༧༦. གཱ་མ་སཱི་མཱ་དི

༡༤༧. ཨ་ས་མྨ་ཏཱ་ཡ, བྷི་ཀྑ་ཝེ, སཱི་མཱ་ཡ ཨ་ཊྛ་པི་ཏཱ་ཡ, ཡཾ གཱ་མཾ ཝཱ ནི་ག་མཾ ཝཱ ཨུ་པ་ནི་སྶཱ་ཡ ཝི་ཧ་ར་ཏི, ཡཱ ཏ་སྶ ཝཱ གཱ་མ་སྶ གཱ་མ་སཱི་མཱ, ནི་ག་མ་སྶ ཝཱ ནི་ག་མ་སཱི་མཱ, ཨ་ཡཾ ཏ་ཏྠ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ. ཨ་གཱ་མ་ཀེ ཙེ, བྷི་ཀྑ་ཝེ, ཨ་ར་ཉྙེ ས་མ་ནྟཱ ས་ཏྟ་བྦྷ་ནྟ་རཱ, ཨ་ཡཾ ཏ་ཏྠ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ. ས་བྦཱ, བྷི་ཀྑ་ཝེ, ན་དཱི ཨ་སཱི་མཱ; ས་བྦོ ས་མུ་དྡོ ཨ་སཱི་མོ; ས་བྦོ ཛཱ་ཏ་སྶ་རོ ཨ་སཱི་མོ. ན་དི་ཡཱ ཝཱ, བྷི་ཀྑ་ཝེ, ས་མུ་དྡེ ཝཱ ཛཱ་ཏ་སྶ་རེ ཝཱ ཡཾ མ་ཛ྄ཛྷི་མ་སྶ པུ་རི་ས་སྶ ས་མ་ནྟཱ ཨུ་ད་ཀུ་ཀྑེ་པཱ, ཨ་ཡཾ ཏ་ཏྠ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ་ཏི.

༡༤༨. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ སཱི་མཱ་ཡ སཱི་མཾ ས་མྦྷི་ནྡ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཡེ་སཾ, བྷི་ཀྑ་ཝེ, སཱི་མཱ པ་ཋ་མཾ ས་མྨ་ཏཱ ཏེ་སཾ ཏཾ ཀ་མྨཾ དྷ་མྨི་ཀཾ ཨ་ཀུ་པྤཾ ཋཱ་ནཱ་ར་ཧཾ. ཡེ་སཾ, བྷི་ཀྑ་ཝེ, སཱི་མཱ པ་ཙྪཱ ས་མྨ་ཏཱ ཏེ་སཾ ཏཾ ཀ་མྨཾ ཨ་དྷ་མྨི་ཀཾ ཀུ་པྤཾ ཨ་ཊྛཱ་ནཱ་ར་ཧཾ. ན, བྷི་ཀྑ་ཝེ, སཱི་མཱ་ཡ སཱི་མཱ ས་མྦྷི་ནྡི་ཏ་བྦཱ. ཡོ ས་མྦྷི་ནྡེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ སཱི་མཱ་ཡ སཱི་མཾ ཨ་ཛ྄ཛྷོ་ཏྠ་ར་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཡེ་སཾ, བྷི་ཀྑ་ཝེ, སཱི་མཱ པ་ཋ་མཾ ས་མྨ་ཏཱ ཏེ་སཾ ཏཾ ཀ་མྨཾ དྷ་མྨི་ཀཾ ཨ་ཀུ་པྤཾ ཋཱ་ནཱ་ར་ཧཾ. ཡེ་སཾ, བྷི་ཀྑ་ཝེ, སཱི་མཱ པ་ཙྪཱ ས་མྨ་ཏཱ ཏེ་སཾ ཏཾ ཀ་མྨཾ ཨ་དྷ་མྨི་ཀཾ ཀུ་པྤཾ ཨ་ཊྛཱ་ནཱ་ར་ཧཾ. ན, བྷི་ཀྑ་ཝེ, སཱི་མཱ་ཡ སཱི་མཱ ཨ་ཛ྄ཛྷོ་ཏྠ་རི་ཏ་བྦཱ. ཡོ ཨ་ཛ྄ཛྷོ་ཏྠ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི. ཨ་ནུ་ཛཱ་ནཱ་མི, བྷི་ཀྑ་ཝེ, སཱི་མཾ ས་མྨ་ནྣ་ནྟེ་ན སཱི་མ་ནྟ་རི་ཀཾ ཋ་པེ་ཏྭཱ སཱི་མཾ ས་མྨ་ནྣི་ཏུ་ནྟི.