༨༤. པ་ཀྑ་ག་ཎ་ནཱ་དི་ཨུ་གྒ་ཧ་ཎཱ་ནུ་ཛཱ་ན་ནཱ

༡༥༦. ཨ་ཐ ཁོ བྷ་ག་ཝཱ ཙོ་ད་ནཱ་ཝ་ཏྠུ་སྨིཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ པུ་ན་དེ་ཝ རཱ་ཛ་ག་ཧཾ པ་ཙྩཱ་ག་ཉྪི.

ཏེ་ན ཁོ པ་ན ས་མ་ཡེ་ན མ་ནུ་སྶཱ བྷི་ཀྑཱུ པི་ཎྜཱ་ཡ ཙ་ར་ནྟེ པུ་ཙྪ་ནྟི – ‘‘ཀ་ཏི་མཱི, བྷ་ནྟེ, པ་ཀྑ་སྶཱ’’ཏི? བྷི་ཀྑཱུ ཨེ་ཝ་མཱ་ཧཾ་སུ – ‘‘ན ཁོ མ་ཡཾ, ཨཱ་ཝུ་སོ, ཛཱ་ནཱ་མཱ’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘པ་ཀྑ་ག་ཎ་ན་མ་ཏྟ་མ་མྤི་མེ ས་མ་ཎཱ ས་ཀྱ་པུ་ཏྟི་ཡཱ ན ཛཱ་ན་ནྟི, ཀིཾ པ་ནི་མེ ཨ་ཉྙཾ ཀི་ཉྩི ཀ་ལྱཱ་ཎཾ ཛཱ་ནི་སྶ་ནྟཱི’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, པ་ཀྑ་ག་ཎ་ནཾ ཨུ་གྒ་ཧེ་ཏུ་ནྟི. ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ པ་ཀྑ་ག་ཎ་ནཱ ཨུ་གྒ་ཧེ་ཏ་བྦཱ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ས་བྦེ་ཧེ་ཝ པ་ཀྑ་ག་ཎ་ནཾ ཨུ་གྒ་ཧེ་ཏུ་ནྟི.

༡༥༧. ཏེ་ན ཁོ པ་ན ས་མ་ཡེ་ན མ་ནུ་སྶཱ བྷི་ཀྑཱུ པི་ཎྜཱ་ཡ ཙ་ར་ནྟེ པུ་ཙྪ་ནྟི – ‘‘ཀཱི་ཝ་ཏི་ཀཱ, བྷ་ནྟེ, བྷི་ཀྑཱུ’’ཏི? བྷི་ཀྑཱུ ཨེ་ཝ་མཱ་ཧཾ་སུ – ‘‘ན ཁོ མ་ཡཾ, ཨཱ་ཝུ་སོ, ཛཱ་ནཱ་མཱ’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཨ་ཉྙ་མ་ཉྙ་མྤི་མེ ས་མ་ཎཱ ས་ཀྱ་པུ་ཏྟི་ཡཱ ན ཛཱ་ན་ནྟི, ཀིཾ པ་ནི་མེ ཨ་ཉྙཾ ཀི་ཉྩི ཀ་ལྱཱ་ཎཾ ཛཱ་ནི་སྶ་ནྟཱི’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, བྷི་ཀྑཱུ ག་ཎེ་ཏུ་ནྟི.

ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀ་དཱ ནུ ཁོ བྷི་ཀྑཱུ ག་ཎེ་ཏ་བྦཱ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཏ་ད་ཧུ་པོ་ས་ཐེ ནཱ་མ་གྒེ་ན [ནཱ་མ་མ་ཏྟེ་ན (སྱཱ.), ག་ཎ་མ་གྒེ་ན (ཀ.)] ག་ཎེ་ཏུཾ, ས་ལཱ་ཀཾ ཝཱ གཱ་ཧེ་ཏུ་ནྟི.

༡༥༨. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་ཛཱ་ན་ནྟཱ ཨ་ཛྫུ་པོ་ས་ཐོ་ཏི དཱུ་རཾ གཱ་མཾ པི་ཎྜཱ་ཡ ཙ་ར་ནྟི. ཏེ ཨུ་དྡི་སྶ་མཱ་ནེ་པི པཱ་ཏི་མོ་ཀྑེ ཨཱ་ག་ཙྪ་ནྟི, ཨུ་དྡི་ཊྛ་མ་ཏྟེ་པི ཨཱ་ག་ཙྪ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨཱ་རོ་ཙེ་ཏུཾ ‘ཨ་ཛྫུ་པོ་ས་ཐོ’ཏི.

ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ ཨཱ་རོ་ཙེ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཐེ་རེ་ན བྷི་ཀྑུ་ནཱ ཀཱ་ལ་ཝ་ཏོ ཨཱ་རོ་ཙེ་ཏུ་ནྟི.

ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ ཐེ་རོ ཀཱ་ལ་ཝ་ཏོ ན་སྶ་ར་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, བྷ་ཏྟ་ཀཱ་ལེ་པི ཨཱ་རོ་ཙེ་ཏུ་ནྟི.

བྷ་ཏྟ་ཀཱ་ལེ་པི ན་སྶ་ར་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཡཾ ཀཱ་ལཾ ས་ར་ཏི, ཏཾ ཀཱ་ལཾ ཨཱ་རོ་ཙེ་ཏུ་ནྟི.