༧༡. སཱི་མཱ་ནུ་ཛཱ་ན་ནཱ

༡༣༨. ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ཨེ་ཏྟཱ་ཝ་ཏཱ སཱ་མ་གྒཱི ཡཱ་ཝ་ཏཱ ཨེ་ཀཱ་ཝཱ་སོ’ཏི, ཀི་ཏྟཱ་ཝ་ཏཱ ནུ ཁོ ཨེ་ཀཱ་ཝཱ་སོ ཧོ་ཏཱི’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, སཱི་མཾ ས་མྨ་ནྣི་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦཱ – པ་ཋ་མཾ ནི་མི་ཏྟཱ ཀི་ཏྟེ་ཏ་བྦཱ – པ་བྦ་ཏ་ནི་མི་ཏྟཾ, པཱ་སཱ་ཎ་ནི་མི་ཏྟཾ, ཝ་ན་ནི་མི་ཏྟཾ, རུ་ཀྑ་ནི་མི་ཏྟཾ, མ་གྒ་ནི་མི་ཏྟཾ, ཝ་མྨི་ཀ་ནི་མི་ཏྟཾ, ན་དཱི་ནི་མི་ཏྟཾ, ཨུ་ད་ཀ་ནི་མི་ཏྟཾ. ནི་མི་ཏྟེ ཀི་ཏྟེ་ཏྭཱ བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

༡༣༩. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ་ཝ་ཏཱ ས་མ་ནྟཱ ནི་མི་ཏྟཱ ཀི་ཏྟི་ཏཱ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨེ་ཏེ་ཧི ནི་མི་ཏྟེ་ཧི སཱི་མཾ ས་མྨ་ནྣེ་ཡྻ ས་མཱ་ན་སཾ་ཝཱ་སཾ ཨེ་ཀུ་པོ་ས་ཐཾ [ཨེ་ཀཱུ་པོ་ས་ཐཾ (ཀ.)]. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡཱ་ཝ་ཏཱ ས་མ་ནྟཱ ནི་མི་ཏྟཱ ཀི་ཏྟི་ཏཱ. ས་ངྒྷོ ཨེ་ཏེ་ཧི ནི་མི་ཏྟེ་ཧི སཱི་མཾ ས་མྨ་ནྣ་ཏི ས་མཱ་ན་སཾ་ཝཱ་སཾ ཨེ་ཀུ་པོ་ས་ཐཾ. ཡ་སྶཱ་ཡ་སྨ་ཏོ ཁ་མ་ཏི ཨེ་ཏེ་ཧི ནི་མི་ཏྟེ་ཧི སཱི་མཱ་ཡ ས་མྨུ་ཏི [ས་མྨ་ཏི (སྱཱ.)] ས་མཱ་ན་སཾ་ཝཱ་སཱ་ཡ ཨེ་ཀུ་པོ་ས་ཐཱ་ཡ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ. ས་མྨ་ཏཱ སཱི་མཱ ས་ངྒྷེ་ན ཨེ་ཏེ་ཧི ནི་མི་ཏྟེ་ཧི ས་མཱ་ན་སཾ་ཝཱ་སཱ ཨེ་ཀུ་པོ་ས་ཐཱ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.

༡༤༠. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ – བྷ་ག་ཝ་ཏཱ སཱི་མཱ་ས་མྨུ་ཏི ཨ་ནུ་ཉྙཱ་ཏཱ་ཏི – ཨ་ཏི་མ་ཧ་ཏི་ཡོ སཱི་མཱ་ཡོ ས་མྨ་ནྣ་ནྟི, ཙ་ཏུ་ཡོ་ཛ་ནི་ཀཱ་པི པ་ཉྩ་ཡོ་ཛ་ནི་ཀཱ་པི ཚ་ཡོ་ཛ་ནི་ཀཱ་པི. བྷི་ཀྑཱུ ཨུ་པོ་ས་ཐཾ ཨཱ་ག་ཙྪ་ནྟཱ ཨུ་དྡི་སྶ་མཱ་ནེ་པི པཱ་ཏི་མོ་ཀྑེ ཨཱ་ག་ཙྪ་ནྟི, ཨུ་དྡི་ཊྛ་མ་ཏྟེ་པི ཨཱ་ག་ཙྪ་ནྟི, ཨ་ནྟ་རཱ་པི པ་རི་ཝ་ས་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཨ་ཏི་མ་ཧ་ཏཱི སཱི་མཱ ས་མྨ་ནྣི་ཏ་བྦཱ, ཙ་ཏུ་ཡོ་ཛ་ནི་ཀཱ ཝཱ པ་ཉྩ་ཡོ་ཛ་ནི་ཀཱ ཝཱ ཚ་ཡོ་ཛ་ནི་ཀཱ ཝཱ. ཡོ ས་མྨ་ནྣེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཏི་ཡོ་ཛ་ན་པ་ར་མཾ སཱི་མཾ ས་མྨ་ནྣི་ཏུ་ནྟི.

ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ན་དཱི་པཱ་ར་སཱི་མཾ [ན་དཱི་པཱ་རཾ སཱི་མཾ (སཱི. སྱཱ.)] ས་མྨ་ནྣ་ནྟི. ཨུ་པོ་ས་ཐཾ ཨཱ་ག་ཙྪ་ནྟཱ བྷི་ཀྑཱུ་པི ཝུ་ཡ྄ཧ་ནྟི, པ་ཏྟཱ་པི ཝུ་ཡ྄ཧ་ནྟི, ཙཱི་ཝ་རཱ་ནི་པི ཝུ་ཡ྄ཧ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ན་དཱི་པཱ་ར་སཱི་མཱ ས་མྨ་ནྣི་ཏ་བྦཱ. ཡོ ས་མྨ་ནྣེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཡ་ཏྠ་སྶ དྷུ་ཝ་ནཱ་ཝཱ ཝཱ དྷུ་ཝ་སེ་ཏུ ཝཱ, ཨེ་ཝ་རཱུ་པཾ ན་དཱི་པཱ་ར་སཱི་མཾ ས་མྨ་ནྣི་ཏུ་ནྟི.