༡༦༣. གུ་ལཱ༹་དི་ཨ་ནུ་ཛཱ་ན་ནཱ

༢༧༢. ཨ་ཐ ཁོ བྷ་ག་ཝཱ སཱ་ཝ་ཏྠི་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན རཱ་ཛ་ག་ཧཾ ཏེ་ན ཙཱ་རི་ཀཾ པ་ཀྐཱ་མི. ཨ་དྡ་སཱ ཁོ ཨཱ་ཡ་སྨཱ ཀ་ངྑཱ་རེ་ཝ་ཏོ ཨ་ནྟ་རཱ་མ་གྒེ གུ་ལ༹་ཀ་ར་ཎཾ, ཨོ་ཀྐ་མི་ཏྭཱ གུ་ལེ༹ པི་ཊྛ་མྤི ཚཱ་རི་ཀ་མྤི པ་ཀྑི་པ་ནྟེ, དི་སྭཱ་ན ‘‘ཨ་ཀ་པྤི་ཡོ གུ་ལོ༹ སཱ་མི་སོ, ན ཀ་པྤ་ཏི གུ་ལོ༹ ཝི་ཀཱ་ལེ པ་རི་བྷུ་ཉྫི་ཏུ’’ནྟི ཀུ་ཀྐུ་ཙྩཱ་ཡ་ནྟོ ས་པ་རི་སོ གུ་ལ༹ཾ ན པ་རི་བྷུ་ཉྫ་ཏི. ཡེ་པི་སྶ སོ་ཏ་བྦཾ མ་ཉྙ་ནྟི, ཏེ་པི གུ་ལ༹ཾ ན པ་རི་བྷུ་ཉྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཀི་མ་ཏྠཱ་ཡ [ཀི་མ་ཏྠི་ཡཱ (ཀ.)], བྷི་ཀྑ་ཝེ, གུ་ལེ༹ པི་ཊྛ་མྤི ཚཱ་རི་ཀ་མྤི པ་ཀྑི་པ་ནྟཱི་ཏི? ཐ་དྡྷ་ཏྠཱ་ཡ [བ་ནྡྷ་ན་ཏྠཱ་ཡ (སཱི. སྱཱ.)] བྷ་ག་ཝཱ་ཏི. ས་ཙེ, བྷི་ཀྑ་ཝེ, ཐ་དྡྷ་ཏྠཱ་ཡ གུ་ལེ༹ པི་ཊྛ་མྤི ཚཱ་རི་ཀ་མྤི པ་ཀྑི་པ་ནྟི, སོ ཙ གུ་ལོ༹་ཏྭེ་ཝ ས་ངྑཾ ག་ཙྪ་ཏི. ཨ་ནུ་ཛཱ་ནཱ་མི, བྷི་ཀྑ་ཝེ, ཡ་ཐཱ་སུ་ཁཾ གུ་ལ༹ཾ པ་རི་བྷུ་ཉྫི་ཏུ་ནྟི.

ཨ་དྡ་སཱ ཁོ ཨཱ་ཡ་སྨཱ ཀ་ངྑཱ་རེ་ཝ་ཏོ ཨ་ནྟ་རཱ་མ་གྒེ ཝ་ཙྩེ མུ་གྒཾ ཛཱ་ཏཾ, པ་སྶི་ཏྭཱ ‘‘ཨ་ཀ་པྤི་ཡཱ མུ་གྒཱ; པ་ཀྐཱ་པི མུ་གྒཱ ཛཱ་ཡ་ནྟཱི་ཏི’’ ཀུ་ཀྐུ་ཙྩཱ་ཡ་ནྟོ ས་པ་རི་སོ མུ་གྒཾ ན པ་རི་བྷུ་ཉྫ་ཏི. ཡེ་པི་སྶ སོ་ཏ་བྦཾ མ་ཉྙ་ནྟི, ཏེ་པི མུ་གྒཾ ན པ་རི་བྷུ་ཉྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ས་ཙེ [ས་ཙེ་པི (?)], བྷི་ཀྑ་ཝེ, པ་ཀྐཱ་པི མུ་གྒཱ ཛཱ་ཡ་ནྟི, ཨ་ནུ་ཛཱ་ནཱ་མི, བྷི་ཀྑ་ཝེ, ཡ་ཐཱ་སུ་ཁཾ མུ་གྒཾ པ་རི་བྷུ་ཉྫི་ཏུ་ནྟི.

༢༧༣. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྶ བྷི་ཀྑུ་ནོ ཨུ་ད་ར་ཝཱ་ཏཱ་བཱ་དྷོ ཧོ་ཏི. སོ ལོ་ཎ་སོ་ཝཱི་ར་ཀཾ ཨ་པཱ་ཡི. ཏ་སྶ སོ ཨུ་ད་ར་ཝཱ་ཏཱ་བཱ་དྷོ པ་ཊི་པྤ་སྶ་མྦྷི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ན་སྶ ལོ་ཎ་སོ་ཝཱི་ར་ཀཾ; ཨ་གི་ལཱ་ན་སྶ ཨུ་ད་ཀ་ས་མྦྷི་ནྣཾ པཱ་ན་པ་རི་བྷོ་གེ་ན པ་རི་བྷུ་ཉྫི་ཏུ་ནྟི.

གུ་ལཱ༹་དི་ཨ་ནུ་ཛཱ་ན་ནཱ ནི་ཊྛི་ཏཱ.