༧༤. ཨ་ཝི་པྤ་ཝཱ་ས་སཱི་མཱ་ནུ་ཛཱ་ན་ནཱ

༡༤༣. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ མ་ཧཱ་ཀ་སྶ་པོ ཨ་ནྡྷ་ཀ་ཝི་ནྡཱ རཱ་ཛ་ག་ཧཾ ཨུ་པོ་ས་ཐཾ ཨཱ་ག་ཙྪ་ནྟོ ཨ་ནྟ་རཱ་མ་གྒེ ན་དིཾ ཏ་ར་ནྟོ མ་ནཾ ཝཱུ་ལ༹ྷོ ཨ་ཧོ་སི, ཙཱི་ཝ་རཱ་ནི་སྶ [ཏེ་ན ཙཱི་ཝ་རཱ་ནི་སྶ (ཀ.)] ཨ་ལླཱ་ནི. བྷི་ཀྑཱུ ཨཱ་ཡ་སྨ་ནྟཾ མ་ཧཱ་ཀ་སྶ་པཾ ཨེ་ཏ་ད་ཝོ་ཙུཾ – ‘‘ཀི་སྶ ཏེ, ཨཱ་ཝུ་སོ, ཙཱི་ཝ་རཱ་ནི ཨ་ལླཱ་ནཱི’’ཏི? ‘‘ཨི་དྷཱ་ཧཾ, ཨཱ་ཝུ་སོ, ཨ་ནྡྷ་ཀ་ཝི་ནྡཱ རཱ་ཛ་ག་ཧཾ ཨུ་པོ་ས་ཐཾ ཨཱ་ག་ཙྪ་ནྟོ ཨ་ནྟ་རཱ་མ་གྒེ ན་དིཾ ཏ་ར་ནྟོ མ་ན་མྷི ཝཱུ་ལ༹ྷོ. ཏེ་ན མེ ཙཱི་ཝ་རཱ་ནི ཨ་ལླཱ་ནཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ སཱ, བྷི་ཀྑ་ཝེ, ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ས་ངྒྷོ ཏཾ སཱི་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མྨ་ནྣ་ཏུ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ སཱ ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ཡ་དི ས་ངྒྷ་སྶ པ་ཏྟ་ཀ་ལླཾ ས་ངྒྷོ ཏཾ སཱི་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མྨ་ནྣེ་ཡྻ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ སཱ ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ས་ངྒྷོ ཏཾ སཱི་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མྨ་ནྣ་ཏི. ཡ་སྶཱ་ཡ་སྨ་ཏོ ཁ་མ་ཏི ཨེ་ཏི་སྶཱ སཱི་མཱ་ཡ ཏི་ཙཱི་ཝ་རེ་ན ཨ་ཝི་པྤ་ཝཱ་སཱ་ཡ [ཨ་ཝི་པྤ་ཝཱ་ས་སྶ (སྱཱ.)] ས་མྨུ་ཏི, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མྨ་ཏཱ སཱ སཱི་མཱ ས་ངྒྷེ་ན ཏི་ཙཱི་ཝ་རེ་ན ཨ་ཝི་པྤ་ཝཱ་སཱ [ཨ་ཝི་པྤ་ཝཱ་སོ (སྱཱ.)]. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.

ཏེ་ན ཁོ པ་ན ས་མ་ཡེ་ན བྷི་ཀྑཱུ བྷ་ག་ཝ་ཏཱ ཏི་ཙཱི་ཝ་རེ་ན ཨ་ཝི་པྤ་ཝཱ་ས་ས་མྨུ་ཏི ཨ་ནུ་ཉྙཱ་ཏཱ་ཏི ཨ་ནྟ་ར་གྷ་རེ ཙཱི་ཝ་རཱ་ནི ནི་ཀྑི་པ་ནྟི. ཏཱ་ནི ཙཱི་ཝ་རཱ་ནི ན་སྶ་ནྟི་པི ཌ་ཡ྄ཧ་ནྟི་པི ཨུ་ནྡཱུ་རེ་ཧི་པི ཁ་ཛྫ་ནྟི. བྷི་ཀྑཱུ དུ་ཙྩོ་ལཱ༹ ཧོ་ནྟི ལཱུ་ཁ་ཙཱི་ཝ་རཱ. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏུ་མྷེ, ཨཱ་ཝུ་སོ, དུ་ཙྩོ་ལཱ༹ ལཱུ་ཁ་ཙཱི་ཝ་རཱ’’ཏི? ‘‘ཨི་དྷ མ་ཡཾ, ཨཱ་ཝུ་སོ, བྷ་ག་ཝ་ཏཱ ཏི་ཙཱི་ཝ་རེ་ན ཨ་ཝི་པྤ་ཝཱ་ས་ས་མྨུ་ཏི ཨ་ནུ་ཉྙཱ་ཏཱ་ཏི ཨ་ནྟ་ར་གྷ་རེ ཙཱི་ཝ་རཱ་ནི ནི་ཀྑི་པི་མྷཱ. ཏཱ་ནི ཙཱི་ཝ་རཱ་ནི ན་ཊྛཱ་ནི་པི ད་ཌྜྷཱ་ནི་པི, ཨུ་ནྡཱུ་རེ་ཧི་པི ཁཱ་ཡི་ཏཱ་ནི, ཏེ་ན མ་ཡཾ དུ་ཙྩོ་ལཱ༹ ལཱུ་ཁ་ཙཱི་ཝ་རཱ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ སཱ, བྷི་ཀྑ་ཝེ, ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ས་ངྒྷོ ཏཾ སཱི་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མྨ་ནྣ་ཏུ, ཋ་པེ་ཏྭཱ གཱ་མ་ཉྩ གཱ་མཱུ་པ་ཙཱ་ར་ཉྩ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦཱ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

༡༤༤. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ སཱ ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏཾ སཱི་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མྨ་ནྣེ་ཡྻ, ཋ་པེ་ཏྭཱ གཱ་མ་ཉྩ གཱ་མཱུ་པ་ཙཱ་ར་ཉྩ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ སཱ ས་ངྒྷེ་ན སཱི་མཱ ས་མྨ་ཏཱ ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ, ས་ངྒྷོ ཏཾ སཱི་མཾ ཏི་ཙཱི་ཝ་རེ་ན ཨ་ཝི་པྤ་ཝཱ་སཾ ས་མྨ་ནྣ་ཏི, ཋ་པེ་ཏྭཱ གཱ་མ་ཉྩ གཱ་མཱུ་པ་ཙཱ་ར་ཉྩ. ཡ་སྶཱ་ཡ་སྨ་ཏོ ཁ་མ་ཏི ཨེ་ཏི་སྶཱ སཱི་མཱ་ཡ ཏི་ཙཱི་ཝ་རེ་ན ཨ་ཝི་པྤ་ཝཱ་སཱ་ཡ [ཨ་ཝི་པྤ་ཝཱ་ས་སྶ (སྱཱ.)] ས་མྨུ་ཏི, ཋ་པེ་ཏྭཱ གཱ་མ་ཉྩ གཱ་མཱུ་པ་ཙཱ་ར་ཉྩ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མྨ་ཏཱ སཱ སཱི་མཱ ས་ངྒྷེ་ན ཏི་ཙཱི་ཝ་རེ་ན ཨ་ཝི་པྤ་ཝཱ་སཱ [ཨ་ཝི་པྤ་ཝཱ་སོ (སྱཱ.)], ཋ་པེ་ཏྭཱ གཱ་མ་ཉྩ གཱ་མཱུ་པ་ཙཱ་ར་ཉྩ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.