༡༧༨. སཱི་ཧ་སེ་ནཱ་པ་ཏི་ཝ་ཏྠུ
༢༩༠. [ཨ. ནི. ༨.༡༢ ཨཱ་ད་ཡོ] ཏེ་ན ཁོ པ་ན ས་མ་ཡེ་ན ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ ལི་ཙྪ་ཝཱི ས་ནྡྷཱ་གཱ་རེ [ས་ནྠཱ་གཱ་རེ (སཱི. སྱཱ.)] ས་ནྣི་སི་ནྣཱ ས་ནྣི་པ་ཏི་ཏཱ ཨ་ནེ་ཀ་པ་རི་ཡཱ་ཡེ་ན བུ་དྡྷ་སྶ ཝ་ཎྞཾ བྷཱ་ས་ནྟི, དྷ་མྨ་སྶ ཝ་ཎྞཾ བྷཱ་ས་ནྟི, ས་ངྒྷ་སྶ ཝ་ཎྞཾ བྷཱ་ས་ནྟི. ཏེ་ན ཁོ པ་ན ས་མ་ཡེ་ན སཱི་ཧོ སེ་ནཱ་པ་ཏི ནི་ག་ཎྛ་སཱ་ཝ་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི. ཨ་ཐ ཁོ སཱི་ཧ་སྶ སེ་ནཱ་པ་ཏི་སྶ ཨེ་ཏ་ད་ཧོ་སི – ‘‘ནི་སྶཾ་ས་ཡཾ ཁོ སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ བྷ་ཝི་སྶ་ཏི, ཏ་ཐཱ ཧི་མེ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ ལི་ཙྪ་ཝཱི ས་ནྠཱ་གཱ་རེ ས་ནྣི་སི་ནྣཱ ས་ནྣི་པ་ཏི་ཏཱ ཨ་ནེ་ཀ་པ་རི་ཡཱ་ཡེ་ན བུ་དྡྷ་སྶ ཝ་ཎྞཾ བྷཱ་ས་ནྟི, དྷ་མྨ་སྶ ཝ་ཎྞཾ བྷཱ་ས་ནྟི, ས་ངྒྷ་སྶ ཝ་ཎྞཾ བྷཱ་ས་ནྟི. ཡཾ་ནཱུ་ནཱ་ཧཾ ཏཾ བྷ་ག་ཝ་ནྟཾ ད་སྶ་ནཱ་ཡ ཨུ་པ་ས་ངྐ་མེ་ཡྻཾ ཨ་ར་ཧ་ནྟཾ ས་མྨཱ་ས་མྦུ་དྡྷ’’ནྟི. ཨ་ཐ ཁོ སཱི་ཧོ སེ་ནཱ་པ་ཏི ཡེ་ན ནི་ག་ཎྛོ ནཱ་ཊ་པུ་ཏྟོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ནི་ག་ཎྛཾ ནཱ་ཊ་པུ་ཏྟཾ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, བྷ་ནྟེ, ས་མ་ཎཾ གོ་ཏ་མཾ ད་སྶ་ནཱ་ཡ ཨུ་པ་ས་ངྐ་མི་ཏུ’’ནྟི. ‘‘ཀིཾ པ་ན ཏྭཾ, སཱི་ཧ, ཀི་རི་ཡ་ཝཱ་དོ ས་མཱ་ནོ ཨ་ཀི་རི་ཡ་ཝཱ་དཾ ས་མ་ཎཾ གོ་ཏ་མཾ ད་སྶ་ནཱ་ཡ ཨུ་པ་ས་ངྐ་མི་སྶ་སི? ས་མ་ཎོ ཧི, སཱི་ཧ, གོ་ཏ་མོ ཨ་ཀི་རི་ཡ་ཝཱ་དོ ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི’’ཏི. ཨ་ཐ ཁོ སཱི་ཧ་སྶ སེ་ནཱ་པ་ཏི་སྶ ཡོ ཨ་ཧོ་སི ག་མི་ཀཱ་བྷི་ས་ངྑཱ་རོ བྷ་ག་ཝ་ནྟཾ ད་སྶ་ནཱ་ཡ, སོ པ་ཊི་པྤ་སྶ་མྦྷི. དུ་ཏི་ཡ་མྤི ཁོ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ ལི་ཙྪ་ཝཱི ས་ནྡྷཱ་གཱ་རེ ས་ནྣི་སི་ནྣཱ ས་ནྣི་པ་ཏི་ཏཱ ཨ་ནེ་ཀ་པ་རི་ཡཱ་ནེ་ན བུ་དྡྷ་སྶ ཝ་ཎྞཾ བྷཱ་ས་ནྟི, དྷ་མྨ་སྶ ཝ་ཎྞཾ བྷཱ་ས་ནྟི, ས་ངྒྷ་སྶ ཝ་ཎྞཾ བྷཱ་ས་ནྟི. དུ་ཏི་ཡ་མྤི ཁོ སཱི་ཧ་སྶ སེ་ནཱ་པ་ཏི་སྶ ཨེ་ཏ་ད་ཧོ་སི – ‘‘ནི་སྶཾ་ས་ཡཾ ཁོ སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ བྷ་ཝི་སྶ་ཏི, ཏ་ཐཱ ཧི་མེ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ ལི་ཙྪ་ཝཱི ས་ནྡྷཱ་གཱ་རེ ས་ནྣི་སི་ནྣཱ ས་ནྣི་པ་ཏི་ཏཱ ཨ་ནེ་ཀ་པ་རི་ཡཱ་ཡེ་ན བུ་དྡྷ་སྶ ཝ་ཎྞཾ བྷཱ་ས་ནྟི, དྷ་མྨ་སྶ ཝ་ཎྞཾ བྷཱ་ས་ནྟི, ས་ངྒྷ་སྶ ཝ་ཎྞཾ བྷཱ་ས་ནྟི. ཡཾ་ནཱུ་ནཱ་ཧཾ ཏཾ བྷ་ག་ཝ་ནྟཾ ད་སྶ་ནཱ་ཡ ཨུ་པ་ས་ངྐ་མེ་ཡྻཾ ཨ་ར་ཧ་ནྟཾ ས་མྨཱ་ས་མྦུ་དྡྷ’’ནྟི. དུ་ཏི་ཡ་མྤི ཁོ སཱི་ཧོ སེ་ནཱ་པ་ཏི ཡེ་ན ནི་ག་ཎྛོ ནཱ་ཊ་པུ་ཏྟོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ནི་ག་ཎྛཾ ནཱ་ཊ་པུ་ཏྟཾ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, བྷ་ནྟེ, ས་མ་ཎཾ གོ་ཏ་མཾ ད་སྶ་ནཱ་ཡ ཨུ་པ་ས་ངྐ་མི་ཏུ’’ནྟི. ‘‘ཀིཾ པ་ན ཏྭཾ, སཱི་ཧ, ཀི་རི་ཡ་ཝཱ་དོ ས་མཱ་ནོ ཨ་ཀི་རི་ཡ་ཝཱ་དཾ ས་མ་ཎཾ གོ་ཏ་མཾ ད་སྶ་ནཱ་ཡ ཨུ་པ་ས་ངྐ་མི་སྶ་སི? ས་མ་ཎོ ཧི, སཱི་ཧ, གོ་ཏ་མོ ཨ་ཀི་རི་ཡ་ཝཱ་དོ ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི’’ཏི. དུ་ཏི་ཡ་མྤི ཁོ སཱི་ཧ་སྶ སེ་ནཱ་པ་ཏི་སྶ ཡོ ཨ་ཧོ་སི ག་མི་ཀཱ་བྷི་ས་ངྑཱ་རོ བྷ་ག་ཝ་ནྟཾ ད་སྶ་ནཱ་ཡ, སོ པ་ཊི་པྤ་སྶ་མྦྷི. ཏ་ཏི་ཡ་མྤི ཁོ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ ལི་ཙྪ་ཝཱི ས་ནྡྷཱ་གཱ་རེ ས་ནྣི་སི་ནྣཱ ས་ནྣི་པ་ཏི་ཏཱ ཨ་ནེ་ཀ་པ་རི་ཡཱ་ཡེ་ན བུ་དྡྷ་སྶ ཝ་ཎྞཾ བྷཱ་ས་ནྟི, དྷ་མྨ་སྶ ཝ་ཎྞཾ བྷཱ་ས་ནྟི, ས་ངྒྷ་སྶ ཝ་ཎྞཾ བྷཱ་ས་ནྟི. ཏ་ཏི་ཡ་མྤི ཁོ སཱི་ཧ་སྶ སེ་ནཱ་པ་ཏི་སྶ ཨེ་ཏ་ད་ཧོ་སི – ‘‘ནི་སྶཾ་ས་ཡཾ ཁོ སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ བྷ་ཝི་སྶ་ཏི, ཏ་ཐཱ ཧི་མེ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ ལི་ཙྪ་ཝཱི ས་ནྡྷཱ་གཱ་རེ ས་ནྣི་སི་ནྣཱ ས་ནྣི་པ་ཏི་ཏཱ ཨ་ནེ་ཀ་པ་རི་ཡཱ་ཡེ་ན བུ་དྡྷ་སྶ ཝ་ཎྞཾ བྷཱ་ས་ནྟི, དྷ་མྨ་སྶ ཝ་ཎྞཾ བྷཱ་ས་ནྟི, ས་ངྒྷ་སྶ ཝ་ཎྞཾ བྷཱ་ས་ནྟི. ཀི་ཉྷི མེ ཀ་རི་སྶ་ནྟི ནི་ག་ཎྛཱ ཨ་པ་ལོ་ཀི་ཏཱ ཝཱ ཨ་ན་པ་ལོ་ཀི་ཏཱ ཝཱ? ཡཾ་ནཱུ་ནཱ་ཧཾ ཨ་ན་པ་ལོ་ཀེ་ཏྭཱ་ཝ ནི་ག་ཎྛེ ཏཾ བྷ་ག་ཝ་ནྟཾ ད་སྶ་ནཱ་ཡ ཨུ་པ་ས་ངྐ་མེ་ཡྻཾ ཨ་ར་ཧ་ནྟཾ ས་མྨཱ་ས་མྦུ་དྡྷ’’ནྟི.
ཨ་ཐ ཁོ སཱི་ཧོ སེ་ནཱ་པ་ཏི པ་ཉྩ་ཧི ར་ཐ་ས་ཏེ་ཧི དི་ཝཱ དི་ཝ་སྶ ཝེ་སཱ་ལི་ཡཱ ནི་ཡྻཱ་སི བྷ་ག་ཝ་ནྟཾ ད་སྶ་ནཱ་ཡ. ཡཱ་ཝ་ཏི་ཀཱ ཡཱ་ན་སྶ བྷཱུ་མི, ཡཱ་ནེ་ན ག་ནྟྭཱ ཡཱ་ནཱ པ་ཙྩོ་རོ་ཧི་ཏྭཱ པ་ཏྟི་ཀོ་ཝ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སཱི་ཧོ སེ་ནཱ་པ་ཏི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སུ་ཏཾ མེ ཏཾ, བྷ་ནྟེ, ‘ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི’ཏི. ཡེ ཏེ, བྷ་ནྟེ, ཨེ་ཝ་མཱ་ཧཾ་སུ ‘ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ, ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི’ཏི. ཀ་ཙྩི ཏེ, བྷ་ནྟེ, བྷ་ག་ཝ་ཏོ ཝུ་ཏྟ་ཝཱ་དི་ནོ, ན ཙ བྷ་ག་ཝ་ནྟཾ ཨ་བྷཱུ་ཏེ་ན ཨ་བྦྷཱ་ཙི་ཀྑ་ནྟི, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རོ་ནྟི, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་ཝཱ་དོ གཱ་ར་ཡ྄ཧཾ ཋཱ་ནཾ ཨཱ་ག་ཙྪ་ཏི? ཨ་ན་བྦྷ་ཀྑཱ་ཏུ་ཀཱ་མཱ ཧི མ་ཡཾ, བྷ་ནྟེ, བྷ་ག་ཝ་ནྟ’’ནྟི.
༢༩༡. ‘‘ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ, ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཀི་རི་ཡ་ཝཱ་དོ ས་མ་ཎོ གོ་ཏ་མོ ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨུ་ཙྪེ་ད་ཝཱ་དོ ས་མ་ཎོ གོ་ཏ་མོ ཨུ་ཙྪེ་དཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཛེ་གུ་ཙྪཱི ས་མ་ཎོ གོ་ཏ་མོ, ཛེ་གུ་ཙྪི་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཝེ་ན་ཡི་ཀོ ས་མ་ཎོ གོ་ཏ་མོ, ཝི་ན་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཏ་པ་སྶཱི ས་མ་ཎོ གོ་ཏ་མོ, ཏ་པ་སྶི་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་པ་ག་བྦྷོ ས་མ་ཎོ གོ་ཏ་མོ, ཨ་པ་ག་བྦྷ་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི. ཨ་ཏྠི, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་སྶ་ཏྠོ ས་མ་ཎོ གོ་ཏ་མོ, ཨ་སྶཱ་སཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
༢༩༢. ‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ, ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཨ་ཧ་ཉྷི, སཱི་ཧ, ཨ་ཀི་རི་ཡཾ ཝ་དཱ་མི ཀཱ་ཡ་དུ་ཙྩ་རི་ཏ་སྶ ཝ་ཙཱི་དུ་ཙྩ་རི་ཏ་སྶ མ་ནོ་དུ་ཙྩ་རི་ཏ་སྶ; ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨ་ཀི་རི་ཡཾ ཝ་དཱ་མི. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་ཀི་རི་ཡ་ཝཱ་དོ ས་མ་ཎོ གོ་ཏ་མོ, ཨ་ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཀི་རི་ཡ་ཝཱ་དོ ས་མ་ཎོ གོ་ཏ་མོ, ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཨ་ཧ་ཉྷི, སཱི་ཧ, ཀི་རི་ཡཾ ཝ་དཱ་མི ཀཱ་ཡ་སུ་ཙ་རི་ཏ་སྶ ཝ་ཙཱི་སུ་ཙ་རི་ཏ་སྶ མ་ནོ་སུ་ཙ་རི་ཏ་སྶ, ཨ་ནེ་ཀ་ཝི་ཧི་ཏཱ་ནཾ ཀུ་ས་ལཱ་ནཾ དྷ་མྨཱ་ནཾ ཀི་རི་ཡཾ ཝ་དཱ་མི. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཀི་རི་ཡ་ཝཱ་དོ ས་མ་ཎོ གོ་ཏ་མོ, ཀི་རི་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨུ་ཙྪེ་ད་ཝཱ་དོ ས་མ་ཎོ གོ་ཏ་མོ, ཨུ་ཙྪེ་དཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཨ་ཧ་ཉྷི, སཱི་ཧ, ཨུ་ཙྪེ་དཾ ཝ་དཱ་མི རཱ་ག་སྶ དོ་ས་སྶ མོ་ཧ་སྶ; ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨུ་ཙྪེ་དཾ ཝ་དཱ་མི. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨུ་ཙྪེ་ད་ཝཱ་དོ ས་མ་ཎོ གོ་ཏ་མོ ཨུ་ཙྪེ་དཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཛེ་གུ་ཙྪཱི ས་མ་ཎོ གོ་ཏ་མོ, ཛེ་གུ་ཙྪི་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཨ་ཧ་ཉྷི, སཱི་ཧ, ཛི་གུ་ཙྪཱ་མི ཀཱ་ཡ་དུ་ཙྩ་རི་ཏེ་ན ཝ་ཙཱི་དུ་ཙྩ་རི་ཏེ་ན མ་ནོ་དུ་ཙྩ་རི་ཏེ་ན; ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ས་མཱ་པ་ཏྟི་ཡཱ ཛི་གུ་ཙྪཱ་མི. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཛེ་གུ་ཙྪཱི ས་མ་ཎོ གོ་ཏ་མོ, ཛེ་གུ་ཙྪི་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཝེ་ན་ཡི་ཀོ ས་མ་ཎོ གོ་ཏ་མོ, ཝི་ན་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཨ་ཧ་ཉྷི, སཱི་ཧ, ཝི་ན་ཡཱ་ཡ དྷ་མྨཾ དེ་སེ་མི རཱ་ག་སྶ དོ་ས་སྶ མོ་ཧ་སྶ; ཨ་ནེ་ཀ་ཝི་ཧི་ཏཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཝི་ན་ཡཱ་ཡ དྷ་མྨཾ དེ་སེ་མི. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཝེ་ན་ཡི་ཀོ ས་མ་ཎོ གོ་ཏ་མོ, ཝི་ན་ཡཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཏ་པ་སྶཱི ས་མ་ཎོ གོ་ཏ་མོ, ཏ་པ་སྶི་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཏ་པ་ནཱི་ཡཱ་ཧཾ, སཱི་ཧ, པཱ་པ་ཀེ ཨ་ཀུ་ས་ལེ དྷ་མྨེ ཝ་དཱ་མི – ཀཱ་ཡ་དུ་ཙྩ་རི་ཏཾ ཝ་ཙཱི་དུ་ཙྩ་རི་ཏཾ མ་ནོ་དུ་ཙྩ་རི་ཏཾ. ཡ་སྶ ཁོ, སཱི་ཧ, ཏ་པ་ནཱི་ཡཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝ་ངྐ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ, ཏ་མ་ཧཾ ཏ་པ་སྶཱི་ཏི ཝ་དཱ་མི. ཏ་ཐཱ་ག་ཏ་སྶ ཁོ, སཱི་ཧ, ཏ་པ་ནཱི་ཡཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪཱི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ ‘‘ཏ་པ་སྶཱི ས་མ་ཎོ གོ་ཏ་མོ ཏ་པ་སྶི་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི’’ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་པ་ག་བྦྷོ ས་མ་ཎོ གོ་ཏ་མོ ཨ་པ་ག་བྦྷ་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཡ་སྶ ཁོ, སཱི་ཧ, ཨཱ་ཡ་ཏིཾ ག་བྦྷ་སེ་ཡྻཱ པུ་ན་བྦྷ་ཝཱ་བྷི་ནི་བྦ་ཏྟི པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ, ཏ་མ་ཧཾ ཨ་པ་ག་བྦྷོ་ཏི ཝ་དཱ་མི. ཏ་ཐཱ་ག་ཏ་སྶ ཁོ, སཱི་ཧ, ཨཱ་ཡ་ཏིཾ ག་བྦྷ་སེ་ཡྻཱ པུ་ན་བྦྷ་ཝཱ་བྷི་ནི་བྦ་ཏྟི པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་པ་ག་བྦྷོ ས་མ་ཎོ གོ་ཏ་མོ, ཨ་པ་ག་བྦྷ་ཏཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི.
‘‘ཀ་ཏ་མོ ཙ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་སྶ་ཏྠོ ས་མ་ཎོ གོ་ཏ་མོ ཨ་སྶཱ་སཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི་ཏི? ཨ་ཧ་ཉྷི, སཱི་ཧ, ཨ་སྶ་ཏྠོ པ་ར་མེ་ན ཨ་སྶཱ་སེ་ན, ཨ་སྶཱ་སཱ་ཡ དྷ་མྨཾ དེ་སེ་མི, ཏེ་ན ཙ སཱ་ཝ་ཀེ ཝི་ནེ་མི. ཨ་ཡཾ ཁོ, སཱི་ཧ, པ་རི་ཡཱ་ཡོ, ཡེ་ན མཾ པ་རི་ཡཱ་ཡེ་ན ས་མྨཱ ཝ་ད་མཱ་ནོ ཝ་དེ་ཡྻ – ཨ་སྶ་ཏྠོ ས་མ་ཎོ གོ་ཏ་མོ ཨ་སྶཱ་སཱ་ཡ དྷ་མྨཾ དེ་སེ་ཏི, ཏེ་ན ཙ སཱ་ཝ་ཀེ ཝི་ནེ་ཏཱི’’ཏི.
༢༩༣. ཨེ་ཝཾ ཝུ་ཏྟེ སཱི་ཧོ སེ་ནཱ་པ་ཏི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷ་ནྟེ…པེ… ཨུ་པཱ་ས་ཀཾ མཾ བྷ་ག་ཝཱ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. ‘‘ཨ་ནུ་ཝི་ཙྩ་ཀཱ་རཾ [ཨ་ནུ་ཝི་ཛྫ་ཀཱ་རཾ (ཀ.)] ཁོ, སཱི་ཧ, ཀ་རོ་ཧི; ཨ་ནུ་ཝི་ཙྩ་ཀཱ་རོ ཏུ་མྷཱ་དི་སཱ་ནཾ ཉཱ་ཏ་མ་ནུ་སྶཱ་ནཾ སཱ་དྷུ ཧོ་ཏཱི’’ཏི. ‘‘ཨི་མི་ནཱ་པཱ་ཧཾ, བྷ་ནྟེ, བྷ་ག་ཝ་ཏོ བྷི་ཡྻོ་སོ་མ་ཏྟཱ་ཡ ཨ་ཏྟ་མ་ནོ ཨ་བྷི་ར་དྡྷོ, ཡཾ མཾ བྷ་ག་ཝཱ ཨེ་ཝ་མཱ་ཧ – ‘ཨ་ནུ་ཝི་ཙྩ་ཀཱ་རཾ ཁོ, སཱི་ཧ, ཀ་རོ་ཧི; ཨ་ནུ་ཝི་ཙྩ་ཀཱ་རོ ཏུ་མྷཱ་དི་སཱ་ནཾ ཉཱ་ཏ་མ་ནུ་སྶཱ་ནཾ སཱ་དྷུ ཧོ་ཏཱི’ཏི. མ་མ་ཉྷི, བྷ་ནྟེ, ཨ་ཉྙ་ཏི་ཏྠི་ཡཱ སཱ་ཝ་ཀཾ ལ་བྷི་ཏྭཱ ཀེ་ཝ་ལ་ཀ་པྤཾ ཝེ་སཱ་ལིཾ པ་ཊཱ་ཀཾ པ་རི་ཧ་རེ་ཡྻུཾ – ‘སཱི་ཧོ ཁོ ཨ་མྷཱ་ཀཾ སེ་ནཱ་པ་ཏི སཱ་ཝ་ཀ་ཏྟཾ ཨུ་པ་ག་ཏོ’ཏི. ཨ་ཐ ཙ པ་ན མཾ བྷ་ག་ཝཱ ཨེ་ཝ་མཱ་ཧ – ‘ཨ་ནུ་ཝི་ཙྩ་ཀཱ་རཾ ཁོ, སཱི་ཧ, ཀ་རོ་ཧི; ཨ་ནུ་ཝི་ཙྩ་ཀཱ་རོ ཏུ་མྷཱ་དི་སཱ་ནཾ ཉཱ་ཏ་མ་ནུ་སྶཱ་ནཾ སཱ་དྷུ ཧོ་ཏཱི’ཏི. ཨེ་སཱ་ཧཾ, བྷ་ནྟེ, དུ་ཏི་ཡ་མྤི བྷ་ག་ཝ་ནྟཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ག་ཝཱ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. ‘‘དཱི་གྷ་ར་ཏྟཾ ཁོ ཏེ, སཱི་ཧ, ནི་ག་ཎྛཱ་ནཾ ཨོ་པཱ་ན་བྷཱུ་ཏཾ ཀུ་ལཾ, ཡེ་ན ནེ་སཾ ཨུ་པ་ག་ཏཱ་ནཾ པི་ཎྜ་ཀཾ དཱ་ཏ་བྦཾ མ་ཉྙེ་ཡྻཱ་སཱི’’ཏི. ‘‘ཨི་མི་ནཱ་པཱ་ཧཾ, བྷ་ནྟེ, བྷ་ག་ཝ་ཏོ བྷི་ཡྻོ་སོ་མ་ཏྟཱ་ཡ ཨ་ཏྟ་མ་ནོ ཨ་བྷི་ར་དྡྷོ, ཡཾ མཾ བྷ་ག་ཝཱ ཨེ་ཝ་མཱ་ཧ – ‘དཱི་གྷ་ར་ཏྟཾ ཁོ ཏེ, སཱི་ཧ, ནི་ག་ཎྛཱ་ནཾ ཨོ་པཱ་ན་བྷཱུ་ཏཾ ཀུ་ལཾ, ཡེ་ན ནེ་སཾ ཨུ་པ་ག་ཏཱ་ནཾ པི་ཎྜ་ཀཾ དཱ་ཏ་བྦཾ མ་ཉྙེ་ཡྻཱ་སཱི’ཏི. སུ་ཏཾ མེ ཏཾ, བྷ་ནྟེ, ས་མ་ཎོ གོ་ཏ་མོ ཨེ་ཝ་མཱ་ཧ – ‘མ་ཡ྄ཧ་མེ་ཝ དཱ་ནཾ དཱ་ཏ་བྦཾ, ན ཨ་ཉྙེ་སཾ དཱ་ནཾ དཱ་ཏ་བྦཾ; མ་ཡ྄ཧ་མེ་ཝ སཱ་ཝ་ཀཱ་ནཾ དཱ་ནཾ དཱ་ཏ་བྦཾ, ན ཨ་ཉྙེ་སཾ སཱ་ཝ་ཀཱ་ནཾ དཱ་ནཾ དཱ་ཏ་བྦཾ; མ་ཡ྄ཧ་མེ་ཝ དི་ནྣཾ མ་ཧ་པྥ་ལཾ, ན ཨ་ཉྙེ་སཾ དི་ནྣཾ མ་ཧ་པྥ་ལཾ; མ་ཡ྄ཧ་མེ་ཝ སཱ་ཝ་ཀཱ་ནཾ དི་ནྣཾ མ་ཧ་པྥ་ལཾ, ན ཨ་ཉྙེ་སཾ སཱ་ཝ་ཀཱ་ནཾ དི་ནྣཾ མ་ཧ་པྥ་ལ’ནྟི. ཨ་ཐ ཙ པ་ན མཾ བྷ་ག་ཝཱ ནི་ག་ཎྛེ་སུ་པི དཱ་ནེ ས་མཱ་ད་པེ་ཏི. ཨ་པི ཙ, བྷ་ནྟེ, མ་ཡ་མེ་ཏྠ ཀཱ་ལཾ ཛཱ་ནི་སྶཱ་མ. ཨེ་སཱ་ཧཾ, བྷ་ནྟེ, ཏ་ཏི་ཡ་མྤི བྷ་ག་ཝ་ནྟཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ག་ཝཱ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི.
ཨ་ཐ ཁོ བྷ་ག་ཝཱ སཱི་ཧ་སྶ སེ་ནཱ་པ་ཏི་སྶ ཨ་ནུ་པུ་བྦིཾ ཀ་ཐཾ ཀ་ཐེ་སི, སེ་ཡྻ་ཐི་དཾ – དཱ་ན་ཀ་ཐཾ…པེ… ཨ་པ་ར་པྤ་ཙྩ་ཡོ ས་ཏྠུ་སཱ་ས་ནེ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་དྷི་ཝཱ་སེ་ཏུ མེ, བྷ་ནྟེ, བྷ་ག་ཝཱ སྭཱ་ཏ་ནཱ་ཡ བྷ་ཏྟཾ ས་དྡྷིཾ བྷི་ཀྑུ་ས་ངྒྷེ་ནཱ’’ཏི. ཨ་དྷི་ཝཱ་སེ་སི བྷ་ག་ཝཱ ཏུ་ཎྷཱི་བྷཱ་ཝེ་ན. ཨ་ཐ ཁོ སཱི་ཧོ སེ་ནཱ་པ་ཏི བྷ་ག་ཝ་ཏོ ཨ་དྷི་ཝཱ་ས་ནཾ ཝི་དི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི.
༢༩༤. ཨ་ཐ ཁོ སཱི་ཧོ སེ་ནཱ་པ་ཏི ཨ་ཉྙ་ཏ་རཾ པུ་རི་སཾ ཨཱ་ཎཱ་པེ་སི – ‘‘ག་ཙྪ, བྷ་ཎེ, པ་ཝ་ཏྟ་མཾ་སཾ ཛཱ་ནཱ་ཧཱི’’ཏི. ཨ་ཐ ཁོ སཱི་ཧོ སེ་ནཱ་པ་ཏི ཏ་སྶཱ ར་ཏྟི་ཡཱ ཨ་ཙྩ་ཡེ་ན པ་ཎཱི་ཏཾ ཁཱ་ད་ནཱི་ཡཾ བྷོ་ཛ་ནཱི་ཡཾ པ་ཊི་ཡཱ་དཱ་པེ་ཏྭཱ བྷ་ག་ཝ་ཏོ ཀཱ་ལཾ ཨཱ་རོ་ཙཱ་པེ་སི – ‘‘ཀཱ་ལོ, བྷ་ནྟེ, ནི་ཊྛི་ཏཾ བྷ་ཏྟ’’ནྟི. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན སཱི་ཧ་སྶ སེ་ནཱ་པ་ཏི་སྶ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི ས་དྡྷིཾ བྷི་ཀྑུ་ས་ངྒྷེ་ན.
ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ ནི་ག་ཎྛཱ ཝེ་སཱ་ལི་ཡཾ ར་ཐི་ཀཱ་ཡ ར་ཐི་ཀཾ སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ བཱ་ཧཱ པ་གྒ་ཡ྄ཧ ཀ་ནྡ་ནྟི – ‘‘ཨ་ཛྫ སཱི་ཧེ་ན སེ་ནཱ་པ་ཏི་ནཱ ཐཱུ་ལཾ པ་སུཾ ཝ་དྷི་ཏྭཱ ས་མ་ཎ་སྶ གོ་ཏ་མ་སྶ བྷ་ཏྟཾ ཀ་ཏཾ, ཏཾ ས་མ་ཎོ གོ་ཏ་མོ ཛཱ་ནཾ ཨུ་དྡི་སྶ་ཀ་ཏཾ མཾ་སཾ པ་རི་བྷུ་ཉྫ་ཏི པ་ཊི་ཙྩ་ཀ་མྨ’’ནྟི. ཨ་ཐ ཁོ ཨ་ཉྙ་ཏ་རོ པུ་རི་སོ ཡེ་ན སཱི་ཧོ སེ་ནཱ་པ་ཏི ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ སཱི་ཧ་སྶ སེ་ནཱ་པ་ཏི་སྶ ཨུ་པ་ཀ་ཎྞ་ཀེ ཨཱ་རོ་ཙེ་སི ‘‘ཡ་གྒྷེ, བྷ་ནྟེ, ཛཱ་ནེ་ཡྻཱ་སི, ཨེ་ཏེ ས་མྦ་ཧུ་ལཱ ནི་ག་ཎྛཱ ཝེ་སཱ་ལི་ཡཾ ར་ཐི་ཀཱ་ཡ ར་ཐི་ཀཾ སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ བཱ་ཧཱ པ་གྒ་ཡ྄ཧ ཀ་ནྡ་ནྟི – ‘ཨ་ཛྫ སཱི་ཧེ་ན སེ་ནཱ་པ་ཏི་ནཱ ཐཱུ་ལཾ པ་སུཾ ཝ་དྷི་ཏྭཱ ས་མ་ཎ་སྶ གོ་ཏ་མ་སྶ བྷ་ཏྟཾ ཀ་ཏཾ, ཏཾ ས་མ་ཎོ གོ་ཏ་མོ ཛཱ་ནཾ ཨུ་དྡི་སྶ་ཀ་ཏཾ མཾ་སཾ པ་རི་བྷུ་ཉྫ་ཏི པ་ཊི་ཙྩ་ཀ་མྨ’’’ནྟི. ‘‘ཨ་ལཾ ཨ་ཡྻོ, དཱི་གྷ་ར་ཏྟ་མྤི ཏེ ཨཱ་ཡ་སྨ་ནྟཱ ཨ་ཝ་ཎྞ་ཀཱ་མཱ བུ་དྡྷ་སྶ, ཨ་ཝ་ཎྞ་ཀཱ་མཱ དྷ་མྨ་སྶ, ཨ་ཝ་ཎྞ་ཀཱ་མཱ ས་ངྒྷ་སྶ; ན ཙ པ་ན ཏེ ཨཱ་ཡ་སྨ་ནྟཱ ཛི་རི་ད་ནྟི ཏཾ བྷ་ག་ཝ་ནྟཾ ཨ་ས་ཏཱ ཏུ་ཙྪཱ མུ་སཱ ཨ་བྷཱུ་ཏེ་ན ཨ་བྦྷཱ་ཙི་ཀྑ་ནྟཱ; ན ཙ མ་ཡཾ ཛཱི་ཝི་ཏ་ཧེ་ཏུ་པི ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ་མཱ’’ཏི. ཨ་ཐ ཁོ སཱི་ཧོ སེ་ནཱ་པ་ཏི བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་ཏྭཱ ས་མྤ་ཝཱ་རེ་ཏྭཱ བྷ་ག་ཝ་ནྟཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ སཱི་ཧཾ སེ་ནཱ་པ་ཏིཾ བྷ་ག་ཝཱ དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཛཱ ནཾ ཨུ་དྡི་སྶ་ཀ་ཏཾ མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཏི་ཀོ་ཊི་པ་རི་སུ་དྡྷཾ མ་ཙྪ་མཾ་སཾ – ཨ་དི་ཊྛཾ ཨ་སྶུ་ཏཾ ཨ་པ་རི་ས་ངྐི་ཏ’’ནྟི.
སཱི་ཧ་སེ་ནཱ་པ་ཏི་ཝ་ཏྠུ ནི་ཊྛི་ཏཾ.