༧༣. ཨུ་པོ་ས་ཐ་པྤ་མུ་ཁཱ་ནུ་ཛཱ་ན་ནཱ

༡༤༢. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཨ་ཏི་ཁུ་དྡ་ཀཾ ཨུ་པོ་ས་ཐཱ་གཱ་རཾ ས་མྨ་ཏཾ ཧོ་ཏི, ཏ་ད་ཧུ་པོ་ས་ཐེ མ་ཧཱ་བྷི་ཀྑུ་ས་ངྒྷོ ས་ནྣི་པ་ཏི་ཏོ ཧོ་ཏི. བྷི་ཀྑཱུ ཨ་ས་མྨ་ཏཱ་ཡ བྷཱུ་མི་ཡཱ ནི་སི་ནྣཱ པཱ་ཏི་མོ་ཀྑཾ ཨ་སྶོ་སུཾ. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི ‘‘བྷ་ག་ཝ་ཏཱ པ་ཉྙ་ཏྟཾ ‘ཨུ་པོ་ས་ཐཱ་གཱ་རཾ ས་མྨ་ནྣི་ཏྭཱ ཨུ་པོ་ས་ཐོ ཀཱ་ཏ་བྦོ’ཏི, མ་ཡ་ཉྩ་མྷཱ ཨ་ས་མྨ་ཏཱ་ཡ བྷཱུ་མི་ཡཱ ནི་སི་ནྣོ པཱ་ཏི་མོ་ཀྑཾ ཨ་སྶུ་མྷཱ, ཀ་ཏོ ནུ ཁོ ཨ་མྷཱ་ཀཾ ཨུ་པོ་ས་ཐོ, ཨ་ཀ་ཏོ ནུ ཁོ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ས་མྨ་ཏཱ་ཡ ཝཱ, བྷི་ཀྑ་ཝེ, བྷཱུ་མི་ཡཱ ནི་སི་ནྣཱ ཨ་ས་མྨ་ཏཱ་ཡ ཝཱ ཡ་ཏོ པཱ་ཏི་མོ་ཀྑཾ སུ་ཎཱ་ཏི, ཀ་ཏོ་ཝ་སྶ ཨུ་པོ་ས་ཐོ. ཏེ་ན ཧི, བྷི་ཀྑ་ཝེ, ས་ངྒྷོ ཡཱ་ཝ མ་ཧ་ནྟཾ ཨུ་པོ་ས་ཐ་པྤ་མུ་ཁཾ [ཨུ་པོ་ས་ཐ་མུ་ཁཾ (སྱཱ.)] ཨཱ་ཀ་ངྑ་ཏི, ཏཱ་ཝ མ་ཧ་ནྟཾ ཨུ་པོ་ས་ཐ་པྤ་མུ་ཁཾ ས་མྨ་ནྣ་ཏུ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦཾ. པ་ཋ་མཾ ནི་མི་ཏྟཱ ཀི་ཏྟེ་ཏ་བྦཱ. ནི་མི་ཏྟེ ཀི་ཏྟེ་ཏྭཱ བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ་ཝ་ཏཱ ས་མ་ནྟཱ ནི་མི་ཏྟཱ ཀི་ཏྟི་ཏཱ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨེ་ཏེ་ཧི ནི་མི་ཏྟེ་ཧི ཨུ་པོ་ས་ཐ་པྤ་མུ་ཁཾ ས་མྨ་ནྣེ་ཡྻ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ་ཝ་ཏཱ ས་མ་ནྟཱ ནི་མི་ཏྟཱ ཀི་ཏྟི་ཏཱ. ས་ངྒྷོ ཨེ་ཏེ་ཧི ནི་མི་ཏྟེ་ཧི ཨུ་པོ་ས་ཐ་པྤ་མུ་ཁཾ ས་མྨ་ནྣ་ཏི. ཡ་སྶཱ་ཡ་སྨ་ཏོ ཁ་མ་ཏི ཨེ་ཏེ་ཧི ནི་མི་ཏྟེ་ཧི ཨུ་པོ་ས་ཐ་པྤ་མུ་ཁ་སྶ ས་མྨུ་ཏི, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མྨ་ཏཾ ས་ངྒྷེ་ན ཨེ་ཏེ་ཧི ནི་མི་ཏྟེ་ཧི ཨུ་པོ་ས་ཐ་པྤ་མུ་ཁཾ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.

ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ན་ཝ་ཀཱ བྷི་ཀྑཱུ པ་ཋ་མ་ཏ་རཾ ས་ནྣི་པ་ཏི་ཏྭཱ – ‘‘ན ཏཱ་ཝ ཐེ་རཱ ཨཱ་ག་ཙྪ་ནྟཱི’’ཏི – པ་ཀྐ་མིཾ་སུ. ཨུ་པོ་ས་ཐོ ཝི་ཀཱ་ལེ ཨ་ཧོ་སི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཏ་ད་ཧུ་པོ་ས་ཐེ ཐེ་རེ་ཧི བྷི་ཀྑཱུ་ཧི པ་ཋ་མ་ཏ་རཾ ས་ནྣི་པ་ཏི་ཏུ་ནྟི.

ཏེ་ན ཁོ པ་ན ས་མ་ཡེ་ན རཱ་ཛ་ག་ཧེ ས་མྦ་ཧུ་ལཱ ཨཱ་ཝཱ་སཱ ས་མཱ་ན་སཱི་མཱ ཧོ་ནྟི. ཏ་ཏྠ བྷི་ཀྑཱུ ཝི་ཝ་ད་ནྟི – ‘‘ཨ་མྷཱ་ཀཾ ཨཱ་ཝཱ་སེ ཨུ་པོ་ས་ཐོ ཀ་རཱི་ཡ་ཏུ, ཨ་མྷཱ་ཀཾ ཨཱ་ཝཱ་སེ ཨུ་པོ་ས་ཐོ ཀ་རཱི་ཡ་ཏཱུ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨི་དྷ པ་ན, བྷི་ཀྑ་ཝེ, ས་མྦ་ཧུ་ལཱ ཨཱ་ཝཱ་སཱ ས་མཱ་ན་སཱི་མཱ ཧོ་ནྟི. ཏ་ཏྠ བྷི་ཀྑཱུ ཝི་ཝ་ད་ནྟི – ‘‘ཨ་མྷཱ་ཀཾ ཨཱ་ཝཱ་སེ ཨུ་པོ་ས་ཐོ ཀ་རཱི་ཡ་ཏུ, ཨ་མྷཱ་ཀཾ ཨཱ་ཝཱ་སེ ཨུ་པོ་ས་ཐོ ཀ་རཱི་ཡ་ཏཱུ’’ཏི. ཏེ་ཧི, བྷི་ཀྑ་ཝེ, བྷི་ཀྑཱུ་ཧི ས་བྦེ་ཧེ་ཝ ཨེ་ཀ་ཛ྄ཛྷཾ ས་ནྣི་པ་ཏི་ཏྭཱ ཨུ་པོ་ས་ཐོ ཀཱ་ཏ་བྦོ. ཡ་ཏྠ ཝཱ པ་ན ཐེ་རོ བྷི་ཀྑུ ཝི་ཧ་ར་ཏི, ཏ་ཏྠ ས་ནྣི་པ་ཏི་ཏྭཱ ཨུ་པོ་ས་ཐོ ཀཱ་ཏ་བྦོ, ན ཏྭེ་ཝ ཝ་གྒེ་ན ས་ངྒྷེ་ན ཨུ་པོ་ས་ཐོ ཀཱ་ཏ་བྦོ. ཡོ ཀ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.