༡༦༩. ཧ་ཏྠི་མཾ་སཱ་དི་པ་ཊི་ཀྑེ་པ་ཀ་ཐཱ

༢༨༡. ཏེ་ན ཁོ པ་ན ས་མ་ཡེ་ན ར་ཉྙོ ཧ་ཏྠཱི མ་ར་ནྟི. མ་ནུ་སྶཱ དུ་བྦྷི་ཀྑེ ཧ་ཏྠི་མཾ་སཾ པ་རི་བྷུ་ཉྫ་ནྟི, བྷི་ཀྑཱུ་ནཾ པི་ཎྜཱ་ཡ ཙ་ར་ནྟཱ་ནཾ ཧ་ཏྠི་མཾ་སཾ དེ་ནྟི. བྷི་ཀྑཱུ ཧ་ཏྠི་མཾ་སཾ པ་རི་བྷུ་ཉྫ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ཧ་ཏྠི་མཾ་སཾ པ་རི་བྷུ་ཉྫི་སྶ་ནྟི. རཱ་ཛ་ངྒཾ ཧ་ཏྠཱི, ས་ཙེ རཱ་ཛཱ ཛཱ་ནེ་ཡྻ, ན ནེ་སཾ ཨ་ཏྟ་མ་ནོ ཨ་སྶཱ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཧ་ཏྠི་མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཏེ་ན ཁོ པ་ན ས་མ་ཡེ་ན ར་ཉྙོ ཨ་སྶཱ མ་ར་ནྟི. མ་ནུ་སྶཱ དུ་བྦྷི་ཀྑེ ཨ་སྶ་མཾ་སཾ པ་རི་བྷུ་ཉྫ་ནྟི, བྷི་ཀྑཱུ་ནཾ པི་ཎྜཱ་ཡ ཙ་ར་ནྟཱ་ནཾ ཨ་སྶ་མཾ་སཾ དེ་ནྟི. བྷི་ཀྑཱུ ཨ་སྶ་མཾ་སཾ པ་རི་བྷུ་ཉྫ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ཨ་སྶ་མཾ་སཾ པ་རི་བྷུ་ཉྫི་སྶ་ནྟི. རཱ་ཛ་ངྒཾ ཨ་སྶཱ, ས་ཙེ རཱ་ཛཱ ཛཱ་ནེ་ཡྻ, ན ནེ་སཾ ཨ་ཏྟ་མ་ནོ ཨ་སྶཱ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཨ་སྶ་མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཏེ་ན ཁོ པ་ན ས་མ་ཡེ་ན མ་ནུ་སྶཱ དུ་བྦྷི་ཀྑེ སུ་ན་ཁ་མཾ་སཾ པ་རི་བྷུ་ཉྫ་ནྟི, བྷི་ཀྑཱུ་ནཾ པི་ཎྜཱ་ཡ ཙ་ར་ནྟཱ་ནཾ སུ་ན་ཁ་མཾ་སཾ དེ་ནྟི. བྷི་ཀྑཱུ སུ་ན་ཁ་མཾ་སཾ པ་རི་བྷུ་ཉྫ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ སུ་ན་ཁ་མཾ་སཾ པ་རི་བྷུ་ཉྫི་སྶ་ནྟི, ཛེ་གུ་ཙྪོ སུ་ན་ཁོ པ་ཊི་ཀཱུ་ལོ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, སུ་ན་ཁ་མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཏེ་ན ཁོ པ་ན ས་མ་ཡེ་ན མ་ནུ་སྶཱ དུ་བྦྷི་ཀྑེ ཨ་ཧི་མཾ་སཾ པ་རི་བྷུ་ཉྫ་ནྟི, བྷི་ཀྑཱུ་ནཾ པི་ཎྜཱ་ཡ ཙ་ར་ནྟཱ་ནཾ ཨ་ཧི་མཾ་སཾ དེ་ནྟི. བྷི་ཀྑཱུ ཨ་ཧི་མཾ་སཾ པ་རི་བྷུ་ཉྫ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ ཨ་ཧི་མཾ་སཾ པ་རི་བྷུ་ཉྫི་སྶ་ནྟི, ཛེ་གུ་ཙྪོ ཨ་ཧི པ་ཊི་ཀཱུ་ལོ’’ཏི. སུ་པ་སྶོ་པི [སུ་ཕ་སྶོ (སཱི.)] ནཱ་ག་རཱ་ཛཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ སུ་པ་སྶོ ནཱ་ག་རཱ་ཛཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ས་ནྟི, བྷ་ནྟེ, ནཱ་གཱ ཨ་སྶ་དྡྷཱ ཨ་པྤ་ས་ནྣཱ. ཏེ ཨ་པྤ་མ་ཏྟ་ཀེ་ཧི་པི བྷི་ཀྑཱུ ཝི་ཧེ་ཋེ་ཡྻུཾ. སཱ་དྷུ, བྷ་ནྟེ, ཨ་ཡྻཱ ཨ་ཧི་མཾ་སཾ ན པ་རི་བྷུ་ཉྫེ་ཡྻུ’’ནྟི. ཨ་ཐ ཁོ བྷ་ག་ཝཱ སུ་པ་སྶཾ ནཱ་ག་རཱ་ཛཱ་ནཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི…པེ… པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཨ་ཧི་མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི.

ཏེ་ན ཁོ པ་ན ས་མ་ཡེ་ན ལུ་དྡ་ཀཱ སཱི་ཧཾ ཧ་ནྟྭཱ སཱི་ཧ་མཾ་སཾ [མཾ་སཾ (ཀ.)] པ་རི་བྷུ་ཉྫ་ནྟི, བྷི་ཀྑཱུ་ནཾ པི་ཎྜཱ་ཡ ཙ་ར་ནྟཱ་ནཾ སཱི་ཧ་མཾ་སཾ དེ་ནྟི. བྷི་ཀྑཱུ སཱི་ཧ་མཾ་སཾ པ་རི་བྷུ་ཉྫི་ཏྭཱ ཨ་ར་ཉྙེ ཝི་ཧ་ར་ནྟི. སཱི་ཧཱ སཱི་ཧ་མཾ་ས་ག་ནྡྷེ་ན བྷི་ཀྑཱུ པ་རི་པཱ་ཏེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, སཱི་ཧ་མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཏེ་ན ཁོ པ་ན ས་མ་ཡེ་ན ལུ་དྡ་ཀཱ བྱ་གྒྷཾ ཧ་ནྟྭཱ…པེ… དཱི་པིཾ ཧ་ནྟྭཱ…པེ… ཨ་ཙྪཾ ཧ་ནྟྭཱ…པེ… ཏ་ར་ཙྪཾ ཧ་ནྟྭཱ ཏ་ར་ཙྪ་མཾ་སཾ པ་རི་བྷུ་ཉྫ་ནྟི, བྷི་ཀྑཱུ་ནཾ པི་ཎྜཱ་ཡ ཙ་ར་ནྟཱ་ནཾ ཏ་ར་ཙྪ་མཾ་སཾ དེ་ནྟི. བྷི་ཀྑཱུ ཏ་ར་ཙྪ་མཾ་སཾ པ་རི་བྷུ་ཉྫི་ཏྭཱ ཨ་ར་ཉྙེ ཝི་ཧ་ར་ནྟི. ཏ་ར་ཙྪཱ ཏ་ར་ཙྪ་མཾ་ས་ག་ནྡྷེ་ན བྷི་ཀྑཱུ པ་རི་པཱ་ཏེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཏ་ར་ཙྪ་མཾ་སཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཧ་ཏྠི་མཾ་སཱ་དི་པ་ཊི་ཀྑེ་པ་ཀ་ཐཱ ནི་ཊྛི་ཏཱ.

སུ་པྤི་ཡ་བྷཱ་ཎ་ཝཱ་རོ ནི་ཊྛི་ཏོ དུ་ཏི་ཡོ.