༡༧༠. ཡཱ་གུ་མ་དྷུ་གོ་ལ༹་ཀཱ་ནུ་ཛཱ་ན་ནཱ
༢༨༢. ཨ་ཐ ཁོ བྷ་ག་ཝཱ བཱ་རཱ་ཎ་སི་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན ཨ་ནྡྷ་ཀ་ཝི་ནྡཾ ཏེ་ན ཙཱ་རི་ཀཾ པ་ཀྐཱ་མི, མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ, ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧི. ཏེ་ན ཁོ པ་ན ས་མ་ཡེ་ན ཛཱ་ན་པ་དཱ མ་ནུ་སྶཱ བ་ཧུཾ ལོ་ཎ་མྤི, ཏེ་ལ་མྤི, ཏ་ཎྜུ་ལ་མྤི, ཁཱ་ད་ནཱི་ཡ་མྤི ས་ཀ་ཊེ་སུ ཨཱ་རོ་པེ་ཏྭཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ པི་ཊྛི་ཏོ པི་ཊྛི་ཏོ ཨ་ནུ་བ་ནྡྷཱ ཧོ་ནྟི – ཡ་དཱ པ་ཊི་པཱ་ཊིཾ ལ་བྷི་སྶཱ་མ ཏ་དཱ བྷ་ཏྟཾ ཀ་རི་སྶཱ་མཱ་ཏི, པ་ཉྩ་མ་ཏྟཱ་ནི ཙ ཝི་གྷཱ་སཱ་ད་ས་ཏཱ་ནི. ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཨ་ནྡྷ་ཀ་ཝི་ནྡཾ ཏ་ད་ཝ་ས་རི. ཨ་ཐ ཁོ ཨ་ཉྙ་ཏ་ར་སྶ བྲཱ་ཧྨ་ཎ་སྶ པ་ཊི་པཱ་ཊིཾ ཨ་ལ་བྷ་ནྟ་སྶ ཨེ་ཏ་ད་ཧོ་སི – ‘‘ཨ་ཏཱི་ཏཱ་ནི [ཨ་དྷི་ཀཱ་ནི (སཱི. སྱཱ.)] ཁོ མེ དྭེ མཱ་སཱ་ནི བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ ཨ་ནུ་བ་ནྡྷ་ནྟ་སྶ ‘ཡ་དཱ པ་ཊི་པཱ་ཊིཾ ལ་བྷི་སྶཱ་མི ཏ་དཱ བྷ་ཏྟཾ ཀ་རི་སྶཱ་མཱི’ཏི, ན ཙ མེ པ་ཊི་པཱ་ཊི ལ་བྦྷ་ཏི, ཨ་ཧ་ཉྩ་མྷི ཨེ་ཀ་ཏྟ་ཀོ [ཨེ་ཀ་ཏོ (སཱི. སྱཱ.)], བ་ཧུ ཙ མེ གྷ་རཱ་ཝཱ་ས་ཏྠོ ཧཱ་ཡ་ཏི. ཡཾ་ནཱུ་ནཱ་ཧཾ བྷ་ཏྟ་གྒཾ ཨོ་ལོ་ཀེ་ཡྻཾ; ཡཾ བྷ་ཏྟ་གྒེ ནཱ་སྶ, ཏཾ པ་ཊི་ཡཱ་དེ་ཡྻ’’ནྟི. ཨ་ཐ ཁོ སོ བྲཱ་ཧྨ་ཎོ བྷ་ཏྟ་གྒཾ ཨོ་ལོ་ཀེ་ནྟོ དྭེ ནཱ་དྡ་ས – ཡཱ་གུ་ཉྩ མ་དྷུ་གོ་ལ༹་ཀ་ཉྩ. ཨ་ཐ ཁོ སོ བྲཱ་ཧྨ་ཎོ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཨི་དྷ མེ, བྷོ ཨཱ་ན་ནྡ, པ་ཊི་པཱ་ཊིཾ ཨ་ལ་བྷ་ནྟ་སྶ ཨེ་ཏ་ད་ཧོ་སི ‘ཨ་ཏཱི་ཏཱ་ནི ཁོ མེ དྭེ མཱ་སཱ་ནི བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ ཨ་ནུ་བ་ནྡྷ་ནྟ་སྶ, ཡ་དཱ པ་ཊི་པཱ་ཊིཾ ལ་བྷི་སྶཱ་མི ཏ་དཱ བྷ་ཏྟཾ ཀ་རི་སྶཱ་མཱི་ཏི. ན ཙ མེ པ་ཊི་པཱ་ཊི ལ་བྦྷ་ཏི, ཨ་ཧ་ཉྩ་མྷི ཨེ་ཀ་ཏྟ་ཀོ, བ་ཧུ ཙ མེ གྷ་རཱ་ཝཱ་ས་ཏྠོ ཧཱ་ཡ་ཏི. ཡཾ་ནཱུ་ནཱ་ཧཾ བྷ་ཏྟ་གྒཾ ཨོ་ལོ་ཀེ་ཡྻཾ; ཡཾ བྷ་ཏྟ་གྒེ ནཱ་སྶ, ཏཾ པ་ཊི་ཡཱ་དེ་ཡྻ’ནྟི. སོ ཁོ ཨ་ཧཾ, བྷོ ཨཱ་ན་ནྡ, བྷ་ཏྟ་གྒཾ ཨོ་ལོ་ཀེ་ནྟོ དྭེ ནཱ་དྡ་སཾ – ཡཱ་གུ་ཉྩ མ་དྷུ་གོ་ལ༹་ཀ་ཉྩ. ས་ཙཱ་ཧཾ, བྷོ ཨཱ་ན་ནྡ, པ་ཊི་ཡཱ་དེ་ཡྻཾ ཡཱ་གུ་ཉྩ མ་དྷུ་གོ་ལ༹་ཀ་ཉྩ, པ་ཊི་གྒ་ཎྷེ་ཡྻ མེ བྷ་ཝཾ གོ་ཏ་མོ’’ཏི? ‘‘ཏེ་ན ཧི, བྲཱ་ཧྨ་ཎ, བྷ་ག་ཝ་ནྟཾ པ་ཊི་པུ་ཙྪི་སྶཱ་མཱི’’ཏི. ཨ་ཐ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཏེ་ན ཧཱ་ན་ནྡ, པ་ཊི་ཡཱ་དེ་ཏཱུ་ཏི. ཏེ་ན ཧི, བྲཱ་ཧྨ་ཎ, པ་ཊི་ཡཱ་དེ་ཧཱི་ཏི. ཨ་ཐ ཁོ སོ བྲཱ་ཧྨ་ཎོ ཏ་སྶཱ ར་ཏྟི་ཡཱ ཨ་ཙྩ་ཡེ་ན པ་ཧཱུ་ཏཾ ཡཱ་གུ་ཉྩ མ་དྷུ་གོ་ལ༹་ཀ་ཉྩ པ་ཊི་ཡཱ་དཱ་པེ་ཏྭཱ བྷ་ག་ཝ་ཏོ ཨུ་པ་ནཱ་མེ་སི – པ་ཊི་གྒ་ཎྷཱ་ཏུ མེ བྷ་ཝཾ གོ་ཏ་མོ ཡཱ་གུ་ཉྩ མ་དྷུ་གོ་ལ༹་ཀ་ཉྩཱ་ཏི. ཏེ་ན ཧི, བྲཱ་ཧྨ་ཎ, བྷི་ཀྑཱུ་ནཾ དེ་ཧཱི་ཏི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ན པ་ཊི་གྒ་ཎྷ་ནྟི. པ་ཊི་གྒ་ཎྷ་ཐ, བྷི་ཀྑ་ཝེ, པ་རི་བྷུ་ཉྫ་ཐཱ་ཏི. ཨ་ཐ ཁོ སོ བྲཱ་ཧྨ་ཎོ བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ པ་ཧཱུ་ཏཱ་ཡ ཡཱ་གུ་ཡཱ ཙ མ་དྷུ་གོ་ལ༹་ཀེ་ན ཙ ས་ཧ་ཏྠཱ ས་ནྟ་པྤེ་ཏྭཱ ས་མྤ་ཝཱ་རེ་ཏྭཱ བྷ་ག་ཝ་ནྟཾ དྷོ་ཏ་ཧ་ཏྠཾ ཨོ་ནཱི་ཏ་པ་ཏྟ་པཱ་ཎིཾ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཏཾ བྲཱ་ཧྨ་ཎཾ བྷ་ག་ཝཱ ཨེ་ཏ་ད་ཝོ་ཙ –
‘‘ད་ས་ཡི་མེ, བྲཱ་ཧྨ་ཎ, ཨཱ་ནི་སཾ་སཱ ཡཱ་གུ་ཡཱ. ཀ་ཏ་མེ ད་ས? ཡཱ་གུཾ དེ་ནྟོ ཨཱ་ཡུཾ དེ་ཏི, ཝ་ཎྞཾ དེ་ཏི, སུ་ཁཾ དེ་ཏི, བ་ལཾ དེ་ཏི, པ་ཊི་བྷཱ་ནཾ དེ་ཏི, ཡཱ་གུ པཱི་ཏཱ ཁུ་དྡཾ [ཁུ་དཾ (སཱི. སྱཱ.)] པ་ཊི་ཧ་ན་ཏི, པི་པཱ་སཾ ཝི་ནེ་ཏི, ཝཱ་ཏཾ ཨ་ནུ་ལོ་མེ་ཏི, ཝ་ཏྠིཾ སོ་དྷེ་ཏི, ཨཱ་མཱ་ཝ་སེ་སཾ པཱ་ཙེ་ཏི – ཨི་མེ ཁོ, བྲཱ་ཧྨ་ཎ, ད་སཱ་ནི་སཾ་སཱ ཡཱ་གུ་ཡཱ’’ཏི [པ་ཙྪི་མཱ པ་ཉྩ ཨཱ་ནི་སཾ་སཱ ཨ. ནི. ༥.༢༠༧].
[ཨ. ནི. ༤.༥༨-༥༩ ཐོ་ཀཾ ཝི་ས་དི་སཾ] ཡོ ས་ཉྙ་ཏཱ་ནཾ པ་ར་ད་ཏྟ་བྷོ་ཛི་ནཾ;
ཀཱ་ལེ་ན ས་ཀྐ་ཙྩ ད་དཱ་ཏི ཡཱ་གུཾ;
ད་ས་སྶ ཋཱ་ནཱ་ནི ཨ་ནུ་པྤ་ཝེ་ཙྪ་ཏི;
ཨཱ་ཡུ་ཉྩ ཝ་ཎྞ་ཉྩ སུ་ཁཾ བ་ལ་ཉྩ.
པ་ཊི་བྷཱ་ན་མ་སྶ ཨུ་པ་ཛཱ་ཡ་ཏེ ཏ་ཏོ;
ཁུ་དྡཾ པི་པཱ་ས་ཉྩ བྱ་པ་ནེ་ཏི ཝཱ་ཏཾ;
སོ་དྷེ་ཏི ཝ་ཏྠིཾ པ་རི་ཎཱ་མེ་ཏི བྷུ་ཏྟཾ;
བྷེ་ས་ཛྫ་མེ་ཏཾ སུ་ག་ཏེ་ན ཝ་ཎྞི་ཏཾ.
ཏ་སྨཱ ཧི ཡཱ་གུཾ ཨ་ལ་མེ་ཝ དཱ་ཏུཾ;
ནི་ཙྩཾ མ་ནུ་སྶེ་ན སུ་ཁ་ཏྠི་ཀེ་ན;
དི་བྦཱ་ནི ཝཱ པ་ཏྠ་ཡ་ཏཱ སུ་ཁཱ་ནི;
མ་ནུ་སྶ་སོ་བྷ་གྱ་ཏ་མི་ཙྪ་ཏཱ ཝཱ་ཏི.
ཨ་ཐ ཁོ བྷ་ག་ཝཱ ཏཾ བྲཱ་ཧྨ་ཎཾ ཨི་མཱ་ཧི གཱ་ཐཱ་ཧི ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཡཱ་གུ་ཉྩ མ་དྷུ་གོ་ལ༹་ཀ་ཉྩཱ’’ཏི.
ཡཱ་གུ་མ་དྷུ་གོ་ལ༹་ཀཱ་ནུ་ཛཱ་ན་ནཱ ནི་ཊྛི་ཏཱ.