༡༠. ད་ནྟ་པོ་ན་སི་ཀྑཱ་པ་དཾ

༢༦༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ས་བྦ་པཾ་སུ་ཀཱུ་ལི་ཀོ སུ་སཱ་ནེ ཝི་ཧ་ར་ཏི. སོ མ་ནུ་སྶེ་ཧི དི་ཡྻ་མཱ་ནཾ ན ཨི་ཙྪ་ཏི པ་ཊི་གྒ་ཧེ་ཏུཾ, སུ་སཱ་ནེ་པི རུ་ཀྑ་མཱུ་ལེ་པི ཨུ་མྨཱ་རེ་པི ཨ་ཡྻ་ཝོ་སཱ་ཊི་ཏ་ཀཱ་ནི སཱ་མཾ ག་ཧེ་ཏྭཱ པ་རི་བྷུ་ཉྫ་ཏི [བྷུ་ཉྫ་ཏི (སྱཱ.)]. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡཾ བྷི་ཀྑུ ཨ་མྷཱ་ཀཾ ཨ་ཡྻ་ཝོ་སཱ་ཊི་ཏ་ཀཱ་ནི སཱ་མཾ ག་ཧེ་ཏྭཱ པ་རི་བྷུ་ཉྫི་སྶ་ཏི! ཐེ་རོ་ཡཾ བྷི་ཀྑུ ཝ་ཋ་རོ མ་ནུ་སྶ་མཾ་སཾ མ་ཉྙེ ཁཱ་ད་ཏཱི’’ཏི! ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧ་རི་སྶ་ཏཱི’’ཏི…པེ… ས་ཙྩཾ ཀི་ར ཏྭཾ, བྷི་ཀྑུ, ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧ་ར་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧ་རི་སྶ་སི! ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

‘‘ཡོ པ་ན བྷི་ཀྑུ ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧ་རེ་ཡྻ, པཱ་ཙི་ཏྟི་ཡ’’ནྟི.

ཨེ་ཝ་ཉྩི་དཾ བྷ་ག་ཝ་ཏཱ བྷི་ཀྑཱུ་ནཾ སི་ཀྑཱ་པ་དཾ པ་ཉྙ་ཏྟཾ ཧོ་ཏི.

༢༦༤. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨུ་ད་ཀ་ད་ནྟ་པོ་ནེ [ཨུ་ད་ཀ་ད་ནྟ་པོ་ཎེ (སྱཱ. ཀ.)] ཀུ་ཀྐུ་ཙྩཱ་ཡ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་ད་ཀ་ད་ནྟ་པོ་ནཾ སཱ་མཾ ག་ཧེ་ཏྭཱ པ་རི་བྷུ་ཉྫི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨི་མཾ སི་ཀྑཱ་པ་དཾ ཨུ་དྡི་སེ་ཡྻཱ་ཐ –

༢༦༥. ‘‘ཡོ པ་ན བྷི་ཀྑུ ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧ་རེ་ཡྻ, ཨ་ཉྙ་ཏྲ ཨུ་ད་ཀ་ད་ནྟ་པོ་ནཱ, པཱ་ཙི་ཏྟི་ཡ’’ནྟི.

༢༦༦. ཡོ པ་ནཱཏི ཡོ ཡཱ་དི་སོ…པེ… བྷི་ཀྑཱུཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏོ བྷི་ཀྑཱུ་ཏི.

ཨ་དི་ནྣཾ ནཱ་མ ཨ་པྤ་ཊི་གྒ་ཧི་ཏ་ཀཾ ཝུ་ཙྩ་ཏི.

དི་ནྣཾ ནཱ་མ ཀཱ་ཡེ་ན ཝཱ ཀཱ་ཡ་པ་ཊི་བ་དྡྷེ་ན ཝཱ ནི་སྶ་གྒི་ཡེ་ན ཝཱ དེ་ནྟེ ཧ་ཏྠ་པཱ་སེ ཋི་ཏོ ཀཱ་ཡེ་ན ཝཱ ཀཱ་ཡ་པ་ཊི་བ་དྡྷེ་ན ཝཱ པ་ཊི་གྒ་ཎྷཱ་ཏི, ཨེ་ཏཾ དི་ནྣཾ ནཱ་མ.

ཨཱ་ཧཱ་རོ ནཱ་མ ཨུ་ད་ཀ་ད་ནྟ་པོ་ནཾ ཋ་པེ་ཏྭཱ ཡཾ་ཀི་ཉྩི ཨ་ཛ྄ཛྷོ་ཧ་ར་ཎཱི་ཡཾ, ཨེ་སོ ཨཱ་ཧཱ་རོ ནཱ་མ.

ཨ་ཉྙ་ཏྲ ཨུ་ད་ཀ་ད་ནྟ་པོ་ནཱཏི ཋ་པེ་ཏྭཱ ཨུ་ད་ཀ་ད་ནྟ་པོ་ནཾ.

‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི ག་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཙི་ཏྟི་ཡ་སྶ.

༢༦༧. ཨ་པྤ་ཊི་གྒ་ཧི་ཏ་ཀེ ཨ་པྤ་ཊི་གྒ་ཧི་ཏ་ཀ་ས་ཉྙཱི ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧཱ་རེ་ཏི, ཨ་ཉྙ་ཏྲ ཨུ་ད་ཀ་ད་ནྟ་པོ་ནཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་པྤ་ཊི་གྒ་ཧི་ཏ་ཀེ ཝེ་མ་ཏི་ཀོ ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧཱ་རེ་ཏི, ཨ་ཉྙ་ཏྲ ཨུ་ད་ཀ་ད་ནྟ་པོ་ནཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨ་པྤ་ཊི་གྒ་ཧི་ཏ་ཀེ པ་ཊི་གྒ་ཧི་ཏ་ཀ་ས་ཉྙཱི ཨ་དི་ནྣཾ མུ་ཁ་དྭཱ་རཾ ཨཱ་ཧཱ་རཾ ཨཱ་ཧཱ་རེ་ཏི, ཨ་ཉྙ་ཏྲ ཨུ་ད་ཀ་ད་ནྟ་པོ་ནཱ, ཨཱ་པ་ཏྟི པཱ་ཙི་ཏྟི་ཡ་སྶ.

པ་ཊི་གྒ་ཧི་ཏ་ཀེ ཨ་པྤ་ཊི་གྒ་ཧི་ཏ་ཀ་ས་ཉྙཱི, ཨཱ་པ་ཏྟི དུ་ཀྐ་ཊ་སྶ. པ་ཊི་གྒ་ཧི་ཏ་ཀེ ཝེ་མ་ཏི་ཀོ, ཨཱ་པ་ཏྟི དུ་ཀྐ་ཊ་སྶ. པ་ཊི་གྒ་ཧི་ཏ་ཀེ པ་ཊི་གྒ་ཧི་ཏ་ཀ་ས་ཉྙཱི, ཨ་ནཱ་པ་ཏྟི.

༢༦༨. ཨ་ནཱ་པ་ཏྟི ཨུ་ད་ཀ་ད་ནྟ་པོ་ནེ, ཙ་ཏྟཱ་རི མ་ཧཱ་ཝི་ཀ་ཏཱ་ནི ས་ཏི པ་ཙྩ་ཡེ ཨ་ས་ཏི ཀ་པྤི་ཡ་ཀཱ་ར་ཀེ སཱ་མཾ ག་ཧེ་ཏྭཱ པ་རི་བྷུ་ཉྫ་ཏི, ཨུ་མྨ་ཏྟ་ཀ་སྶ, ཨཱ་དི་ཀ་མྨི་ཀ་སྶཱ་ཏི.

ད་ནྟ་པོ་ན་སི་ཀྑཱ་པ་དཾ ནི་ཊྛི་ཏཾ ད་ས་མཾ.

བྷོ་ཛ་ན་ཝ་གྒོ ཙ་ཏུ་ཏྠོ.

ཏ་སྶུ་དྡཱ་ནཾ –

པི་ཎྜོ ག་ཎཾ པ་རཾ པཱུ་ཝཾ, དྭེ ཙ ཝུ་ཏྟཱ པ་ཝཱ་ར་ཎཱ;

ཝི་ཀཱ་ལེ ས་ནྣི་དྷཱི ཁཱི་རཾ, ད་ནྟ་པོ་ནེ་ན ཏེ ད་སཱ་ཏི.