༧༥. སཱི་མཱ་ས་མཱུ་ཧ་ན་ན

‘‘སཱི་མཾ, བྷི་ཀྑ་ཝེ, ས་མྨ་ནྣ་ནྟེ་ན པ་ཋ་མཾ ས་མཱ་ན་སཾ་ཝཱ་ས་སཱི་མཱ [ས་མཱ་ན་སཾ་ཝཱ་སཱ སཱི་མཱ (སྱཱ.)] ས་མྨ་ནྣི་ཏ་བྦཱ, པ་ཙྪཱ ཏི་ཙཱི་ཝ་རེ་ན ཨ་ཝི་པྤ་ཝཱ་སོ ས་མྨ་ནྣི་ཏ་བྦོ. སཱི་མཾ, བྷི་ཀྑ་ཝེ, ས་མཱུ་ཧ་ན་ནྟེ་ན པ་ཋ་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སོ ས་མཱུ་ཧ་ནྟ་བྦོ, པ་ཙྪཱ ས་མཱ་ན་སཾ་ཝཱ་ས་སཱི་མཱ ས་མཱུ་ཧ་ནྟ་བྦཱ. ཨེ་ཝ་ཉྩ པ་ན, བྷི་ཀྑ་ཝེ, ཏི་ཙཱི་ཝ་རེ་ན ཨ་ཝི་པྤ་ཝཱ་སོ ས་མཱུ་ཧ་ནྟ་བྦོ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

༡༤༥. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡོ སོ ས་ངྒྷེ་ན ཏི་ཙཱི་ཝ་རེ་ན ཨ་ཝི་པྤ་ཝཱ་སོ ས་མྨ་ཏོ, ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མཱུ་ཧ་ནེ་ཡྻ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡོ སོ ས་ངྒྷེ་ན ཏི་ཙཱི་ཝ་རེ་ན ཨ་ཝི་པྤ་ཝཱ་སོ ས་མྨ་ཏོ, ས་ངྒྷོ ཏཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མཱུ་ཧ་ན་ཏི. ཡ་སྶཱ་ཡ་སྨ་ཏོ ཁ་མ་ཏི ཨེ་ཏ་སྶ ཏི་ཙཱི་ཝ་རེ་ན ཨ་ཝི་པྤ་ཝཱ་ས་སྶ ས་མུ་གྒྷཱ་ཏོ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མཱུ་ཧ་ཏོ སོ ས་ངྒྷེ་ན ཏི་ཙཱི་ཝ་རེ་ན ཨ་ཝི་པྤ་ཝཱ་སོ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.

ཨེ་ཝ་ཉྩ པ་ན, བྷི་ཀྑ་ཝེ, སཱི་མཱ [ས་མཱ་ན་སཾ་ཝཱ་སཱ སཱི་མཱ (སྱཱ.)]. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

༡༤༦. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ སཱ ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏཾ སཱི་མཾ ས་མཱུ་ཧ་ནེ་ཡྻ ས་མཱ་ན་སཾ་ཝཱ་སཾ ཨེ་ཀུ་པོ་ས་ཐཾ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ སཱ ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ས་ངྒྷོ ཏཾ སཱི་མཾ ས་མཱུ་ཧ་ན་ཏི ས་མཱ་ན་སཾ་ཝཱ་སཾ ཨེ་ཀུ་པོ་ས་ཐཾ. ཡ་སྶཱ་ཡ་སྨ་ཏོ ཁ་མ་ཏི ཨེ་ཏི་སྶཱ སཱི་མཱ་ཡ ས་མཱ་ན་སཾ་ཝཱ་སཱ་ཡ ཨེ་ཀུ་པོ་ས་ཐཱ་ཡ ས་མུ་གྒྷཱ་ཏོ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མཱུ་ཧ་ཏཱ སཱ སཱི་མཱ ས་ངྒྷེ་ན ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.