༡༦༧. ས་ཏྠ་ཀ་མྨ་པ་ཊི་ཀྑེ་པ་ཀ་ཐཱ

༢༧༩. ཨ་ཐ ཁོ བྷ་ག་ཝཱ སཱ་ཝ་ཏྠི་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན རཱ་ཛ་ག་ཧཾ ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན རཱ་ཛ་ག་ཧཾ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྶ བྷི་ཀྑུ་ནོ བྷ་ག་ནྡ་ལཱ་བཱ་དྷོ ཧོ་ཏི. ཨཱ་ཀཱ་ས་གོ་ཏྟོ ཝེ་ཛྫོ ས་ཏྠ་ཀ་མྨཾ ཀ་རོ་ཏི. ཨ་ཐ ཁོ བྷ་ག་ཝཱ སེ་ནཱ་ས་ན་ཙཱ་རི་ཀཾ ཨཱ་ཧི་ཎྜ་ནྟོ ཡེ་ན ཏ་སྶ བྷི་ཀྑུ་ནོ ཝི་ཧཱ་རོ ཏེ་ནུ་པ་ས་ངྐ་མི. ཨ་དྡ་སཱ ཁོ ཨཱ་ཀཱ་ས་གོ་ཏྟོ ཝེ་ཛྫོ བྷ་ག་ཝ་ནྟཾ དཱུ་ར་ཏོ་ཝ ཨཱ་ག་ཙྪ་ནྟཾ, དི་སྭཱ་ན བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨཱ་ག་ཙྪ་ཏུ བྷ་ཝཾ གོ་ཏ་མོ, ཨི་མ་སྶ བྷི་ཀྑུ་ནོ ཝ་ཙྩ་མ་གྒཾ པ་སྶ་ཏུ, སེ་ཡྻ་ཐཱ་པི གོ་དྷཱ་མུ་ཁ’’ནྟི. ཨ་ཐ ཁོ བྷ་ག་ཝཱ – ‘‘སོ མཾ ཁྭཱ་ཡཾ མོ་གྷ་པུ་རི་སོ ཨུ་པྤ་ཎྜེ་ཏཱི’’ཏི – ཏ་ཏོ་ཝ པ་ཊི་ནི་ཝ་ཏྟི་ཏྭཱ, ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ, བྷི་ཀྑཱུ པ་ཊི་པུ་ཙྪི – ‘‘ཨ་ཏྠི ཀི་ར, བྷི་ཀྑ་ཝེ, ཨ་མུ་ཀ་སྨིཾ ཝི་ཧཱ་རེ བྷི་ཀྑུ གི་ལཱ་ནོ’’ཏི? ‘‘ཨ་ཏྠི བྷ་ག་ཝཱ’’ཏི. ‘‘ཀིཾ ཏ་སྶ, བྷི་ཀྑ་ཝེ, བྷི་ཀྑུ་ནོ ཨཱ་བཱ་དྷོ’’ཏི? ‘‘ཏ་སྶ, བྷ་ནྟེ, ཨཱ་ཡ་སྨ་ཏོ བྷ་ག་ནྡ་ལཱ་བཱ་དྷོ, ཨཱ་ཀཱ་ས་གོ་ཏྟོ ཝེ་ཛྫོ ས་ཏྠ་ཀ་མྨཾ ཀ་རོ་ཏཱི’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, བྷི་ཀྑ་ཝེ, ཏ་སྶ མོ་གྷ་པུ་རི་ས་སྶ, ཨ་ན་ནུ་ལོ་མི་ཀཾ, ཨ་པྤ་ཏི་རཱུ་པཾ, ཨ་སྶཱ་མ་ཎ་ཀཾ, ཨ་ཀ་པྤི་ཡཾ, ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ སོ, བྷི་ཀྑ་ཝེ, མོ་གྷ་པུ་རི་སོ ས་མྦཱ་དྷེ ས་ཏྠ་ཀ་མྨཾ ཀཱ་རཱ་པེ་སྶ་ཏི. ས་མྦཱ་དྷེ, བྷི་ཀྑ་ཝེ, སུ་ཁུ་མཱ ཚ་ཝི, དུ་རོ་པ་ཡོ ཝ་ཎོ, དུ་པྤ་རི་ཧཱ་རཾ ས་ཏྠཾ. ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ས་མྦཱ་དྷེ ས་ཏྠ་ཀ་མྨཾ ཀཱ་རཱ་པེ་ཏ་བྦཾ. ཡོ ཀཱ་རཱ་པེ་ཡྻ, ཨཱ་པ་ཏྟི ཐུ་ལླ་ཙྩ་ཡ་སྶཱ’’ཏི.

ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ – བྷ་ག་ཝ་ཏཱ ས་ཏྠ་ཀ་མྨཾ པ་ཊི་ཀྑི་ཏྟ་ནྟི – ཝ་ཏྠི་ཀ་མྨཾ ཀཱ་རཱ་པེ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ, ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཝ་ཏྠི་ཀ་མྨཾ ཀཱ་རཱ་པེ་སྶ་ནྟཱི’’ཏི. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ‘‘ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑཱུ ཝ་ཏྠི་ཀ་མྨཾ ཀཱ་རཱ་པེ་ནྟཱི’’ཏི? ‘‘ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ས་མྦཱ་དྷ་སྶ སཱ་མ་ནྟཱ དྭ་ངྒུ་ལཱ ས་ཏྠ་ཀ་མྨཾ ཝཱ ཝ་ཏྠི་ཀ་མྨཾ ཝཱ ཀཱ་རཱ་པེ་ཏ་བྦཾ. ཡོ ཀཱ་རཱ་པེ་ཡྻ, ཨཱ་པ་ཏྟི ཐུ་ལླ་ཙྩ་ཡ་སྶཱ’’ཏི.

ས་ཏྠ་ཀ་མྨ་པ་ཊི་ཀྑེ་པ་ཀ་ཐཱ ནི་ཊྛི་ཏཱ.