༤༨. ཐེ་ཡྻ་སཾ་ཝཱ་ས་ཀ་ཝ་ཏྠུ

༡༡༠. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ པུ་རཱ་ཎ་ཀུ་ལ་པུ་ཏྟོ ཁཱི་ཎ་ཀོ་ལ་ཉྙོ སུ་ཁུ་མཱ་ལོ ཧོ་ཏི. ཨ་ཐ ཁོ ཏ་སྶ པུ་རཱ་ཎ་ཀུ་ལ་པུ་ཏྟ་སྶ ཁཱི་ཎ་ཀོ་ལ་ཉྙ་སྶ ཨེ་ཏ་ད་ཧོ་སི – ‘‘ཨ་ཧཾ ཁོ སུ་ཁུ་མཱ་ལོ, ན པ་ཊི་བ་ལོ ཨ་ན་དྷི་ག་ཏཾ ཝཱ བྷོ་གཾ ཨ་དྷི་ག་ནྟུཾ, ཨ་དྷི་ག་ཏཾ ཝཱ བྷོ་གཾ ཕཱ་ཏིཾ ཀཱ་ཏུཾ. ཀེ་ན ནུ ཁོ ཨ་ཧཾ ཨུ་པཱ་ཡེ་ན སུ་ཁ་ཉྩ ཛཱི་ཝེ་ཡྻཾ, ན ཙ ཀི་ལ་མེ་ཡྻ’’ནྟི? ཨ་ཐ ཁོ ཏ་སྶ པུ་རཱ་ཎ་ཀུ་ལ་པུ་ཏྟ་སྶ ཁཱི་ཎ་ཀོ་ལ་ཉྙ་སྶ ཨེ་ཏ་ད་ཧོ་སི – ‘‘ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ སུ་ཁ་སཱི་ལཱ སུ་ཁ་ས་མཱ་ཙཱ་རཱ, སུ་བྷོ་ཛ་ནཱ་ནི བྷུ་ཉྫི་ཏྭཱ ནི་ཝཱ་ཏེ་སུ ས་ཡ་ནེ་སུ ས་ཡ་ནྟི. ཡཾ་ནཱུ་ནཱ་ཧཾ སཱ་མཾ པ་ཏྟ་ཙཱི་ཝ་རཾ པ་ཊི་ཡཱ་དེ་ཏྭཱ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨཱ་རཱ་མཾ ག་ནྟྭཱ བྷི་ཀྑཱུ་ཧི ས་དྡྷིཾ སཾ་ཝ་སེ་ཡྻ’’ནྟི. ཨ་ཐ ཁོ སོ པུ་རཱ་ཎ་ཀུ་ལ་པུ་ཏྟོ ཁཱི་ཎ་ཀོ་ལ་ཉྙོ སཱ་མཾ པ་ཏྟ་ཙཱི་ཝ་རཾ པ་ཊི་ཡཱ་དེ་ཏྭཱ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨཱ་རཱ་མཾ ག་ནྟྭཱ བྷི་ཀྑཱུ ཨ་བྷི་ཝཱ་དེ་ཏི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀ་ཏི་ཝ་སྶོ་སི ཏྭཾ, ཨཱ་ཝུ་སོ’’ཏི? ཀིཾ ཨེ་ཏཾ, ཨཱ་ཝུ་སོ, ཀ་ཏི་ཝ་སྶོ ནཱ་མཱ་ཏི? ཀོ པ་ན ཏེ, ཨཱ་ཝུ་སོ, ཨུ་པ་ཛ྄ཛྷཱ་ཡོ་ཏི? ཀིཾ ཨེ་ཏཾ, ཨཱ་ཝུ་སོ, ཨུ་པ་ཛ྄ཛྷཱ་ཡོ ནཱ་མཱ་ཏི? བྷི་ཀྑཱུ ཨཱ་ཡ་སྨ་ནྟཾ ཨུ་པཱ་ལིཾ ཨེ་ཏ་ད་ཝོ་ཙུཾ – ‘‘ཨི་ངྒྷཱ་ཝུ་སོ ཨུ་པཱ་ལི, ཨི་མཾ པ་བྦ་ཛི་ཏཾ ཨ་ནུ་ཡུ་ཉྫཱ་ཧཱི’’ཏི. ཨ་ཐ ཁོ སོ པུ་རཱ་ཎ་ཀུ་ལ་པུ་ཏྟོ ཁཱི་ཎ་ཀོ་ལ་ཉྙོ ཨཱ་ཡ་སྨ་ཏཱ ཨུ་པཱ་ལི་ནཱ ཨ་ནུ་ཡུ་ཉྫི་ཡ་མཱ་ནོ ཨེ་ཏ་མ་ཏྠཾ ཨཱ་རོ་ཙེ་སི. ཨཱ་ཡ་སྨཱ ཨུ་པཱ་ལི བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཐེ་ཡྻ་སཾ་ཝཱ་ས་ཀོ, བྷི་ཀྑ་ཝེ, ཨ་ནུ་པ་ས་མྤ་ནྣོ ན ཨུ་པ་ས་མྤཱ་དེ་ཏ་བྦོ, ཨུ་པ་ས་མྤ་ནྣོ ནཱ་སེ་ཏ་བྦོ་ཏི. ཏི་ཏྠི་ཡ་པ་ཀྐ་ནྟ་ཀོ, བྷི་ཀྑ་ཝེ, ཨ་ནུ་པ་ས་མྤ་ནྣོ ན ཨུ་པ་ས་མྤཱ་དེ་ཏ་བྦོ, ཨུ་པ་ས་མྤ་ནྣོ ནཱ་སེ་ཏ་བྦོ་ཏི.