༧༢. ཨུ་པོ་ས་ཐཱ་གཱ་ར་ཀ་ཐཱ

༡༤༡. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་ནུ་པ་རི་ཝེ་ཎི་ཡཾ པཱ་ཏི་མོ་ཀྑཾ ཨུ་དྡི་ས་ནྟི ཨ་ས་ངྐེ་ཏེ་ན. ཨཱ་ག་ནྟུ་ཀཱ བྷི་ཀྑཱུ ན ཛཱ་ན་ནྟི – ‘‘ཀ་ཏྠ ཝཱ ཨ་ཛྫུ་པོ་ས་ཐོ ཀ་རཱི་ཡི་སྶ་ཏཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཨ་ནུ་པ་རི་ཝེ་ཎི་ཡཾ པཱ་ཏི་མོ་ཀྑཾ ཨུ་དྡི་སི་ཏ་བྦཾ ཨ་ས་ངྐེ་ཏེ་ན. ཡོ ཨུ་དྡི་སེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པོ་ས་ཐཱ་གཱ་རཾ ས་མྨ་ནྣི་ཏྭཱ ཨུ་པོ་ས་ཐཾ ཀཱ་ཏུཾ, ཡཾ ས་ངྒྷོ ཨཱ་ཀ་ངྑ་ཏི ཝི་ཧཱ་རཾ ཝཱ ཨ་ཌྜྷ་ཡོ་གཾ ཝཱ པཱ་སཱ་དཾ ཝཱ ཧ་མྨི་ཡཾ ཝཱ གུ་ཧཾ ཝཱ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦཾ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ ཝི་ཧཱ་རཾ ཨུ་པོ་ས་ཐཱ་གཱ་རཾ ས་མྨ་ནྣེ་ཡྻ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ས་ངྒྷོ ཨི་ཏྠ་ནྣཱ་མཾ ཝི་ཧཱ་རཾ ཨུ་པོ་ས་ཐཱ་གཱ་རཾ ས་མྨ་ནྣ་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ ཝི་ཧཱ་ར་སྶ ཨུ་པོ་ས་ཐཱ་གཱ་ར་སྶ ས་མྨུ་ཏི, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མྨ་ཏོ ས་ངྒྷེ་ན ཨི་ཏྠ་ནྣཱ་མོ ཝི་ཧཱ་རོ ཨུ་པོ་ས་ཐཱ་གཱ་རཾ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.

ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ དྭེ ཨུ་པོ་ས་ཐཱ་གཱ་རཱ་ནི ས་མྨ་ཏཱ་ནི ཧོ་ནྟི. བྷི་ཀྑཱུ ཨུ་བྷ་ཡ་ཏྠ ས་ནྣི་པ་ཏ་ནྟི – ‘‘ཨི་དྷ ཨུ་པོ་ས་ཐོ ཀ་རཱི་ཡི་སྶ་ཏི, ཨི་དྷ ཨུ་པོ་ས་ཐོ ཀ་རཱི་ཡི་སྶ་ཏཱི’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཨེ་ཀ་སྨིཾ ཨཱ་ཝཱ་སེ དྭེ ཨུ་པོ་ས་ཐཱ་གཱ་རཱ་ནི ས་མྨ་ནྣི་ཏ་བྦཱ་ནི. ཡོ ས་མྨ་ནྣེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཨེ་ཀཾ ས་མཱུ་ཧ་ནི་ཏྭཱ [ས་མུ་ཧ་ནི་ཏྭཱ (ཀ.)] ཨེ་ཀ་ཏྠ ཨུ་པོ་ས་ཐཾ ཀཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ས་མཱུ་ཧ་ནྟ་བྦཾ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ ཨུ་པོ་ས་ཐཱ་གཱ་རཾ ས་མཱུ་ཧ་ནེ་ཡྻ [ས་མུ་ཧ་ནེ་ཡྻ (ཀ.)]. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ས་ངྒྷོ ཨི་ཏྠ་ནྣཱ་མཾ ཨུ་པོ་ས་ཐཱ་གཱ་རཾ ས་མཱུ་ཧ་ན་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ ཨུ་པོ་ས་ཐཱ་གཱ་ར་སྶ ས་མུ་གྒྷཱ་ཏོ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མཱུ་ཧ་ཏཾ ས་ངྒྷེ་ན ཨི་ཏྠ་ནྣཱ་མཾ ཨུ་པོ་ས་ཐཱ་གཱ་རཾ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.