཱ ཙཱི་ཝ་ར་ལཱ་བྷེ་ན ཏི་ཎྞཾ དུ་བྦ་ཎྞ་ཀ་ར་ཎཱ་ནཾ ཨ་ཉྙ་ཏ་རཾ དུ་བྦ་ཎྞ་ཀ་ར་ཎཾ ཨཱ་དཱ་ཏ་བྦཾ – ནཱི་ལཾ ཝཱ ཀ་དྡ་མཾ ཝཱ ཀཱ་ལ༹་སཱ་མཾ ཝཱ. ཨ་ནཱ་དཱ ཙེ བྷི་ཀྑུ ཏི་ཎྞཾ དུ་བྦ་ཎྞ་ཀ་ར་ཎཱ་ནཾ ཨ་ཉྙ་ཏ་རཾ དུ་བྦ་ཎྞ་ཀ་ར་ཎཾ ན་ཝཾ ཙཱི་ཝ་རཾ པ་རི་བྷུ་ཉྫེ་ཡྻ, པཱ་ཙི་ཏྟི་ཡ’’ནྟི.
༣༦༩. ན་ཝཾ ནཱ་མ ཨ་ཀ་ཏ་ཀ་པྤཾ ཝུ་ཙྩ་ཏི.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ.
ཏི་ཎྞཾ དུ་བྦ་ཎྞ་ཀ་ར་ཎཱ་ནཾ ཨ་ཉྙ་ཏ་རཾ དུ་བྦ་ཎྞ་ཀ་ར་ཎཾ ཨཱ་དཱ་ཏ་བྦནྟི ཨ་ནྟ་མ་སོ ཀུ་ས་གྒེ་ན་པི ཨཱ་དཱ་ཏ་བྦཾ.
ནཱི་ལཾ ནཱ་མ དྭེ ནཱི་ལཱ་ནི – ཀཾ་ས་ནཱི་ལཾ, པ་ལཱ་ས་ནཱི་ལཾ.
ཀ་དྡ་མོ ནཱ་མ ཨོ་ད་ཀོ ཝུ་ཙྩ་ཏི.
ཀཱ་ལ༹་སཱ་མཾ ནཱ་མ ཡཾ་ཀི་ཉྩི ཀཱ་ལ༹་སཱ་མ་ཀཾ [ཀཱ་ལ༹་ཀཾ (སཱི. སྱཱ.)].
ཨ་ནཱ་དཱ ཙེ བྷི་ཀྑུ ཏི་ཎྞཾ དུ་བྦ་ཎྞ་ཀ་ར་ཎཱ་ནཾ ཨ་ཉྙ་ཏ་རཾ དུ་བྦ་ཎྞ་ཀ་ར་ཎནྟི ཨ་ནྟ་མ་སོ ཀུ་ས་གྒེ་ན་པི ཨ་ནཱ་དི་ཡི་ཏྭཱ ཏི་ཎྞཾ དུ་བྦ་ཎྞ་ཀ་ར་ཎཱ་ནཾ ཨ་ཉྙ་ཏ་རཾ དུ་བྦ་ཎྞ་ཀ་ར་ཎཾ ན་ཝཾ ཙཱི་ཝ་རཾ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༣༧༠. ཨ་ནཱ་དི་ནྣེ ཨ་ནཱ་དི་ནྣ་ས་ཉྙཱི པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནཱ་དི་ནྣེ ཝེ་མ་ཏི་ཀོ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ནཱ་དི་ནྣེ ཨཱ་དི་ནྣ་ས་ཉྙཱི པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨཱ་དི་ནྣེ ཨ་ནཱ་དི་ནྣ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. ཨཱ་དི་ནྣེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. ཨཱ་དི་ནྣེ ཨཱ་དི་ནྣ་ས་ཉྙཱི, ཨ་ནཱ་པ་ཏྟི.
༣༧༡. ཨ་ནཱ་པ་ཏྟི་ཨཱ་དི་ཡི་ཏྭཱ པ་རི་བྷུ་ཉྫ་ཏི, ཀ་པྤོ ན་ཊྛོ ཧོ་ཏི, ཀ་པྤ་ཀ་ཏོ་ཀཱ་སོ ཛི་ཎྞོ ཧོ་ཏི, ཀ་པྤ་ཀ་ཏེ་ན ཨ་ཀ་པྤ་ཀ་ཏཾ སཾ་སི་བྦི་ཏཾ ཧོ་ཏི, ཨ་གྒ་ལེ༹ ཨ་ནུ་ཝཱ་ཏེ པ་རི་བྷ་ཎྜེ, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
དུ་བྦ་ཎྞ་ཀ་ར་ཎ་སི་ཀྑཱ་པ་དཾ ནི་ཊྛི་ཏཾ ཨ་ཊྛ་མཾ.
༩. ཝི་ཀ་པྤ་ན་སི་ཀྑཱ་པ་དཾ
༣༧༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ བྷཱ་ཏུ་ནོ ས་དྡྷི་ཝི་ཧཱ་རི་ཀ་སྶ བྷི་ཀྑུ་ནོ སཱ་མཾ ཙཱི་ཝ་རཾ ཝི་ཀ་པྤེ་ཏྭཱ ཨ་པྤ་ཙྩུ་དྡྷཱ་ར་ཎཾ [ཨ་པ་ཙྩུ་དྡྷཱ་ར་ཀཾ (སཱི. སྱཱ.)] པ་རི་བྷུ་ཉྫ་ཏི. ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི – ‘‘ཨ་ཡཾ, ཨཱ་ཝུ་སོ, ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ མ་ཡ྄ཧཾ ཙཱི་ཝ་རཾ སཱ་མཾ ཝི་ཀ་པྤེ་ཏྭཱ ཨ་པྤ་ཙྩུ་དྡྷཱ་ར་ཎཾ པ་རི་བྷུ་ཉྫ་ཏཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ བྷི་ཀྑུ་སྶ སཱ་མཾ ཙཱི་ཝ་རཾ ཝི་ཀ་པྤེ་ཏྭཱ ཨ་པྤ་ཙྩུ་དྡྷཱ་ར་ཎཾ པ་རི་བྷུ་ཉྫི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, ཨུ་པ་ན་ནྡ, བྷི་ཀྑུ་སྶ སཱ་མཾ ཙཱི་ཝ་རཾ ཝི་ཀ་པྤེ་ཏྭཱ ཨ་པྤ་ཙྩུ་དྡྷཱ་ར་ཎཾ པ་རི་བྷུ་ཉྫ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, བྷི་ཀྑུ་སྶ སཱ་མཾ ཙཱི་ཝ་རཾ ཝི་ཀ་པྤེ་ཏྭཱ ཨ་པྤ་ཙྩུ་དྡྷཱ་ར་ཎཾ པ་རི་བྷུ་ཉྫི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༧༣. ‘‘ཡོ པ་ན བྷི་ཀྑུ བྷི་ཀྑུ་སྶ ཝཱ བྷི་ཀྑུ་ནི་ཡཱ ཝཱ སི་ཀྑ་མཱ་ནཱ་ཡ ཝཱ སཱ་མ་ཎེ་ར་སྶ ཝཱ སཱ་མ་ཎེ་རི་ཡཱ ཝཱ སཱ་མཾ ཙཱི་ཝ་རཾ ཝི་ཀ་པྤེ་ཏྭཱ ཨ་པྤ་ཙྩུ་དྡྷཱ་ར་ཎཾ [ཨ་པ་ཙྩུ་དྡྷཱ་ར་ཀཾ (སཱི. སྱཱ.)] པ་རི་བྷུ་ཉྫེ་ཡྻ, པཱ་ཙི་ཏྟི་ཡ’’ནྟི.
༣༧༤. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུ་སྶཱཏི ཨ་ཉྙ་སྶ བྷི་ཀྑུ་སྶ.
བྷི་ཀྑུ་ནཱི ནཱ་མ ཨུ་བྷ་ཏོ་ས་ངྒྷེ ཨུ་པ་ས་མྤ་ནྣཱ.
སི་ཀྑ་མཱ་ནཱ ནཱ་མ དྭེ ཝ་སྶཱ་ནི ཚ་སུ དྷ་མྨེ་སུ སི་ཀྑི་ཏ་སི་ཀྑཱ.
སཱ་མ་ཎེ་རོ ནཱ་མ ད་ས་སི་ཀྑཱ་པ་དི་ཀོ.
སཱ་མ་ཎེ་རཱི ནཱ་མ ད་ས་སི་ཀྑཱ་པ་དི་ཀཱ.
སཱ་མནྟི ས་ཡཾ ཝི་ཀ་པྤེ་ཏྭཱ.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ ཝི་ཀ་པྤ་ནུ་པ་གཾ པ་ཙྪི་མཾ.
ཝི་ཀ་པྤ་ནཱ ནཱ་མ དྭེ ཝི་ཀ་པྤ་ནཱ – ས་མྨུ་ཁཱ་ཝི་ཀ་པྤ་ནཱ ཙ པ་ར་མྨུ་ཁཱ་ཝི་ཀ་པྤ་ནཱ ཙ.
ས་མྨུ་ཁཱ་ཝི་ཀ་པྤ་ནཱ ནཱ་མ ‘‘ཨི་མཾ ཙཱི་ཝ་རཾ ཏུ་ཡ྄ཧཾ ཝི་ཀ་པྤེ་མི ཨི་ཏྠ་ནྣཱ་མ་སྶ ཝཱ’’ཏི.
པ་ར་མྨུ་ཁཱ་ཝི་ཀ་པྤ་ནཱ ནཱ་མ ‘‘ཨི་མཾ ཙཱི་ཝ་རཾ ཝི་ཀ་པྤ་ན་ཏྠཱ་ཡ ཏུ་ཡ྄ཧཾ ད་མྨཱི’’ཏི. ཏེ་ན ཝ་ཏྟ་བྦོ – ‘‘ཀོ ཏེ མི་ཏྟོ ཝཱ ས་ནྡི་ཊྛོ ཝཱ’’ཏི? ‘‘ཨི་ཏྠ་ནྣཱ་མོ ཙ ཨི་ཏྠ་ནྣཱ་མོ ཙཱ’’ཏི. ཏེ་ན ཝ་ཏྟ་བྦོ – ‘‘ཨ་ཧཾ ཏེ་སཾ ད་མྨི, ཏེ་སཾ ས་ནྟ་ཀཾ པ་རི་བྷུ་ཉྫ ཝཱ ཝི་སྶ་ཛྫེ་ཧི ཝཱ ཡ་ཐཱ་པ་ཙྩ་ཡཾ ཝཱ ཀ་རོ་ཧཱི’’ཏི.
ཨ་པྤ་ཙྩུ་དྡྷཱ་ར་ཎཾ ནཱ་མ ཏ་སྶ ཝཱ ཨ་དི་ནྣཾ, ཏ་སྶ ཝཱ ཨ་ཝི་སྶ་ས་ནྟོ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༣༧༥. ཨ་པྤ་ཙྩུ་དྡྷཱ་ར་ཎེ ཨ་པྤ་ཙྩུ་དྡྷཱ་ར་ཎ་ས་ཉྙཱི པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་པྤ་ཙྩུ་དྡྷཱ་ར་ཎེ ཝེ་མ་ཏི་ཀོ པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་པྤ་ཙྩུ་དྡྷཱ་ར་ཎེ ཨ་པྤ་ཙྩུ་དྡྷཱ་ར་ཎ་ས་ཉྙཱི པ་རི་བྷུ་ཉྫ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་དྷི་ཊྛེ་ཏི ཝཱ ཝི་སྶ་ཛྫེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. པ་ཙྩུ་དྡྷཱ་ར་ཎེ ཨ་པྤ་ཙྩུ་དྡྷཱ་ར་ཎ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པ་ཙྩུ་དྡྷཱ་ར་ཎེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པ་ཙྩུ་དྡྷཱ་ར་ཎེ པ་ཙྩུ་དྡྷཱ་ར་ཎ་ས་ཉྙཱི, ཨ་ནཱ་པ་ཏྟི.
༣༧༦. ཨ་ནཱ་པ་ཏྟི སོ ཝཱ དེ་ཏི, ཏ་སྶ ཝཱ ཝི་སྶ་ས་ནྟོ པ་རི་བྷུ་ཉྫ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.
ཝི་ཀ་པྤ་ན་སི་ཀྑཱ་པ་དཾ ནི་ཊྛི་ཏཾ ན་ཝ་མཾ.
༡༠. ཙཱི་ཝ་ར་ཨ་པ་ནི་དྷཱ་ན་སི་ཀྑཱ་པ་དཾ
༣༧༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་ཏྟ་ར་ས་ཝ་གྒི་ཡཱ བྷི་ཀྑཱུ ཨ་ས་ནྣི་ཧི་ཏ་པ་རི་ཀྑཱ་རཱ ཧོ་ནྟི. ཚ་བྦ་གྒི་ཡཱ བྷི་ཀྑཱུ ས་ཏྟ་ར་ས་ཝ་གྒི་ཡཱ་ནཾ བྷི་ཀྑཱུ་ནཾ པ་ཏྟ་མྤི ཙཱི་ཝ་ར་མྤི ཨ་པ་ནི་དྷེ་ནྟི. ས་ཏྟ་ར་ས་ཝ་གྒི་ཡཱ བྷི་ཀྑཱུ ཚ་བྦ་གྒི་ཡེ བྷི་ཀྑཱུ ཨེ་ཏ་ད་ཝོ་ཙུཾ – ‘‘དེ་ཐཱ་ཝུ་སོ, ཨ་མྷཱ་ཀཾ པ་ཏྟ་མྤི ཙཱི་ཝ་ར་མྤཱི’’ཏི. ཚ་བྦ་གྒི་ཡཱ བྷི་ཀྑཱུ ཧ་ས་ནྟི, ཏེ རོ་ད་ནྟི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, རོ་ད་ཐཱ’’ཏི? ‘‘ཨི་མེ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ཨ་མྷཱ་ཀཾ པ་ཏྟ་མྤི ཙཱི་ཝ་ར་མྤི ཨ་པ་ནི་དྷེ་ནྟཱི’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ བྷི་ཀྑཱུ་ནཾ པ་ཏྟ་མྤི ཙཱི་ཝ་ར་མྤི ཨ་པ་ནི་དྷེ་སྶ་ནྟཱི’’ཏི…པེ… ས་ཙྩཾ ཀི་ར ཏུ་མྷེ, བྷི་ཀྑ་ཝེ, བྷི་ཀྑཱུ་ནཾ པ་ཏྟ་མྤི ཙཱི་ཝ་ར་མྤི ཨ་པ་ནི་དྷེ་ཐཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏུ་མྷེ, མོ་གྷ་པུ་རི་སཱ, བྷི་ཀྑཱུ་ནཾ པ་ཏྟ་མྤི ཙཱི་ཝ་ར་མྤི ཨ་པ་ནི་དྷེ་སྶ་ཐ! ནེ་ཏཾ, མོ་གྷ་པུ་རི་སཱ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –
༣༧༨. ‘‘ཡོ པ་ན བྷི་ཀྑུ བྷི་ཀྑུ་སྶ པ་ཏྟཾ ཝཱ ཙཱི་ཝ་རཾ ཝཱ ནི་སཱི་ད་ནཾ ཝཱ སཱུ་ཙི་གྷ་རཾ ཝཱ ཀཱ་ཡ་བ་ནྡྷ་ནཾ ཝཱ ཨ་པ་ནི་དྷེ་ཡྻ ཝཱ ཨ་པ་ནི་དྷཱ་པེ་ཡྻ ཝཱ, ཨ་ནྟ་མ་སོ ཧ་སཱ་པེ་ཀྑོ་པི, པཱ་ཙི་ཏྟི་ཡ’’ནྟི.
༣༧༩. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.
བྷི་ཀྑུ་སྶཱཏི ཨ་ཉྙ་སྶ བྷི་ཀྑུ་སྶ.
པ་ཏྟོ ནཱ་མ དྭེ པ་ཏྟཱ – ཨ་ཡོ་པ་ཏྟོ, མ་ཏྟི་ཀཱ་པ་ཏྟོ.
ཙཱི་ཝ་རཾ ནཱ་མ ཚ་ནྣཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ, ཝི་ཀ་པྤ་ནུ་པ་གཾ པ་ཙྪི་མཾ.
ནི་སཱི་ད་ནཾ ནཱ་མ ས་ད་སཾ ཝུ་ཙྩ་ཏི.
སཱུ་ཙི་གྷ་རཾ ནཱ་མ ས་སཱུ་ཙི་ཀཾ ཝཱ ཨ་སཱུ་ཙི་ཀཾ ཝཱ.
ཀཱ་ཡ་བ་ནྡྷ་ནཾ ནཱ་མ དྭེ ཀཱ་ཡ་བ་ནྡྷ་ནཱ་ནི – པ་ཊྚི་ཀཱ, སཱུ་ཀ་ར་ནྟ་ཀཾ.
ཨ་པ་ནི་དྷེ་ཡྻ ཝཱཏི ས་ཡཾ ཨ་པ་ནི་དྷེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་པ་ནི་དྷཱ་པེ་ཡྻ ཝཱཏི ཨ་ཉྙཾ ཨཱ་ཎཱ་པེ་སི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་པ་ནི་དྷཱ་པེ་ཡྻ ཝཱ ཏི ཨ་ཡྻཾ ཨཱ་ཎཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་ཀིཾ ཨཱ་ཎ་ཏྟོ བ་ཧུ་ཀ་མྤི ཨ་པ་ནི་དྷེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནྟ་མ་སོ ཧ་སཱ་པེ་ཀྑོ་པཱིཏི ཀཱི་ལཱ༹་དྷི་པྤཱ་ཡོ.