༨༣. པཱ་ཏི་མོ་ཀྑུ་དྡེ་ས་ཀ་ཨ་ཛ྄ཛྷེ་ས་ནཱ་དི

༡༥༥. ཨ་ཐ ཁོ བྷ་ག་ཝཱ རཱ་ཛ་ག་ཧེ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན ཙོ་ད་ནཱ་ཝ་ཏྠུ ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཙོ་ད་ནཱ་ཝ་ཏྠུ ཏ་ད་ཝ་ས་རི. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ས་མྦ་ཧུ་ལཱ བྷི་ཀྑཱུ ཝི་ཧ་ར་ནྟི. ཏ་ཏྠ ཐེ་རོ བྷི་ཀྑུ བཱ་ལོ ཧོ་ཏི ཨ་བྱ་ཏྟོ. སོ ན ཛཱ་ནཱ་ཏི ཨུ་པོ་ས་ཐཾ ཝཱ ཨུ་པོ་ས་ཐ་ཀ་མྨཾ ཝཱ, པཱ་ཏི་མོ་ཀྑཾ ཝཱ པཱ་ཏི་མོ་ཀྑུ་དྡེ་སཾ ཝཱ. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ཐེ་རཱ་དྷི་ཀཾ པཱ་ཏི་མོ་ཀྑ’ནྟི, ཨ་ཡ་ཉྩ ཨ་མྷཱ་ཀཾ ཐེ་རོ བཱ་ལོ ཨ་བྱ་ཏྟོ, ན ཛཱ་ནཱ་ཏི ཨུ་པོ་ས་ཐཾ ཝཱ ཨུ་པོ་ས་ཐ་ཀ་མྨཾ ཝཱ, པཱ་ཏི་མོ་ཀྑཾ ཝཱ པཱ་ཏི་མོ་ཀྑུ་དྡེ་སཾ ཝཱ. ཀ་ཐཾ ནུ ཁོ ཨ་མྷེ་ཧི པ་ཊི་པ་ཛྫི་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཡོ ཏ་ཏྠ བྷི་ཀྑུ བྱ་ཏྟོ པ་ཊི་བ་ལོ ཏ་སྶཱ་དྷེ་ཡྻཾ པཱ་ཏི་མོ་ཀྑ་ནྟི.

ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ས་མྦ་ཧུ་ལཱ བྷི་ཀྑཱུ ཝི་ཧ་ར་ནྟི བཱ་ལཱ ཨ་བྱ་ཏྟཱ. ཏེ ན ཛཱ་ན་ནྟི ཨུ་པོ་ས་ཐཾ ཝཱ ཨུ་པོ་ས་ཐ་ཀ་མྨཾ ཝཱ, པཱ་ཏི་མོ་ཀྑཾ ཝཱ པཱ་ཏི་མོ་ཀྑུ་དྡེ་སཾ ཝཱ. ཏེ ཐེ་རཾ ཨ་ཛ྄ཛྷེ་སིཾ་སུ – ‘‘ཨུ་དྡི་ས་ཏུ, བྷ་ནྟེ, ཐེ་རོ པཱ་ཏི་མོ་ཀྑ’’ནྟི. སོ ཨེ་ཝ་མཱ་ཧ – ‘‘ན མེ, ཨཱ་ཝུ་སོ, ཝ་ཏྟ་ཏཱི’’ཏི. དུ་ཏི་ཡཾ ཐེ་རཾ ཨ་ཛ྄ཛྷེ་སིཾ་སུ – ‘‘ཨུ་དྡི་ས་ཏུ, བྷ་ནྟེ, ཐེ་རོ པཱ་ཏི་མོ་ཀྑ’’ནྟི. སོ་པི ཨེ་ཝ་མཱ་ཧ – ‘‘ན མེ, ཨཱ་ཝུ་སོ, ཝ་ཏྟ་ཏཱི’’ཏི. ཏ་ཏི་ཡཾ ཐེ་རཾ ཨ་ཛ྄ཛྷེ་སིཾ་སུ – ‘‘ཨུ་དྡི་ས་ཏུ, བྷ་ནྟེ, ཐེ་རོ པཱ་ཏི་མོ་ཀྑ’’ནྟི. སོ་པི ཨེ་ཝ་མཱ་ཧ – ‘‘ན མེ, ཨཱ་ཝུ་སོ, ཝ་ཏྟ་ཏཱི’’ཏི. ཨེ་ཏེ་ནེ་ཝ ཨུ་པཱ་ཡེ་ན ཡཱ་ཝ ས་ངྒྷ་ན་ཝ་ཀཾ ཨ་ཛ྄ཛྷེ་སིཾ་སུ – ‘‘ཨུ་དྡི་ས་ཏུ ཨཱ་ཡ་སྨཱ པཱ་ཏི་མོ་ཀྑ’’ནྟི. སོ་པི ཨེ་ཝ་མཱ་ཧ – ‘‘ན མེ, བྷ་ནྟེ, ཝ་ཏྟ་ཏཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.

ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ས་མྦ་ཧུ་ལཱ བྷི་ཀྑཱུ ཝི་ཧ་ར་ནྟི བཱ་ལཱ ཨ་བྱ་ཏྟཱ. ཏེ ན ཛཱ་ན་ནྟི ཨུ་པོ་ས་ཐཾ ཝཱ ཨུ་པོ་ས་ཐ་ཀ་མྨཾ ཝཱ, པཱ་ཏི་མོ་ཀྑཾ ཝཱ པཱ་ཏི་མོ་ཀྑུ་དྡེ་སཾ ཝཱ. ཏེ ཐེ་རཾ ཨ་ཛ྄ཛྷེ་ས་ནྟི – ‘‘ཨུ་དྡི་ས་ཏུ, བྷ་ནྟེ, ཐེ་རོ པཱ་ཏི་མོ་ཀྑ’’ནྟི. སོ ཨེ་ཝཾ ཝ་དེ་ཏི – ‘‘ན མེ, ཨཱ་ཝུ་སོ, ཝ་ཏྟ་ཏཱི’’ཏི. དུ་ཏི་ཡཾ ཐེ་རཾ ཨ་ཛ྄ཛྷེ་ས་ནྟི – ‘‘ཨུ་དྡི་ས་ཏུ, བྷ་ནྟེ, ཐེ་རོ པཱ་ཏི་མོ་ཀྑ’’ནྟི. སོ་པི ཨེ་ཝཾ ཝ་དེ་ཏི – ‘‘ན མེ, ཨཱ་ཝུ་སོ, ཝ་ཏྟ་ཏཱི’’ཏི. ཏ་ཏི་ཡཾ ཐེ་རཾ ཨ་ཛ྄ཛྷེ་ས་ནྟི – ‘‘ཨུ་དྡི་ས་ཏུ, བྷ་ནྟེ, ཐེ་རོ པཱ་ཏི་མོ་ཀྑ’’ནྟི. སོ་པི ཨེ་ཝཾ ཝ་དེ་ཏི – ‘‘ན མེ, ཨཱ་ཝུ་སོ, ཝ་ཏྟ་ཏཱི’’ཏི. ཨེ་ཏེ་ནེ་ཝ ཨུ་པཱ་ཡེ་ན ཡཱ་ཝ ས་ངྒྷ་ན་ཝ་ཀཾ ཨ་ཛ྄ཛྷེ་ས་ནྟི – ‘‘ཨུ་དྡི་ས་ཏུ ཨཱ་ཡ་སྨཱ པཱ་ཏི་མོ་ཀྑ’’ནྟི. སོ་པི ཨེ་ཝཾ ཝ་དེ་ཏི – ‘‘ན མེ, བྷ་ནྟེ, ཝ་ཏྟ་ཏཱི’’ཏི. ཏེ་ཧི, བྷི་ཀྑ་ཝེ, བྷི་ཀྑཱུ་ཧི ཨེ་ཀོ བྷི་ཀྑུ སཱ་མ་ནྟཱ ཨཱ་ཝཱ་སཱ ས་ཛྫུ་ཀཾ པཱ་ཧེ་ཏ་བྦོ – ག་ཙྪཱ་ཝུ་སོ, སཾ་ཁི་ཏྟེ་ན ཝཱ ཝི་ཏྠཱ་རེ་ན ཝཱ པཱ་ཏི་མོ་ཀྑཾ པ་རི་ཡཱ་པུ་ཎི་ཏྭཱ་ན ཨཱ་ག་ཙྪཱ་ཧཱི་ཏི.

ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀེ་ན ནུ ཁོ པཱ་ཧེ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཐེ་རེ་ན བྷི་ཀྑུ་ནཱ ན་ཝཾ བྷི་ཀྑུཾ ཨཱ་ཎཱ་པེ་ཏུ་ནྟི. ཐེ་རེ་ན ཨཱ་ཎ་ཏྟཱ ན་ཝཱ བྷི་ཀྑཱུ ན ག་ཙྪ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཐེ་རེ་ན ཨཱ་ཎ་ཏྟེ་ན ཨ་གི་ལཱ་ནེ་ན ན ག་ནྟ་བྦཾ. ཡོ ན ག་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.