༨༥. པུ་བྦ་ཀ་ར་ཎཱ་ནུ་ཛཱ་ན་ནཱ
༡༥༩. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཨུ་པོ་ས་ཐཱ་གཱ་རཾ ཨུ་ཀླཱ་པཾ ཧོ་ཏི. ཨཱ་ག་ནྟུ་ཀཱ བྷི་ཀྑཱུ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཝཱ་སི་ཀཱ བྷི་ཀྑཱུ ཨུ་པོ་ས་ཐཱ་གཱ་རཾ ན ས་མྨ་ཛྫི་སྶ་ནྟཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པོ་ས་ཐཱ་གཱ་རཾ ས་མྨ་ཛྫི་ཏུ་ནྟི.
ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ ཨུ་པོ་ས་ཐཱ་གཱ་རཾ ས་མྨ་ཛྫི་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཐེ་རེ་ན བྷི་ཀྑུ་ནཱ ན་ཝཾ བྷི་ཀྑུཾ ཨཱ་ཎཱ་པེ་ཏུ་ནྟི.
ཐེ་རེ་ན ཨཱ་ཎ་ཏྟཱ ན་ཝཱ བྷི་ཀྑཱུ ན ས་མྨ་ཛྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཐེ་རེ་ན ཨཱ་ཎ་ཏྟེ་ན ཨ་གི་ལཱ་ནེ་ན ན ས་མྨ་ཛྫི་ཏ་བྦཾ. ཡོ ན ས་མྨ་ཛྫེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
༡༦༠. ཏེ་ན ཁོ པ་ན ས་མ་ཡེ་ན ཨུ་པོ་ས་ཐཱ་གཱ་རེ ཨཱ་ས་ནཾ ཨ་པ་ཉྙ་ཏྟཾ ཧོ་ཏི. བྷི་ཀྑཱུ ཚ་མཱ་ཡཾ ནི་སཱི་ད་ནྟི, ག་ཏྟཱ་ནི་པི ཙཱི་ཝ་རཱ་ནི་པི པཾ་སུ་ཀི་ཏཱ་ནི ཧོ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པོ་ས་ཐཱ་གཱ་རེ ཨཱ་ས་ནཾ པ་ཉྙ་པེ་ཏུ་ནྟི.
ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ ཨུ་པོ་ས་ཐཱ་གཱ་རེ ཨཱ་ས་ནཾ པ་ཉྙ་པེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཐེ་རེ་ན བྷི་ཀྑུ་ནཱ ན་ཝཾ བྷི་ཀྑུཾ ཨཱ་ཎཱ་པེ་ཏུ་ནྟི.
ཐེ་རེ་ན ཨཱ་ཎ་ཏྟཱ ན་ཝཱ བྷི་ཀྑཱུ ན པ་ཉྙ་པེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཐེ་རེ་ན ཨཱ་ཎ་ཏྟེ་ན ཨ་གི་ལཱ་ནེ་ན ན པ་ཉྙ་པེ་ཏ་བྦཾ. ཡོ ན པ་ཉྙ་པེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
༡༦༡. ཏེ་ན ཁོ པ་ན ས་མ་ཡེ་ན ཨུ་པོ་ས་ཐཱ་གཱ་རེ པ་དཱི་པོ ན ཧོ་ཏི. བྷི་ཀྑཱུ ཨ་ནྡྷ་ཀཱ་རེ ཀཱ་ཡ་མྤི ཙཱི་ཝ་ར་མྤི ཨ་ཀྐ་མ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པོ་ས་ཐཱ་གཱ་རེ པ་དཱི་པཾ ཀཱ་ཏུ་ནྟི.
ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ ཨུ་པོ་ས་ཐཱ་གཱ་རེ པ་དཱི་པོ ཀཱ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཐེ་རེ་ན བྷི་ཀྑུ་ནཱ ན་ཝཾ བྷི་ཀྑུཾ ཨཱ་ཎཱ་པེ་ཏུ་ནྟི.
ཐེ་རེ་ན ཨཱ་ཎ་ཏྟཱ ན་ཝཱ བྷི་ཀྑཱུ ན པ་དཱི་པེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཐེ་རེ་ན ཨཱ་ཎ་ཏྟེ་ན ཨ་གི་ལཱ་ནེ་ན ན པ་དཱི་པེ་ཏ་བྦོ. ཡོ ན པ་དཱི་པེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
༡༦༢. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཨཱ་ཝཱ་སི་ཀཱ བྷི་ཀྑཱུ ནེ་ཝ པཱ་ནཱི་ཡཾ ཨུ་པ་ཊྛཱ་པེ་ནྟི, ན པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ནྟི. ཨཱ་ག་ནྟུ་ཀཱ བྷི་ཀྑཱུ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཝཱ་སི་ཀཱ བྷི་ཀྑཱུ ནེ་ཝ པཱ་ནཱི་ཡཾ ཨུ་པ་ཊྛཱ་པེ་སྶ་ནྟི, ན པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་སྶ་ནྟཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏུ་ནྟི.
ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཐེ་རེ་ན བྷི་ཀྑུ་ནཱ ན་ཝཾ བྷི་ཀྑུཾ ཨཱ་ཎཱ་པེ་ཏུ་ནྟི.
ཐེ་རེ་ན ཨཱ་ཎ་ཏྟཱ ན་ཝཱ བྷི་ཀྑཱུ ན ཨུ་པ་ཊྛཱ་པེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཐེ་རེ་ན ཨཱ་ཎ་ཏྟེ་ན ཨ་གི་ལཱ་ནེ་ན ན ཨུ་པ་ཊྛཱ་པེ་ཏ་བྦཾ. ཡོ ན ཨུ་པ་ཊྛཱ་པེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.