༡༦༦. པ་ཊི་གྒ་ཧི་ཏཱ་དི་ཨ་ནུ་ཛཱ་ན་ནཱ
༢༧༧. [པཱ་ཙི. ༢༩༥] ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨུ་པ་ན་ནྡ་སྶ ས་ཀྱ་པུ་ཏྟ་སྶ ཨུ་པ་ཊྛཱ་ཀ་ཀུ་ལཾ ས་ངྒྷ་སྶ་ཏྠཱ་ཡ ཁཱ་ད་ནཱི་ཡཾ པཱ་ཧེ་སི – ཨ་ཡྻ་སྶ ཨུ་པ་ན་ནྡ་སྶ ད་སྶེ་ཏྭཱ ས་ངྒྷ་སྶ དཱ་ཏ་བྦ་ནྟི. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ གཱ་མཾ པི་ཎྜཱ་ཡ པ་ཝི་ཊྛོ ཧོ་ཏི. ཨ་ཐ ཁོ ཏེ མ་ནུ་སྶཱ ཨཱ་རཱ་མཾ ག་ནྟྭཱ བྷི་ཀྑཱུ པུ་ཙྪིཾ་སུ – ‘‘ཀ་ཧཾ, བྷ་ནྟེ, ཨ་ཡྻོ ཨུ་པ་ན་ནྡོ’’ཏི? ‘‘ཨེ་སཱ་ཝུ་སོ, ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ གཱ་མཾ པི་ཎྜཱ་ཡ པ་ཝི་ཊྛོ’’ཏི. ‘‘ཨི་དཾ, བྷ་ནྟེ, ཁཱ་ད་ནཱི་ཡཾ ཨ་ཡྻ་སྶ ཨུ་པ་ན་ནྡ་སྶ ད་སྶེ་ཏྭཱ ས་ངྒྷ་སྶ དཱ་ཏ་བྦ’’ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཏེ་ན ཧི, བྷི་ཀྑ་ཝེ, པ་ཊི་གྒ་ཧེ་ཏྭཱ ནི་ཀྑི་པ་ཐ ཡཱ་ཝ ཨུ་པ་ན་ནྡོ ཨཱ་ག་ཙྪ་ཏཱི་ཏི. ཨ་ཐ ཁོ ཨཱ་ཡ་སྨཱ ཨུ་པ་ན་ནྡོ ས་ཀྱ་པུ་ཏྟོ པུ་རེ་བྷ་ཏྟཾ ཀུ་ལཱ་ནི པ་ཡི་རུ་པཱ་སི་ཏྭཱ དི་ཝཱ ཨཱ་ག་ཙྪ་ཏི. ཏེ་ན ཁོ པ་ན ས་མ་ཡེ་ན བྷི་ཀྑཱུ དུ་བྦྷི་ཀྑེ ཨ་པྤ་མ་ཏྟ་ཀེ་པི པ་ཝཱ་རེ་ནྟི, པ་ཊི་ས་ངྑཱ་པི པ་ཊི་ཀྑི་པ་ནྟི, ས་བྦོ ཙ ས་ངྒྷོ པ་ཝཱ་རི་ཏོ ཧོ་ཏི, བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ན པ་ཊི་གྒ་ཎྷ་ནྟི. པ་ཊི་གྒ་ཎྷ་ཐ, བྷི་ཀྑ་ཝེ, པ་རི་བྷུ་ཉྫ་ཐ. ཨ་ནུ་ཛཱ་ནཱ་མི, བྷི་ཀྑ་ཝེ, པུ་རེ་བྷ་ཏྟཾ པ་ཊི་གྒ་ཧི་ཏཾ བྷུ་ཏྟཱ་ཝི་ནཱ པ་ཝཱ་རི་ཏེ་ན ཨ་ན་ཏི་རི་ཏྟཾ པ་རི་བྷུ་ཉྫི་ཏུ་ནྟི.
༢༧༨. ཨ་ཐ ཁོ བྷ་ག་ཝཱ རཱ་ཛ་ག་ཧེ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན སཱ་ཝ་ཏྠི ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན སཱ་ཝ་ཏྠི ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ སཱ་རི་པུ་ཏྟ་སྶ ཀཱ་ཡ་ཌཱ་ཧཱ་བཱ་དྷོ ཧོ་ཏི. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཡེ་ནཱ་ཡ་སྨཱ སཱ་རི་པུ་ཏྟོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ – ‘‘པུ་བྦེ ཏེ, ཨཱ་ཝུ་སོ སཱ་རི་པུ་ཏྟ, ཀཱ་ཡ་ཌཱ་ཧཱ་བཱ་དྷོ ཀེ་ན ཕཱ་སུ ཧོ་ཏཱི’’ཏི? ‘‘བྷི་སེ་ཧི ཙ མེ, ཨཱ་ཝུ་སོ, མུ་ལཱ༹་ལི་ཀཱ་ཧི ཙཱ’’ཏི. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མྨི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ, ཨེ་ཝ་མེ་ཝ ཛེ་ཏ་ཝ་ནེ ཨ་ནྟ་ར་ཧི་ཏོ མ་ནྡཱ་ཀི་ནི་ཡཱ པོ་ཀྑ་ར་ཎི་ཡཱ ཏཱི་རེ པཱ་ཏུ་ར་ཧོ་སི. ཨ་དྡ་སཱ ཁོ ཨ་ཉྙ་ཏ་རོ ནཱ་གོ ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ དཱུ་ར་ཏོ་ཝ ཨཱ་ག་ཙྪ་ནྟཾ, དི་སྭཱ་ན ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ ཨེ་ཏ་ད་ཝོ་ཙ – ‘‘ཨེ་ཏུ ཁོ, བྷ་ནྟེ, ཨ་ཡྻོ མ་ཧཱ་མོ་གྒ་ལླཱ་ནོ. སྭཱ་ག་ཏཾ, བྷ་ནྟེ, ཨ་ཡྻ་སྶ མ་ཧཱ་མོ་གྒ་ལླཱ་ན་སྶ. ཀེ་ན, བྷ་ནྟེ, ཨ་ཡྻ་སྶ ཨ་ཏྠོ; ཀིཾ ད་མྨཱི’’ཏི? ‘‘བྷི་སེ་ཧི ཙ མེ, ཨཱ་ཝུ་སོ, ཨ་ཏྠོ, མུ་ལཱ༹་ལི་ཀཱ་ཧི ཙཱ’’ཏི. ཨ་ཐ ཁོ སོ ནཱ་གོ ཨ་ཉྙ་ཏ་རཾ ནཱ་གཾ ཨཱ་ཎཱ་པེ་སི – ‘‘ཏེ་ན ཧི, བྷ་ཎེ, ཨ་ཡྻ་སྶ བྷི་སེ ཙ མུ་ལཱ༹་ལི་ཀཱ་ཡོ ཙ ཡཱ་ཝ་ད་ཏྠཾ དེ་ཧཱི’’ཏི. ཨ་ཐ ཁོ སོ ནཱ་གོ མ་ནྡཱ་ཀི་ནིཾ པོ་ཀྑ་ར་ཎིཾ ཨོ་གཱ་ཧེ་ཏྭཱ, སོ་ཎྜཱ་ཡ བྷི་ས་ཉྩ མུ་ལཱ༹་ལི་ཀ་ཉྩ ཨ་བྦཱ་ཧི་ཏྭཱ, སུ་ཝི་ཀྑཱ་ལི་ཏཾ ཝི་ཀྑཱ་ལེ་ཏྭཱ, བྷ་ཎྜི་ཀཾ བ་ནྡྷི་ཏྭཱ ཡེ་ནཱ་ཡ་སྨཱ མ་ཧཱ་མོ་གྒ་ལླཱ་ནོ ཏེ་ནུ་པ་ས་ངྐ་མི. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ – སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ, ཨེ་ཝ་མེ་ཝ – མ་ནྡཱ་ཀི་ནི་ཡཱ པོ་ཀྑ་ར་ཎི་ཡཱ ཏཱི་རེ ཨ་ནྟ་ར་ཧི་ཏོ ཛེ་ཏ་ཝ་ནེ པཱ་ཏུ་ར་ཧོ་སི. སོ་པི ཁོ ནཱ་གོ མ་ནྡཱ་ཀི་ནི་ཡཱ པོ་ཀྑ་ར་ཎི་ཡཱ ཏཱི་རེ ཨ་ནྟ་ར་ཧི་ཏོ ཛེ་ཏ་ཝ་ནེ པཱ་ཏུ་ར་ཧོ་སི. ཨ་ཐ ཁོ སོ ནཱ་གོ ཨཱ་ཡ་སྨ་ཏོ མ་ཧཱ་མོ་གྒ་ལླཱ་ན་སྶ བྷི་སེ ཙ མུ་ལཱ༹་ལི་ཀཱ་ཡོ ཙ པ་ཊི་གྒ་ཧཱ་པེ་ཏྭཱ ཛེ་ཏ་ཝ་ནེ ཨ་ནྟ་ར་ཧི་ཏོ མ་ནྡཱ་ཀི་ནི་ཡཱ པོ་ཀྑ་ར་ཎི་ཡཱ ཏཱི་རེ པཱ་ཏུ་ར་ཧོ་སི. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཨཱ་ཡ་སྨ་ཏོ སཱ་རི་པུ་ཏྟ་སྶ བྷི་སེ ཙ མུ་ལཱ༹་ལི་ཀཱ་ཡོ ཙ ཨུ་པ་ནཱ་མེ་སི. ཨ་ཐ ཁོ ཨཱ་ཡ་སྨ་ཏོ སཱ་རི་པུ་ཏྟ་སྶ བྷི་སེ ཙ མུ་ལཱ༹་ལི་ཀཱ་ཡོ ཙ བྷུ་ཏྟ་སྶ ཀཱ་ཡ་ཌཱ་ཧཱ་བཱ་དྷོ པ་ཊི་པྤ་སྶ་མྦྷི. བ་ཧཱུ བྷི་སཱ ཙ མུ་ལཱ༹་ལི་ཀཱ་ཡོ ཙ ཨ་ཝ་སི་ཊྛཱ ཧོ་ནྟི. ཏེ་ན ཁོ པ་ན ས་མ་ཡེ་ན བྷི་ཀྑཱུ དུ་བྦྷི་ཀྑེ ཨ་པྤ་མ་ཏྟ་ཀེ་པི པ་ཝཱ་རེ་ནྟི, པ་ཊི་ས་ངྑཱ་པི པ་ཊི་ཀྑི་པ་ནྟི, ས་བྦོ ཙ ས་ངྒྷོ པ་ཝཱ་རི་ཏོ ཧོ་ཏི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ན པ་ཊི་གྒ་ཎྷ་ནྟི. པ་ཊི་གྒ་ཎྷ་ཐ, བྷི་ཀྑ་ཝེ, པ་རི་བྷུ་ཉྫ་ཐ. ཨ་ནུ་ཛཱ་ནཱ་མི, བྷི་ཀྑ་ཝེ, ཝ་ན་ཊྛཾ པོ་ཀྑ་ར་ཊྛཾ བྷུ་ཏྟཱ་ཝི་ནཱ པ་ཝཱ་རི་ཏེ་ན ཨ་ན་ཏི་རི་ཏྟཾ པ་རི་བྷུ་ཉྫི་ཏུ་ནྟི.
ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཾ བ་ཧུཾ ཕ་ལ་ཁཱ་ད་ནཱི་ཡཾ ཨུ་པྤ་ནྣཾ ཧོ་ཏི, ཀ་པྤི་ཡ་ཀཱ་ར་ཀོ ཙ ན ཧོ་ཏི. བྷི་ཀྑཱུ ཀུ་ཀྐུ་ཙྩཱ་ཡ་ནྟཱ ཕ་ལཾ ན པ་རི་བྷུ་ཉྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་བཱི་ཛཾ ནི་བྦ་ཏྟ་བཱི་ཛཾ [ནི་བྦ་ཊྚ་བཱི་ཛཾ (སཱི.), ནི་བྦ་ཊ་བཱི་ཛཾ (སྱཱ.), ནི་པྤ་ཊྚ་བཱི་ཛཾ (ཀ.)] ཨ་ཀ་ཏ་ཀ་པྤཾ ཕ་ལཾ པ་རི་བྷུ་ཉྫི་ཏུ་ནྟི.
པ་ཊི་གྒ་ཧི་ཏཱ་དི ཨ་ནུ་ཛཱ་ན་ནཱ ནི་ཊྛི་ཏཱ.