༡༨༡. པ་ཉྩ་གོ་ར་སཱ་དི་ཨ་ནུ་ཛཱ་ན་ནཱ
༢༩༩. ཨ་ཐ ཁོ བྷ་ག་ཝཱ བྷ་དྡི་ཡེ ཡ་ཐཱ་བྷི་ར་ནྟཾ ཝི་ཧ་རི་ཏྭཱ མེ་ཎྜ་ཀཾ ག་ཧ་པ་ཏིཾ ཨ་ནཱ་པུ་ཙྪཱ ཡེ་ན ཨ་ངྒུ་ཏྟ་རཱ་པོ ཏེ་ན ཙཱ་རི་ཀཾ པ་ཀྐཱ་མི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧི. ཨ་སྶོ་སི ཁོ མེ་ཎྜ་ཀོ ག་ཧ་པ་ཏི – ‘‘བྷ་ག་ཝཱ ཀི་ར ཡེ་ན ཨ་ངྒུ་ཏྟ་རཱ་པོ ཏེ་ན ཙཱ་རི་ཀཾ པ་ཀྐ་ནྟོ མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧཱི’’ཏི. ཨ་ཐ ཁོ མེ་ཎྜ་ཀོ ག་ཧ་པ་ཏི དཱ་སེ ཙ ཀ་མྨ་ཀ་རེ ཙ ཨཱ་ཎཱ་པེ་སི – ‘‘ཏེ་ན ཧི, བྷ་ཎེ, བ་ཧུཾ ལོ་ཎ་མྤི, ཏེ་ལ་མྤི, ཏ་ཎྜུ་ལ་མྤི, ཁཱ་ད་ནཱི་ཡ་མྤི ས་ཀ་ཊེ་སུ ཨཱ་རོ་པེ་ཏྭཱ ཨཱ་ག་ཙྪ་ཐ, ཨ་ཌྜྷ་ཏེ་ལ་སཱ་ནི ཙ གོ་པཱ་ལ་ཀ་ས་ཏཱ་ནི ཨ་ཌྜྷ་ཏེ་ལ་སཱ་ནི ཙ དྷེ་ནུ་ས་ཏཱ་ནི ཨཱ་དཱ་ཡ ཨཱ་ག་ཙྪ་ནྟུ, ཡ་ཏྠ བྷ་ག་ཝ་ནྟཾ པ་སྶི་སྶཱ་མ ཏ་ཏྠ ཏ་རུ་ཎེ་ན [དྷཱ་རུ་ཎྷེ་ན (སཱི. སྱཱ.)] ཁཱི་རེ་ན བྷོ་ཛེ་སྶཱ་མཱ’’ཏི. ཨ་ཐ ཁོ མེ་ཎྜ་ཀོ ག་ཧ་པ་ཏི བྷ་ག་ཝ་ནྟཾ ཨ་ནྟ་རཱ་མ་གྒེ ཀ་ནྟཱ་རེ ས་མྦྷཱ་ཝེ་སི. ཨ་ཐ ཁོ མེ་ཎྜ་ཀོ ག་ཧ་པ་ཏི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ མེ་ཎྜ་ཀོ ག་ཧ་པ་ཏི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་དྷི་ཝཱ་སེ་ཏུ མེ, བྷ་ནྟེ, བྷ་ག་ཝཱ སྭཱ་ཏ་ནཱ་ཡ བྷ་ཏྟཾ ས་དྡྷིཾ བྷི་ཀྑུ་ས་ངྒྷེ་ནཱ’’ཏི. ཨ་དྷི་ཝཱ་སེ་སི བྷ་ག་ཝཱ ཏུ་ཎྷཱི་བྷཱ་ཝེ་ན. ཨ་ཐ ཁོ མེ་ཎྜ་ཀོ ག་ཧ་པ་ཏི བྷ་ག་ཝ་ཏོ ཨ་དྷི་ཝཱ་ས་ནཾ ཝི་དི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི.
ཨ་ཐ ཁོ མེ་ཎྜ་ཀོ ག་ཧ་པ་ཏི ཏ་སྶཱ ར་ཏྟི་ཡཱ ཨ་ཙྩ་ཡེ་ན པ་ཎཱི་ཏཾ ཁཱ་ད་ནཱི་ཡཾ བྷོ་ཛ་ནཱི་ཡཾ པ་ཊི་ཡཱ་དཱ་པེ་ཏྭཱ བྷ་ག་ཝ་ཏོ ཀཱ་ལཾ ཨཱ་རོ་ཙཱ་པེ་སི – ‘‘ཀཱ་ལོ, བྷ་ནྟེ, ནི་ཊྛི་ཏཾ བྷ་ཏྟ’’ནྟི. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན མེ་ཎྜ་ཀ་སྶ ག་ཧ་པ་ཏི་སྶ པ་རི་ཝེ་ས་ནཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི ས་དྡྷིཾ བྷི་ཀྑུ་ས་ངྒྷེ་ན. ཨ་ཐ ཁོ མེ་ཎྜ་ཀོ ག་ཧ་པ་ཏི ཨ་ཌྜྷ་ཏེ་ལ་སཱ་ནི གོ་པཱ་ལ་ཀ་ས་ཏཱ་ནི ཨཱ་ཎཱ་པེ་སི – ‘‘ཏེ་ན་ཧི, བྷ་ཎེ, ཨེ་ཀ་མེ་ཀཾ དྷེ་ནུཾ ག་ཧེ་ཏྭཱ ཨེ་ཀ་མེ་ཀ་སྶ བྷི་ཀྑུ་ནོ ཨུ་པ་ཏི་ཊྛ་ཐ ཏ་རུ་ཎེ་ན ཁཱི་རེ་ན བྷོ་ཛེ་སྶཱ་མཱ’’ཏི. ཨ་ཐ ཁོ མེ་ཎྜ་ཀོ ག་ཧ་པ་ཏི བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་སི ས་མྤ་ཝཱ་རེ་སི, ཏ་རུ་ཎེ་ན ཙ ཁཱི་རེ་ན. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ཁཱི་རཾ ན པ་ཊི་གྒ་ཎྷ་ནྟི. པ་ཊི་གྒ་ཎྷ་ཐ, བྷི་ཀྑ་ཝེ, པ་རི་བྷུ་ཉྫ་ཐཱ་ཏི. ཨ་ཐ ཁོ མེ་ཎྜ་ཀོ ག་ཧ་པ་ཏི བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་ཏྭཱ ས་མྤ་ཝཱ་རེ་ཏྭཱ ཏ་རུ་ཎེ་ན ཙ ཁཱི་རེ་ན བྷ་ག་ཝ་ནྟཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ མེ་ཎྜ་ཀོ ག་ཧ་པ་ཏི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ས་ནྟི, བྷ་ནྟེ, མ་གྒཱ ཀ་ནྟཱ་རཱ, ཨ་པྤོ་ད་ཀཱ ཨ་པྤ་བྷ་ཀྑཱ, ན སུ་ཀ་རཱ ཨ་པཱ་ཐེ་ཡྻེ་ན ག་ནྟུཾ. སཱ་དྷུ, བྷ་ནྟེ, བྷ་ག་ཝཱ བྷི་ཀྑཱུ་ནཾ པཱ་ཐེ་ཡྻཾ ཨ་ནུ་ཛཱ་ནཱ་ཏཱུ’’ཏི. ཨ་ཐ ཁོ བྷ་ག་ཝཱ མེ་ཎྜ་ཀཾ ག་ཧ་པ་ཏིཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པ་ཉྩ གོ་ར་སེ – ཁཱི་རཾ, ད་དྷིཾ, ཏ་ཀྐཾ, ན་ཝ་ནཱི་ཏཾ, ས་པྤིཾ. ས་ནྟི, བྷི་ཀྑ་ཝེ, མ་གྒཱ ཀ་ནྟཱ་རཱ ཨ་པྤོ་ད་ཀཱ ཨ་པྤ་བྷ་ཀྑཱ, ན སུ་ཀ་རཱ ཨ་པཱ་ཐེ་ཡྻེ་ན ག་ནྟུཾ. ཨ་ནུ་ཛཱ་ནཱ་མི, བྷི་ཀྑ་ཝེ, པཱ་ཐེ་ཡྻཾ པ་རི་ཡེ་སི་ཏུཾ ཏ་ཎྜུ་ལོ ཏ་ཎྜུ་ལ་ཏྠི་ཀེ་ན, མུ་གྒོ མུ་གྒ་ཏྠི་ཀེ་ན, མཱ་སོ མཱ་ས་ཏྠི་ཀེ་ན, ལོ་ཎཾ ལོ་ཎ་ཏྠི་ཀེ་ན, གུ་ལོ༹ གུ་ལ༹་ཏྠི་ཀེ་ན, ཏེ་ལཾ ཏེ་ལ་ཏྠི་ཀེ་ན, ས་པྤི ས་པྤི་ཏྠི་ཀེ་ན. ས་ནྟི, བྷི་ཀྑ་ཝེ, མ་ནུ་སྶཱ, ས་དྡྷཱ པ་ས་ནྣཱ, ཏེ ཀ་པྤི་ཡ་ཀཱ་ར་ཀཱ་ནཾ ཧ་ཏྠེ ཧི་ར་ཉྙཾ ཨུ་པ་ནི་ཀྑི་པ་ནྟི – ‘ཨི་མི་ནཱ ཨ་ཡྻ་སྶ ཡཾ ཀ་པྤི་ཡཾ ཏཾ དེ་ཐཱ’ཏི. ཨ་ནུ་ཛཱ་ནཱ་མི, བྷི་ཀྑ་ཝེ, ཡཾ ཏ་ཏོ ཀ་པྤི་ཡཾ ཏཾ སཱ་དི་ཏུཾ; ན ཏྭེ་ཝཱ་ཧཾ, བྷི་ཀྑ་ཝེ, ཀེ་ན་ཙི པ་རི་ཡཱ་ཡེ་ན ཛཱ་ཏ་རཱུ་པ་ར་ཛ་ཏཾ སཱ་དི་ཏ་བྦཾ པ་རི་ཡེ་སི་ཏ་བྦ་ནྟི ཝ་དཱ་མཱི’’ཏི.
པ་ཉྩ་གོ་ར་སཱ་དི་ཨ་ནུ་ཛཱ་ན་ནཱ ནི་ཊྛི་ཏཱ.