༢༦. པ་ཉྩཱ་བཱ་དྷ་ཝ་ཏྠུ
༨༨. ཏེ་ན ཁོ པ་ན ས་མ་ཡེ་ན མ་ག་དྷེ་སུ པ་ཉྩ ཨཱ་བཱ་དྷཱ ཨུ་སྶ་ནྣཱ ཧོ་ནྟི – ཀུ་ཊྛཾ, ག་ཎྜོ, ཀི་ལཱ་སོ, སོ་སོ, ཨ་པ་མཱ་རོ. མ་ནུ་སྶཱ པ་ཉྩ་ཧི ཨཱ་བཱ་དྷེ་ཧི ཕུ་ཊྛཱ ཛཱི་ཝ་ཀཾ ཀོ་མཱ་ར་བྷ་ཙྩཾ ཨུ་པ་ས་ངྐ་མི་ཏྭཱ ཨེ་ཝཾ ཝ་ད་ནྟི – ‘‘སཱ་དྷུ ནོ, ཨཱ་ཙ་རི་ཡ, ཏི་ཀི་ཙྪཱ་ཧཱི’’ཏི. ‘‘ཨ་ཧཾ ཁྭ་ཡྻོ, བ་ཧུ་ཀི་ཙྩོ བ་ཧུ་ཀ་ར་ཎཱི་ཡོ; རཱ་ཛཱ ཙ མེ མཱ་ག་དྷོ སེ་ནི་ཡོ བི་མྦི་སཱ་རོ ཨུ་པ་ཊྛཱ་ཏ་བྦོ ཨི་ཏྠཱ་གཱ་ར་ཉྩ བུ་དྡྷ་པྤ་མུ་ཁོ ཙ བྷི་ཀྑུ་ས་ངྒྷོ; ནཱ་ཧཾ ས་ཀྐོ་མི ཏི་ཀི་ཙྪི་ཏུ’’ནྟི. ‘‘ས་བྦཾ སཱ་པ་ཏེ་ཡྻ་ཉྩ ཏེ, ཨཱ་ཙ་རི་ཡ, ཧོ་ཏུ; མ་ཡ་ཉྩ ཏེ དཱ་སཱ; སཱ་དྷུ, ནོ, ཨཱ་ཙ་རི་ཡ, ཏི་ཀི་ཙྪཱ་ཧཱི’’ཏི. ‘‘ཨ་ཧཾ ཁྭ་ཡྻོ, བ་ཧུ་ཀི་ཙྩོ བ་ཧུ་ཀ་ར་ཎཱི་ཡོ རཱ་ཛཱ ཙ མེ མཱ་ག་དྷོ སེ་ནི་ཡོ བི་མྦི་སཱ་རོ ཨུ་པ་ཊྛཱ་ཏ་བྦོ ཨི་ཏྠཱ་གཱ་ར་ཉྩ བུ་དྡྷ་པྤ་མུ་ཁོ ཙ བྷི་ཀྑུ་ས་ངྒྷོ; ནཱ་ཧཾ ས་ཀྐོ་མི ཏི་ཀི་ཙྪི་ཏུ’’ནྟི. ཨ་ཐ ཁོ ཏེ་སཾ མ་ནུ་སྶཱ་ནཾ ཨེ་ཏ་ད་ཧོ་སི – ‘‘ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ སུ་ཁ་སཱི་ལཱ སུ་ཁ་ས་མཱ་ཙཱ་རཱ, སུ་བྷོ་ཛ་ནཱ་ནི བྷུ་ཉྫི་ཏྭཱ ནི་ཝཱ་ཏེ་སུ ས་ཡ་ནེ་སུ ས་ཡ་ནྟི. ཡཾ་ནཱུ་ན མ་ཡཾ ས་མ་ཎེ་སུ ས་ཀྱ་པུ་ཏྟི་ཡེ་སུ པ་བྦ་ཛེ་ཡྻཱ་མ. ཏ་ཏྠ བྷི་ཀྑཱུ ཙེ་ཝ ཨུ་པ་ཊྛ་ཧི་སྶ་ནྟི, ཛཱི་ཝ་ཀོ ཙ ཀོ་མཱ་ར་བྷ་ཙྩོ ཏི་ཀི་ཙྪི་སྶ་ཏཱི’’ཏི. ཨ་ཐ ཁོ ཏེ མ་ནུ་སྶཱ བྷི་ཀྑཱུ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙིཾ་སུ. ཏེ བྷི་ཀྑཱུ པ་བྦཱ་ཛེ་སུཾ, ཨུ་པ་ས་མྤཱ་དེ་སུཾ. ཏེ བྷི་ཀྑཱུ ཙེ་ཝ ཨུ་པ་ཊྛ་ཧིཾ་སུ ཛཱི་ཝ་ཀོ ཙ ཀོ་མཱ་ར་བྷ་ཙྩོ ཏི་ཀི་ཙྪི. ཏེ་ན ཁོ པ་ན ས་མ་ཡེ་ན བྷི་ཀྑཱུ བ་ཧཱུ གི་ལཱ་ནེ བྷི་ཀྑཱུ ཨུ་པ་ཊྛ་ཧ་ནྟཱ ཡཱ་ཙ་ན་བ་ཧུ་ལཱ ཝི་ཉྙ་ཏྟི་བ་ཧུ་ལཱ ཝི་ཧ་ར་ནྟི – གི་ལཱ་ན་བྷ་ཏྟཾ དེ་ཐ, གི་ལཱ་ནུ་པ་ཊྛཱ་ཀ་བྷ་ཏྟཾ དེ་ཐ, གི་ལཱ་ན་བྷེ་ས་ཛྫཾ དེ་ཐཱ་ཏི. ཛཱི་ཝ་ཀོ་པི ཀོ་མཱ་ར་བྷ་ཙྩོ བ་ཧཱུ གི་ལཱ་ནེ བྷི་ཀྑཱུ ཏི་ཀི་ཙྪ་ནྟོ ཨ་ཉྙ་ཏ་རཾ རཱ་ཛ་ཀི་ཙྩཾ པ་རི་ཧཱ་པེ་སི.
༨༩. ཨ་ཉྙ་ཏ་རོ་པི པུ་རི་སོ པ་ཉྩ་ཧི ཨཱ་བཱ་དྷེ་ཧི ཕུ་ཊྛོ ཛཱི་ཝ་ཀཾ ཀོ་མཱ་ར་བྷ་ཙྩཾ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙ – ‘‘སཱ་དྷུ མཾ, ཨཱ་ཙ་རི་ཡ, ཏི་ཀི་ཙྪཱ་ཧཱི’’ཏི. ‘‘ཨ་ཧཾ ཁྭ་ཡྻོ, བ་ཧུ་ཀི་ཙྩོ, བ་ཧུ་ཀ་ར་ཎཱི་ཡོ, རཱ་ཛཱ ཙ མེ མཱ་ག་དྷོ སེ་ནི་ཡོ བི་མྦི་སཱ་རོ ཨུ་པ་ཊྛཱ་ཏ་བྦོ ཨི་ཏྠཱ་གཱ་ར་ཉྩ བུ་དྡྷ་པྤ་མུ་ཁོ ཙ བྷི་ཀྑུ་ས་ངྒྷོ; ནཱ་ཧཾ ས་ཀྐོ་མི ཏི་ཀི་ཙྪི་ཏུ’’ནྟི. ‘‘ས་བྦཾ སཱ་པ་ཏེ་ཡྻ་ཉྩ ཏེ, ཨཱ་ཙ་རི་ཡ, ཧོ་ཏུ, ཨ་ཧ་ཉྩ ཏེ དཱ་སོ; སཱ་དྷུ མཾ, ཨཱ་ཙ་རི་ཡ, ཏི་ཀི་ཙྪཱ་ཧཱི’’ཏི. ‘‘ཨ་ཧཾ ཁྭ་ཡྻོ, བ་ཧུ་ཀི་ཙྩོ བ་ཧུ་ཀ་ར་ཎཱི་ཡོ, རཱ་ཛཱ ཙ མེ མཱ་ག་དྷོ སེ་ནི་ཡོ བི་མྦི་སཱ་རོ ཨུ་པ་ཊྛཱ་ཏ་བྦོ ཨི་ཏྠཱ་གཱ་ར་ཉྩ བུ་དྡྷ་པྤ་མུ་ཁོ ཙ བྷི་ཀྑུ་ས་ངྒྷོ, ནཱ་ཧཾ ས་ཀྐོ་མི ཏི་ཀི་ཙྪི་ཏུ’’ནྟི. ཨ་ཐ ཁོ ཏ་སྶ པུ་རི་ས་སྶ ཨེ་ཏ་ད་ཧོ་སི – ‘‘ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ སུ་ཁ་སཱི་ལཱ སུ་ཁ་ས་མཱ་ཙཱ་རཱ, སུ་བྷོ་ཛ་ནཱ་ནི བྷུ་ཉྫི་ཏྭཱ ནི་ཝཱ་ཏེ་སུ ས་ཡ་ནེ་སུ ས་ཡ་ནྟི. ཡཾ་ནཱུ་ནཱ་ཧཾ ས་མ་ཎེ་སུ ས་ཀྱ་པུ་ཏྟི་ཡེ་སུ པ་བྦ་ཛེ་ཡྻཾ. ཏ་ཏྠ བྷི་ཀྑཱུ ཙེ་ཝ ཨུ་པ་ཊྛ་ཧི་སྶ་ནྟི, ཛཱི་ཝ་ཀོ ཙ ཀོ་མཱ་ར་བྷ་ཙྩོ ཏི་ཀི་ཙྪི་སྶ་ཏི. སོ་མྷི [སོ་ཧཾ (བ་ཧཱུ་སུ, ཝི་མ་ཏི་ཝི་ནོ་ད་ནཱི་ཊཱི་ཀཱ ཨོ་ལོ་ཀེ་ཏ་བྦཱ)] ཨ་རོ་གོ ཝི་བྦྷ་མི་སྶཱ་མཱི’’ཏི. ཨ་ཐ ཁོ སོ པུ་རི་སོ བྷི་ཀྑུ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. ཏཾ བྷི་ཀྑཱུ པ་བྦཱ་ཛེ་སུཾ, ཨུ་པ་ས་མྤཱ་དེ་སུཾ. ཏཾ བྷི་ཀྑཱུ ཙེ་ཝ ཨུ་པ་ཊྛ་ཧིཾ་སུ, ཛཱི་ཝ་ཀོ ཙ ཀོ་མཱ་ར་བྷ་ཙྩོ ཏི་ཀི་ཙྪི. སོ ཨ་རོ་གོ ཝི་བྦྷ་མི. ཨ་དྡ་སཱ ཁོ ཛཱི་ཝ་ཀོ ཀོ་མཱ་ར་བྷ་ཙྩོ ཏཾ པུ་རི་སཾ ཝི་བྦྷ་ནྟཾ, དི་སྭཱ་ན ཏཾ པུ་རི་སཾ ཨེ་ཏ་ད་ཝོ་ཙ – ‘‘ན་ནུ ཏྭཾ, ཨ་ཡྻོ, བྷི་ཀྑཱུ་སུ པ་བྦ་ཛི་ཏོ ཨ་ཧོ་སཱི’’ཏི? ‘‘ཨེ་ཝཾ, ཨཱ་ཙ་རི་ཡཱ’’ཏི. ‘‘ཀི་སྶ པ་ན ཏྭཾ, ཨ་ཡྻོ, ཨེ་ཝ་རཱུ་པ་མ་ཀཱ་སཱི’’ཏི? ཨ་ཐ ཁོ སོ པུ་རི་སོ ཛཱི་ཝ་ཀ་སྶ ཀོ་མཱ་ར་བྷ་ཙྩ་སྶ ཨེ་ཏ་མ་ཏྠཾ ཨཱ་རོ་ཙེ་སི. ཛཱི་ཝ་ཀོ ཀོ་མཱ་ར་བྷ་ཙྩོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷ་ད་ནྟཱ [བྷ་དྡ་ནྟཱ (ཀ.)] པ་ཉྩ་ཧི ཨཱ་བཱ་དྷེ་ཧི ཕུ་ཊྛཾ པ་བྦཱ་ཛེ་སྶ་ནྟཱི’’ཏི. ཨ་ཐ ཁོ ཛཱི་ཝ་ཀོ ཀོ་མཱ་ར་བྷ་ཙྩོ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཛཱི་ཝ་ཀོ ཀོ་མཱ་ར་བྷ་ཙྩོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སཱ་དྷུ, བྷ་ནྟེ, ཨ་ཡྻཱ པ་ཉྩ་ཧི ཨཱ་བཱ་དྷེ་ཧི ཕུ་ཊྛཾ ན པ་བྦཱ་ཛེ་ཡྻུ’’ནྟི. ཨ་ཐ ཁོ བྷ་ག་ཝཱ ཛཱི་ཝ་ཀཾ ཀོ་མཱ་ར་བྷ་ཙྩཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ ཛཱི་ཝ་ཀོ ཀོ་མཱ་ར་བྷ་ཙྩོ བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏོ ས་མཱ་ད་པི་ཏོ ས་མུ་ཏྟེ་ཛི་ཏོ ས་མྤ་ཧཾ་སི་ཏོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, པ་ཉྩ་ཧི ཨཱ་བཱ་དྷེ་ཧི ཕུ་ཊྛོ པ་བྦཱ་ཛེ་ཏ་བྦོ. ཡོ པ་བྦཱ་ཛེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི.
པ་ཉྩཱ་བཱ་དྷ་ཝ་ཏྠུ ནི་ཊྛི་ཏཾ.