༤༩. ཏི་ར་ཙྪཱ་ན་ག་ཏ་ཝ་ཏྠུ
༡༡༡. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ ནཱ་གོ ནཱ་ག་ཡོ་ནི་ཡཱ ཨ་ཊྚཱི་ཡ་ཏི ཧ་རཱ་ཡ་ཏི ཛི་གུ་ཙྪ་ཏི. ཨ་ཐ ཁོ ཏ་སྶ ནཱ་ག་སྶ ཨེ་ཏ་ད་ཧོ་སི – ‘‘ཀེ་ན ནུ ཁོ ཨ་ཧཾ ཨུ་པཱ་ཡེ་ན ནཱ་ག་ཡོ་ནི་ཡཱ ཙ པ་རི་མུ་ཙྩེ་ཡྻཾ ཁི་པྤ་ཉྩ མ་ནུ་སྶ་ཏྟཾ པ་ཊི་ལ་བྷེ་ཡྻ’’ནྟི. ཨ་ཐ ཁོ ཏ་སྶ ནཱ་ག་སྶ ཨེ་ཏ་ད་ཧོ་སི – ‘‘ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ དྷ་མྨ་ཙཱ་རི་ནོ ས་མ་ཙཱ་རི་ནོ བྲ་ཧྨ་ཙཱ་རི་ནོ ས་ཙྩ་ཝཱ་དི་ནོ སཱི་ལ་ཝ་ནྟོ ཀ་ལྱཱ་ཎ་དྷ་མྨཱ. ས་ཙེ ཁོ ཨ་ཧཾ ས་མ་ཎེ་སུ ས་ཀྱ་པུ་ཏྟི་ཡེ་སུ པ་བྦ་ཛེ་ཡྻཾ, ཨེ་ཝཱ་ཧཾ ནཱ་ག་ཡོ་ནི་ཡཱ ཙ པ་རི་མུ་ཙྩེ་ཡྻཾ, ཁི་པྤ་ཉྩ མ་ནུ་སྶ་ཏྟཾ པ་ཊི་ལ་བྷེ་ཡྻ’’ནྟི. ཨ་ཐ ཁོ སོ ནཱ་གོ མཱ་ཎ་ཝ་ཀ་ཝ་ཎྞེ་ན བྷི་ཀྑཱུ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. ཏཾ བྷི་ཀྑཱུ པ་བྦཱ་ཛེ་སུཾ, ཨུ་པ་ས་མྤཱ་དེ་སུཾ. ཏེ་ན ཁོ པ་ན ས་མ་ཡེ་ན སོ ནཱ་གོ ཨ་ཉྙ་ཏ་རེ་ན བྷི་ཀྑུ་ནཱ ས་དྡྷིཾ པ་ཙྩ་ནྟི་མེ ཝི་ཧཱ་རེ པ་ཊི་ཝ་ས་ཏི. ཨ་ཐ ཁོ སོ བྷི་ཀྑུ ར་ཏྟི་ཡཱ པ་ཙྩཱུ་ས་ས་མ་ཡཾ པ་ཙྩུ་ཊྛཱ་ཡ ཨ་ཛ྄ཛྷོ་ཀཱ་སེ ཙ་ངྐ་མ་ཏི. ཨ་ཐ ཁོ སོ ནཱ་གོ ཏ་སྶ བྷི་ཀྑུ་ནོ ནི་ཀྑ་ནྟེ ཝི་སྶ་ཊྛོ ནི་དྡཾ ཨོ་ཀྐ་མི. ས་བྦོ ཝི་ཧཱ་རོ ཨ་ཧི་ནཱ པུ་ཎྞོ, ཝཱ་ཏ་པཱ་ནེ་ཧི བྷོ་གཱ ནི་ཀྑ་ནྟཱ ཧོ་ནྟི. ཨ་ཐ ཁོ སོ བྷི་ཀྑུ ཝི་ཧཱ་རཾ པ་ཝི་སི་སྶཱ་མཱི་ཏི ཀ་ཝཱ་ཊཾ པ་ཎཱ་མེ་ནྟོ ཨ་དྡ་ས ས་བྦཾ ཝི་ཧཱ་རཾ ཨ་ཧི་ནཱ པུ་ཎྞཾ, ཝཱ་ཏ་པཱ་ནེ་ཧི བྷོ་གེ ནི་ཀྑ་ནྟེ, དི་སྭཱ་ན བྷཱི་ཏོ ཝི་སྶ་ར་མ་ཀཱ་སི. བྷི་ཀྑཱུ ཨུ་པ་དྷཱ་ཝི་ཏྭཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨཱ་ཝུ་སོ, ཝི་སྶ་ར་མ་ཀཱ་སཱི’’ཏི? ‘‘ཨ་ཡཾ, ཨཱ་ཝུ་སོ, ས་བྦོ ཝི་ཧཱ་རོ ཨ་ཧི་ནཱ པུ་ཎྞོ, ཝཱ་ཏ་པཱ་ནེ་ཧི བྷོ་གཱ ནི་ཀྑ་ནྟཱ’’ཏི. ཨ་ཐ ཁོ སོ ནཱ་གོ ཏེ་ན ས་དྡེ་ན པ་ཊི་བུ་ཛ྄ཛྷི་ཏྭཱ ས་ཀེ ཨཱ་ས་ནེ ནི་སཱི་དི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀོ་སི ཏྭཾ, ཨཱ་ཝུ་སོ’’ཏི? ‘‘ཨ་ཧཾ, བྷ་ནྟེ, ནཱ་གོ’’ཏི. ‘‘ཀི་སྶ པ་ན ཏྭཾ, ཨཱ་ཝུ་སོ, ཨེ་ཝ་རཱུ་པཾ ཨ་ཀཱ་སཱི’’ཏི? ཨ་ཐ ཁོ སོ ནཱ་གོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ ཏཾ ནཱ་གཾ ཨེ་ཏ་ད་ཝོ་ཙ – ‘‘ཏུ་མྷེ ཁོ་ཏྠ ནཱ་གཱ ཨ་ཝི་རུ་ལ༹ྷི་དྷ་མྨཱ ཨི་མ་སྨིཾ དྷ་མྨ་ཝི་ན་ཡེ. ག་ཙྪ ཏྭཾ, ནཱ་ག, ཏ་ཏྠེ་ཝ ཙཱ་ཏུ་དྡ་སེ པ་ནྣ་ར་སེ ཨ་ཊྛ་མི་ཡཱ ཙ པ་ཀྑ་སྶ ཨུ་པོ་ས་ཐཾ ཨུ་པ་ཝ་ས, ཨེ་ཝཾ ཏྭཾ ནཱ་ག་ཡོ་ནི་ཡཱ ཙ པ་རི་མུ་ཙྩི་སྶ་སི, ཁི་པྤ་ཉྩ མ་ནུ་སྶ་ཏྟཾ པ་ཊི་ལ་བྷི་སྶ་སཱི’’ཏི. ཨ་ཐ ཁོ སོ ནཱ་གོ ཨ་ཝི་རུ་ལ༹ྷི་དྷ་མྨོ ཀི་རཱ་ཧཾ ཨི་མ་སྨིཾ དྷ་མྨ་ཝི་ན་ཡེ་ཏི དུ་ཀྑཱི དུ་མྨ་ནོ ཨ་སྶཱུ་ནི པ་ཝ་ཏྟ་ཡ་མཱ་ནོ ཝི་སྶ་རཾ ཀ་ཏྭཱ པ་ཀྐཱ་མི. ཨ་ཐ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘དྭེ་མེ, བྷི་ཀྑ་ཝེ, པ་ཙྩ་ཡཱ ནཱ་ག་སྶ ས་བྷཱ་ཝ་པཱ་ཏུ་ཀ་མྨཱ་ཡ. ཡ་དཱ ཙ ས་ཛཱ་ཏི་ཡཱ མེ་ཐུ་ནཾ དྷ་མྨཾ པ་ཊི་སེ་ཝ་ཏི, ཡ་དཱ ཙ ཝི་སྶ་ཊྛོ ནི་དྡཾ ཨོ་ཀྐ་མ་ཏི – ཨི་མེ ཁོ, བྷི་ཀྑ་ཝེ, དྭེ པ་ཙྩ་ཡཱ ནཱ་ག་སྶ ས་བྷཱ་ཝ་པཱ་ཏུ་ཀ་མྨཱ་ཡ. ཏི་ར་ཙྪཱ་ན་ག་ཏོ, བྷི་ཀྑ་ཝེ, ཨ་ནུ་པ་ས་མྤ་ནྣོ ན ཨུ་པ་ས་མྤཱ་དེ་ཏ་བྦོ, ཨུ་པ་ས་མྤ་ནྣོ ནཱ་སེ་ཏ་བྦོ’’ཏི.