༡༦༤. ཨ་ནྟོ་ཝུ་ཊྛཱ་དི་པ་ཊི་ཀྑེ་པ་ཀ་ཐཱ
༢༧༤. ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན རཱ་ཛ་ག་ཧཾ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན བྷ་ག་ཝ་ཏོ ཨུ་ད་ར་ཝཱ་ཏཱ་བཱ་དྷོ ཧོ་ཏི. ཨ་ཐ ཁོ ཨཱ་ཡ་སྨཱ ཨཱ་ན་ནྡོ – ‘པུ་བྦེ་པི བྷ་ག་ཝ་ཏོ ཨུ་ད་ར་ཝཱ་ཏཱ་བཱ་དྷོ ཏེ་ཀ་ཊུ་ལ་ཡཱ་གུ་ཡཱ ཕཱ་སུ ཧོ་ཏཱི’ཏི – སཱ་མཾ ཏི་ལ་མྤི, ཏ་ཎྜུ་ལ་མྤི, མུ་གྒ་མྤི ཝི་ཉྙཱ་པེ་ཏྭཱ, ཨ་ནྟོ ཝཱ་སེ་ཏྭཱ, ཨ་ནྟོ སཱ་མཾ པ་ཙི་ཏྭཱ བྷ་ག་ཝ་ཏོ ཨུ་པ་ནཱ་མེ་སི – ‘‘པི་ཝ་ཏུ བྷ་ག་ཝཱ ཏེ་ཀ་ཊུ་ལ་ཡཱ་གུ’’ནྟི. ཛཱ་ན་ནྟཱ་པི ཏ་ཐཱ་ག་ཏཱ པུ་ཙྪ་ནྟི, ཛཱ་ན་ནྟཱ་པི ན པུ་ཙྪ་ནྟི; ཀཱ་ལཾ ཝི་དི་ཏྭཱ པུ་ཙྪ་ནྟི, ཀཱ་ལཾ ཝི་དི་ཏྭཱ ན པུ་ཙྪ་ནྟི; ཨ་ཏྠ་སཾ་ཧི་ཏཾ ཏ་ཐཱ་ག་ཏཱ པུ་ཙྪ་ནྟི, ནོ ཨ་ན་ཏྠ་སཾ་ཧི་ཏཾ. ཨ་ན་ཏྠ་སཾ་ཧི་ཏེ སེ་ཏུ་གྷཱ་ཏོ ཏ་ཐཱ་ག་ཏཱ་ནཾ. དྭཱི་ཧི ཨཱ་ཀཱ་རེ་ཧི བུ་དྡྷཱ བྷ་ག་ཝ་ནྟོ བྷི་ཀྑཱུ པ་ཊི་པུ་ཙྪ་ནྟི – དྷ་མྨཾ ཝཱ དེ་སེ་སྶཱ་མ, སཱ་ཝ་ཀཱ་ནཾ ཝཱ སི་ཀྑཱ་པ་དཾ པ་ཉྙ་པེ་སྶཱ་མཱ་ཏི. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨཱ་ན་ནྡཾ ཨཱ་མ་ནྟེ་སི – ‘‘ཀུ་ཏཱ་ཡཾ, ཨཱ་ན་ནྡ, ཡཱ་གཱུ’’ཏི? ཨ་ཐ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཝི་ག་ར་ཧི བུ་དྡྷོ བྷ་ག་ཝཱ – ‘ཨ་ན་ནུ་ཙྪ་ཝི་ཀཾ, ཨཱ་ན་ནྡ, ཨ་ན་ནུ་ལོ་མི་ཀཾ, ཨ་པྤ་ཏི་རཱུ་པཾ, ཨ་སྶཱ་མ་ཎ་ཀཾ, ཨ་ཀ་པྤི་ཡཾ, ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ ཏྭཾ, ཨཱ་ན་ནྡ, ཨེ་ཝ་རཱུ་པཱ་ཡ བཱ་ཧུ་ལླཱ་ཡ ཙེ་ཏེ་སྶ་སི. ཡ་ད་པི, ཨཱ་ན་ནྡ, ཨ་ནྟོ ཝུ་ཊྛཾ [ཝུ་ཏྠཾ (སཱི. སྱཱ. ཀ.)] ཏ་ད་པི ཨ་ཀ་པྤི་ཡཾ; ཡ་ད་པི ཨ་ནྟོ པ་ཀྐཾ ཏ་ད་པི ཨ་ཀ་པྤི་ཡཾ; ཡ་ད་པི སཱ་མཾ པ་ཀྐཾ, ཏ་ད་པི ཨ་ཀ་པྤི་ཡཾ. ནེ་ཏཾ, ཨཱ་ན་ནྡ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཨ་ནྟོ ཝུ་ཊྛཾ, ཨ་ནྟོ པ་ཀྐཾ, སཱ་མཾ པ་ཀྐཾ པ་རི་བྷུ་ཉྫི་ཏ་བྦཾ. ཡོ པ་རི་བྷུ་ཉྫེ་ཡ, ཨཱ་པ་ཏྟི དུ་ཀྐ་ཊ་སྶ. ཨ་ནྟོ ཙེ, བྷི་ཀྑ་ཝེ, ཝུ་ཊྛཾ, ཨ་ནྟོ པ་ཀྐཾ, སཱ་མཾ པ་ཀྐཾ ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི ཏི་ཎྞཾ དུ་ཀྐ་ཊཱ་ནཾ. ཨ་ནྟོ ཙེ, བྷི་ཀྑ་ཝེ, ཝུ་ཊྛཾ, ཨ་ནྟོ པ་ཀྐཾ, ཨ་ཉྙེ་ཧི པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི དྭི་ནྣཾ དུ་ཀྐ་ཊཱ་ནཾ. ཨ་ནྟོ ཙེ, བྷི་ཀྑ་ཝེ, ཝུ་ཊྛཾ, བ་ཧི པ་ཀྐཾ, སཱ་མཾ པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི དྭི་ནྣཾ དུ་ཀྐ་ཊཱ་ནཾ. བ་ཧི ཙེ, བྷི་ཀྑ་ཝེ, ཝུ་ཊྛཾ, ཨ་ནྟོ པ་ཀྐཾ, སཱ་མཾ པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི དྭི་ནྣཾ དུ་ཀྐ་ཊཱ་ནཾ. ཨ་ནྟོ ཙེ, བྷི་ཀྑ་ཝེ, ཝུ་ཊྛཾ, བ་ཧི པ་ཀྐཾ, ཨ་ཉྙེ་ཧི པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶ. བ་ཧི ཙེ, བྷི་ཀྑ་ཝེ, ཝུ་ཊྛཾ, ཨ་ནྟོ པ་ཀྐཾ, ཨ་ཉྙེ་ཧི པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶ. བ་ཧི ཙེ, བྷི་ཀྑ་ཝེ, ཝུ་ཊྛཾ, བ་ཧི པ་ཀྐཾ, སཱ་མཾ པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨཱ་པ་ཏྟི དུ་ཀྐ་ཊ་སྶ. བ་ཧི ཙེ, བྷི་ཀྑ་ཝེ, ཝུ་ཊྛཾ, བ་ཧི པ་ཀྐཾ, ཨ་ཉྙེ་ཧི པ་ཀྐཾ, ཏ་ཉྩེ པ་རི་བྷུ་ཉྫེ་ཡྻ, ཨ་ནཱ་པ་ཏྟཱི’’’ཏི.
ཏེ་ན ཁོ པ་ན ས་མ་ཡེ་ན བྷི་ཀྑཱུ ‘‘བྷ་ག་ཝ་ཏཱ སཱ་མཾ་པཱ་ཀོ པ་ཊི་ཀྑི་ཏྟོ’’ཏི པུ་ན པཱ་ཀེ ཀུ་ཀྐུ་ཙྩཱ་ཡ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, པུ་ན པཱ་ཀཾ པ་ཙི་ཏུ་ནྟི.
ཏེ་ན ཁོ པ་ན ས་མ་ཡེ་ན རཱ་ཛ་ག་ཧཾ དུ་བྦྷི་ཀྑཾ ཧོ་ཏི. མ་ནུ་སྶཱ ལོ་ཎ་མྤི, ཏེ་ལ་མྤི, ཏ་ཎྜུ་ལ་མྤི, ཁཱ་ད་ནཱི་ཡ་མྤི ཨཱ་རཱ་མཾ ཨཱ་ཧ་ར་ནྟི. ཏཱ་ནི བྷི་ཀྑཱུ བ་ཧི ཝཱ་སེ་ནྟི; ཨུ་ཀྐ་པི་ཎྜ་ཀཱ་པི ཁཱ་ད་ནྟི, ཙོ་རཱ་པི ཧ་ར་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ནྟོ ཝཱ་སེ་ཏུ་ནྟི. ཨ་ནྟོ ཝཱ་སེ་ཏྭཱ བ་ཧི པཱ་ཙེ་ནྟི. ད་མ་ཀཱ པ་རི་ཝཱ་རེ་ནྟི. བྷི་ཀྑཱུ ཨ་ཝི་སྶ་ཊྛཱ པ་རི་བྷུ་ཉྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ནྟོ པ་ཙི་ཏུ་ནྟི. དུ་བྦྷི་ཀྑེ ཀ་པྤི་ཡ་ཀཱ་ར་ཀཱ བ་ཧུ་ཏ་རཾ ཧ་ར་ནྟི, ཨ་པྤ་ཏ་རཾ བྷི་ཀྑཱུ་ནཾ དེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, སཱ་མཾ པ་ཙི་ཏུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ནྟོ ཝུ་ཊྛཾ, ཨ་ནྟོ པ་ཀྐཾ, སཱ་མཾ པ་ཀྐ་ནྟི.
ཨ་ནྟོ་ཝུ་ཊྛཱ་དི་པ་ཊི་ཀྑེ་པ་ཀ་ཐཱ ནི་ཊྛི་ཏཱ.