༢༥. ཨ་ཉྙ་ཏི་ཏྠི་ཡ་པུ་བྦ་ཀ་ཐཱ
༨༦. ཏེ་ན ཁོ པ་ན ས་མ་ཡེ་ན ཡོ སོ ཨ་ཉྙ་ཏི་ཏྠི་ཡ་པུ་བྦོ [ཡོ སོ པ་སུ་ར་པ་རི་བྦཱ་ཛ་ཀོ ཨ་ཉྙ་ཏི་ཏྠི་ཡ་པུ་བྦོ (ཀ.)] པ་ཛ྄ཛྷཱ་ཡེ་ན ས་ཧ་དྷ་མྨི་ཀཾ ཝུ་ཙྩ་མཱ་ནོ ཨུ་པ་ཛ྄ཛྷཱ་ཡ་སྶ ཝཱ་དཾ ཨཱ་རོ་པེ་ཏྭཱ ཏཾ་ཡེ་ཝ ཏི་ཏྠཱ་ཡ་ཏ་ནཾ ས་ངྐ་མི. སོ པུ་ན པ་ཙྩཱ་ག་ནྟྭཱ བྷི་ཀྑཱུ ཨུ་པ་ས་མྤ་དཾ ཡཱ་ཙི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཡོ སོ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨུ་པ་ཛ྄ཛྷཱ་ཡེ་ན ས་ཧ་དྷ་མྨི་ཀཾ ཝུ་ཙྩ་མཱ་ནོ ཨུ་པ་ཛ྄ཛྷཱ་ཡ་སྶ ཝཱ་དཾ ཨཱ་རོ་པེ་ཏྭཱ ཏཾ་ཡེ་ཝ ཏི་ཏྠཱ་ཡ་ཏ་ནཾ ས་ངྐ་ནྟོ, སོ ཨཱ་ག་ཏོ ན ཨུ་པ་ས་མྤཱ་དེ་ཏ་བྦོ. ཡོ སོ, བྷི་ཀྑ་ཝེ, ཨ་ཉྙོ་པི ཨ་ཉྙ་ཏི་ཏྠི་ཡ་པུ་བྦོ ཨི་མ་སྨིཾ དྷ་མྨ་ཝི་ན་ཡེ ཨཱ་ཀ་ངྑ་ཏི པ་བྦ་ཛྫཾ, ཨཱ་ཀ་ངྑ་ཏི ཨུ་པ་ས་མྤ་དཾ, ཏ་སྶ ཙ་ཏྟཱ་རོ མཱ་སེ པ་རི་ཝཱ་སོ དཱ་ཏ་བྦོ. ཨེ་ཝ་ཉྩ པ་ན, བྷི་ཀྑ་ཝེ, དཱ་ཏ་བྦོ – པ་ཋ་མཾ ཀེ་ས་མ་སྶུཾ ཨོ་ཧཱ་རཱ་པེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དཱ་པེ་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀཱ་རཱ་པེ་ཏྭཱ བྷི་ཀྑཱུ་ནཾ པཱ་དེ ཝ་ནྡཱ་པེ་ཏྭཱ ཨུ་ཀྐུ་ཊི་ཀཾ ནི་སཱི་དཱ་པེ་ཏྭཱ ཨ་ཉྫ་ལིཾ པ་གྒ་ཎྷཱ་པེ་ཏྭཱ ཨེ་ཝཾ ཝ་དེ་ཧཱི་ཏི ཝ་ཏྟ་བྦོ – ‘‘བུ་དྡྷཾ ས་ར་ཎཾ ག་ཙྪཱ་མི, དྷ་མྨཾ ས་ར་ཎཾ ག་ཙྪཱ་མི, ས་ངྒྷཾ ས་ར་ཎཾ ག་ཙྪཱ་མི; དུ་ཏི་ཡ་མྤི བུ་དྡྷཾ ས་ར་ཎཾ ག་ཙྪཱ་མི, དུ་ཏི་ཡ་མྤི དྷ་མྨཾ ས་ར་ཎཾ ག་ཙྪཱ་མི, དུ་ཏི་ཡ་མྤི ས་ངྒྷཾ ས་ར་ཎཾ ག་ཙྪཱ་མི; ཏ་ཏི་ཡ་མྤི བུ་དྡྷཾ ས་ར་ཎཾ ག་ཙྪཱ་མི, ཏ་ཏི་ཡ་མྤི དྷ་མྨཾ ས་ར་ཎཾ ག་ཙྪཱ་མི, ཏ་ཏི་ཡ་མྤི ས་ངྒྷཾ ས་ར་ཎཾ ག་ཙྪཱ་མཱི’’ཏི.
ཏེ་ན, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦེ་ན ས་ངྒྷཾ ཨུ་པ་ས་ངྐ་མི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ བྷི་ཀྑཱུ་ནཾ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘‘ཨ་ཧཾ, བྷ་ནྟེ, ཨ་ཉྙ་ཏི་ཏྠི་ཡ་པུ་བྦོ ཨི་མ་སྨིཾ དྷ་མྨ་ཝི་ན་ཡེ ཨཱ་ཀ་ངྑཱ་མི ཨུ་པ་ས་མྤ་དཾ. སོ་ཧཾ, བྷ་ནྟེ, ས་ངྒྷཾ ཙ་ཏྟཱ་རོ མཱ་སེ པ་རི་ཝཱ་སཾ ཡཱ་ཙཱ་མཱི’’ཏི. དུ་ཏི་ཡ་མྤི ཡཱ་ཙི་ཏ་བྦོ. ཏ་ཏི་ཡ་མྤི ཡཱ་ཙི་ཏ་བྦོ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ ཨ་ཉྙ་ཏི་ཏྠི་ཡ་པུ་བྦོ ཨི་མ་སྨིཾ དྷ་མྨ་ཝི་ན་ཡེ ཨཱ་ཀ་ངྑ་ཏི ཨུ་པ་ས་མྤ་དཾ. སོ ས་ངྒྷཾ ཙ་ཏྟཱ་རོ མཱ་སེ པ་རི་ཝཱ་སཾ ཡཱ་ཙ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ ས་ངྒྷོ ཨི་ཏྠ་ནྣཱ་མ་སྶ ཨ་ཉྙ་ཏི་ཏྠི་ཡ་པུ་བྦ་སྶ ཙ་ཏྟཱ་རོ མཱ་སེ པ་རི་ཝཱ་སཾ ད་དེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ཨི་ཏྠ་ནྣཱ་མོ ཨ་ཉྙ་ཏི་ཏྠི་ཡ་པུ་བྦོ ཨི་མ་སྨིཾ དྷ་མྨ་ཝི་ན་ཡེ ཨཱ་ཀ་ངྑ་ཏི ཨུ་པ་ས་མྤ་དཾ. སོ ས་ངྒྷཾ ཙ་ཏྟཱ་རོ མཱ་སེ པ་རི་ཝཱ་སཾ ཡཱ་ཙ་ཏི. ས་ངྒྷོ ཨི་ཏྠ་ནྣཱ་མ་སྶ ཨ་ཉྙ་ཏི་ཏྠི་ཡ་པུ་བྦ་སྶ ཙ་ཏྟཱ་རོ མཱ་སེ པ་རི་ཝཱ་སཾ དེ་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ ཨ་ཉྙ་ཏི་ཏྠི་ཡ་པུ་བྦ་སྶ ཙ་ཏྟཱ་རོ མཱ་སེ པ་རི་ཝཱ་ས་སྶ དཱ་ནཾ, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.
‘‘དི་ནྣོ ས་ངྒྷེ་ན ཨི་ཏྠ་ནྣཱ་མ་སྶ ཨ་ཉྙ་ཏི་ཏྠི་ཡ་པུ་བྦ་སྶ ཙ་ཏྟཱ་རོ མཱ་སེ པ་རི་ཝཱ་སོ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
༨༧. ‘‘ཨེ་ཝཾ ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི, ཨེ་ཝཾ ཨ་ནཱ་རཱ་དྷ་ཀོ. ཀ་ཐ་ཉྩ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ནཱ་རཱ་དྷ་ཀོ ཧོ་ཏི? ཨི་དྷ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ཏི་ཀཱ་ལེ་ན གཱ་མཾ པ་ཝི་ས་ཏི, ཨ་ཏི་དི་ཝཱ པ་ཊི་ཀྐ་མ་ཏི. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ནཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཝེ་སི་ཡཱ་གོ་ཙ་རོ ཝཱ ཧོ་ཏི, ཝི་དྷ་ཝཱ་གོ་ཙ་རོ ཝཱ ཧོ་ཏི, ཐུ་ལླ་ཀུ་མཱ་རི་ཀཱ་གོ་ཙ་རོ ཝཱ ཧོ་ཏི, པ་ཎྜ་ཀ་གོ་ཙ་རོ ཝཱ ཧོ་ཏི, བྷི་ཀྑུ་ནི་གོ་ཙ་རོ ཝཱ ཧོ་ཏི. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ནཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཡཱ་ནི ཏཱ་ནི ས་བྲ་ཧྨ་ཙཱ་རཱི་ནཾ ཨུ་ཙྩཱ་ཝ་ཙཱ་ནི ཀ་ར་ཎཱི་ཡཱ་ནི, ཏ་ཏྠ ན ད་ཀྑོ ཧོ་ཏི, ན ཨ་ན་ལ་སོ, ན ཏ་ཏྲུ་པཱ་ཡཱ་ཡ ཝཱི་མཾ་སཱ་ཡ ས་མ་ནྣཱ་ག་ཏོ, ན ཨ་ལཾ ཀཱ་ཏུཾ, ན ཨ་ལཾ སཾ་ཝི་དྷཱ་ཏུཾ. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ནཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ན ཏི་བྦ་ཙྪ་ནྡོ ཧོ་ཏི ཨུ་དྡེ་སེ, པ་རི་པུ་ཙྪཱ་ཡ, ཨ་དྷི་སཱི་ལེ, ཨ་དྷི་ཙི་ཏྟེ, ཨ་དྷི་པ་ཉྙཱ་ཡ. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ནཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཡ་སྶ ཏི་ཏྠཱ་ཡ་ཏ་ནཱ ས་ངྐ་ནྟོ ཧོ་ཏི, ཏ་སྶ ས་ཏྠུ་ནོ ཏ་སྶ དི་ཊྛི་ཡཱ ཏ་སྶ ཁ་ནྟི་ཡཱ ཏ་སྶ རུ་ཙི་ཡཱ ཏ་སྶ ཨཱ་དཱ་ཡ་སྶ ཨ་ཝ་ཎྞེ བྷ་ཉྙ་མཱ་ནེ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨ་ན་བྷི་ར་དྡྷོ, བུ་དྡྷ་སྶ ཝཱ དྷ་མྨ་སྶ ཝཱ ས་ངྒྷ་སྶ ཝཱ ཨ་ཝ་ཎྞེ བྷ་ཉྙ་མཱ་ནེ ཨ་ཏྟ་མ་ནོ ཧོ་ཏི ཨུ་ད་གྒོ ཨ་བྷི་ར་དྡྷོ. ཡ་སྶ ཝཱ པ་ན ཏི་ཏྠཱ་ཡ་ཏ་ནཱ ས་ངྐ་ནྟོ ཧོ་ཏི, ཏ་སྶ ས་ཏྠུ་ནོ ཏ་སྶ དི་ཊྛི་ཡཱ ཏ་སྶ ཁ་ནྟི་ཡཱ ཏ་སྶ རུ་ཙི་ཡཱ ཏ་སྶ ཨཱ་དཱ་ཡ་སྶ ཝ་ཎྞེ བྷ་ཉྙ་མཱ་ནེ ཨ་ཏྟ་མ་ནོ ཧོ་ཏི ཨུ་ད་གྒོ ཨ་བྷི་ར་དྡྷོ, བུ་དྡྷ་སྶ ཝཱ དྷ་མྨ་སྶ ཝཱ ས་ངྒྷ་སྶ ཝཱ ཝ་ཎྞེ བྷ་ཉྙ་མཱ་ནེ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨ་ན་བྷི་ར་དྡྷོ. ཨི་དཾ, བྷི་ཀྑ་ཝེ, ས་ངྒྷཱ་ཏ་ནི་ཀཾ ཨ་ཉྙ་ཏི་ཏྠི་ཡ་པུ་བྦ་སྶ ཨ་ནཱ་རཱ་དྷ་ནཱི་ཡ་སྨིཾ. ཨེ་ཝ་མྤི ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨ་ནཱ་རཱ་དྷ་ཀོ ཧོ་ཏི. ཨེ་ཝཾ ཨ་ནཱ་རཱ་དྷ་ཀོ ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་ག་ཏོ ན ཨུ་པ་ས་མྤཱ་དེ་ཏ་བྦོ.
‘‘ཀ་ཐ་ཉྩ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི? ཨི་དྷ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ནཱ་ཏི་ཀཱ་ལེ་ན གཱ་མཾ པ་ཝི་ས་ཏི ནཱ་ཏི་དི་ཝཱ པ་ཊི་ཀྐ་མ་ཏི. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ན ཝེ་སི་ཡཱ་གོ་ཙ་རོ ཧོ་ཏི, ན ཝི་དྷ་ཝཱ་གོ་ཙ་རོ ཧོ་ཏི, ན ཐུ་ལླ་ཀུ་མཱ་རི་ཀཱ་གོ་ཙ་རོ ཧོ་ཏི, ན པ་ཎྜ་ཀ་གོ་ཙ་རོ ཧོ་ཏི, ན བྷི་ཀྑུ་ནི་གོ་ཙ་རོ ཧོ་ཏི. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཡཱ་ནི ཏཱ་ནི ས་བྲ་ཧྨ་ཙཱ་རཱི་ནཾ ཨུ་ཙྩཱ་ཝ་ཙཱ་ནི ཀ་ར་ཎཱི་ཡཱ་ནི, ཏ་ཏྠ ད་ཀྑོ ཧོ་ཏི, ཨ་ན་ལ་སོ, ཏ་ཏྲུ་པཱ་ཡཱ་ཡ ཝཱི་མཾ་སཱ་ཡ ས་མ་ནྣཱ་ག་ཏོ, ཨ་ལཾ ཀཱ་ཏུཾ, ཨ་ལཾ སཾ་ཝི་དྷཱ་ཏུཾ. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཏི་བྦ་ཙྪ་ནྡོ ཧོ་ཏི ཨུ་དྡེ་སེ, པ་རི་པུ་ཙྪཱ་ཡ, ཨ་དྷི་སཱི་ལེ, ཨ་དྷི་ཙི་ཏྟེ, ཨ་དྷི་པ་ཉྙཱ་ཡ. ཨེ་ཝ་མྤི, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཡ་སྶ ཏི་ཏྠཱ་ཡ་ཏ་ནཱ ས་ངྐ་ནྟོ ཧོ་ཏི, ཏ་སྶ ས་ཏྠུ་ནོ ཏ་སྶ དི་ཊྛི་ཡཱ ཏ་སྶ ཁ་ནྟི་ཡཱ ཏ་སྶ རུ་ཙི་ཡཱ ཏ་སྶ ཨཱ་དཱ་ཡ་སྶ ཨ་ཝ་ཎྞེ བྷ་ཉྙ་མཱ་ནེ ཨ་ཏྟ་མ་ནོ ཧོ་ཏི ཨུ་ད་གྒོ ཨ་བྷི་ར་དྡྷོ, བུ་དྡྷ་སྶ ཝཱ དྷ་མྨ་སྶ ཝཱ ས་ངྒྷ་སྶ ཝཱ ཨ་ཝ་ཎྞེ བྷ་ཉྙ་མཱ་ནེ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨ་ན་བྷི་ར་དྡྷོ. ཡ་སྶ ཝཱ པ་ན ཏི་ཏྠཱ་ཡ་ཏ་ནཱ ས་ངྐ་ནྟོ ཧོ་ཏི, ཏ་སྶ ས་ཏྠུ་ནོ ཏ་སྶ དི་ཊྛི་ཡཱ ཏ་སྶ ཁ་ནྟི་ཡཱ ཏ་སྶ རུ་ཙི་ཡཱ ཏ་སྶ ཨཱ་དཱ་ཡ་སྶ ཝ་ཎྞེ བྷ་ཉྙ་མཱ་ནེ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨ་ན་བྷི་ར་དྡྷོ, བུ་དྡྷ་སྶ ཝཱ དྷ་མྨ་སྶ ཝཱ ས་ངྒྷ་སྶ ཝཱ ཝ་ཎྞེ བྷ་ཉྙ་མཱ་ནེ ཨ་ཏྟ་མ་ནོ ཧོ་ཏི ཨུ་ད་གྒོ ཨ་བྷི་ར་དྡྷོ. ཨི་དཾ, བྷི་ཀྑ་ཝེ, ས་ངྒྷཱ་ཏ་ནི་ཀཾ ཨ་ཉྙ་ཏི་ཏྠི་ཡ་པུ་བྦ་སྶ ཨཱ་རཱ་དྷ་ནཱི་ཡ་སྨིཾ. ཨེ་ཝ་མྤི ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་རཱ་དྷ་ཀོ ཧོ་ཏི. ཨེ་ཝཾ ཨཱ་རཱ་དྷ་ཀོ ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ཨཱ་ག་ཏོ ཨུ་པ་ས་མྤཱ་དེ་ཏ་བྦོ.
‘‘ས་ཙེ, བྷི་ཀྑ་ཝེ, ཨ་ཉྙ་ཏི་ཏྠི་ཡ་པུ་བྦོ ན་གྒོ ཨཱ་ག་ཙྪ་ཏི, ཨུ་པ་ཛ྄ཛྷཱ་ཡ་མཱུ་ལ་ཀཾ ཙཱི་ཝ་རཾ པ་རི་ཡེ་སི་ཏ་བྦཾ. ས་ཙེ ཨ་ཙྪི་ནྣ་ཀེ་སོ ཨཱ་ག་ཙྪ་ཏི, ས་ངྒྷོ ཨ་པ་ལོ་ཀེ་ཏ་བྦོ བྷ་ཎྜུ་ཀ་མྨཱ་ཡ. ཡེ ཏེ, བྷི་ཀྑ་ཝེ, ཨ་གྒི་ཀཱ ཛ་ཊི་ལ་ཀཱ, ཏེ ཨཱ་ག་ཏཱ ཨུ་པ་ས་མྤཱ་དེ་ཏ་བྦཱ, ན ཏེ་སཾ པ་རི་ཝཱ་སོ དཱ་ཏ་བྦོ. ཏཾ ཀི་སྶ ཧེ་ཏུ? ཀ་མྨ་ཝཱ་དི་ནོ ཨེ་ཏེ, བྷི་ཀྑ་ཝེ, ཀི་རི་ཡ་ཝཱ་དི་ནོ. ས་ཙེ, བྷི་ཀྑ་ཝེ, ཛཱ་ཏི་ཡཱ སཱ་ཀི་ཡོ ཨ་ཉྙ་ཏི་ཏྠི་ཡ་པུ་བྦོ ཨཱ་ག་ཙྪ་ཏི, སོ ཨཱ་ག་ཏོ ཨུ་པ་ས་མྤཱ་དེ་ཏ་བྦོ, ན ཏ་སྶ པ་རི་ཝཱ་སོ དཱ་ཏ་བྦོ. ཨི་མཱ་ཧཾ, བྷི་ཀྑ་ཝེ, ཉཱ་ཏཱི་ནཾ ཨཱ་ཝེ་ཎི་ཀཾ པ་རི་ཧཱ་རཾ ད་མྨཱི’’ཏི.
ཨ་ཉྙ་ཏི་ཏྠི་ཡ་པུ་བྦ་ཀ་ཐཱ ནི་ཊྛི་ཏཱ.
ས་ཏྟ་མ་བྷཱ་ཎ་ཝཱ་རོ.